أخي الحبيب والنسيب والقريب محمد المرتضى .. لكم وددت لو أني عرفت البوست بدري شوي فهو سفر جميل ووثيقة ولوحة يجملها أدب الزاكي عبدالحميد ودرر فضيلي جماع وكل المشاركين معك يبدو أن لديهم في ذاكرتهم الكثير والكثير ولكم أشكر لك دعوتك الخاصة لي بالمشاركة وأنت تعلم أنني من جيل الوسط فقد كنا فتيان كشافة توتي الباسلة عندما كان السودان يتشكل في أيامه الخالدة في بدايات الخمسينات والستينات ومع بداية مايو توقف العطاء وبدأ إجترار الذكريات .. دعني أخي الحبيب محمد المرتضى أستهل هذه المداخلة بمقالة كتبها الأستاذ شوقي بدري وهو يحكي عن ذكرياته وهو صبي في السابعة عشر من عمره ومالفت نظري في مقالته إرتباطها بشخصيات من أهلي من جزيرة توتي أسماهم هو بروفسيرات توتي ويسعدني أن أنقل لكم المقال كما هو حفظا لحقه الأدبي ولنا عودة بإذن الله لان من ناسنا شريحة هامة من أهلي من توتي الذين يختزنون في ذاكرتهم الكثير والكثير من ذكريات ناسنا ودعوني أنقلكم لمقالة الأستاذ شوقي بدري :
نص المقال بعنوان (بروفسيرات توتي)
[QUOTE]ذات عطلة مدرسيَّة ، وهو أي شوقي بدري ، بعدُ ، صبيٌ في السابعة عشر ، قذف به توقه ذاك ، سباحة مع أصدقائه ، إلى نواحي جزيرة (توتي) ، قبالة (مقرن النيلين) ، وجزيرة (ود دكين) النائمة ، كتمساح هائل ، تحت كبري (النيل الأبيض) تتبع لسواقي (الفتيحاب) ، والثالثة الهلاليَّة التي تقع بينهما ، بذيلها الرمليِّ الطويل ، ورأسها الشماليِّ المرتفع المكسوِّ بطبقة من الصلصال ، ووسطها المغطى بشجيرات (الطرفة) ذوات الخضرة الدائمة ، والأوراق شبه الإبَريَّة ، وأعشاب (الشديدة) التي تساعد على تماسك التربة ، وإن كانت غير صالحة لأكل الماشية. ويروي شوقي أن المُزارع الذي يزرع الرأس الطينىَّ ، والذي عرف ، لاحقاً ، أن اسمه مبارك بسطاوي ، إقترب منهم قائلاً ، وهو يشير إلى ما بدا لهم عشباً غريباً: "ده ما تطوه (لا تطأوه) ، ولا تقلعوه ، ده دخن"! ولما رأى دهشتهم واصل قائلاً: "ده دخن جزاير ما بتأكِل ، بس بنزرعه نعرش بيه البيوت والرواكيب"! وكان ذلك أول درس تعلمه شوقي في زراعة الجُزر. شكلت تلك اللحظة ، وعلى مدى سنتين ونصف ، إحدى أهمِّ نقاط التحوُّل الفاصلة في حياته ، إذ لم يحتج الأمر ، في ما يروي مواصلاً ، إلى أكثر من مقابلة أخرى مع مبارك بسطاوي وعدد من المزارعين وصيادى السمك ، كي يقرِّر ألا يرجع إلى المدرسة ، وأن يبقى هناك يتشرَّب منهم الحِرفة ، وأن تتراجع إلى المرتبة الثانويَّة من خياراته ، بصورة حاسمة ، فكرة الجلوس ، وقتها ، لامتحان الدخول إلى الجامعة ، فقد وجد ، كما قال ، الجامعة التي تناسبه ، تحت إشراف أولئك .. (البروفيسورات): مبارك بسطاوي وخوجلي هارون والريِّس ميرغني وقرض الحوَّاتة وأبو دبورة والحاج والغول ورجلان وشرف حريقة العملاق والآخرين! ويقول شوقي أن إحساسه بمبارك بسطاوي كان إحساس من وجد أخاً منذ اللحظة الأولى ، حيث تقبله ببساطة ، كأنه كان ينتظره ، دون أن يسأله عن شخصه ، أو أهله ، أو عمله ، مثلما تقبله الآخرون كذلك. وعن شرف حريقة يروي شوقي كم تأثر بكرمه ، ونجدته للضعفاء ، ومسارعته لعمل الخير ، حتى لقد خاض مشاجرة خلفه ، ذات يوم بسوق الخضار ، دفاعاً عن هذه القيم! ويؤكد شوقي أنه اكتسب من شرف حريقة هذا ، بالذات ، وعبر سنوات عمره اللاحقة ، سواء في السودان أو يوغسلافيا أو تشيكوسلوفاكيا أو اليونان أو السويد أو أىٍّ من بلاد العالم الأخرى التى طافها طولاً وعرضاً ، عادة التبرُّع بشئ من دمه للمحتاجين ، وأنه ، في كل مرة يفعل ذلك ، يكون شرف حريقة حاضراً في ذاكرته! ويصف شوقي تلك الفترة بأنها من أكثر سِنِيِّ حياته سعادة ، إذ حصُل خلالها على دروس وخبرات لا تتاح ، عادة ، في أيَّة مدرسة ، وعلى رأس ذلك احترام الآخرين ، بما هم بشر ، وبما يتمتعون به من حميد خصال ، على رقة حال. بعد زهاء نصف القرن ، حكى شوقي عن أولئك الكادحين البسطاء ، مادحاً نبلهم ، وشارحاً طرائقهم في العمل ومغالبة المشقات ، وكاشفاً عن مخزون مدهش من الخبرات والتجارب والدروس ، فجاءت حكايته غنيَّة بتفاصيلها الشائقة عن انخفاض النيل ، وعن حشِّ القشِّ وقت الدَّرت (الحرِّ) بعد الفيضان ، وعن زراعة الطماطم في الشتاء ، والبطيخ والعجور والشمّام والكوسة في المناطق الرمليَّة ، وعن مغزى العلامة التي ترسم على البطيخ في شكل دائرة أو مثلث أو صليب ، وعن الشلح (عِرق البطيخ) الذي يرقد متجهاً نحو الغرب ، وعن البطيخة الأولى في رأس الشلح ، وتعرف بـ (الحجريَّة) ، وهي الأحلى التي يأكلها المُزارع ولا يبيعها! ومن طريف ما روى أنه ، وبعد سنوات طوال من ذلك ، طلب من بائع بطيخ أن يبيعه ثلاثة بطيخات سمحات متعهِّداً بأن يدفع له ما يريد ، شريطة ألا يحاول غشه ، كونه كان يزرع البطيخ! غير أن البائع أجال نظره في سيارته وسائقه ، ثمَّ أدخل ثلاث بطيخات في صندوق السيارة ، فأعطاه شوقي ثمن بطيخة واحدة فقط ، وعندما احتج البائع قال له: هذا لأنك أعطيتني بطيخة واحدة .. فإحدى هذه (البُطرُسيَّات) عِرقها (ميِّت) والأخرى (قعَرْ شَلِح) ، فما كان من البائع إلا أن هتف: "أهلاً ود كارنا"! ويمضي شوقي يؤانس بزراعة وقطف الأسود (الباذنجان) والبامية والسلج ، وبالمعديَّة وزوارق الحراز الخفيفة ، وبحوادث الغرق والتماسيح الصغيرة التائهة على الشطِّ ، وبتركيب النبرو (الشادوف) بعد جفاف الأرض الطينيَّة وتشققها ، وكيف أنها عمليَّة قاسيَّة ، لا أصعب منها إلا الري بالجوز (صفيحتين تحملان على الاكتاف بحامل خشبي). ويقول في هذا متباهياً ، إنه ، عندما اشتغل ، بعد سنوات طوال من ذلك ، حمَّالاً في ميناء مالمو (بالسويد) ، وجد نفسه قادراً على أداء العمل بسهولة ، فهو من خريجي (جامعة توتي) التي علمته الصبر على المكاره ، فكان يعمل 18 ساعة ، وأحياناً 24 ساعة متواصلة! كذلك يروي شوقي كيف التصق بالحوَّاتة (صيادي السمك) ، كما وبالنوَّاتة ، فتعلم حرفتهم حتى كاد يصبح واحداً منهم! ويتذكر ، في هذا السياق ، طرَّاحته (شبكته المخروطيَّة) التي تربط أثقال الرصاص في أطرافها. ويصنف أنواع السمك مُبرزاً خصائص كل نوع ، كالعجل والكبروس والبلطي والكوَّارة والكأس والترزة وخشم البنات والبياض والقرموط والقرقور والشلبى والبتكويه والبنيَّة والنوق والتامبيرة والبَرَدة. ويصف الصريمة التي تستخدم في صيد العجل والكبروس ، وهي خيط سميك بمئات الصنارات تشكُّ فيها أسماك القرموط الصغيرة الحيَّة ، ثمَّ تبَيَّت وسط النهر لتسحب في الصباحات. ويُجْمِلُ شوقي أوضاع أولئك الصيادين الكادحين بشاعريَّة شفيفة ، قائلاً: ".. النهر يحدِّد رزقهم ، والحظ يلعب دوراً كبيراً في حياتهم ، لكن الحريَّة تعني لهم كل شئ". ويردف متفاخِراً بأنه ، بعد الحياة التي قضاها معهم ، ليس ثمَّة طعام لا يستطيع أكله ، ولا سطح يعجزه النوم عليه ، ناعماً أو خشناً ، وأحياناً جالساً القرفصاء! ويروي أنه كان من عادته أن يعوم بالصريمة في المغرب ، وكان الجميع يتطيَّرون من نزوله ، في مثل تلك الساعة ، إلى النهر ، وبالأخص في منطقة الشيمة (الدوَّامات) ، فالصيادون كثيرو التطيُّر ، وقد يحسبون صنارات الصريمة عدة مرَّات للتأكد من أن عددها فردي! وكان شرف حريقة أكثرهم غضباً مِمَّا كان يعدُّه استهتاراً من شوقي وعدم احترام للنهر! لكن شوقي ، وبعد أن يروي الكثير من الأحداث والوقائع المفرحة والمحزنة بأسلوبه الشائق ، يؤكد أن أولئك الرجال أعطوه أشياء لا تقاس بالمال: الصداقة الصافية ، والقلوب النظيفة ، وحُبَّ العمل ، وتقبُّل المصائب ، والصِّدق. ويمتدحهم لكونهم عاشوا أحراراً كالطير في السماء ، مع أن أرزاقهم كانت في رحم الغيب ، فهم الذين صنعوا الوطن ، وما زالوا يصنعونه ، بعيداً عن صالونات التفاهة والسفسطة! ويقول: "مبارك من المفروض أن يكون قد أكمل السبعين اليوم .. له عظيم التحيَّة والاحترام ، فهو لا شك أستاذي في هذه الدنيا". أتمنى أن يحظى (بروفيسورات توتي) بكاتب سيناريو حصيف ، ومخرج بارع ، ومنتج مقدام ، فيصنعون من سرديَّة شوقي ، الناتجة عن تجربة حقيقيَّة لا انفصام فيها بين عمل (ذهني) وعمل (عضلي) ، شريطاً (ممتعاً) و(نافعاً) أتوقع له ، منذ الآن ، أن يحصد الكثير من الجوائز الاقليميَّة ، إن لم تكن .. العالميَّة!
لك كل الحب والتقدير وإلى مداخلة قريبة بإذن الله في ذات الموضوع عمار محجوب زكي (توتي)
11-29-2007, 09:42 AM
mamkouna mamkouna
تاريخ التسجيل: 12-05-2004
مجموع المشاركات: 2246
عزيزى مرتضى أولا عودا حميدا أو لعلك عدت وأنا الغائبة
تذكرتك قبل أشهر وأنا أرى مظاهرة تتفرق. وضحكت طويلا وانا أروى كيف خرجنا منذ بداية مظاهرات الانتفاضة فى ابريل من العام 1985 وفى واحدة من تلك المظاهرات تحمس القوم من الاحتياطى المركزى وضربك أحدهم على يدك بتلك الخيزرانة الطويلة اللعينة. وبرغم الالم المبرح لم تنتظر قالب الثلج الذى أخرجته لك من ثلاجةالمكتب لزوم المكمدات. استدرت ولم أجدك وعندما نظرت من البلكونة رايتك تزحف مع المظاهرة الأتية من السوق العربى تجاه شارع الجمهورية ولم أجد ما أقول غير "بالله شوف الولد ده" ولحقت أنا بالمظاهرة وجلس ابوبكر ابو الريش عليه رحمة الله بعد أن خذله ذلك القلب الكبير- جلس خارج العمارة وكانه يريد أن يتأكد أننا ندفع ضريبة الوطن.
ولى عودة
11-29-2007, 04:41 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: للذاكرة شأنها العجيب في انتخاب ما تبقي وما تذر ، والأعجب شأناً أن تتهيأ لك في حياتك فرصة العيش في أمكنة متعددة كأن يكون أبوك شغال في السكة حديد أو التعليم مثلاً .
صدقت ، من نعم الإله على الإنسان أن يتيح له فرصة التنقل ومعرفة البشر على اختلاف عاداتهم وألوانهم ، وفي السودان القارة أتاح لنا الزمان أن نفتح عيوننا على أطرافه ووسطه وعشنا أياما في تلك الأماكن لايمكن الكتابة عنها هنا لأن الكثير من الأشياء لايمكن وصفها. سعدت كثيرا بالبوست الذي تفضلت وكتبته عن قطار الغرب ولوري النهود (بالكوز) والميرم وشارف الضعين ونيالا ، مدن الغرب يا عادل وقراه تجذرت في الخاطر لأننا تلقينا أول إشارات الحياة منها فاصبحت بعض من تكويننا. داخليات المدارس والجراري والنقاره والدوبيت والنمّه والفانوس والدونكي والرتينه والرينجر والميركري وإفطار رمضان في الشارع يبدأ ب (أم جِنقر) ، والصلاة والسمر في البرش.... هيييه ، أيام.. لماذا لاتنفحنا من عبق تلك الأيام يا صديقي..
11-29-2007, 07:00 PM
abubakr abubakr
تاريخ التسجيل: 04-22-2002
مجموع المشاركات: 16044
مرتضى سلام بهديك وزوارك ومرابطى بوستك .. ( حلوة مرابطى دى صاح ) بهديكم( ما ناسك نحن ما ناسك) بصوت الاخ فيصل الصحافة تحياتنا ليه عبركم وهو يحل ضيفاكريما فى مسقط العامرة بى (ناسا) ناسا ما الفاضائية يا شيقوق .. ما تجينى ناطى هسه لكن يا مرتضى حاديك ليها بعدين الاغنيه دى تنزلا انت اصلو انا زى ود شيقوق صاحبك العريبى ده ..ادينا فصاحة اللسان بس لكن ما بنخبر لى تكنلوجيتكم دى التكتح لكن برضو من ناسكم
متاوقة حقيقة يا مرتضى كل البوست ظريف حد السقف لكن اكتر مداخلة عجبتنى وبصراحة شديده جدا مداخلة الاخ سيف الدولة بضحك فيها كل يوم برااااااااى تحياتى ليه وللشخصية الاظرف الاخ دالى الحبوب الزول الحبوب وبالمناسبة دى يا دالى ياخ ما تجى تدخل البوست ده اصلو بشبهك برااااك ليه حاربت البورد؟ تحياتى للجميع
11-30-2007, 07:43 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
ربما لم تكوني وقتها موجودة ، لا أدري ، وربما لاتهتمين بكرة القدم، لكن البرازيل وبيليه تحديدا من (ناسنا) وناس محمد أبوالعزائم والباش أبوبكر وشيقوق ورأفت وجل اللي فوق مع استثناء أخواتنا لأنهم دائما اصغر سنا ( ولا أنا بالغت ياسلمى) ، أكيد الذاكرة مترعة ب (العالم تحت أقدامهم) يوم هزموا الطليان 4/1 وأحرزوا (جول ريميه) إلى الأبد أصبح كل برازيلي من ناسنا. مودتي يا سلمى,
11-30-2007, 07:41 AM
abubakr abubakr
تاريخ التسجيل: 04-22-2002
مجموع المشاركات: 16044
القال ليك منو نحن ما لايمن فى ديل ولا ديل ؟ والله امرق ليك هسسسه اهلى البطاحين الا يرجعوك الدندر كدارى ده غير لو جوك اهلى الشكرية لا بضاربوا بى عصاو لا بندقية ولا بخبروا دريبا للظابطية هيـــــــع قال بدون قال
Quote: والله يابتي/اختي ..انتي ياكا شاعرة وبتكتبي حروف سمحة واهاالناطقيين بغيرها زي بيسامحوكي بشان داك اها العرريب اللسانو متبري منو دة مالك ومالو ؟؟.. دة حفر ليهو خور سماهو النهر الجاف والفيضانات مالت الخريف الفائت تب ابت تنقط نقطة وحيدونة في النهر الجاف ..في سوايتن مجبوكة اكتر من كدة .. انتي بس قولي حوالينا ولا علينا من كتاحة العرريب دة ...
الاخ الكريم ابو بكر سلامات تسلم يا العشا يا ضل بيوتنا وعرشا والله مافى زول غيرك انت يا ود العم بقدر لى على لسان ود شيقوق ده عفيت منك يا الكلس تسلم وربى يضحكك ويفرحك ديمه باقى بالحيل ضحكتنى الليلة من الصباح
11-30-2007, 08:10 AM
abubakr abubakr
تاريخ التسجيل: 04-22-2002
مجموع المشاركات: 16044
صباحك فل .. انا كمان مبسوط لانو من زمن ما غرقو بيتنا في حلفا ما في كتيرين وقفو معاي ضد العراريب؟ اها وقفة تمام .. بس بيني وبينك واصلو انا الديكشنري القروني بيهو نضم العرريب كان ابريدجد abridged اها "كلس " يعني شنو ? بس امانة ما تخلي العرريب يعرف اصلو مصاحب قرود في الغابة الفي السكة من الدندر لبيتم في الحلة بكان ما تيمس عمو مغرز وبكان صفايح الطحنية في دكان عمو الكان بيوزعو مجانا علي بنيات الحلة اصلو زولا خلبوص بعدين يرسل قرود يعملو جوطة هنا ..
11-30-2007, 08:33 AM
abubakr abubakr
تاريخ التسجيل: 04-22-2002
مجموع المشاركات: 16044
زمانك زمن ناسنا اها صباح الجمعة الواحد بدري يتلبس القميص الاظرف ويمكن من محلات اسندكو وياها وقفة جنب صينية بشري ( اها الماحضرو زمن بوليس المرور بشري بنجيكم بعدين لو سالتو ) وتجي الباصات من ناحية بوابة البركس ومن بحر العرب والجبل والواحد يسال " بتري واللا معلوف ؟ " ويتاوق من الشبابيك يشوف عدد الظريفات حلاوة الرحلات عددن كم وبعدما ما يطمئن يسال " اها منو بادي واللا خضر بشير ؟ "- وعموما دي ما كانت بتفرق كتير بس الواحد يمكن الجمعة القبلو كان في رحلة فيها واحد وعايز يغير الاسبوع دة -.. وياها رحلة وغني وبهجة وباحترام وما في تجاوزات ولا شطط في القول والفعل ....زمن ناسنا كان زمن وما نستولجيا يا ممكونة لكن كلما هو جميل وانساني يبقي في الوجدان لا يذهب مع الزمن وتتراكم الاشياء الجميلة في دواخلنا وعندما يجدب الزمن نعود اليها نخرجها من خزائن ذاكرتنا ومن خبايا وجداننا
Quote: صباحك فل .. انا كمان مبسوط لانو من زمن ما غرقو بيتنا في حلفا ما في كتيرين وقفو معاي ضد العراريب؟ اها وقفة تمام .. بس بيني وبينك واصلو انا الديكشنري القروني بيهو نضم العرريب كان ابريدجد abridged اها "كلس " يعني شنو ? بس امانة ما تخلي العرريب يعرف اصلو مصاحب قرود في الغابة الفي السكة من الدندر لبيتم في الحلة بكان ما تيمس عمو مغرز وبكان صفايح الطحنية في دكان عمو الكان بيوزعو مجانا علي بنيات الحلة اصلو زولا خلبوص بعدين يرسل قرود يعملو جوطة هنا ..
ابوبكر والله انت اظرف شخصية فى البورد على فكره انا من عنديكم بالمواطنة وزى ما بقول الوالد عليه رحمة الله البيئه ليها اثر يعنى ممكن اشكل معاك حزب قوى جدا ضد شيقوق والجماعه البقوموا عليك فى اللغة يعنى ممكن نحاربهم ليك بالرطانة انا بفهم لكن ما بقدر اتكلم باقى عشت طفولتى وصباى بينكم فى القضارف وتمينا الباقى 10 سنة فى حلفا الجديده وذكرياتها العتيقة اكلنا الصلابيه ولبسنا الجرجار ورقصنا جماعى وفرشنا قدام الحوش فى الشارع نورق الخدرة ونتصايح مع جيرانا ناس نقد وسيد عبده ومحمد صالح وغيرهم الله يطراهم بالخير وايـــــــك ذكريات بعمق الحضارة النوبيه العريقة ولى علاقة وطيدة جدا بالشاعر الفذ محمد مختار عبدون ياما جلست معاه وياما استفدت من نصائحه المن ذهب اعشق كلامو حد الثمالة سعيده جدا انه اطلق على اسم ريا البطحانية علمنى كيف القى الشعر .. وان لا ارتبك اثناء القرآءة احييه من الاعماق عبر ناسنا وهو من اعرق الناس السنحت لى الظروف بمقابلتهم تربطنى علاقة اكثر بالكثير... الكثير من اهلى فى شمال الوادى وفى حلفا الجديده .. كل القرى 6 18 10 والمصنع العتيق لهم التحية والتقدير ولك اخى ابو بكر فرح نبل الذكريات
11-30-2007, 09:35 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: شن بلمك عليهو هسع دى اكان جاتك حارة يا سوما غيري انا القريب منك ده البفزعك منو؟ - والله الرطاني اكان بقى مجاورك كان جاتك الحارة يتغطى ببطانيتو ويتاوق ليك من بعيييييييييييد ويتغطى .
اها ياجرول بن اوس بن مالك المكني بابي مليكة ؟؟ جرول يا راجل ؟ الا تعرفه وهو القائل يهجو نفسه :"ابت شفتاي الا تكلما..بهجو فما ادري لمن انا قائله" .. حارة شنو ؟؟ دي كنداكة يعني هي البتقود الرجالة في الحارة ؟ بعدين الرطانة ما بتغطو ببطاطيين لكن بلحاف املس وناعم ..؟ روح ياشيخ
11-30-2007, 11:42 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: اها ياجرول بن اوس بن مالك المكني بابي مليكة ؟؟ جرول يا راجل ؟ الا تعرفه وهو القائل يهجو نفسه :"ابت شفتاي الا تكلما..بهجو فما ادري لمن انا قائله" .. حارة شنو ؟؟ دي كنداكة يعني هي البتقود الرجالة في الحارة ؟ بعدين الرطانة ما بتغطو ببطاطيين لكن بلحاف املس وناعم ..؟ روح ياشيخ
حسبي الرد عليك ايها الرطاني بما قاله هذا الجرول بن اوس
Quote: ابوبكر والله انت اظرف شخصية فى البورد على فكره انا من عنديكم بالمواطنة وزى ما بقول الوالد عليه رحمة الله البيئه ليها اثر يعنى ممكن اشكل معاك حزب قوى جدا ضد شيقوق والجماعه البقوموا عليك فى اللغة يعنى ممكن نحاربهم ليك بالرطانة انا بفهم لكن ما بقدر اتكلم باقى عشت طفولتى وصباى بينكم فى القضارف وتمينا الباقى 10 سنة فى حلفا الجديده وذكرياتها العتيقة اكلنا الصلابيه ولبسنا الجرجار ورقصنا جماعى وفرشنا قدام الحوش فى الشارع نورق الخدرة ونتصايح مع جيرانا ناس نقد وسيد عبده ومحمد صالح وغيرهم الله يطراهم بالخير وايـــــــك ذكريات بعمق الحضارة النوبيه العريقة ولى علاقة وطيدة جدا بالشاعر الفذ محمد مختار عبدون ياما جلست معاه وياما استفدت من نصائحه المن ذهب اعشق كلامو حد الثمالة سعيده جدا انه اطلق على اسم ريا البطحانية علمنى كيف القى الشعر .. وان لا ارتبك اثناء القرآءة احييه من الاعماق عبر ناسنا وهو من اعرق الناس السنحت لى الظروف بمقابلتهم تربطنى علاقة اكثر بالكثير... الكثير من اهلى فى شمال الوادى وفى حلفا الجديده .. كل القرى 6 18 10 والمصنع العتيق لهم التحية والتقدير ولك اخى ابو بكر فرح نبل الذكريات
والله جمعة مباركة وصباحنا ناير .. ناسنا ... ناسنا .. انا من 15 بس القري كلها يا فيها عم يا خال يا خاله يا قريب من الدرجة التانية وهكذا .. اصلو اسر ممتدة قطعوها زي مربعات الطاولة كل مربع في قرية...لكن لي سنيين ما مشيت لا هناك لا الوطن الاكبر ... اها يالعرريب ودشيقوق يا "عرريب بدون" لو كت عرريب صدج ما كانو خلوك وافد في الجزيرة العربية زينا سوا سوا ...
اها شوف ناسنا بكان ما نمشي نلقاهم ...
11-30-2007, 09:50 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
من منا لم يقرأ مجلة (بناء الصين) أو ( الصين الجديده) ؟ من منا لم يقرأ عن (الزعيم المحبوب كيم إيل سونغ)؟ من منا لم يسمع غنا البنات ( الله لي يا كوريا و الطلبه الدخلو العليا)
11-30-2007, 10:17 AM
abubakr abubakr
تاريخ التسجيل: 04-22-2002
مجموع المشاركات: 16044
في عطبرة وكل يوم خميس وبعد الحصة الاخيرة الساعة واحدة وخمس وثلاثون دقيقة جري علي الصفرة وغدا سريع ثم التحرك الي تحت الشجرة الكبيرة في طرف السوق امام بوابة السكة حديد لنكون هناك مع مرقة عمال السكة الحديد والباب بيفتح اتنين الا دقيقة ويجو كاسحيين علي عجلات الراللي ومن لبسم تعرف من ياتو ورشة .. والشجرة كانت كبيرة وضلها وارف واها المتخصصين في قيادة المظاهرات يقيفو تحتها وهات يا خطب عصماء المناسبات في مطلع الستينات وقبل اكتوبر كانت كتيرة شي تمبلباي وشي مانديلا وطبعا ناس عبود ليهم الاكتر ...ومن القادة المتخصصين في الكلام رغم التوجهات السياسية - يا شيوعي يا اخو مسلم ومافي باقيين واهو دة الكان حاصل- اخونا ابو ذرد وكان اخو مسلم لكن قيادة المظاهرات ما ليها دعوة بذلك لانو المواضيع ما كان فيها ترابي ولا شيخ علي و لا البشير .. واها يوم خميسيا عطبراويا بقينا تحت الشدرة واخونا ابزرد وقف تحتها وهات ياكلام معظمو كان "قتلوهم . شنقوهم .. علقوهم"" ويعاين لفروع الشدرة الكبيرة " ونحن ما عارفيين الموضوع شنو ؟ واها " يا ابزرد دييل منو ؟ " تجاهل النداء واستمر في شنقوهم وقتلوهم .. والجماعة يصروا ياخي منو ؟ " وهو لا يرد لحد ما وقت المظاهرة خلص - والعلامة كانت انو لو العمال الكام و الف كلهم خرجو ومرو بعجلاتم من غير ما يشاركونا- اخونا ابزرد فت وجري ناحية السوق وغاب في شوارعا ونحن ما عارفين الحكاية شنو والكتلوهم منو ؟؟؟ اها بعدما رجعنا عرفنا انو كانت في مذبحة في افريقيا الجنوبية - والكتل كان هناك وفي روديسيا الايام دييك كتير للمناهضيين للعنصرية - واعدمو شباب صغار واخونا ابزرد بس سمع انو في جماعة اعدموهم و علقوهم والدور كان عليهو في مظاهرة الخميس داك واكتفي بذلك ...وبعض الايام وانا اراه في النيل الازرق بشكله ذاتو سوي ما اصابه كما اصابنا م نبياض في الشعر جالسا يحلل الاخبار والاحداث واتذكر علقوهم دييك .. عموما كان من الشخصيات اللطيفة المحببة وكثير الهظار والمقالب وتخصص هو وواحد في حجمه -ضخم الجته- من اندينا اسمو حسين في اتنين مدرسيين مصريين اشتهروا بضخامة الجته فكان ابزرد وحسين ياتيان الي حصصهم وفي جيوبهم زغب الطير يجمعوهم من اشجار اللبخ العطبراوية الكبيرة في المدرسة وحواليها واول لبيب او حبيب يقبل علي السبورة يقومو فاكيين الطيور من اخر الصف وهرج ومرج وعلي بال ما حبيب او لبيب يكون تمكن من دورة نصف دائرية تكون الطيور طلعت من الشباك وهكذا دوالييك ....
(عدل بواسطة abubakr on 11-30-2007, 10:18 AM) (عدل بواسطة abubakr on 11-30-2007, 10:19 AM) (عدل بواسطة abubakr on 11-30-2007, 10:22 AM)
11-30-2007, 10:42 AM
د.محمد حسن د.محمد حسن
تاريخ التسجيل: 09-05-2006
مجموع المشاركات: 15194
أبوبكر سيد أحمد الضحكة دي ياسيد الناس شوفتي ليها لمن قلت لي لازم إنتو تقيفوا !؟ ما ممكن تبكوا قاعدين (فقا نبك) ... تتذكر أنا لوجيت دبي بجي بس عشان ألاقيك مش زي بعض الناس .. الما ناسك طبعا شيقوق دا ناسنا من الناس المافيهم نسناس
11-30-2007, 12:05 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: اتنشلنا يا محمد المرتضى حامد ...اتنشلنا فى ذاكرتنا وانتماءنا وعشقنا ...
نشلتنا الاكاذيب والاوهام ..
كنت أتصفح سودان فوراول ...وقرأت مقالا للدكتور حسن موسى "صديقنا الزمان والحسة" ...ينعى فيه ذاكرتنا مع "امتى" ..
ديوان محمد المكى ابراهيم بعد أن قال عنه ما معناه انه من ترهات الشباب ...راح "نافضه" ...وعقب المعقبون وذكر آخر أن الكابلى تنكر لآسيا وأفريقيا ..وان مين تنكر لمين ...هذه هى احداثيات وجداننا المهترىء هذا ...
عندما كنت احضر فى بوسطن اللقاء بين نساء السودان من أطرافه المختلفة ...شعرت ببؤسى تاريخى الذى عشته ...وكما قال محمد الامين فى أغنية ود مدنى ...دار ابويا ونعمتى وعجنى ...كل هذا كان على حساب الآخر اللامرئى لنا والذى لم نعى حتى فجيعته ..ونحن ندخل المدارس والجامعات ونمشى الاسبتالية لما نمرض ..وكمان نمشى سينما النيل الازرق ونحضر المعارض وعروض الدبلوم ومواسم المسرح ...وساسستنا الكرام بفرموا فى انسان الجنوب وجبال النوبة والنيل الازرق ودارفور والبجا فرم ..ونحن ننعم بالشباب وننظر فى الثقافة والسياسة ونتمشى فى شارع النيل "ونرتاد دواوين الحكومة) ..والبص والطرحة "التكسى المشترك" ..نتفلهم بى بلدنا ونتباهى بى حصاد تعليمنا ...ونسمع موسيقى ونكتب شعر ..ونطلع مظاهرات من حين لآخر...
ووالله لو جاء زرادشت نفسه وتكلم عنا لما وجد التعبير المناسب لما حدث لنا من نكسة عمر ...ونشلة ذكريات حلوة ...
ياللخزى ..ويالعار الذاكرة ...
Quote: أها انت من ناسنا ولا من ناس تانيين؟؟؟
أختي الصديقة تماضر، قرأت كلامك كله عدة مرات و بتمعن وبالطبع يحتاج كل سطر فيه لمقال بحاله لكن كل سطورك تتوحد في ماضينا بعين الحاضر ولا أريد هنا التنظير لكلامك المؤثر لأني لست ممن يفهمون في السياسة فهذه لها أهلها ، أهو انتي شايفاهم على قفا من يشيل ، لكنني ، وفيما يخص تجربتي الشخصية أود توضيح ما يلي: 1- بالنسبة لما نسبته لدكتور/ حسن موسى ، والذي لم أتشرف بالقراءة له ولكن سأبحث عن موقع سودان فور أول لمطالعة خلفية سطورك ، لم أفهم هل قصة ( ترهات شباب) هي رأي ودالمكي أم ود موسى، على أية حال أفترض أنها مقولة ودالمكي لأنها لو كانت لحسن موسى لماكان هناك غرابة باعتبار أنه ليس من الممكن أن يعدم الشعر والشاعر منتقديه ، وأقول لك محمد المكي إبراهيم ربما يكون شخصية يختلف الناس عليها ولكنه في ذاكرتي هو محمد المكي الشاعر بذات المستوى الذي يبقى فيه مصطفى سند في ذات الخانه التي كان فيها ، ومازال ، اسماعين حسن الذي قيل أنه كان عضوا بالإتحاد الإشتراكي على ايام نميري هو في خاطري اسماعين وا أسفاي ، أنا لم التق أولئك الناس إلا في دواوينهم وليس في الديوانيات السياسية لأصدر أحكاما عليهم من خلال تلك العدسه فلينفض ودالمكي يده عن ( أمتي) ولينفض سند كلتا يديه من (البحر القديم) ولكن أيا منهما لن ينفض نتاجه الإنساني من وجداني فالقصيدة عندما تقال ، وكذا النتاج الفني ، تصبح ملكية عامة متاحة للجميع public domain وبغير هذا الفهم سنلغي تاريخ البشرية جمعاء. على ذكر تبدل المواقف، وليس المبادئ ، أذكر أنه منذ عقدين تقريبا قال لي صديق بنبرة غضب : والله الليله ودالمكي زعلني زعل ، ياخ تصدق قال في الإذاعة عن (الأكتوبريات) إنها كانت مرحلة مراهقة شعرية ، وكان صديقي من المعجبين بشعر ودالمكي ، لكنني لم أر في ماقال ودالمكي ما يغضب ، إن صحت رواية صديقي ، فالشاعر إنسان يتطور والشعر ايضا كائن حي يتطور ومن يريد من ودالمكي أن يبقى في الستين من عمره هو ذات ودالمكي ابن العشرين يكون قد أهدر أربعين سنة من عمر الرجل ، أما رأيه فلن يغير من جمالية القيود انسدلت جدلة عرس في الأيادي . إن محاكمتنا لإبداع الغير في ضوء ما هم عليه الآن رؤية لا أتفق فيها مع أهل ذلك النهج وإلا لأسقطنا كل المبدعين من حساباتنا وبجرة قلم يمكنك شطب كل من غنى لمايو بما فيهم من غنى أجراس المعبد وخاف من الله على قلبي أو كل إنتاج أوسكار وايلد أو إيلتون جون (لم أقرا للأول سوى كتيب ايام الثانوي العام ولم اسمع للثاني سوى ترنيمته عن ديانا سبنسر) ولكن أحترم معجبي أولئك البشر ، يا تماضر إننا نحتفي بإنتاج أناس في هذه الحياة العامة ونكرمهم وهم يرتكبون جرائم في حياتهم الخاصة فكيف نعترض على ودالمكي لأنه (نفض ايدو) من ما نراه ابداعا ، ودالمكي لم يسرق من أحد وله ما أراد في شأن رؤاه وتقييمه لعمله ، ياخ سلفادور دالي الفنان المجنون مزق لوحات كثيرة لو تركها لفتحت لها أشهر غاليري القرن الواحد والعشرين. راجع ليك يا خنساء..
11-30-2007, 12:17 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
شن بلمك عليهو هسع دى اكان جاتك حارة يا سوما غيري انا القريب منك ده البفزعك منو؟ - والله الرطاني اكان بقى مجاورك كان جاتك الحارة يتغطى ببطانيتو ويتاوق ليك من بعيييييييييييد ويتغطى .
هييييييييييييع اتاري ناسنا ذاتهم خشم بيوت
ود شيقوق لكن امانه ما لقيتك حاااااار تولع طرف التوب فى الحبل لكن مبسوووووطه بالحيل لانك ضحكتنى وعرفت لى سبب يضحكنى كان بقيت زهجانه اجى اسوى ليك سوات شفعنا فى الحلة المديدة حرقتنى واخليك تعرب براك واقعد انا اضحك فيك اتاريك كملان كدى بى طبيعك ده
مشاققة تعرف لى كلمة تعرب ؟؟ اها بس فالح فينى انا شملة الكنز البتدور معناهاياخوى لو وصفتها لى ابو بكر هنا بجيك بالدرب الحقك امات طة الشملة حقت الشعر المفرقه وما بتضارى التكتح كلها رقراق لكن حاشاه ابو بكر ضل شبابيك القبيلة هيـــــــع
11-30-2007, 07:46 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
وأنت في أي بقعة في السودان ، وأفضل أن تكون كردفان أو دارفور ، كانت الأمطار تروي الرمال بالنهار وفي المساء ( الهمبريب يفتح شبابيك الحبيب) ، العشاء عصيدة دخن باللبن الطازج وبالسمن والعسل أحيانا، تتمدد على سرير أو عنقريب لم تسمع به IKEA وأخواتها من فرط عذوبته وراحته ، تعرف أنك موعود بكل البهاء والجمال ومركبات الخيال ، موعود بأن يكون بقربك الراديو الفيليبس مغطى بجلد بني ، على طاولة ( طقطوقه) قرب السرير أو العنقريب والغطاء (فردة) المنشأ شندى أو بعض مصانع الأقباط المحلية ، الفرده ضروريه لأن البرد قريب الصبح في كل الفصول امر ثابت. بدأنا مع مونتي كارلو وصوت أمريكا ويتجه الليل نحو صوت العرب ونجوى أبوالنجا بصوتها الأسطوري في أشهى برامجها وأشهرها (أضواء على ال (قانب) الآخر) والضيوف هم علماء العالم العربي وساسته ومشاهيره ومنهم أبعاج اخوي دراج المحن، ثم ندير القرص نحو الجماهيرية ومقاطع الكتاب الأخضر لكن لا أحد يخاطر بتحريك القرص لأن مظفر النواب سيأتي ومعه وترياته الشهيرة ، جلكم حفظتم (القدس عروس عروبتكم فلماذا..) وينتهي مظفر وتبدأ أحلام اليقظة مع حبيبة في الخاطر على صوت حليم ونسافر في كل الدنيا زي الهوى ، كل من أحب وقتها نام وعلى جفنيه سؤال ناعس : أغدا ألقاك؟ منو الفيكم ما نام وخلاّ الرادي فاتح؟ يا خوف فؤادي من غدِ.
مظفر والوتريات
11-30-2007, 07:12 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: الشملة حقت الشعر المفرقه وما بتضارى التكتح كلها رقراق لكن حاشاه ابو بكر ضل شبابيك القبيلة هيـــــــع
اها شن قولك يا عرريب ؟؟؟ قعدتك فوق البرش تحت السلم اها ضارتك من الشمش والا دحين كان ضربتك في نافوخك وانت متزمل شملة الكنز مالت نوارة الفريق سوما البطحانية النوبية ...هييييييييييييييييييييع ....قال تيمس ونهر جاف وطحينية وحت مع زيدان؟؟ ...يعني نسيت العشرة ما جبت سيرتو (زيدان) مع "ناسنا" بعد الحت الحتيتو في مدرسة الدندر وهو بيغني ليكم .. دة كلام يا حتات ؟؟؟
11-30-2007, 08:13 PM
abubakr abubakr
تاريخ التسجيل: 04-22-2002
مجموع المشاركات: 16044
برغم من حرقتنا علي بلدنا الغرقت تحت مياه السد الا اننا معظم النوبيين وكثير من اهل السودان احببنا كتابا وشعراء واصواتا مصرية لدرجة الولهومنهم الست ام كلثوم . كنت مهوسا بها ... كل خميس من الشهر كان حضور حفلتها امرا تجاوزه محال .. اقول "حضور" رغم المسافات والامكانات فما كانت حفلاتها التي يطير اليها عشاق غناؤها من اثريا العرب بطائرات خاصة امر متاحا لامثالي من الطلبة ابناء ملح الارض .. كان مجرد ان يكون لك راديو تستمع اليها منه امرا يساوي الطيران الخاص بالنسبة لامثالي .. وفي المدرسة الثانوية تمكنت وصديق لي كذلك من "ناس اللفة" كما كان يسمينا-نحن ساكني ضفاف النيل من ابوحمد الي حلفا- المرحوم خالد موسي في وادي سيدنا (قبل ان احول الي عطبرة) من شراء راديو ..وهذا امر جلل ؟؟ كان صديقي الفة لداخلية ونسكن في عنبر واحد ويوم حفلة الخميس كنا ناخد سرايرنا الي خارج العنبر في مساحة بين العنبر وسكن المدرسيين العزابة ..وكان احد المددرسيين يحضر للماجستير فلذا كان يسهر وضايقه صوت الراديو وطلب منا مرارا ان نبتعد عن غرفته ولكنا لم نفعل وياليتنا فعلنا ...ونحن نستعد لامتحانات الشهادة وفي يوم اغبر وعند نشر اسماء الممتحنيين وجدنا ان اسمينا قد حذفتا وتلك مصيبة وكنا من اوائل فصولنا .. يعني لا عذر عند اهالينا ..ذهبنا او دعانا الناظر ليخبرنا بان ادارة المدرسة قررت حذف اسمينا واننا سنحرم من الجلوس لامتحانات الشهادة وكانت صدمة وطلبنا بان نعرف السبب وحينئذ عرفنا السبب وبطل الععجب فالاستاذ الذي رفضنا ان نتركه في حاله يذاكر للماجستير بسبب "الست" كان قد اشتكانا عدة مرات وسود صفحات عنا وبقينا في التوسولات والبكائيات ووووايام حتي عفو عنا واضيفت اسماءنا الي القائمة .. وامتحنا ونجحنا وذهبنا الي الجامعة وفي نهاية السنة اتت الست الي الخرطوم واستقبلت استقبال الفاتحيين وقررت ان اوفر كل مصروفي لا تمكن من حضور الحفلتيين وقد كان ولكن لضيق ذات اليد ذهبت الي الحفلتيين كداري من الجامعة الي المسرح القومي ماشي وراجع الثانية صباحا والدنيا اياميها كانت امان والمشي بشارع النيل نزهة حتي ولو كان ذلك في الثانية صباحا :÷والشكر امن سجل وحفظ في يوتيوب)
12-01-2007, 05:02 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: عارف يا مرتضى .. من يومين بس .. وبدون مقدّمات، إشتغل جوة راسي شريط من الزمن داك .. وجاني صوت أبوعركي يقول: قطر ماش ** وعمّي الزين وكيل صنفور ** وزي ما الدنيا سكة طويلة، مرة تعدّي مرة تهدّي مرة تدور ** عمّي الزين محكّر في قطار الهم ** يشرِّق يوم ** يغرِّب يوم ** شهور ودهور .... بعدها يجيك صوت عمي الزين يقول: قطعنا السكة محطّة محطّة ** جبل موية ** جبل عطشان ** جبل رويان ** ود الحوري ** ود النيِّل ** ود سجمان ...................... زمن
محمد أبوالعزائم، مباشرة بعد المسلسل الإذاعي الشهير الذي أشرت إليه ( قطر الهم) للزول الكتّاب هاشم صديق ، إذا أصبت ، مباشرة يأيتك صوت زيدان فراش القاش والتي احتلت نصيبا معتبرا من شبكة أعصابنا قبل أن تنهكها الخطوب ، تلك الأغنية خففت بعض الضغط على (في الليله ديك) التي راجت معها تجارة المناديل في غياب التيشوز وما أن تزور حفل زواج وإلا السؤال المطروح (أهي الليله أين الديك)، أبوعركي بدوره ومتزامنا مع الليله ديك أطلق أغنية أضاف معها للخوف من الإمتحانات خوفا أكثر رعبا وهو (انكشاف) الريده وحقيقة يا محمد كان الثانوي العام يبدأ من ( بهم لو مره لاقيتك) ، ياريت انت تعرف لحدت وين بعزك.. ما تنقطع يا محمد.
12-01-2007, 08:00 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: اها شن قولك يا عرريب ؟؟؟ قعدتك فوق البرش تحت السلم اها ضارتك من الشمش والا دحين كان ضربتك في نافوخك وانت متزمل شملة الكنز مالت نوارة الفريق سوما البطحانية النوبية ...هييييييييييييييييييييع ....قال تيمس ونهر جاف وطحينية وحت مع زيدان؟؟ ...يعني نسيت العشرة ما جبت سيرتو (زيدان) مع "ناسنا" بعد الحت الحتيتو في مدرسة الدندر وهو بيغني ليكم .. دة كلام يا حتات ؟؟؟
Quote: ...هييييييييييييييييييييع ....
هلا هلا شوفي يا سوما حلات هييييييييييييع دى من حلقوم الرطاني والله زولك ما ساهل اتاري من ناسنا القصّع عديييييييل .
Quote: بادي محمد الطيب كل من عرفه أحبه واحترمه لأنه رجل يحترم فنه ووهب حياته لهذا الفن فلذلك يجبر كل من يعرفه ومن يستمع له أن يحبه ويقدره ويحنى هامته له
ياأحمد القرشي لا أستطيع أن أضيف للكثير الجميل الذي كتب في هذا المنبر عن بادي ( الشيخ طه) ولكن ماأوردته عن الحادثتين يبين جانبا لايظهره التلفاز، جانب بادي الإنسان، كان فيه قدر من التسامح يكفي لإطفاء حرب أهلية وفضيلة تجعل من مجالستك له نوع من التطهر، دعك عن مستوى التطريب (الساحق) المعروفة عنه والذي يأخذك إلى نشوة تُغَيِّب الرشد فيك وتخليك تفقد (صِحاك) وترفض النصح وهو يدرك تلك الدرجة بصيحاته الصادقة الشهيرة المعبرة ووووووك. تلك (العمليات) المخترقة لحاجز الصوت تذكرني صيحات وتعليقات الراحل صديق الكحلاوي في منتصف الأغنية عندما يناجي الكاشف في حجبوه أو يُحَلَِق شاهقا أنا يا طير محل مااطير بشوفك .. استغفر الله .. فرحان جيت تغني وحبيبك معاك وحبيبي غاب عني .. إنالله . الراحل عبدالعظيم حركه كانت له (خجَات) في نص الأغنيات من عينة ( خميني فك الرهائن)، وخضر بشير من المعروفين في هذا الإتجاه بطلعاته الرأسية ثم الهبوط المفاجئ مع تعابير حادة وتحريك لليدين والراس ينفض عنك كل ماعلق بأذنك من طفيليات الطرب ولا أنسى الرائع رمضان زايد في لومه وتقريعه لعينه، عينيَّ ياسبب التعب شوفتي الجمال شوفتي العجب وييين آخر جزا جزا .. خليك مع الزمن يا.. وكنا نؤولها رياضيا (خليك مع المسافه على السرعه)، ذلك جيل مدهش حتى الإهتزاز والغيبوبة. لهم الرحمة والمغفرة،
يا أحمد، (تمشي آهة وتجينا آهة ومافي حاجه اتعدَّلت)
12-01-2007, 09:28 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: وحينئذ عرفنا السبب وبطل الععجب فالاستاذ الذي رفضنا ان نتركه في حاله يذاكر للماجستير بسبب "الست" كان قد اشتكانا عدة مرات وسود صفحات عنا وبقينا في التوسولات والبكائيات ووووايام حتي عفو عنا واضيفت اسماءنا الي القائمة
يا ريت لو ما رجعوك اكان هسع رئيس للجان الشعبية ويدوك عربة بكس دبل قبين كل عصرية تمشى مع بناتك واولادك الجنينة وتملوا الصندوق الخلفي بركاوى صبيب سااااااااااى وعيدان حطب كمان وتجوا راجعين تغنوا وبكسيكم منشبح امام البيت كلما تتوجع مرة للولادة تدور بيها لاخصائي النساء والتوليد وكان هفت ليك تركب البوكس مليان بنزين تمشى تقنص بيهو تقع من حفرة لى حفرة ومن ضقل لضقل وما بهمك اصلو مال حكومة في ستين الف داهية .
12-01-2007, 12:17 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
فى حلقة مع الاستاذ حسن عبدالوهاب اعترف الفنان خضر بشير بانه عندما يشتد به الطرب يطلع فوق الاشجار ليواصل الغناء من بين اغصانها كالبلبل ...انه ينجذب تماما عندما يغنى ويطرب نفسه قبل الاخرين صوفى من الطراز الرفيع كذلك شيخنا بادى وهو الفنان الوحيد الذى يصرخ اثناء الغناء فى اجهزة الاعلام الرسمية ولاتحذف صرخاته لانها فى حد ذاتها نغمات نطرب لها ... اما الفنان الكبير صديق الكحلاوى فلقد قال لى احد كورسه انه يسرح ويمرح فى الاغنية ويحادث نفسه والاخرين ولكنه يسلمهم العصاية فى زمنها اى انه فنان لا يخرج من الزمن والايقاع نهائيا... فعلا انهم من ناسنا لهم الرحمة
12-02-2007, 09:25 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
حقيقة يا أحمد ، خضر بشير فنان يندر أن يتكرر وهو قامة في الطرب والتطريب قل أن يجود بها الزمان ومشاهدته تحبس أنفاسك من فرط إدهاشه لكل من يستمع إليه في غيرما إخلال بمضمون أغنياته الروائع. رحم الله خضر بشير وكل من رحل عن هذه الفانية ممن عطروا وجداننا.
12-02-2007, 09:30 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: يا ريت لو ما رجعوك اكان هسع رئيس للجان الشعبية
لجان شعبية شنو ؟ مطاعم شعبية .. اصلو حلم الواحد يكون عندو مطعم وزمانك بعد ما اتخرجت مهندس كنت بقول بس كام سنة شغل وارجع اعمل مطعم وكمان حددت المكان هناك بس جنب بيوت الري المصري في الشجرة جزيرة صغيرونة قت بس اعمل كبري صغير يودييك المطعم واخوك يبدع في جميع انواع المعجنات وووووو.. تجي تقولي شغل ابليس لجان شعبية ؟؟؟
12-02-2007, 09:47 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
تحية للأحباب وأخص الباشمهندس أبوبكر والغيبة يا حبيبنا أسبابها عديدة يأتي على رأس هذه الأسباب تغُّير المنبر المحزون وميله ميلاً عظيماً عن السلام والبركة في حبيبنا المرتضى ومن نسج على منواله والشكر لهم على سعيهم لانتشالنا بين الأرشفة والأرشفة بمثل هذا البوست
وشايف ناسنا تغافلوا عن ذكريات الابتدائي ، أو مرو بها على عجل وأنا شايف إنها أهم وأوضح وأجمل سنوات العمر والذاكرة عهدئذ بكر خضراء ونقية
بجي تاني بحول الله
12-02-2007, 11:47 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: وشايف ناسنا تغافلوا عن ذكريات الابتدائي ، أو مرو بها على عجل وأنا شايف إنها أهم وأوضح وأجمل سنوات العمر والذاكرة عهدئذ بكر خضراء ونقية
ياعادل ..الابتدائي بالنسبة لي وزملائي في وادي حلفا بين 59 و63 امر لا يوجد فيه ناسنا .. 4 سنوات حسوما لم تقف فيه المظاهرات والجلد بواسطة قوات للجيش ارسلوها ناس عبود الي حلفا التي كان يوجد بها رجل بوليس واحد او علي الاقل الانا شوفتو وبوليس سري واحد كلنا كنا نعرفه وكان يعرف نفسه بذلك.. عموما اتتنا كوامر بها رجالات من الجيش تحمل اسواطا طويلة من العنج وتفضلت علينا الطغمة العسكرية بالبمبان فكنا اول السودانيين بعد الاستقلال نتنعم بتلك التكنلوجيا .. كانت مظاهراتنا تجمع التلاميذ والمدرسيين والنظار واهلنا جميعا رجالا ونساء واستمرت طيلة سنوات دراستنا ولقد راينا كيف يجلد مدرسينا ونظارنا امام تلاميذهم بواسطة هؤلاء العسكر ...اتذكر انه قبل الامتحانات بشهور تعرضنا لمعرض لمنتجات خشم القربة بنته السلطات عند سور المدرسة فاحرقناه فتعرض ناظرنا الي المسالة والاعتقال من كثرة بلاوينا فتقرر قفل المدرسة الي موعد الامتحانات التي كانت في خيمة كبيرة يحرسها الجيش ننام فيها ونمتحن فيها ولا نخرج منها الا اليوم الاخير الي اللواري التي اخذتنا الي بيوتنا وبعج ثلاث شهور اخذنا القطار الي مدارسنا الجديدة في وادي سيدنا وعطبرة وبعدها بشهور تحولت قرانا الي قطارات طويلة اخذت اهلنا الي المهجر شرقا الي اليوم وبقي بعض منهم الي اليوم ....
12-02-2007, 10:19 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
هبت الخرطوم في جنح الدجى ضمدت بالعزم هاتيك الجراح.. وقفت للفجر حتى طلع.. أو أنت القادم توا من حطين .. عليك سلام الله .. صلاح الدين. كانت أياما مضيئة يا أباآمنه حامد ، لحقت بالجميل فإلى جنات الخلد.
maia , لك سلامي وتحاياي خاصة وسلامك وصل إلى هاله والأولاد.
12-02-2007, 11:06 PM
HAYDER GASIM HAYDER GASIM
تاريخ التسجيل: 01-18-2005
مجموع المشاركات: 11868
يا سلاااااام يا محمد المرتضى, إسترجعت الزمن الزمان ... اللي كنا قايلنوا { تعيس } وفيما ظللنا نردد ... أن أفضل أيامنا هي القادمة, وأن أحلى زهرات الغد لم تتفتح, وأن أجمل الأطفال لم يولد بعد.
لكن دورة الأيام أظنها أكذبت أحلامنا, بل أجهزت عليها بضراوة وقساوة لدرجة تخض ثقة المرء فيما كان يعتقد, كانت دورة راجمة لسبلات الأمل وبتلات العبور, حتى عدنا أدراجنا ولنفتح من جديد بصيرتنا على { المساومة } ... فيما كنا نعتقد أن الثورية أمضى من كل عوائق وعلائق العصر.
ذكرتني بأخبار قوات الفياتكونج, وكان دوما الخبر الأول والمتصدر لنشرة أخبارنا العالمية, كنت أنتظر أن أسمع عنهم بشوق وعاطفة قوية, خاصة وأنهم الطرف المظلوم فى هذه الحرب العدوانية.
ذكرتني بمشروع الجزيرة ... ولغير مقامه الوطني, فقد تأسست على فكرته هجرتنا البشرية من حيث قواعدنا التاريخية إلى حيث المشروع وضرورات الحياة, وإن كانت طيبة الشيخ عبد الباقي { أقدم } من المشروع وأدعى في قيامها للمكون الصوفي { العركي } من مؤثرات الزراعة... لكن سريعا ما تقدم المشروع وأضفى صبغته على مناحيه الجغرافية... فكنا من بواكير الرهط المتصل بثقافة الزراعة الحديثة والري النظامي.
يقال أن أحد أبناء حلتنا طيبة الشيخ عبدالباقي كان يرقب وبشدة فى إغتناء حواشة ولما أرهقة تطوال زمنه فى مجال العمالة الزراعية, فنصحه بعض الأعيان بالتحدث مباشرة إلى المفتش الزارعي ... وقد كان ... فإنتظر زيارة المفتش يوما ما إلى قريتنا طيبة لبعض الأغراض الخاصة... وترقبه حتى خروجه بعربته { الموريس } إلى كبري الحلة ومخرجها, فإستوقف المفتش بكل أدب وحادثه برغبته فى إمتلاك حواشة, رد المفتش بإختصار أن ليس لديه طريقة وفيما يعني رفضه للطلب, ثم داس على البنزين ليواصل رحلته إلى مكتب طيبة والذي هو مقر إقامته كذلك, أما المدهش فهو إصرار طالب الحواشة على الجري بنفس سرعة الموريس بل وتكرار الرجاء للمفتش فيما يرقب ... وقد إستمر هذا السباق لأكثر من نصف المسافة المقررة ... فإحتار المفتش وتوقف وقبل فى النهاية أن يمنح هذا الرجل حواشة ... دراما عجيبة.
شكرا ... صديقي وعزيزي محمد المرتضى حامد, فقد فتحت لنا كوة لا تخلص ومسارا ليس له من قرار.
مع مودتي
12-03-2007, 08:35 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: وسينما امدرمان واستاد المريخ واستاد الهلال وعلى قاقرين وكمال عبد الوهاب ( الدكتور)
بالطبع سينمات أمدرمان والوطنية وكوليزيوم والنيل الأزرق وغرب والنهود ونيالا والأبيض دي قصة طويلة. يا محمد اللوج وناس اللوج والتذاكر اللي في السوق الأسود أيام العيد ومقاعد الشعب ( ناس هشام هباني مع التبش والعنكوليب) وناس اللوج مع الساندوتشات المحترمه ومعها زجاجات البيبسى والناس المرتاحين لما تضاء الأنوار في الإستراحه تلاقي وجوه من كافة الجنسيات وفي حالة أن كان الفيلم هندي فالشعب كلو (ميري موهابات ساداراهي) ولا أنسى التصفيق العاصف في الشعب واللوج معا لشرطي المرور الذي أوصل شامي كابور (سوندار) إلى ( سبنا) بدراجته النارية في لحظة حاسمة من حياة الأمة قبل أن تغادر هي بطائرتها. ياخ في فيلم من أجل أبنائي كانت السينما زي بيت البكا. أما الكوره وكمال عبدالوهاب ( دكتور بوكو) اللي كان عامل ليكم ألم مستمر أنت ومحمد الفاتح فهو لاعب لن يتكرر وسأعود إليه ودار الرياضه امدرمان. بالطبع على قاقارين لاعب نادر وانا زعلان لأنو قاقا كان في أشبال المريخ كما علمت وشقيقه جعفر أخطر منو والله يسامح زغبير. تعرف كمال ( كِلِّي) دا لو كان جا في الزمن دا كان عمل ضغط لتمبس وملاسي ومن لف لفهم من الهلالاب.
تحايا يا حبيب
12-03-2007, 08:44 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
شكرا يا أمير في زمن أصبحت فيه المصافحة بالخنجر، والله يا محمد الوجوه التي شرفت بها هذه المساحة ، المدهشة بمستوى وضوحها، تعبر بدقة عن ناسنا. أنظر لكل تلك الوجوه، أقل ما تبثه فيك هو الأمان، أولئك نفر من زمن سمح وأرجو ألا يبارحوا عيوننا ، أحيانا ينتابني إحساس بأن غيابهم ، وهم أوتاد المجتمع ، سيطيح بخيمتنا (الأخيرة) مع أول عاصفة. ربنا يمد لنا في أعمارهم.
12-03-2007, 08:44 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
في فترة من الفترات أصابتنا نزعة ثقافية ... فكنا نرتاد المركز الثقافي البريطاني .. والمركز الثقافي السوفيتي .. وسجّلنا اشتراكاً في مكتبة المجلس القومي لرعاية الآداب والفنون (أظن إسمها كدة) ... ثم نستعرض جميع هذه المعارف في نشاطات الجمعية الأدبية.
Quote: ناسنا والله انا من تاسكم ناسيننا ولا شنو ياناسنا جاييكم بشويش قيلو عافية
أستاذنا الفنان ، لاشك انك من (ناسنا) ونحن ناسك مش كنت بتسمع الرائع صالح الضي بيغني : ماناسك .. نحن ما ناسك. أثق أنك ، إذا فتحتها سيره ، ستضيف إلى هذه المساحة دررا سيما وأنك من نفر أحدثوا تحولا في الكوميديا والدراما في فترة هامة من تاريخ الفن في السودان رغم صغر سنك كما قال فضيلي. أها نحن قيلنا وبتنا وراجينك يا العزيز.
12-04-2007, 08:38 PM
Abdul Monim Khaleefa Abdul Monim Khaleefa
تاريخ التسجيل: 08-27-2006
مجموع المشاركات: 1274
أخي ومودتي محمد المرتضى لك التحية والإعزاز وأنت ترتاد دوما آفاق الحب والخير والجمال .
في السودان عندما لا يكون الشخص من (ناسهم) يقولون " ما زولي " ؛ والإنجليز يقولون He is not my piece of cake ! وبما أن (ناسك) والبشبهوك لازم يكونوا ناس محبة، ووئام، وطفولة ،وبراءة، ووحدة وطنية، وسودان جديد، وثقة في المستقبل ؛ رأيت أن أهديكم هذه الصورة المعبرة والتي أرجو أن أتلقى التعليق عليها من كل واحد من (ناسك) .(أرجو أن تقوم أخي مرتضى بتنزيل الصورة بعد المعالجة التكنولوجية ) .
محبتي عبد المنعم خليفة
12-05-2007, 05:19 AM
Abdul Monim Khaleefa Abdul Monim Khaleefa
تاريخ التسجيل: 08-27-2006
مجموع المشاركات: 1274
Quote: أخي ومودتي محمد المرتضى لك التحية والإعزاز وأنت ترتاد دوما آفاق الحب والخير والجمال .
في السودان عندما لا يكون الشخص من (ناسهم) يقولون " ما زولي " ؛ والإنجليز يقولون He is not my piece of cake ! وبما أن (ناسك) والبشبهوك لازم يكونوا ناس محبة، ووئام، وطفولة ،وبراءة، ووحدة وطنية، وسودان جديد، وثقة في المستقبل ؛ رأيت أن أهديكم هذه الصورة المعبرة والتي أرجو أن أتلقى التعليق عليها من كل واحد من (ناسك) .(أرجو أن تقوم أخي مرتضى بتنزيل الصورة بعد المعالجة التكنولوجية ) .
محبتي عبد المنعم خليفة
12-03-2007, 10:08 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: رائع أنت يا هشام عندما تنزع من صلبك الديناميت وتحمل الورد
بالفعل يا فضيلي ، هشام هباني عرفته مذ أن كان طالبا في كلية القانون ولم يحدث أن رأيته بدون ابتسامة جميلة مريحه ، وهو مازال كذلك ومن لايعرفه في الواقع سيحكم عليه بالتجهم وهو الشاعر والكاتب ، ورغم ماتراه يفعل فهو هين تستخفه بسمة الطفل، هو من جيلي ومن خيرة من يحملون عن ذكريات تلك الفتره وأنا معك في مسألة (الدلاميت) ، كمايقول الأبنودي، اللي شايلو هشام ولما اتكلمت معاهو قال لي بس شوفو لي دوا من (الدلاميت) وأنا أهديك وأهديه صورة لشخصين أحببتهما منذ الطفولة ويندر أن تجد في الزمن الذي أحكي عنه من لم يعشقهما وكلاهما رحل شابا.
محبتي يافضيلي يا أحد أعمدة (ناسنا).
12-04-2007, 10:35 PM
Adil Isaac Adil Isaac
تاريخ التسجيل: 12-02-2003
مجموع المشاركات: 4105
Quote: إن لنا الآن ذواكر منفصلة حتى الرعب.. لكل منا حلم مختلف ..من الصعب أن تصب أحلامنا عند مصب كبير .. مضيء لم يقدر علينا الزمن .. أكثر شتاتانحن مما ينبغي ...عفوا ولكن (ناسنا) هذا البوست أتاني من مناح عدة.. هو صندوق ثمين... دعوة أخرى .. لفتح نوافذ على أشياء ثمينة مخبوءة في ذواكر حية وجميلة وضاجة...
يا ريل ، مازال ضمن ظنوني أن لنا ذكريات و(ذواكر) متحدة حتى لو اختلفت الأحلام واختلاف الأحلام شئ طبيعي لكن (ناسنا) يا ريل ، ولا أغالي ، يتحدون في الذكريات والأحلام معا ، مجرد إشارتك إلى أن هنالك ذواكر منفصلة وأنهر أحلام لاتصب في خليج واحد أرعبني وأحسست للحظة أني أعيش على مشارف صحراء العمر. صدقيني ، رغم الإنحناءات والمنحنيات سيظهر الضوء ( المخبوء) فنكتشف أنَا بعض من بعضنا، أحمد المولى أن ثمة نافذة تعِد بالثمين الكامن في الذاكرة (الحية الجميلة الضاجة)، في قصيدته (جائزة الشعور) قال الجواهري:
نادمت خلان الأسى وسُقيت من كأس دهاق مثل اصطباحي من كؤوس الهم والألم اغتباقي هذي النفوس الشاعرات تلذذت بالإحتراق غنيت نفسي إذ رأيت نفوسها غنت رفاقي كل يقول أنا أحوز السبق في يوم السباق مالي أنوح على سواي وميِّتي رهن السياق
لا أضيف جديدا إن قلت أنك من قليلات لا أستطيع مقاومة ما تجود به أقلامهن في زمن التهريج القبيح هذا. لك مودتي يا ريل.
12-05-2007, 11:05 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
د. عادل سلام وتحايا، شكرا لإطرائك وهذه المساحة تكون (نسمة) بمشاركاتكم وحسب، سلامك أمانة وصلت لأستاذي عبدالمنعم خليفه وصديقك أمين عام الحقيبه د. أحمد القرشي، والله ياعادل بس ندعو الله يرد غربة الجميع، أهديك من أهل النضال والتسامح تصويرا، محبتي يا عزيز,
12-05-2007, 11:44 AM
ماجدة عوض خوجلى ماجدة عوض خوجلى
تاريخ التسجيل: 12-25-2006
مجموع المشاركات: 7279
والله يامحمد المرتضى انا من ناسكم ... وساكنه سكنه هنا بقرا وانا مبسوطة وسعيدة .... لمنى القى الناس حلوة وروحا اجمل والكلام صافى ومريح .... حلوين انتو شديد .. جد مافى اروع من النفوس لمن جميلة .. كل حاجة منها بيكون جميل .. تسلمو يارب كلكم ياناس ياحلوين ياصافيين
12-05-2007, 08:05 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
الجميل / محمد المرتضى إن قلت عمرا نحن ما ناسك ( أصغر منك قطع شك ) وإن قلت حوفا ساكت نحن الناس القبُل القبُل ناسكم والله يكبر العقول أنا أكيد اصغر منك ومن ودشيقوق والاستاذ فضيلي جماع وأظن كما اصغر من ابوبكر المكبر نفسو ديما
في قعدة فوق عنقريب ضحوية وشمش الله تتاوق بي الرقراق ... مرأة قد حان عودة الزوج من مأمورية. تتزين للقائه... منظرها لا يبارح الخيال. ست المُشاط في وضعية تبدو في متناول يد المشاطة التي علت فوق المرتبة بمخدتين ... وفي يددها المخرز من شوكة عاجية وبقرب منها البلال وطفاية للسجائر.
والمشاط أنواع:- شتح ... مشاط بي مساير ... ومشاط بي وصلة من الجورسي .. ومشاط أحي حرقو .. ومشاط كوفيت
ولي الراقيات تسريحة ضنب حصان .. دردقني في النجيلة ... وعالي .. وباروكا
وياحليل المحنّا يا ودالمرتضى .. المحنّا راحت مع القمُل كانوا الناس حنين وهم يفلو في بعض
يا حليلنا وحليل يا زمان
تحياتي ود المرتضى
خالد
12-05-2007, 09:20 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: المرتضى طرقت البوست حتى كلّ متني ولم يفتح سمسم أبوابه وأخيرا قلت ممكن تكون كلمة السر نحنا ما ناسك
حقيقه يا سميه الصفحه الأولى محملّه كتير وبتاخد وكت شان تفتح ، لكن البيسأل ما بيتوه دارنا نحن قريبه ليك ونحن بي خاترنا و ... مجبورين عليك، اها انشالله كلمة السر (ناسنا) ما راحت منك. عليك الله يا سميه عندي ليك هديه من زمن (من الربوع) يوم التلاتاالعصُر للنعام بصوت الرائع حد الدهشه إبراهيم دينق.
12-06-2007, 08:12 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: إن قلت عمرا نحن ما ناسك ( أصغر منك قطع شك ) وإن قلت حوفا ساكت نحن الناس القبُل القبُل ناسكم والله يكبر العقول أنا أكيد اصغر منك ومن ودشيقوق والاستاذ فضيلي جماع وأظن كما اصغر من ابوبكر المكبر نفسو ديما
في قعدة فوق عنقريب ضحوية وشمش الله تتاوق بي الرقراق ... مرأة قد حان عودة الزوج من مأمورية. تتزين للقائه... منظرها لا يبارح الخيال. ست المُشاط في وضعية تبدو في متناول يد المشاطة التي علت فوق المرتبة بمخدتين ... وفي يددها المخرز من شوكة عاجية وبقرب منها البلال وطفاية للسجائر.
والمشاط أنواع:- شتح ... مشاط بي مساير ... ومشاط بي وصلة من الجورسي .. ومشاط أحي حرقو .. ومشاط كوفيت
ولي الراقيات تسريحة ضنب حصان .. دردقني في النجيلة ... وعالي .. وباروكا
وياحليل المحنّا يا ودالمرتضى .. المحنّا راحت مع القمُل كانوا الناس حنين وهم يفلو في بعض يا حليلنا وحليل يا زمان
يا زول هسة ده كلام واحد صغيييير؟ ..... والله رجعتنا لي زمن عجيب ... زمن راح مع (الميش) و(مايكل جاكسون).
Quote: وطفاية للسجائر.
"برنجي" أكيد
مودّتي
12-06-2007, 10:44 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: يا زول هسة ده كلام واحد صغيييير؟ ..... والله رجعتنا لي زمن عجيب ... زمن راح مع (الميش) و(مايكل جاكسون). Quote: وطفاية للسجائر. "برنجي" أكيد مودّتي
أخي الفاضل الجميل/ محمد ابوالعزائم تحية طيبة وسلام عليك يا المبروك
والله سغيــــــــــــــــــــــر وجاهل لكن فايت عمر حبوا سااااااكت ظنيت الحديث عجبك بالحيل واخدتا ليك رجعا لي ورا تجتر الذكريات الجميلة البرنجي برا وابوقندول وابو نخلة ومشروب حرية والبزيانوس
لك تحياتي مودتي تعبق بكل جميل في ذاك الزمان
تسلم ولينا رجعة
خالد
12-06-2007, 07:04 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
Quote: ربما لم تكوني وقتها موجودة ، لا أدري ، وربما لاتهتمين بكرة القدم، لكن البرازيل وبيليه تحديدا من (ناسنا) وناس محمد أبوالعزائم والباش أبوبكر وشيقوق ورأفت وجل اللي فوق
لم أكن موجودة يا سيدي الفاضل ولكن ما يمنعني من تنشق عبير الماضي الجميل وهو أساس لكل ساس ...مش بيقول المثل من فات داره قل مقداره...ومن فات قديمه تاه !!
نحن نبتة جذورها متأصلة في أرض الماضي وتنمو لتطل على آفاق المستقبل....ساقها كالبان يرقب كل جميل...وأوراقها خضراء بلون جنائن بلادي....وأزهارها معتقة برائحة الوالد رحمه الله....فكيف لا نحبهم! من أتيت على ذكرهم يا سيدي هم فاكهة المنبر الناضجة الغنية بخيراتها....وأنت منهم
فلك ولهم ولكل المتداخلين كل التقدير والاحترام.... ويا جمال دنيانا بوجودهم....
وأهدي لكم جميعاً... يا جمال دنيانا....يغنيها الكابلي...
.....
12-07-2007, 04:39 AM
abubakr abubakr
تاريخ التسجيل: 04-22-2002
مجموع المشاركات: 16044
أنا في حالة سغربه حقيقية أنك شهدتِ السبعينيات؟ طبعا يا أسماء في ناس كانوا معانا في الثانوي العام طوال عراض ومن اللي بيقعدوا في الصفوف الأخيره وما عندهم أي علاقه بالبوست دا لأنهم ما حضروا زمن عبدالعزيز المبارك ولا خوجلي عثمان وكلهم من جيل (مي عمر) ونحن براناالعجايز اللي حضرنا مايو وشاركنا في (الطلايع). غايتو أحمدالله حيدر قاسم إتذكر معاي ثوار الفياتكونغ وسقوط سايقون وهروب الأمريكان حتي من سفارتهم هناك ، منتظر ما تريدي إنزاله، سيف الدوله ببالغ عديل في قصة التلج ولولا معرفتي الشخصية بسيف الدولة وبالدالي ونوع ما يسرد لقلت أنها من تأليف سيف، شوفي بالله ، التلج كان مشكله. يعني الجماعه ديل لو كان فجأة نقلوهم البرتا في يناير كان ريحوهم. بمناسبة التلج يا سيف ذكرتنا تلاجة الجاز وهي من ناسنا زي سندوتش ممكونه.
12-07-2007, 04:30 PM
علوبه علوبه
تاريخ التسجيل: 07-27-2002
مجموع المشاركات: 1069
تلقي الدنيا باسمة والأيام طرب ... هناك في حي العرب
لوحة تجسدت ورسمت للسودان من امدرمان " تلقي الدنيا باسمة والأيام طرب هناك في حي العرب " وتتمدد حي العرب لتلتقي بحي المظاهر الحارة 2/5 ليكونا معقلاً للثقافة والفن والأدب والرياضة و السياسة , ونقول ونعدد :- الشعراء : - تجد أولاد الدسوقي وأشهرهم سيف الدسوقي ، عبد الرحمن الريح , الشاعر علي محمود التنقاري , عبد الله محمد زين شاعر أنا امدرمان , والشاعر محجوب سراج "رد الله غربته , الطاهر إبراهيم . الفنانين :- علي رأسهم يأتي المرحوم إبراهيم عوض الفنان الذري والمرحوم أحمد الجابري والمرحوم عمر أحمد "كان بدري عليك" , وثنائي الحقيبة الشهير مرغني المأمون وأحمد حسن جمعة , ومحمد أحمد عوض وتمتد القائمة للشاعر الرائع والملحن الأروع عبد الرحمن الريح . ومن الفنانين الذين لم يحالفهم الحظ بحذو حذو رصفائهم ( إبراهيم عوض والجابري) رغم حلاوة وعذوبة أصواتهم وتسجيلهم لبعض الأغاني بالإذاعة :- حسن الجلال ، الفاتح سعد ، ومحمد جعفر صالح سعد ، رمضان حسن القادم من إحدى ديوم الخرطوم، ومن الناشئة الفاتح قميحة وكل هؤلاء ممن ذكرنا من الفنانين تعدهم بالرعاية شعراً ولحناً الملهم الشاعر الملحن عبد الرحمن الريح . وفي الرياضة :- من اللاعبين دقنو، حسن العبد ، جعفر قاقارين ، جاد الله خير السيد "المريخ" إبراهيم يحي الكوارتي ، حسن عطية ، علي قاقارين ، عبد القادر قاقارين ، فريد ملة ، الريح كاريكا "الهلال" ومن الإداريين : - محجوب بلية "سكرتير الإتحاد المحلي الأسبق" ، محمد الياس "رئيس نادي المريخ السابق"، محمد حمزة الكوارتي "سكرتير نادي الهلال الأسبق". ومن الفرق الرياضية :- نادي الرابطة ، نادي حي العرب ، نادي الحديد ، ونادي المكتبة القبطية. ومن الإعلاميين :- التاج حمد "مراقب عام إذاعة امدرمان" ، سيف الدسوقي "إذاعة امدرمان" ومدير إذاعة وادي النيل السابق ، وعمر عثمان المذيع اللامع ومحمد حجاز مدثر"ساعة صفاء" والإذاعية والدرامية فوزية يوسف ، محمد عبد الله الشيخ "قضايا الناس التلفزيوني". ومن الدراميين :- الريح عبد القادر وأحمد بله الحاردلو . ومن الصحفيين الرياضيين :- أحمد محمد الحسن ، أحمد الحبو ، وعبده قابل صاحب "الإحصائيات الكروية" حاج حسن عثمان والذي مثل مع أبوآ منة حامد "هلال/مريخ الأدب الرياضي" ، احمد الطيب المحينة وعمر الفاروق "كمبيوتر الهلال " . ومن أهل العلم والتعليم :- حمد أحمد الحاج ومحمد علي الناظر. ومن أهل السياسة والعمل الوطني :- تجد ألوان الطيف السياسي محمد صالح الشنقيطي "حزب الأمة والإستقلاليين" ، الرشيد الطاهر "جبهة الميثاق/الاتحادي الديمقراطي ورئيس وزراء مايو" ، جعفر محمد علي بخيت "مايو"، الخليفة حمد كمبال " الختمية والإتحاديين "، عوض الكريم موسي " الجمهوريين " والتجاني الطيب " الحزب الشيوعي". والرأسمالية الوطنية :- تمثلت في محمد حسين علي ، عثمان الجلال ومن أهلنا الكوارتة الحاج عمر عبد السلام وأبنائه، يحي الكوارتي، عثمان الياس، حمزة الخضر، أحمد محمد الحسن كمبال , تجار الذهب ناس ملة وغيرهم. ومن معالم حي العرب وحي المظاهر:- مدرسة حي العرب الابتدائية والوسطي سابقاً ، مدرسة الشنقيطي بنات، مدرسة محمد حسين الثانوية ، الكنيسة القبطية ، مركز صحي عبد المنعم ، جامع عمر عبد السلام ، المسلخ والبيطري . ومن سوق امدرمان يمر بحي العرب والمظاهر الشارع الشهير شارع الشنقيطي "شارع دنقلا سابقاً". ومن شخصيات حي العرب والمظاهر :- "القابلة أم كندف" التي ولّدت معظم الجيل الحالي من أبناء وبنات حي العرب والمظاهر، ومن ظرفاء حي العرب والمظاهر: بابكر التلب ، عبد الله محمد زين ، وحٌق ضابط إيقاع الفنان الجابري وغيرهم . و لك أن تتخيل كم شكلت ولونت هذه المجموعات الحياة السودانية وكم أسهمت هذه المجموعات في إثراء كل ساحات الحياة السودانية من فن وأدب وشعر ورياضة وثقافة وسياسة فحقيقة تلقي الدنيا باسمة والأيام طرب هناك في حي العرب .
12-08-2007, 08:22 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
أخي سيف الدوله كتب مداخلته أدناه وذهبت الى الصفحة الأولى (عصية الدخول) ولجمالها ، وحفاظا على التسلسل ، أنقلها إلى هذه الصفحة.
العزيز ابو اكرم
كان ( ناسنا ) حين وعيت على الدنيا هم جدة والدي وجدة والدتي ، كانت كلتاهما قد تجاوزت المائة ، ثم رحلتا ليخلفهما ( ناسنا ) من جيل كبير من الحبوبات ، لم تكن واحدة منهن تسمى باسمها فكل تسب لابيها – على الطريقة العمانية – فجدتاي كانت بنت حمد وبنت نمر ورفاقهما بنت مناع وبنت خرومي وبنت وبنت ... الخ ، كنا نرى الدنيا بعيونهن ، بل كانت الدنيا لا ترى الا بعيونهن .
كنت في مدرسة الكارة الابتدائية في كسلا حين زارتنا بنت حمد لتبقى بجانب والدتي ( عليهم جميعا الرحمة ) في مرضها بالايرغان ، وحين همت بالعودة كنا نبكي ونخبئ حقيبتها لتبقى معنا ، وتصادف في ذلك التاريخ ان سمعت لاول مرة ( 1966 ) محمد الامين يغني :
لو تسافر دون رضانا بنشقى الدهر كلو ..... الى اخر الاغنية ، ومنذ ذلك التاريخ وحتى الآن لم تستطع الكلمات الرصينة والرائعة التي عني بها الشاعر محبوبته حين يقول : الدقيقة وانت مافي مرة ما بنقدر نطيقا ( مش نطيقها ) لم تستطع ان تقنعني معاني القصيدة بأن المقصود بها شخص اخر غير ( بت حمد )
ومضت بت حمد وبت خرومي وبت نمر ومضت بعدهم والدتي ، وهكذا تسلل ( ناسنا ) من الدنيا حتى وقنا نحن في اول الطابور .
لك يا مرتضى طول العمر ولضيوفك ، ونأسف لهذه الخاطرة الحزينة عن ناسنا .
12-09-2007, 06:29 PM
saif addawla saif addawla
تاريخ التسجيل: 12-07-2006
مجموع المشاركات: 911
تراودني الرغبة في الحديث عن ( ناسنا ) ويحول دون ذلك ضدان ، بطء النت عندي وابطأ منه فتح البوست ، الى ان اجد لاحدى المعضلتين حل ، اكتفي باحد ( البطئين ) واتابع
12-08-2007, 09:30 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
إيدي ميرفي الأبيض القصير راندلوف إسكوت جاري كوبر بيرت لانكستر ريتشارد ويدمارك جيمس إيستوارت روري كالهون رويرت رايان جيف شاندلر فيكتور ماتييور لاش روروي ( إيستيف ) إيلاي والش زورو الثعلب الرجل المستوحد ذو القناع افلام الحرب والسلام افلام الحب والغرام وافلام الرقص والغناء رقصنا مع ميكي روني والفريد استير ورقصناوغنينا تحت المطر مع جين كييلي وحبنا الخونة والعورا من جاك بلانس الى فيرننادو سانشوو علمتنا السينما قبل المدرسة عرفنا انو الهنود الحمر هم اصحاب اميركا قبل المدرسة وعرفنا كيف اهل مكة عذبوا اصحاب محمد في ظهور الإسلام قبل المدرسة كان ناسنا حلوين وظريفين المدينة كان ناسنا بعلمونا في كل لحظة معنى الحياة التسامح والرضا ديل ناسنا نواصل
12-08-2007, 02:43 PM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
حبيبنا ود المرتضى لك كل الود تأخرنا فى التسجيل والإطلالة مع ( ناسنا) والغريبة كنت منتظر واحد منكم يذكر فنانا الكبير عثمان حسين/ حسين بازرعة والوكر المهجور، فهو يتغنى بأغنية تكاد تكون لسان حال جميع المداخلات : كانت لنا أيام فى قلبى ذكراها لا زلت أطراها يا ليتنا عدناها أو عادت الأيام
لا زلت أتذكر وأنا طفل صغير محمول على كتف والدى وكنا حضور لإحتفال أُقيم له صيوان جوار مركز شرطة الحصاحيصا ناحية السكة حديد ، وكانت الهتافات " عاش عبود الجاب النور " وكان ذلك فى بداية عام 1963 بمناسبة إدخال الكهرباء لمدينة الحصاحيصا ، ومرت الأيام وعرفنا أن ذلك كان بسبب إفتتاح ترعة المناقل وبداية الزراعة بإمتداد المناقل ، ثم مر بنا الزمن الجميل وعملنا بجهة الصعيد وعرفنا إنو عبود إفتتح توربينات الكهرباء التى أتاحت لأهلنا الهتاف بهذا الهتاف الذى لم يكرروه حال حياتهم وحتى مماتهم. ثم لم يطل العهد حتى شاهدنا مظاهرات إكتوبر ضد عبود ولم تسلم حتى زوجته "سكينة" وعمل المتاريس فى الشارع الوحيد الذى يُوصل بين مركز الشرطة وبقية المدينة على كوبرى "شجر الخور" جوار موقف البصات الحالى الذى جنى عليه "الكودة" كعادته فى كل مدينة يحل عليها محافظاً ودونكم وما يقوم به الآن فى العاصمة الخرطوم إذ أنه مهووس بترحيل المواصلات والأسواق الشعبية ولم تسلم منه حتى سنار. أخى محمد المرتضى .... أخونا الطيب شيقوق سايقكم ساااى ومتفسح فيكم بالحيل ، وداير أقول ليهو أعمل حسابك القطر فيهو مفتش وخلينا من ناس " سكتولا و......".
هشام هبانى ذكرنى مفارقة طريفة .... وهى إنو كان لما يرسلوك تجيب سكر من بتاع الدكان كان بشايلو بالشاى ( رطل سكر مع ربع رطل شاى/ وقيتين سكر مع رُبع وقية شاى) ، عشنا وشٌفنا الآن إنو الإشتراك فى باقات القنوات الفضائية يتبعون فيهو نفس الإسلوب القديم لو عاوز تشترك فى قناة محددة ما ممكن إلا من خلال باقة قنوات جربانة.
لن ننسى لنميرى أنو كان السبب فى قطع إنسياب التبعية العمياء للأحزاب السياسية حيث نشأ جيلنا الحالى – فى أغلبه- بدون إنتماء سياسى ويستمتع باللعبة الحلوة من أى مكان جاءت وفى ذات الوقت لا يعير القداسة أى إعتبار. دحين إنت يا مرتضى صادفت "طلائع مايو " ولا "كتائب مايو" بالجد كدا؟.
عشنا فى الجامعة أحلى أيامنا ، فقد كان همنا اليومى مطالعة الصحف ( أين تسهر هذا المساء) حيث يتم إختيار السهرة السينمائية سواءاً أكانت الـ BN أو الحلفاية / غرب / قاعة الصداقة والتى كنا نحرق بيها " البيرسرى " ، ثم المرور كدارى على فول أبوالعباس المصلح ، ثم قضينا وقت جميل فى منتدى الفلاسفة واستمتعنا بمسلسل (Rich Man Poor Man) حتى الساعات الأولى من الصباح – فى الذاكرة إسم لارى هقمان- حيث كنا نتربع فى المنتدى مع الحلوين الطيب محمود/ عاطف/حافظ وشرفالدين سرالختم ولم يثنينا أن المحاضرات كانت عند الساعة السابعة صباحاً ، واستمتعنا أيما إستمتاع برحلات الآداب أسياد اللعب النظيف وإستمتعنا بغناء سيف سانو: كرمبلين يا أبووردة لابسنه تحت الفردة أشاور أبوى كان يرضى وأسكن معاك يا أبوعبدة القاش القاش يا ناس القاش عظيم يا ناس
قال قائلون إن التاريخ يعيد نفسه ، وقال آخرون إن التاريخ لا يعيد نفسه .. وصدق الآخرون.
أبوبكر
12-08-2007, 09:25 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
Quote: ذكرتني بأخبار قوات الفياتكونج, وكان دوما الخبر الأول والمتصدر لنشرة أخبارنا العالمية, كنت أنتظر أن أسمع عنهم بشوق وعاطفة قوية, خاصة وأنهم الطرف المظلوم فى هذه الحرب العدوانية.
لم يكن يهمني في الأخبار ، رغم الطفولة البريئة ، سوى متابعة تقدم أولئك الرائعين الفياتكونغ، كنت أنصت باهتمام للأخبار وللكبار من الأهل وفيهم الشيوعيين والقوميين والأنصار لكنهم يجتمعون على شيئ واحد في السياسة الكراهية الصريحة لأمريكا واسرائيل والتأييد المطلق لمن يقف في الخندق الآخر، لذا كان هوشي منه وجيفارا وابطال التحرر الأفريقي من باتريس لوممبا وبومدين ونايريري وناصر ونكروما هي الأسماء المتداولة أمامنا وعندما هزم كلاي جيري كواري كان هناك احتفال و دعوة للسينما ببرنامج كامل من الكبار. تلك ايام لن تتكرر لأن الأوكسجين كان فيها يكفي الجميع وكنا ، كما قلت يا حيدر ، رغم ذلك نعتقد أن خير الليالي لم تأت بعد، ولكن اتضح (أن خير الليالي مضت دون أن يطلع الفجر فيها) كما قال الرائع ودالمكي ، رغم تفاؤل بأن الخير آت لأنه لايمكن للشيطان العربدة بلا لجام أو نهاية،المهم يا حيدر في الذكرى انها بتدينا بنزين يمشينا لتحقيق الحاجات اللي كنا بنحلم بتحقيقا حتى لو في الجنه. تعرف الفيات كونغ كلفوا أمريكا 4000 طائرة و58000 جندي ومفقود، ياخ أنا كنت مبسوط من صواريخ سام الروسيه التقول صنعوها في المسالمه لأنها هزمت الطيران الأمريكي، كم أعجبتنا التي فيفتي فايف وياسلام على الهجوم على قاعدة دانانغ ، لكن الحق يقال أن أمريكا نفسها كان فيها ساسة أمثال جونسون ونيكسون أراهم اليوم أعظم من بيل مونيكا وجورج الأهبل. زمن ماو وشواين لاي، الذين كانوا ملء السمع والبصر ، شوف هسه مع الفضائيات الكثيره دي رئيس الصين ما بعرف اسمو، وين بريجنيف مع ناس بوتين وبوت واحد. هيه يا حيدر، سلام جاك من ناس طيبه والطريفي ن بس قول ربنا يستر، محبتي.
12-09-2007, 08:31 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
وقالوا لي فى الخرطوم البت تسوق عربية والدبلة تمشي تقيسا..
يا أسمهان برنامج جنة الأطفال سواء كان في التلفزيون في العاشرة صباح الجمعة أوالإذاعة كان يتسبب في عدة منازعات ومشاكل سببها أن الكل يريد أن يكون في الصدارة (لوج) أما الشاشة على بعد نصف بوصة ( يا ود عيونك بتبوظ ) و (جحا- رحمه الله) بطاقيته الشهيرة، والعم شعبان وماما صفية الأمين وكل الرائعين الذين أثروا الحياة في ذلك الزمن الجميل واللذين مازالوا يتوهطون في الذاكرة التي كانت نظيفة لم تصبها الأنواء. عمنا الفكي عبدالرحمن (رحمه الله) وأسلوبه المتميز في الحديث كان يجذب كل مستمع وكانت موسيقى شعار البرنامج في التلفزيون أو الإذاعة بمثابة إعلان حقيقي لحظر تجوال تلقائي للأطفال فالجميع هناك. كانت ايام جميله يا أسمهان فاكتبي عنها ونرجاك, مع السلامه يا حبوبه كلتوم،
12-09-2007, 12:36 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: في السودان عندما لا يكون الشخص من (ناسهم) يقولون " ما زولي " ؛ والإنجليز يقولون He is not my piece of cake ! وبما أن (ناسك) والبشبهوك لازم يكونوا ناس محبة، ووئام، وطفولة ،وبراءة، ووحدة وطنية، وسودان جديد، وثقة في المستقبل ؛ رأيت أن أهديكم هذه الصورة المعبرة
أشكرك كثيرا على الإطراء ومعظم أهل هذا الموقع أهل محبة وتبدى ذلك في مشاركاتهم وتصفحهم لمساحة أخرى في هذا المنبر ومعظم أهلنا هنا يؤمنون بالوحدة الوطنية ولا أظن أن من يقرأ الأحداث والتاريخ بوعي سيتبنى غير خيار الوحدة، الصورة بحق معبرة وأرجو أن يحذو الكبار حذو أطفالهم, مش مفارقات؟ أتمنى عليك أن تضيف الى هنا من أيام الجمال تلك. محبتي يا منعم.
12-09-2007, 06:37 PM
saif addawla saif addawla
تاريخ التسجيل: 12-07-2006
مجموع المشاركات: 911
تراودني الرغبة في الحديث عن ( ناسنا ) ويحول دون ذلك ضدان ، بطء النت عندي وابطأ منه فتح البوست ، الى ان اجد لاحدى المعضلتين حل ، اكتفي باحد ( البطئين ) واتابع
12-10-2007, 08:01 AM
mamkouna mamkouna
تاريخ التسجيل: 12-05-2004
مجموع المشاركات: 2246
يا محمد أبوالعزائم، كأني اراك في العطلة السنويه التي تتخطى الأشهر الثلاث في الثانوية العامة وأنت في ( البرنده) نهارا وبيدك عرس الزين أو موسم الهجرة إلى الشمال أو دومة ودحامد ، بالطبع موسم الهجرة كان في تلك السن يقرأ سرا بسبب إشارات بت مجذوب ولغة ( الأنادي) ، الطيب صالح يبهجنا أين حل ولا أنسى زيارته لمسقط في بداية التسعينيات عندما دعاه وزير الإعلام العماني وقتها وألقى محاضرة في النادي الثقافي تسببت في زحام غير مسبوق داخل ذلك النادي الأنيق وخارجه وكيف أن العمانيين مواطنين ومسئولين احتفوا به لدرجة تفخر معها أنك سوداني. (مصفى سعيد) و ( الزين) من ناسنا عديل وربنا يمد في عمر أستاذنا الطيب.
12-10-2007, 12:09 PM
Abdul Monim Khaleefa Abdul Monim Khaleefa
تاريخ التسجيل: 08-27-2006
مجموع المشاركات: 1274
Quote: أم كلثوم . كنت مهووسا بها ... كل خميس من الشهر كان حضور حفلتها أمرا تجاوزه محال .. أقول "حضور" رغم المسافات والإمكانيات فما كانت حفلاتها التي يطير إليها عشاق غناؤها من اثريا العرب بطائرات خاصة أمر متاحا لأمثالي من الطلبة أبناء ملح الأرض .. كان مجرد أن يكون لك راديو تستمع إليها منه أمرا يساوي الطيران الخاص بالنسبة لأمثالي ..
أخي العزيز محمد المرتضى المودة والإعزاز
بما أن الصديق أبو بكر من عشاق الست أم كلثوم أرجو أن أهديه هذه الطرفة الواقعية ، والتي حدثت فعلاً ذات سحر من شتاء عام 1967م عندما كنت في زيارة لبعض أقاربي في مدينة نيالا. فبعد حفل عشاء عامر أقامه لنا صديق من أبناء الأبيض مقيم بنيالا رجعت إلى مكان إقامتي ، واستعدنا طرائف الأمسية الجميلة وقفشاتها ، وتدثرنا بالبطاطين واستسلمنا للوسن في تلك الليلة الباردة بعد أن تبادلنا عبارات تصبح على خير مع خالي الذي كان في سن مقاربة لي . في هدأه الليل وسكونه إذا بي أسمع شعراً عذبا من أروع الشعر منساباً بصوت رخيم ، وبنبرات واضحة ، وخلفية من الموسيقى الرائعة .. كنت في حالة لم أدرك فيها هل أنا في يقظة أم منام .. غير أني لم أشأ أن أرهق نفسي بذلك حتى لا أفسد على نفسي تلك المتعة التي أعايشها .. أسئلة كثيرة طافت بذهني ، غير أنني لم أعبا بها حتى لا تصرفني عما أنا فيه من طرب ودرجة عالية من الفرح والسمو .. غير أن أكثر ما كان يلح على نفسي وأنا على ذلك الحال هو كيف يحدث هذا ، إذ لم يكن هناك أي تفسير منطقي للمصدر الذي ينبعث من هذا الغناء المموسق البهيج ..
قلت لنفسي لعلها درجة عالية من درجات الإلهام ، حيث لم يكن هناك أي تفسير منطقي آخر للمصدر ، كما لم تعتريني من قبل هذه الحالة من الإلهام ( رغم أنني أكتب الشعر أحياناً وتستبد بي بعض حالات التقمص الذي يلح علي في أن أفرغ إحساسي على الورق ) .. راودتني الفكرة أن أتناول قلماً لأسجل ما أسمعه .. غير أنني صرفت الفكرة ، خشية أن أفسد حالة السعادة التي استشعرها ؛ وفضلت أن أحاول حفظ ما أسمع علني أستعيده في وقت آخر ، ثم أقوم حينها بتسجيله .
خلاصة الأمر هنا أنني تيقنت من أن التفسير الوحيد المقبول هو أن هذا إلهام سامي، وإن كنت غير متيقن من ذلك تماماً ، حيث أن التجارب الوجدانية والأحاسيس المنقولة من خلال هذا الشعر المموسق العذب لا تشابه تجاربي ، ولا المفردات تشابه كلماتي ، مما زاد الأمر حيرة .. وبالمثل صرفت التفكير وركزت على السعادة والاستمتاع :
يا فؤادي لا تسل أين الهوى كان صرحا من خيال فهوى فاسقني واشرب على أطلاله وارو عني طالما الدمع روى كيف ذاك الحب أمسى خبراً وحديثاً من أحاديث الجوى
لم يخرجني من تلك الحيرة سوى ساعة جامعة القاهرة التي أعلنت دقاتها الرابعة صباحا!!!
التفسير لما حدث هو أن خالي ( والذي هو من عشاق الست ومن المتابعين لحفلتها الشهرية كان قبل أن يتدثر بالبطانية قد دثر معه جهاز الترانسستور داخل البطانية وظل محتضنه!! ولم ألاحظ ذلك ، كما لم يحدثني عن الموضوع .. ولم أكن حتى ذلك الحين من متذوقي الست .. حيث أن دنياواتنا أخر!
فيا أخ مرتضى صاحبك أبو بكر ليه حق يكون مهووس جداً بالست أم كلثوم ، لكن الست ما ليها حق تمسرحني قدر المسرحية دي !! لكما كل الحب
عبد المنعم خليفة
12-10-2007, 08:59 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
ماجده عوض خوجلي، الأحداث التي مرت بالمنطقة العربية والأفريقية في الزمن الذي نحكي عنه خلّفت في ذواكرنا أغرب ما يجتمع في الوجدان البشري ، ولا أغالي إن قلت أن السودانيين من أكثر شعوب الأرض تعرضا للثقافات المتباينة باعتبارهم جسرا بين شمال افريقيا العربي وجنوب الصحراء الأفريكاني، تأثرنا بكل أحداث المنطقة العربية من المحيط الى الخليج وبالحربين العالميتين الأخيرتين وأثرنا وتأثرنا بشرق وغرب أفريقيا و(سربنا) أبطال حركات التحرر من جنوب الغاره الى شمالها ونحن نعرف عن كل الشعوب أكثر مما يجب وهذا ما لمسناه عند تفاعلنا مع تلك الشعوب ، نعرف عنها جغرافيتها وطبائعها وساستها وفنها ومن النادر أن تجد شعبا يعرف عنا الكثير مثلما نعرف عنه. من الأحداث التي لاتغيب لحظة عن الذاكرة هي تلك التي ارتبطت بالقضية الفلسطينية فمن منا لم يكن يأسره صوت فيروز وهي تنشد: قلوبنا إليك ترحل كل يوم.. تعانق الكنائس القديمة .. يا قدس يا مدينة الصلاة. شكري يا الماجده على كلماتك،
12-11-2007, 02:09 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
خالد محجوب المامنسي، من أناديهم (ناسنا) ليسوا من فئة عمرية محددة بقدرما هم من فئة ثقافية وذواكر متقاربة إلى حد بعيد ، تهزهم وتشجيهم أحداث وشخوص معينه ويحتفظون ب (أشياء) تكاد تتطابق ، هنا اعتبرني أكبر ناس المنبر هذا سنا ولاتخشى جزئية العمر هذه ، والله يا خالد هناك أعضاء كثر في هذا المنبر وجدناهم أمامنا في المدارس لكن لن يتداخلوا هنا معتقدين أن الحديث عن (أمة الأمجاد) كمثال سيكشف إحداثيات ميلادهم وخارطة عمرهم، أهم شي يا (شاب) تدينا ذكرياتك فمن يكتب عن مارتن لوثر كنج أو عوض الكريم أبوسن أو جوزيف قرنق أو المحلق أو عثمان دقنه ليس بالضرورة أن يكون من معاصريهم فجيفارا لم نعاصره بل سمعنا عنه بعد سنين من رحيله، دا مجرد استدراج لباقي (ناسنا ) شوف هسه أخونا أبوبكر أبوالقاسم راح (شايت) لي سؤال عن الطلائع والكتائب ايام مايو ووالله لم أشارك في أي منهما لكنني شاركت في مهرجانات الشباب (لوحات خلفيه) وفي الميدان وكان معانا تلميذات لابسات ملون وشايلين أطواق زهور عملوها ناس كوريا الشماليه وهم ناس حريفين في قصة المهرجانات.. علمت الناس يامايو اساس الوطنية، وصباح الخير عليك يا بلادنا ونقولا نعم عشان اولادنا تتعلم .. نقولا من الضمير والفم ...، أها يا خالد ألحِّقك إدريس أبراهيم ومايو لينا تسلم ولا كفايه كده؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
mamkouna
الزاكى عبد الحميد
معتصم عبدالرحيم
Asma Abdel Halim
abubakr
الطيب شيقوق
رأفت ميلاد
محمد المرتضى حامد
salma subhi
د.محمد حسن
Ahmed al Qurashi
hameem
HAYDER GASIM
محمد أبوالعزائم أبوالريش
محمد سنى دفع الله
Abdul Monim Khaleefa
Adil Isaac
ماجدة عوض خوجلى
خالد علي محجوب المنسي
علوبه
saif addawla
أبوبكر أبوالقاسم
فيس بوك
تويتر
انستقرام
يوتيوب
بنتيريست