الرسامين , التشكيلين ورسم الهلام والاواهام والعولاق - توجد صور وهمات

Quote: زمااااان أيام كلية الفنون اتهمت بأني زول ( حرفي ) مُجيد و برسم الحاجة بضبانتها ( زي صاحبنا الإيراني ) .. قمت ياخي اتعقدت .. لقيت الناس الفي امتحان القدرات و الكنت بالنسبة ليهم ( عبقرينو ) زمانو .. بقو يعاينو لي شذرا شذرا باعتبار اني زول كاميرا ساكت و هم " المبدعين " لأنهم ( و نحنا لسه في أول سلم تعلم الشغل الأكاديمي الممنهج ) بقو فنانين جد جد و نازلين بتقلهم : تجريد .. طلعوني إرنقتنق ساكت و فاره . فكرة التجريد ما صعب تقبلها لو تخيلنا إنو الرسام بيفكك عناصر الشوف و يحللها و يعيدها لسيرتها الأولى ، و بعدين يعيد صياغة و تركيب كل العلاقات دي بفهمو هو و حاجاتو هو ، و بكل الشيلة الجواهو كبني آدم .. يعني في الأول يتفكك المنظور ، تتفكك علاقات الكتلة بالفراغ ، تتفكك علاقات اللون ، تتفكك علاقات الضو و الضل ، تتفكك علاقات الخطوط ، علاقات الإيقاع .. و بعدين يتعاد نسجها تاني ( أو نسج ما أوحت بيهو ) بصمغ المعرفة بتاعت الرسام .. و الصمغ ده قال ليك ممكن يلاقي و يلايق علاقات منطقية ( منطق الفانتازيا و الخلق الجديد ) تمرق من كل الهيلمانة دي و تلفق مع بعضها و تقعد في مساحة اللوحة بمزاج علاقتها بالتراكيب التانية الصنعتا رؤية الزول الرسام ( و الرؤية دي بقى يا سماني عقدة العقد .. يعني بيطلع فيها المدكن و المخزون و الشيلة الفي النفس بي صمة خشمها ) .

(عدل بواسطة Outcast on 05-12-2009, 07:20 PM)