|
|
 Re: الليله هوي ياليل .. نص مسرحى (Re: khatab)
|
والى الشرق :
ياخى ما معقول اللغه الرسميه دي عملت لينا فلايت
والى الغرب :
Flight
ليه وين ياحبه !!
مُفكر تتخارج وللا شنو!!
( ضحكات من الجميع ..
والى الشرِق :
واللاي انا عندى زَمَه عديل كده .. ياخ الواحد بدل اوضح حالة اقليمو ومتطاباتو
لازم اتكلم من خلال المشروع الفيلى العجيب
والى الغرب :
ومال عملوك والى ليي يا ادروب ما تتحرفن , اتكلم من خلال المشروع الفيلى العظيم
طلِع حقك يا حبه .. متطلباتك لمواجهة احتياجات الاقليم بتاعك .. ومال ايه !! وانت
بالتحديد طوالى طالع كيت مع انك اكتر واحد مهدد فينا بعد والى الجنوب , السهام
البتترصد الفيل فى اقليمك موضوعا براو ..
والى الجنوب :..
كلامو صاح .. انت يا صاحبى تخُش لى تغطية مطلب اقليمك
من خلال المشروع الفيلى ظاطوو ولا شنو ..
( ضحكات استحسان ..)
عندك انا مثلا ً .. مرقت َ بي
( مقلداً فى الجمله القادمه .. طريقة وصوت الملك .. )
جهاز ضبط حركة الحمامه ..
( مواصلا ً تقليد الملك .. )
أفتحوا له الجيوب فتحاً بلا حدود وزودوه بالعتاد والجنود , للاضطلاع بمهامه الدقيقه
وفق معيار المرحله ..
( الولاه وهم يضحكون .. فى حالة عاديتهم تلك يرددون كما فى فى المشهد الفائت ..)
: هلا .. هلا .. هلا
( ينبرى احد الولاه الذىكان يقوم بدور الراوى .. مواصلا ً .. )
الراوى:..
يا الفى الجنوووووووب حييي الشمال مال مااال
( تتواصل الاغنيه وهم فى حاله .. اقرب للطرب الحقيقى منها للهزل
( يهتمون بمكياجهم وكل ما له علاقه بالاستعداد اثناء الحوار التالى )
والى الغرب:..
شوفت الحرفنه كيف يا ادروب .. اهو ده والى الجنوب طلَع ميزانيتُه
بتاعتُه بتاعة الدفاع من خلال الحمامه ..
والى الخرطوم:
دى الحمامه البتبيض دهب
والى الغرب:.. ( مواصلاً ..)
ووالى الشمال .. لفق قصه ما عارف نجرها كيف
دليب وطنبور .. وانهُه الفيل مكسَر وحزين وشنو ماعارف لحدى ما
وصل لى قصة العُشب ديك .. وضرورة اقامة السد .. ومن ثم ياصاحب
طلع بي جهاز شئون السَد ..
والى الوسط:..
لكن ياوالى .. انا فى سؤال محيرنى
والى الشمال:..
سَل ما بدا لك
( يضحكون .. )
والى الوسط:.. ( مواصلاً ..)
يا خوي انت باقى ليك السَد ده بيقوم .!
والى الشمال:..
والله نحنَ عملنا العلينا .. والباقى زي ما انت عارِف .!
(.. يضحكون .. )
شوُف
لو قامت السِدود
لإتاحة الماء والكُهرباء
كان بِها , وإن لم تقُم ..
كمان الميزانيه
بتاعة السَد
فى اليد .. وبتمشى الإمور
لكن انا
برضى عندى ليك سؤال يا والى الوَسَط .!
والى الوسط:.. سل برضو .. مابدا لك
والى الشمال:.. ياخوي قربت تفك اللعب ولا شنو ياجماعه !!
شنو تقول للملك
لا مانع للمواطن من يفنجط الفيل .. ما شاءت له الفنجطه !!
والى الوسط:.. ماصاح ياخ .. اتخيلوا انُه افنجط شمال إروح مُفَنجِط يمين
معفِص الزراعه .. مُخرمج المويه وملخبط الواطه كلها ..
جننا جن .. مزارع واحد عليهو الطلاق .. عارف اشتغل مافى ..
كان خِتو الزراعه دي اقبلوا وين !! أهاا لما نكون عارفين الفنجطه التاليه
حتكون وين .. الناس بتستعد وتعمل حسابها .. انشاالله تقنع ليها من حواشه حواشتين
خصيصاً للفنجطه وللا شنو !!
والى الشمال :.. لكن وصلت مرحلة الخطر وقربت تروح فيها لما قال ليك
.. اشتم رائحة غريبه فى هذا الحديث ايها الوالى
والى الجنوب:.. :..
ارجو الا يسيئ مولاي الملك حفظه الله , تأويل حديثى .. فالمزارع هنا كل جهده الى اين
يمضى سوى الى بطن وصحة وعافية الفيل !! وجهده اين يصب سوى نحو حبوره وسعادته !!!
لكنها الموازنه يا مولاي بين المعفوص وما يتبقى له من علف . . .
الولاه:..
علف .. علف .. علف
والى الوسط:.. ما لازم أجُر واطى المهم امرُق بجهاز ..
الولاه :.. انشاء جهاز
ضبط وجدولة حركة الفيل
والى الجنوب: .. شنو يا والى الخرطوم !!
( .. صمت
( .. والى الخرطوم يبدو ساهما ً .. )
و
نواصل
|
|
 
|
|
|
|
|
| العنوان |
الكاتب |
Date |
| الليله هوي ياليل .. نص مسرحى | khatab | 03-26-09, 04:58 AM |
| Re: الليله هوي ياليل .. نص مسرحى | Hawari Nimir | 03-26-09, 06:39 AM |
| Re: الليله هوي ياليل .. نص مسرحى | khatab | 03-27-09, 02:34 AM |
| Re: الليله هوي ياليل .. نص مسرحى | محمد سنى دفع الله | 03-27-09, 07:27 AM |
| Re: الليله هوي ياليل .. نص مسرحى | khatab | 03-27-09, 02:04 PM |
| Re: الليله هوي ياليل .. نص مسرحى | khatab | 03-29-09, 09:18 PM |
| Re: الليله هوي ياليل .. نص مسرحى | khatab | 03-30-09, 10:42 PM |
| Re: الليله هوي ياليل .. نص مسرحى | khatab | 03-31-09, 06:51 PM |
| Re: الليله هوي ياليل .. نص مسرحى | خضر حسين خليل | 03-31-09, 06:58 PM |
| Re: الليله هوي ياليل .. نص مسرحى | khatab | 03-31-09, 08:58 PM |
|
| |
khatab
فيس بوك
تويتر
انستقرام
يوتيوب
بنتيريست