تمنطاشر ياناير..غنية عشان العشاق

Quote: قلت لاصدقائى فى بوست: احب تماضر ما انشره هنا بتصرف ___________ الليلة يوم تمنطاشر يناير عندنا ناس اهم منى الاتنين عشاق و دايرين الحب وذكراهم اعطر منى عندنا فنان اخضر عطر كل الفسحة ..بلحن شجى وما بنقدر الا نحبو و مواقفو وتكريسوالفايض لجمال الناس والدنيا ..والثورة كان داير يشحن كل قلوب الناس بالحب ويخليهم يقيفوا على رجلين الهمة . .ويمشوا بدون توقف. .لافق جميل. .وبعيد ومضىء. لكن ما قدر يواصل.. جدعناه. واهملناه .بين الاوراق الرسمية والاجراءات ..والغفلة ... غفلنا ..ومات قطع قلب الناس..وغناه داك ما وقف النبرة الحزينة ...ولا وقف من يومو الغفلنا وفات.. .********* والعاشق التانى مفكر ..ورسول لحرية الفكر ادى رسالة ولسع كان مشغول بيوصل فى رسالته وشم الطاغوت ريحة الحرية بتطلع من جيهاته واتهيج ..وغار ..وارغى وازبد زى تور..فى حلبة قرر يوقف ريحة الفكرة الهبت من جيهات الزول ده.. راح حشد الكذابين والجهلة ..والمغبونين ..من افقه الواسع ..ومن رؤياه النافذه راح حاشد اعلام ..ومشاعر الناس ضدو.. وحشد المهووسين ..دينيا والمهووسيين ذهنييا ..نفسيا .. حشد الجيش والناس..والمقصلة والجلاد.. وجا العاشق وجهه العاشق ..ما فيه عضلة ارتجفت جا العاشق قلبو العاشق ما كان برجف وجا العاشق .. طلع السلم . .فى تؤده .. وقار وسكينة زى الماشى يصلى ..طلع واتوجه جيهة ضوء الرب ما بيشرق وطمن ناسو الكانو يوحدو..ويبكو فى نفس الآن واتزلزل عرش الجلاد فى لحظة .وفى ناس كانوا بشوفوه شوف العين انه الجلاد هو المشنوق..والعاشق هو الشانقو وبيضحك.. العاشق صعدت روحو.. والجلاد بقى هو المتهاوى ..والتاريخ الكاتب اسمو هو الجثه المجدوعه ..فى صحراء التيه.. من اعلى علا.. اسم الجلاد راح متهاوى ..ومجدوع فى صحراء ما معروفة واسم العاشق ..اصبح شجرة .. مغروسة فى قلب التاريخ وفى قلب الناس ..صفقة فى كل قلب..اخضر صفقة.. لاحظوا الشجرة ..دى كبرت كيف.. جذع فى اخصب حته من التاريخ..وصفقه ..فى كل قلب.. عبر الاجيال الصفقه بتورث..للاجيال صفقة.. اخضر واخضر.. خلونا الليلة نغنى عشان العشاق..

Quote: سلام للجميع الكاتب الصحفي مسعد حجازي من المعجبين بالأستاذ محمود، وهو كندي مصري يقيم في كندا.. ومن المطلعين على موقع الفكرة، وقد اشترك في منبر الفكرة الحر "القديم" قبل أن يتعرض للتدمير والإغلاق.... في يوم 17 يناير، أعاد نشر مقاله الذي سبق أن نشره في عديد الصحف الإلكترونية.. بالضغط هنا وأعاد نشرها في هذا الموقع بتاريخ 18 يناير 2006 بالضغط هنا مركز الاستاذ محمود الذي تم تدشينه يوم الأربعاء 18 يناير يمكن زيارته هنا: http://alustadhcenter.org/ والصورة أدناه هي تصدير منبر "السودان للجميع".. ياسر

(عدل بواسطة Yasir Elsharif on 01-19-2006, 07:19 AM)