|
لذاذات ابوى ...أو عشق الانسان الكونى
|
قررت ان احكى لكم عن ظرفه ولذاذاته الكاسرة خاطرنا فى غيابو.. القاطعه قلبنا
بعد ان شاركتمونا الحزن وكفكتم عنا الدمع..
من حقكم ان تبتسموا معنا فى طيفه الضاحك اللطيف ابوى كان لذيذ يجيد النكتة ولا يفتعلها الله يرحمه ويغفر ليه ويحسن اليه يعرف انها الطريق الى القلوب وانها جسر سهل من جسورالمحبة والقبول كان يجيد اضحاكنا واضحاك كل من دخل بيتنا مؤمنا او غير مؤمن. شاحكى لكم ما تيسرمن طرافاته الكثيرة..
فى مرة كنت امشى معه فى اسواق الخرطوم فى يوم بهى ..سمعت واياه شخصا من خلفنا يصيح: مضطفى يا مصطفى..فالتفت الى سائلا فى جدية: انا اسمى مصطفى؟ قلت: لا طبعا فرد بسرعه: طيب ده بكورك لى ليه؟؟
ومرة جاء تبارك يحمل "جك" ماء فى يده..فقال هو: تيارك الذى بيده الجك.. كان يخلط اسماء ابنائه " الاولاد بس" ..واخيرا قرر ان "يتحل" من هذه الورطة فصار يصيح لمن يعبر" جعفر! يا جعفر..فيلتفت الواحد ويقول: معاى انا؟ يرد ابى: اى انت مش ولدى؟ اولادى كلهم بقى اسمهم جعفر.. كان يدلل بناته..ويكثر من اطرائهن وعندما تدخل الواحده منا غرفته يسألها انتى حبيبة منو؟؟ نقول حبيبتك يرد الحمدلله "اظن انا الاكتر" فعندما نختلى ببعضنا البعض يقول لى" حبايبى كتير بحبونى لكن انت اللى شاغلنى..واظنها اغنية لام كلثوم..ويهمس لى: ما تكلمى زول...ونضحك
ويقول لى انتى عارفه انا ولدت كتير كده ليه؟ اقول ليه ليه؟ يقول لى كل مرة الد اكون قاصدك انتى ..يطلع زول تانى..هاهاوكنت ازنقو اقول ليه: طيب الباقيين ديل لزومهم شنو؟؟ يقول لى قلت امكن يشبهوك.. اقول ليه: بالله يابا خلى المكنات بتاعتك دى ..ويضحك..مكنات دى شنو؟ وكان بحب كلمات الشماسة دى لما يسمع بواحده يستعملها كتيرفى مواضع مختلفة..مرة يقول لعمى محمد الطيب..ابو مريم .. تعال نتكلم معاهم بلغتهم: بالله اعملوا لينا ليمون "مدنكل" لينا انا ومريم..ويموتوا بالضحك..ونحن نموت بضحك تانى لانه مدنكل زاتها ما لغتنا طبعا هو متزوج من ابنة خالو"امى فاطنة" الاول ثم من امى "علوية" الثانية..وقد شهد اصدقاء الاسرة ..هذا الود الكبير الذى جمع بين المرأتين ..حتى صار مضرب مثل.. وكثيرا ما يجلس معهما فى ضل الضحى "بعد المعاش طبعا" للقهوة..فيبدأ بالشكية لجارة: انتى عارفه الجماعة ديل اليومين دى ما عندهم بن ..وتصرخ المراتان: كيفن ما عندنا بن ..الى اخر الموال فتكشف كل واحده عن قهوة ما..وتجىء القهوة والشرغرغ والقلايات تتطاقش وهو فرح مبتسم ..يغمز لنا بالنصر وتجىء جارة.اخرى .وودع ويحلو الحديث..ويصر ابى ان تخبرة الوداعية متى سيتزوج فى الودع.؟؟.وتطنطن امهاتنا ويهرجن..ويتحول المشهد الى "اسكتش" رائع ونحن حولهم نضحك ونزيد النار حطب..فيقول لهن مش اخدتكن بقروشى؟ فيهرجن: قروشك الكملت زماااان دى؟؟ حسه كان جابوها ما بتسير كملتها زماااان وحسة بقينا طالبنك
ويلتفت للوداعية: خلاص شوفينى ما بجيب لى ولد ولا بت؟؟ "اخ انا الكبرت وما جب جنا" يعنى ما جبت جنا..ويهرجن زيادة: هى يايمة حليل ابوى..بعد الواطة المليتها دى؟ "لا حظوا نحن تسعطاشر" وكثيرا ما كان يعمل لنا ورطة مع الضيف فيقول له: الجماعه ديل بدسوا السكر ما بعملو للضيوف شربات ..ونحتج نحن لا والله بنعمل فيه والضيف يقاطع لا والله انا شارب حسه فيغمز له ابوى ويقول: اسكت خليهم يعملوه عشان يدونى معاك..اصلهم ما بدونى شربات الا يجينا ضيف. ههههاها ويصير الجو كله مرح ومريح
عندما زارنا فى امريكا: كان يتغزل فى جمال الطبيعة..ويبدى اندهاشه الواضح باعتبارات الجمال..والحب والود بين الناس ويقول: كرم الله الانسان فى امريكا وفى يوم كنت واياه نجلس وكان فى التلفزيون فنان من الروك الثقيل يصرخ ويقع على الارض..وكانت امى معنا..فصار يقول لى: غايتو لما اعرس المرة الجاية..الفنان دة بالذات ما تجيبوه لى. وامى هناك تتلمظ غيظا وتكتم ضحكة: يعرسوا ليك شنو؟
كان يتذوق الفن ولكن مسألة اختيارنا لطريق الفن لم تجىء سهلة كشربة ماء له...فقد قاومها فى البداية/ "...مع انه كان يستخدم المسرح فى تعليمه لطلابه و مصاحبة الغناء ..ويشجع الرسم وتذوق الشعر ويحب الرياضة وطلوع الجبال والمشى لمسافات بعيدة ...لكن اظنه كان يخاف علينا من الاحباط وتعرضنا للالسنه وعدم رحمة المجتمع للفنان
لكن لحبه للفن وعندما راى جدية اختيارنا صار اكبر مشجع حتى صار فى النهاية فخورا بنا ولا يتورع من ان يقول لاكثر اصدقائه "تزمتا" انه فخور بنا "انا ابو فلان" "انا ابو فلانهواذكر اننا كنا نتعلم الالات الموسيقية والغناء الجماعى فى الخفاء منه فى البيت..وكان ان "لفقت" الاغنية مرة ونحن فى احد الغرف وقد احكمنا اغلاق ابوابها..وعندما صدحنا بصوت واحد..فتح ابى الباب..وسكتنا لتونا وبعد فترة الصمت المهيب..قال كلمة صارمة ومضى: اولاد الكلب.. ..فوسوس محمد ودخالى عبد القادر:نسميها فرقة اولاد الكلب للغناء والطرب..
فسمع ابى الحكاية وصار يضحك حتى تدمع عيناه...وصار يحكيها لاصدقائه .بعد ذلك صار يطلبنا ويقول: بالله نادوا فرقة اولاد الكلب يجوا يغنوا لينا حاجة..
كان يحفظ معظم اغانى الحقيبة ويعرف معظم شعراءها..حتى ان عوض بابكر نصب كمراته وميكرفونه فى دارنا عدة مرات يريد ان يحثه على الحديث ولكنه اصر على عدم الاضواء..ياخسارة كان يحب اصدقاءنا الممثلين والموسيقيين والفنانين التشكيليين ويقدر اعمالهم وخفة دمهم ويطلب منهم ان يعيدوا له الحكاوى او الالحان او يطلعوه على رسمهم..ويؤكد دائما ان الفن جسارة عقلية وحسية بالغة لا يقدر عليها الا متامل فى ابداع الخالق الاكبر ويعتبرها قمة الايمان والخشوع..كان يستانس الفنان محمد الامين والفنان ابو عركى ويستانسونه ومحمد ادم المنصورى وهاشم صديق وفتح الرحمن عبد العزيز واصدقائى فرقة الاصدقاء ويتبادل معهم "السربعات" وتضحك خالده من تعليقاته حتى يسيل دمعها ويدلع عشه مبارك معانا ويسمى الهام بابكر صديقتى المختصرة فقد كانت قصيرة القامة ويسمى عمى الطيب الختام "الرجل الابيض" فشعر راسه ابيض ولونو فاتح ..ويقول لكل واحده من بناتو "حبيييييبتى" وينادى اولادو واولادهم بالسجع من هشام ولدى التمام وقصى حبيبا لى ومريوم الخاتية اللوم وتماضر ام قلبا حاضر ...الخ
المدهش فيه انه بعد كل هذا الهزار والمرح يقودك من حيث لا تدرى الى مسالة علمية او فقهية ويهرع الى رفوف الكتب ويصير الجو الفكه هذا نقاشا طويلا ولا يخلص النقاش حتى يضطر الزائر للعودة ثانية وهكذا يربطك رباطا وثيقا لاى وجدانه الرحب وعقله الجميل..كان ديمقراطيا بمعنى الكلمة يتعلم من الطفل ويعلمه ومن الكبير والبعيد والقريب..
يعتبر كل قبائل السودان اهله: تعالى سلمى على قلان ده من "اهلنا" المنصير.."البقارة" " الجوامعه" " الدينكا" "الهدندوه" ما حصل ما سمعتو ما اضاف كلمة اهلنا لاى قبيلة سودانية..
وعندما ياتى اصدقاؤنا الخواجات..يجمل لهم صورة السودان حتى "لا نعرفه" ويستمتع كل الاجناس بحلو حديثه. وكان يؤمن بالانسانية ويمارس ديمقراطية الزوار...لا طبقات كل زواره مجلسهم واحد وحفاوتهم واحده مهما اختلفت تصنفات المجتمع لهم...والله على ما اقول شهيد
مرة وفى زعلتو من الحكومة شاف لافته كبيرة جنب الكبرى بتقول "شركاء..لا اجراء" فيقول كلامهم صاح انتو قريتوها كيف؟؟ اقروها: شركاء؟؟ لا، اجراء... مشكلة ترقيم بس وتكون صاح برضو زعلتو قصة الجامع بمكرفون واصوات قبيحة تبدأ من الرابعه صباحا وقراءات مغلوطة " وكا بنضرس من غلط اللغه وشناة الصوت العالى" فيقول والله الجامع بتاعنا ده حقو يودوه المنطقة الصناعية ...وعندما "ينفخ" المؤذن على الميكرفون بصوت تهتز له اركان الحلة: كان ابوى يقول ليه: الضهر مش؟؟ خلاص حنصليه مافى داعى تتمها..
وعلى ذكر الاصوات ..ياسر اخوى صوتو اجش ولما يزعل يزيد جشاشة فيسمعه ابوى ويقول: ولدى ده لما يزعل صوتو ببقى زى "كرد الحوض" ..ههه فى التشبيهات دى كان ابوى رباطابى مع انو دنقلاوى لما يشبه حاجة بحاجة تانية خلاص بكون قرضها...
اخخخخخخخخ ياحليلو..
مرة تبارك فى التلفون سالو: ابوى كيفك كيف صحتك
الحمدلله كيفكم انتو
وسالو تبارك تانى : كيف النظر؟
رد ابوى: لا النظر ده بقى another thing
وكان يضحك من عجزو ولما ما يقدر ياكل حاجه معينه يقول: دى بطن قدييييمة صرفوها لى من ما ولدونى لى حسه معاى
وكان يسخر من كونو لا يفقه اى شىء فى المطبخ ..ويقول لى عرفتوها كيف دى؟ لما يختو ده مع ده بطلع كده دى عرفتوها كيف؟؟ مرة كان فى بكا فى البيت والدنيا رمضان والناس كلها نايمه مرهقه على وش الصبح..انا صحيت بيه..لكن ما قمت..شفتو بتحاوم مابين الحوش..والمطبخ فى الاخر رجع اوضته..مشيت ليه قلت ليه داير حاجه قال لى كوز موية ..جبتو ليه: بدا يضحك فينى: انتو الموية دى بتجيبوها كيف"؟؟ الليلة قمت اتفولح اسقى روحى براى..مشيت التلاجات لقيتها مكنكشة تلج ادخل الكوز اسمع كع..مشيت الماسوره لقيتها قاطعه تقول حححححححححححح..رجعت التلاجة لقيت جردل فرحت دخلت فيه الكوز طلع "رجلة محشوشة" وسخت كوزى واحرجت نفسى ورجعت اوضتى...هاهاهاها
اجمل من يكتب رسالة ..ابوى
كان برسل لى جوابات بقروها فى الطابور
ويرتل القران ترتيلا..
بواصل
|
|
|
|
|
|
|
العنوان |
الكاتب |
Date |
لذاذات ابوى ...أو عشق الانسان الكونى | Tumadir | 10-17-04, 02:59 AM |
Re: لذاذات ابوى ...أو عشق الانسان الكونى | زوزو | 10-17-04, 03:30 AM |
تماضر ام قلبا حاضر | توما | 10-17-04, 05:36 AM |
Re: لذاذات ابوى ...أو عشق الانسان الكونى | توما | 10-17-04, 05:40 AM |
Re: لذاذات ابوى ...أو عشق الانسان الكونى | طلال عفيفي | 10-17-04, 05:58 AM |
Re: لذاذات ابوى ...أو عشق الانسان الكونى | Omer Abdalla | 10-17-04, 05:59 AM |
Re: لذاذات ابوى ...أو عشق الانسان الكونى | لؤى | 10-17-04, 10:53 AM |
Re: لذاذات ابوى ...أو عشق الانسان الكونى | Alia awadelkareem | 10-17-04, 11:40 AM |
Re: لذاذات ابوى ...أو عشق الانسان الكونى | Ibrahim Algrefwi | 10-17-04, 01:34 PM |
Re: لذاذات ابوى ...أو عشق الانسان الكونى | بدرالدين شنا | 10-17-04, 10:13 PM |
Re: لذاذات ابوى ...أو عشق الانسان الكونى | jini | 10-19-04, 09:17 AM |
Re: لذاذات ابوى ...أو عشق الانسان الكونى | jini | 10-19-04, 09:18 AM |
Re: لذاذات ابوى ...أو عشق الانسان الكونى | saadeldin abdelrahman | 10-17-04, 10:40 PM |
Re: لذاذات ابوى ...أو عشق الانسان الكونى | ABU QUSAI | 10-17-04, 11:41 PM |
Re: لذاذات ابوى ...أو عشق الانسان الكونى | samwal ebrahiem | 10-17-04, 11:21 PM |
Re: لذاذات ابوى ...أو عشق الانسان الكونى | عشة بت فاطنة | 10-18-04, 00:47 AM |
Re: لذاذات ابوى ...أو عشق الانسان الكونى | mohammed alfadla | 10-18-04, 00:02 AM |
Re: لذاذات ابوى ...أو عشق الانسان الكونى | حاتم الياس | 10-18-04, 01:02 AM |
Re: لذاذات ابوى ...أو عشق الانسان الكونى | صديق الموج | 10-18-04, 00:42 AM |
Re: لذاذات ابوى ...أو عشق الانسان الكونى | بدرالدين شنا | 10-18-04, 00:48 AM |
Re: لذاذات ابوى ...أو عشق الانسان الكونى | Halema2 | 10-18-04, 02:10 AM |
Re: لذاذات ابوى ...أو عشق الانسان الكونى | السمندل | 10-18-04, 02:40 AM |
Re: لذاذات ابوى ...أو عشق الانسان الكونى | صديق الموج | 10-18-04, 05:31 AM |
Re: لذاذات ابوى ...أو عشق الانسان الكونى | omer almahi | 10-18-04, 06:55 AM |
Re: لذاذات ابوى ...أو عشق الانسان الكونى | Dia eldin khalil | 10-18-04, 06:27 AM |
Re: لذاذات ابوى ...أو عشق الانسان الكونى | ناجى الزبير الملك | 10-18-04, 04:14 PM |
Re: لذاذات ابوى ...أو عشق الانسان الكونى | Rawia | 10-18-04, 05:06 PM |
Re: لذاذات ابوى ...أو عشق الانسان الكونى | عصام عبد الحفيظ | 10-18-04, 05:44 PM |
Re: لذاذات ابوى ...أو عشق الانسان الكونى | عشة بت فاطنة | 10-18-04, 10:35 PM |
Re: لذاذات ابوى ...أو عشق الانسان الكونى | khider | 10-19-04, 12:51 PM |
Re: لذاذات ابوى ...أو عشق الانسان الكونى | Tumadir | 10-19-04, 03:06 PM |
Re: لذاذات ابوى ...أو عشق الانسان الكونى | حبيب نورة | 10-19-04, 03:13 PM |
Re: لذاذات ابوى ...أو عشق الانسان الكونى | nada ali | 10-19-04, 05:20 PM |
Re: لذاذات ابوى ...أو عشق الانسان الكونى | Anwar Ahmed | 10-19-04, 05:54 PM |
Re: لذاذات ابوى ...أو عشق الانسان الكونى | منصوري | 10-19-04, 06:46 PM |
Re: لذاذات ابوى ...أو عشق الانسان الكونى | صديق الموج | 10-20-04, 01:11 AM |
Re: لذاذات ابوى ...أو عشق الانسان الكونى | Tumadir | 10-21-04, 09:36 AM |
Re: لذاذات ابوى ...أو عشق الانسان الكونى | Tumadir | 10-21-04, 09:45 AM |
Re: لذاذات ابوى ...أو عشق الانسان الكونى | تاج السر حسن | 10-21-04, 09:54 AM |
Re: لذاذات ابوى ...أو عشق الانسان الكونى | Tumadir | 10-25-04, 12:42 PM |
Re: لذاذات ابوى ...أو عشق الانسان الكونى | بدرالدين شنا | 10-25-04, 11:52 PM |
Re: لذاذات ابوى ...أو عشق الانسان الكونى | elmahasy | 10-27-04, 09:58 PM |
Re: لذاذات ابوى ...أو عشق الانسان الكونى | Ehab Eltayeb | 10-29-04, 11:05 PM |
Re: لذاذات ابوى ...أو عشق الانسان الكونى | elmahasy | 10-30-04, 05:16 AM |
Re: لذاذات ابوى ...أو عشق الانسان الكونى | Dr. Moiz Bakhiet | 10-30-04, 05:20 AM |
Re: لذاذات ابوى ...أو عشق الانسان الكونى | Dr. Moiz Bakhiet | 10-30-04, 02:47 PM |
|
|
|