|
|
 من قائل هذه الابيات: سؤال وتحية من بدرالدين عجاج لسودانيزاونلاين..
|
اتصل بى الاستاذ الموسيقار بدرالدين عجاج وطلب منى ان اساعده فى معرفة اسم شاعر هذه المرثية..التى قام بتلحينها..على زعم ان كاتبتها هى الصديقة عفاف الصادق حمدالنيل ولكنه عرف من عفاف مؤخرا..انها لم تكتبها..
الموسيقار فى حاجة شديدة لمعرفة كاتب القصيدة حتى يحتفظ له بحقوقه..الادبية والمادية
فمن كان بينكم ايها الاعضاء الافاضل واى القراء الكرام من يعرف كاتبها - وقد قيلت فى رثاء مصطفى سيد احمد-...فليتقدم
ولكم منى ومن الاستاذ عجاج كل الثناء
حيبنا القال لا للغايرين وزن عوده علي الشارع المنبطح هم
نخل حوش الغنا المغبون
مني الراحلين بدون خاطر صدي الروحن صفن بالنم
لسان عبدالرحيم والسره الماشين علي الامشاط
جمر كافر مباريهم يغور قاصد مباريهم
وريحه جلدنا الواقف تفوح يا مصطفي وتنشم
===========================
حبيبنا القال لا للغايرين وزن عوده علي الشارع المنبطح هم
حبيب كل النضاف من جم
ده الوطن البكب في الدم
نسيج وحدك قصاد الكم
برق لافح ,,, وتر هدار,, مطر تم تم
وداعا يا ولد سلفاب .. وداعا نزع .. وداعا كم... وداعا حار
===============
من الام البتسمع فيك من النيل البيفخر بيك
من الحبوبه والخالات من الجار والصديق والعم
من الولد الهو يادوبك وشايلنو
من المضروب وساجننو
من العميان وسايقنو
من الداقش خلا مرزوق
من المجنون وساكنو
من الساكن جحيم الخور
وريحه الموت تفوح منه
من الشارع المطعون وبيصارع
من النخل الصبي وفارع
من الاكل وليداتو وقعد جايع
من المغلوب علي امره
من الماسك علي جمره
من المقفول علي فكره
من الضايع
وداعا يا ولد سلفاب وداعا نوع وداعا كم
ولها بقيه الرجاء الاهتمام منكم
|
|
 
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
العزيزة تماضر
اناقريت وسمعت قصائد كثيرة بترثي الراحل مصطفى سيد احمد ولكن وحقا دي اروع قصيدة مرت على
ويا ريت بورداب الخرطوم يقدرو يوصلو للشاعر المبدع المكاشفي محمد بخيت وينقلو منو المرثية الكتبها هو قبل عامين وقراها لينا في جدة في ذكرى مصطفى ويا ريت ينشروها لينا في البورد
تحياتي لك وانت تجتهدين لنثر الابداع منك او من غيرك
جمال السنوسي
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: mulhim)
|
عمر عبد الله شكرا على المساهمة القيمة
اتمنى ان اجد مزيدا من المتحمسين لنقل مرثيات مصطفى مثلك ويصير البوست "منزلة" لزيارة روحه الشفيفة ولمسة وفاء لابداعه وعطائه غير المنقطع...
نجمة
وملهم
الزمن العلينا ده ، الرفع ليك بوستك ما خلى ليك شى...
كتر الف خيركم ...وان شا الله نرفع ليكم بوستات عرسكم
وخليكم مرابضين لمن نلقى رايحتنا
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: shawgi badri)
|
شوقى بدرى العزيز (براك قلت دايرا حافة من غير استاذ..وعلى مضض اقولها)
الشخص الوسيم راكب الموتر من بانت ده ..ما بتقدر تعرفو لى ..اسمو منو؟؟
الغريبة هنا فى ناس كتيرين بركبوا موتر لكن ما عارفاهم وسيمين ولا لا؟ لانو بلبسوا "كورة" للوقاية ...وكمان هم اكيد ما ساكنين بانت...هههههه
معليش خلينى اضحك شوية على فكرة الوصف ... ما عليك فى حاجات بتضحكنى من "عباطتن" على بس ما اكتر..
لكن شكرا على المعلومة وان شا الله تبقى لينا سبب نلقاه
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
تماضر , شيبا , وباقى العقد الفريد
كم هى جميلة وصادقة تلك الكلمات التى كتب فى رحيل الارخبيل الفنى الرائع مصطفى سيد أحمد , وكم هو أجمل ذلك اللحن العذب الذى حظيت بسماعه من الاستاذ بدر الدين عجاج فى برنامج البالتوك قبل 9 أشهر تقريبا وأحتفظ بنسخه منه .. أرسل لى الاستاذ عجاج قبيل أيام بخصوص نفس الموضع طالبا منى البحث ضمن الفريق العامل للحقيقة وقد أحسست من لهجة حديثه ذلك الحزن المخيم عليه وهو يلحن عمل لانسان ما دون علمه بعد ما تحقق له أنها ليست ل د.عفاف الصادق .. من هذه السانحة الطيبة أشيد بتلك الروح الانسانية العالية لاستاذنا وأتمنى لجميع الموسيقيين والكتاب والنقاد والرؤائين حذو نفس مبدأ عجاج فى إحترام حقوق الغير الادبية والمادية والفكرية .. تسلم يا أستاذنا وأدام الله فى عمرك ... شيبه حاولت الاتصال بك مرارا حتى اليوم بخصوص نفس الموضوع وقد بعثت لك رسالة لكن فوجئت بأن تماضر هى شريكتى فى المهمة الان .. شكرا
ويلا يا شيبه والكل شدوا حيلكم حتى ترجع الابتسامة للاستاذ عجاج
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: wadsolfab)
|
إلى العزيزة تماضر
وإلى كل الرائعين هنا
مع بحر محبتي
وشواطئ كل القصائد
في ذاكرة النجم هواك
في رثاء مصطفى سيد أحمد
شعر: د. معز عمر بخيت
إن غاب بفقدك يا نجمً
فلك ٌيحتضن الأقمار
و سماءٌ تاهت في وطني
و بحارٌ جفّت وديار
لا زال رحيقك يغمرنا
نبلاً و جلالاً و وقار
و سماحاً ينبض إشراقاً
وعبيراً ينضح أسرار
***
مُذ غرب الصبحُ بعينيك
وانطفأت شمس الأعمار
و انشطر الزمن بكفّيك
و توارت كل الأشعار
العشق تحوّل رحالاً
ينهزم بطول المشوار
يلتهب حنيناً أفقياً
يتداعى من خلف ستار
***
(مصطفى ِسيد أحمد) علّمنا
أن نغزل عطر الأزهار
أن ننسج للفرح قميصاً
بخيوط حرير ٍ من نار
كي تهدأ خاطرة أولى
كي يسكن نبض الإعصار
و يموت حريق مواجعنا
ينفجر الحزن و ينهار
***
(مصطفى ِسيد أحمد) علِّمنا
أن نرسم شكل المشوار
و نقود كتائب نهضتنا
في زمنٍ صعبٍ غدّار
علِّمنا شكل ثوابته
كي نشدُد عصب الإصرار
علِّمنا أن الأغنية
ستحارب كل الأشرار
علِّمنا صبراً ينقصنا
و طريق الخير فنختار
بين الأحلام و إن وهبت
للناس جنون الأبقار
تبقى الحرية مذهبنا
و الحق طريق و شعار
فالتحيا شعباً أوجده
و ليحيا عشقك للدار.
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Dr. Moiz Bakhiet)
|
ودسلفاب
يبدو انك من اقارب الرجل الرقيق هذا مصطفى سيداحمد او من بلدو
ولو انه بلدو هو السودان واقاربو كل الناس
لكن مرحب برفقتك فى البحث عن محبه الجميل الذى رثاه ....ونسى ان يوقع
وكلنا امل فى الاعضاء الافاضل عامة وشيبة خاصة
(بينى وبينك انا متهمة بيها خطاب حسن احمد لكن ما لامة فيه)
د. المعز حسن بخيت
الف مرحب بكلماتك الحلوة..ومشاركتك القيمة ..واثرائك لذكرى مصطفى سيداحمد العطرة
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
هذه مرثية محروقة الحشا، كتبها الاستاذ ازهرى محمد على:
ــــــــــــــــ
سلامات يا زول يا رائع
الى انبثاق نفسى عنى - خارجى
الى"مصطفى سيد أحمد"
مدخل أول:
لمتين مِتْيمِّم شَطْر النيل
مُتوقِّى اليابسه ووْاَرد
متوكِّى الغُنيه عصا موسى
بِتْهِش فى غيم الإلفة الشارد
مهدودة القُدرة وفترانة
حَرداَن الضُل البارد
بِتْوجِّل لى يوسف فى البِير
يطْلَع من بَطن البير المارد!
مَدْخل ثانى:
فات الكان بدّينا إحساس بالإلفه
وكان راوينا،
فات الباكي جَرِحنا وناسي جُرحو
ولافّي ورانا مدينه..مدينه
فات الصاحي ونحن نَغِطْ
فى النومه السابعه
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ عواّفي!
سلاماتْ يا خُلاصة الخير الفى الناس
وترياق الزمن المُتْعافي
سلاماتْ يا زول يا رائع
سلاماتْ عَوَّافى
مُحاصَرْ فِيكْ
بسأل عن سكّه تطلِّع مِنَّك
أوسِكّه تودِّي عليكْ
بسأل عن مَخرج منّك وليكْ
زي نَهْر بينْبعُ
وما لاقي مَصَبْ
بِتْمدّد عِشقَكْ من أقصى ضواحي الروح
لي أقصى نواحي القلبْ
يتْكثّف بِسِعةْ إطلاق الرّب
وانا كنتَ بفلِّى القَلْب بسيرتَكْ
سمِّيتك حلاّب الغيم
من ضَرْع الجَدبْ
وظنيتَك مارستَ الفِعل السرِّي
وحَفّظت فحولة النيل
أيام الخِصب
ولمحتَك وانتَ بِتتْمشّى
وترقّص فى حَمَامَكْ
على حُمّة إيقاع الحرب
وتْكَلْكِلْ جِلد الكلمه الحافَّه
لَحبيبه بتفتَح مَجَرى الغُنا فى الدَّم
وتَفلِّس بيان القلب
فيا بنوت الشارع الطاعِم
قُومَن كَبْ!
قومَن للما قَصَّر
فى غناكن ضُمَّه
ولا إتْلوّم بِوراَكَن تبْ!
ولو تَبْقَى السِكّه الجايه ضهَب
وسلاماتْ يا زول يا رائع.
البارح عصفورتكْ
ركَّتْ في البال
رقَصَتْ
وادَتْ عصفور الريد شبَّال
وطارتْ من قولة كَرْ
ما الزول النَهرَ العصفوره
بِحرِّض فى كِلاب الحّر
لابسنى وداخِل فى اللَحم الحي
راصد كلّ البِسْأل عَنْ حالى
حرَّش ضُلّىعليَّ
ونتّف زَغب الخاطره التَّخْطُر على بالي
ومَنَع العصفُوره تَحومْ
إستْجوّب كل الناس البِجُو فى النوم
!ما تْقومْ
يا زول يا رائع ومهمومْ
يا مضيّع ضَيْ عيني وراكْ
واقف
حاحاى للنوم.
يا مْستّف رئةَ الدنيا شهيق
ومُشحتِف روح الخرطوم
كيف حال يا ابوي
كيف حال يا خال
وتعالْ!
إتْفَضَّل على باحة بيتنا الطّيب
ماعون الأطفال
ضمدَّ جراحاتك تعالْ!
من ضلامَاتكْ تعالْ!
من حافة البرزخ تعالْ!
من شرفةْ الملكوت –تعالْ!
أدّينا هينين من صبرُ
السكّه أبعد من مَشيِكْ
والجرح أعمق من حدود الإحتمالْ
السابله والاطفال هِناك
قداَّمك المشوار طويل
والريح وراك
كل البيوتْ
إتشرَّفت لى طَلْعَتَكْ
والوَنَسه ما كِمْلَت معاك
القَرقراب والقهْقَهه
مَينْ سمّى تِرحاَلك غياب!؟
والغيبه بتْزيدك بَهَا
لو يرِتق الحُزن المَصَابْ
كان بَعدك الموت إنتهى
يا أقصى حالات الحضور المُشتهى
يا مُنْتَهَى!
تعال قرِّحنا بس دهشة غُناك الحَي
وحَّيْ من جُرحك الدامي!
وفَتَر حيلَكْ
وحىّ من ضُلّك الرامي!
وحِمِل شيلَكْ
تموت مِتْل الشدر واقف
تموت واقف على حيلَكْ
فيا حْليلَكْ
يا حْليلَك..بِنستنَّاكْ
على صهوة جياد الريحْ
بنِستنَّاكَ!
فى الزمن اللديح القِيحْ
على باب الحلم فى غُناكْ
بِنِستنَّاك!
رحيلك شَلْهَت الدنيا:
ورتّب العالم البهِنَاك
بَستْنّاك!
وانا تانى وراك َشِنْ لاحِقْ؟
دَهَسَتْني فى بُعْدَك
حِدوَ الخوف
الداخله عليّض بالسَاحِقْ
أدِّينى القُدْره التمْنَحني
بِحجمْمَكْ سعةَ الشوف
لو أقدر أطِلْ من شاهق
لو أقْدر ألوّح لعيونك
تَلْمَحنِى
وأنا ضَعفي أمامك فاضحنى
سامحنى!
ما قدرت أطولَكْ
سامحنى!
شُفتَكْ من وجع طَالع
على برزخ ملتقى النيلين
كنتَ هناكَ وحّيدك
وكل الناس اتنين ..اتنين
براك واقف
فى حدْ السيف
براك الما وقف بينْ...بينْ
تغازل حلمك الفارع
فَتح بابين على الملكوتْ
تَسَلِّم على حضرة جلال الموتْ
وتفتح فى الأرِض نفّاج
إذا امتلأ الفراغ بالصوت
فيا باطن الأديم أفتح
براحات الحنين مُشْرَعْ
وأَنْدَهْ لى مُدن شاخت
أنْدَه لأطلال القرى الراحت
بيوتْ فى بيوتْ
تَمْرُق من شِبر مَسَرح
مدن فاضله
وعلم باتساع الحُلْم
بقامةَ يشتهى التابوت
فما لَفَظَ البحر يُونِس
ولا انسدّت
شهِية الحوتْ... ويا زول يا رائع تمشى
بالحسره وتموت؟
وسلاماتْ يازول يا رائع.
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: فرح)
|
Quote: فات الكان بدّينا إحساس بالإلفه
وكان راوينا،
فات الباكي جَرِحنا وناسي جُرحو
ولافّي ورانا مدينه..مدينه
فات الصاحي ونحن نَغِطْ
فى النومه السابعه
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ عواّفي!
سلاماتْ يا خُلاصة الخير الفى الناس
وترياق الزمن المُتْعافي
سلاماتْ يا زول يا رائع
سلاماتْ عَوَّافى
مُحاصَرْ فِيكْ
بسأل عن سكّه تطلِّع مِنَّك
أوسِكّه تودِّي عليكْ
بسأل عن مَخرج منّك وليكْ
زي نَهْر بينْبعُ
وما لاقي مَصَبْ
بِتْمدّد عِشقَكْ من أقصى ضواحي الروح
لي أقصى نواحي القلبْ
يتْكثّف بِسِعةْ إطلاق الرّب
وانا كنتَ بفلِّى القَلْب بسيرتَكْ
سمِّيتك حلاّب الغيم
من ضَرْع الجَدبْ
وظنيتَك مارستَ الفِعل السرِّي
وحَفّظت فحولة النيل
أيام الخِصب
ولمحتَك وانتَ بِتتْمشّى
وترقّص فى حَمَامَكْ
على حُمّة إيقاع الحرب
وتْكَلْكِلْ جِلد الكلمه الحافَّه
لَحبيبه بتفتَح مَجَرى الغُنا فى الدَّم
وتَفلِّس بيان القلب
فيا بنوت الشارع الطاعِم
قُومَن كَبْ!
قومَن للما قَصَّر
فى غناكن ضُمَّه
ولا إتْلوّم بِوراَكَن تبْ!
ولو تَبْقَى السِكّه الجايه ضهَب
وسلاماتْ يا زول يا رائع.
|
سمعت على السقيد بيغنى المقطع ده من قصيدة ازهرى ..الحنينة دى
شكرا عادل على زيادة الحديقة وردتين من عبير مصطفى
وفرح
دى كلماتك براك..وكل سنه واريتك "نصيح"
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
العزيزة تماضر ..
قرأت هذا النص مكتوبآ عام 96 في نادي الدفاع بالحلة الجديدة في ليلة تأبين مصطفي سيد أحمد ..وأكاد أجزم أن كاتبه هو الفنان التشكيلى عبد الواحد ـ لا أتذكر بقية الأسم ـ والذي رسم معظم أغنيات مصطفى .. وعبد الواحد هو أحد أعضاء مجموعة الحبان في بانت ..مما أرجح حديث الأخ شوقي ..ومجموعة الحبان هي مجموعة من الشباب متقاربي الأعمار ربط بينهم حبهم للراحل المقيم ..
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: بدرالدين شنا)
|
ودسلفاب شكرا على حميد الغزير
ايهاب
ومحمد يتقسم؟؟ يلعب باسكت ولا يكلمنى؟؟ زى ما قالت خالدة الجنيد عن منتصر ولدها..يتقسم يتفرج فى التلفزيون ولا يكلمنى ..معليش يا ايهاب ناس يسرى ومحمد ديل ظريفين فى الرد على التلفون لكن لا بكتبو اسم زول لا بتذكرو ...
انا اضرب ..لما ارجع ..ويسال منك الخير..او حاول تانى مسا الليلة
ملامح
فعلا يبدو ان خيط "عبد الواحد" الشاب الوصفو شوقى بدرى وامنت عليه انت ده هو خيط النور..الى حل المشكلة يبقى على التشكيليين واصدقاهم انه يتعبوا لينا ...وكل الثناء لشوقى وليك وللباحثين
بدرالديييييييييين
وا تمالو
جريفاوى ..معليش امس كان "الغسيل" ما شفتك
جيب نمرة فى الايميل...وسمعا وطاعة ان شا الله خير...
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: عبد الله بولا)
|
شرفت يا بولا
بجد شرفت
فدخلتك لبوستن لى ...ما هينة
وطالما جيتنى لى هنا "وقدمك لى بوبراهيم" خلينى ابوح ليك بان وجودك وبت امحمد فى هذا المنبر اثر فيه تاثيرا واضحا وجعل فيه صدى مطمئنا
والله طمنتونا على الحوار والراى والمعرفة ...
ويا حبذتا ..ياعملات زول ما بتذكرو يا حبذتا لو كان حسن موسى سخى وحضر
عشان تكتمل دائرة ما..وتزدهر بشملكم الامكنة
لكن مابينو وما بين النت ساجورا يصرفو الكبير القوى..
اما ما ذكرت من خبر عبدالواحد كمبال الذى اعرفه جيدا ..فما اظن..عبدالواحد فى المغرب بالسنين وليس من "ركبة المواتر" ..لو ما اخاف الكضب..اها كان بتعرف لك عبد الواحدن اخر..الفانا
الا عبد الواحد كمبال سيرتو ما بناباها..سيرة الناس الجميلة ما (بتنوبى)
شكرا لطلتك البهية
هوبفل
الشاعر عرفتو .....اها المساحة الفاضية دى "بانت" ذاتها ولا شنو؟؟
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
عزيزتي نماضر بنت شيخي طيب الذكر والثرى،
تحية المساء و(اظنه عندكُن عصرا بدري. عليك الله دي حَسِّع بلد الزول يقعد فيها؟ الليل فيها عصر؟ واحكي ليك مرة بهذه المناسبة، دحض الحاجة فاطنة "بت فلان" لنظرية النسبية دحضاًقاطعاً وإلقم أينشتاين جبلاً وكشف جهله وحماقته، لدى حضورها للمرة الأولى لفرنسا من ام روابة لباريس رأسا. فما فتئت تُككر عليكن الله دي بلدي ودي ناي دي؟).
ياستي عبد الواحد الأنا اقترحته عليك ليس عبد الواحد كمبال، وإن كان على صلة قربى شديدةٍ به.
عبد الواحد كمبال انا كمان بغباني؟ الزول البقولو ليك دا عكسه تماماً
ماعدا في صفات التضامن والشهامة. دا زول رهيف وحنيِّن ومسالم. شن تجيبو لي صاحبي الزهجي "الشُكلي" الما بصبر على المسخرة. وفي كليهما خيرٌ كثير. والله ذكرتيني صاحبي المسخوت. أمانة مو ظريف. وهو بلا شك من أكثر الناس سخاءً وصراحةً وصدقاً ومحنَّةً ايضاً. إلا أن صفة الرقة الملموسة القاعده بره ديك، حالته متأخرة فيها. وليس عنده نصيب من التشكيل إلا كونه أخو ام الخير. وحتى لا تبقى كَلِمتي شترا وناقصه لا بد أن اقول أن عبد الواحد كمبال هو من أكثر مثقفينا اهتماماً بالتشكيل وتقديراً لأهله وهو شاعرٌ وأديبُ ومسرحي طويل الباع ياحليله. لكن عبد الواحد البقصدو أنا ود عما ليه اسمه عبد الواحد وراق ووليس كمبال. وفي كلٍ خير. عبد الواحد وراق ولدا طويل نحيف، أصفر، شعره ناعم صموت، مبتسم دائما، إلى آخر خصال المبدعين الصالحين. وهو رسامٌ ممتاز، ومصمم ممتاز، وكاتب ممتاز ومستمع مدهش للمحاور وللموسيقى إلخ. عمل بصحيفة "القوات المسلحة" في الثمانينيات بعد الانتفاضة، وربما بالأيام، "وقطعاً" بالميدان كمتطوع، إذا لم تخني الذاكرة في الأخيرتين.
مع كل مودتي لك وللبنيات.
بـــولا
| |
|
|
|
|
|
|
|
|
 Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: atif anees)
|
الأستاذ الفاضل بولا ..الأخت الفاضلة تماضر..
نعم تنطبق الأوصاف التى كتبها بولا عن عبد الواحد ..طويل ورفيع وأصفر اللون ..كان ليلتها يبكي بحرارة حينما بدأت أروكسترا الراحل المقيم مصطفى سيد أحمد عزف أغنية (من بعد ما عز المزار) وكانت قبلها مشاركة من الطفلة ياسمين حضرة أبنة منسق الفرقة وقائدها بأغنية (والله نحن مع الطيور)..بكي عبد الواحد وأغمي على صلاح حاج سعيد ..وبكي الحضور ..
وكان أبناء الراحل سيد أحمد وسامر حضورآ في ذاك اليوم وغنى عاطف أنيس لمصطفي وغنى صلاح ـ أبن أخت مصطفي ـ طيبة ..وعرض عبد الواحد في ذلك اليوم لوحاته التشكيلية التي رسم فيها أغنيات مصطفي سيد أحمد ..وشارك القدال بقصيدتين وهاشم صديق بعدة قصائد ... بالمناسبة ربما يملك عاطف أنيس معلومات أكثر عن عبد الواحد ..خاصة وأنه تشكيلي أيضآ ويغني لمصطفي.
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: malamih)
|
طيب يا ملامح وعاطف انيس نحن الفاضل لينا شنو؟؟
ارجو فعلا ان يكون عبد الواحد (....) التشكيلى (.....) الفى بانت (.....) الوسيم (....) الرقيق (...) الشاب (....) هو عبد الواحد قريب الله ..الكتب وجيدة..
وبين الاقواس هى البراهين المتناثرة التى ذكرها كل مساهم على حدة
الفضل يرجع لكل زول
ومن كان منكم على صلة او اتصال بهذا الرجل الرهيف...فليكمل جميله ويبلغه بامرنا
واذا عرف منه "الاكيدة" يكون بحثكم قد اتى "اكله" كله ..ولم يبق لى الا الامتنان لكم
ولبدر الدين عجاج التحية على بحثه الحقانى ... فى "زمنا" الناس شغالة لفح يمين وشمال فى مجهودات الناس وافكارها ومشاعرها الدفاقة ...
وما اعذب شعره هذا العبد الواحد
وما اصدق مصطفى!!
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
الأخت تماضر و ضيوفها الكرام
مشكورين علي هذا البوست و علي احياء ذكري الراحل المقيم مصطفي ..
الأخ ملامح نعم اذكر هذا اليوم جيداً و أذكر اغماءآت كثيرة أخري .. أشهرها كانت في أول يوم التحقت بفرقة الأستاذ مصطفي و كانت بروفة نهارية في منزل إستأجرة الأستاذ مصطفي للبروفات في الديم .. و كان من بين العازفين الأخوان عبد الرحمن حضرة و الأستاذ عبد الله الملقب بعبد الله فلوت و الأخوان اسامة محي الدين و سليمان سيسي و العم جمعة و الرشيد و عمر الطيب و ايضاً الأخ جمال هاشم عازف البيز الذي علمت بخبر وفاتة مؤخراً رحمة الله و أحسن إليه .. كانت البروفة تحت شجرة النيم الضخمة التي تتوسط حوش البيت الضيق و ترمي بظلالها الكثيفة و كان هناك بعض الشباب يجلسون خلف المرحوم جمال و أمامهم التوصيلات الكهربائية لسماعتي الجيتار و البيز .. و أذكر ان مصطفي طلب منا أداء أغنية الحزن النبيل لآن لدية بعض الملاحظات و التعديلات و ساعتها تدخل عبد الرحمن حضرة قائلاً – لايمكن أداء هذة الأغنية الآن – و بين اصرار مصطفي و إصرار حضرة كنت في حيرة من أمري و أخيراً إستجاب حضرة لرأي مصطفي قائلاً لمصطفي – لو حصلت أي حاجة حا تكون أنت المسئول -. و بالفعل بدأنا الأغنية و عندما وصلنا الي مقطع ندمان أنا ابداً و حاتك عمري ما شلت الندم ..سقط أحد الحاضرين علي سماعة المرحوم جمال في حالة إغماء .. فأوقفنا الأغنية و هرعنا لإسعافة .. في أول الأمر ظننت انة صعق بكهرباء أحد أسلاك التوصيلات المرتمية أمامة و لكن عندما سمعت حضرة يقول لمصطفي شايف يا مصطفي دي ثالث مرة تحصل لنفس الشخص و في نفس الأغنية و نفس المقطع عشان كدة انا قبيل قلت ليك الحزن النبيل دي مافي داعي لتوقيعها الآن.
أما بالنسبة للتشكيلي عبد الواحد فإسمة بالكامل هو عبد الواحد محمد خير و يقيم حالياً في مدينة Johnson City في ولاية Tennessee الأمريكية و سأتصل به اليوم لمعرفة مدي تورطة في كتابة المرثية الرائعة و سآتيكم بالخبر اليقين .. و بالمناسبة عبد الواحد عضو في البورد و لكنه إنقطع لفترة طويلة نسبة لبعض المشاكل في جهاز الكمبيوتر الخاص به.
الصاوي
| |
|
|
|
|
|
|
|
|
 Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: elsawi)
|
شكرآ ليك يا الصاوي ويا دوب عرفتك من الصورة ..وكيف حالك وأحوالك يا حبيب .. وكل سنة
وأنت طيب ..ولى عودة لذلك اليوم ..وذكرى الراحل المقيم العطرة ..
تماضر ..كل سنة وأنتو طيبين ..وشكرآ للمجهود والقصيدة ...وجد عندي مداخلة طريفة عن عبد الواحد كمبال وصدقي كبلو في أتحاد الكتاب عام 86 ..طبعآ يا تماضر تكوني شافعة الأيام ديك ...وعيني باردة ..
أستاذي بولا كل عام وأنت بخير وأرجو أن لا تكون الأيام
قد أستوت لديك ..تقبل تحايا الأخ محمد بابكر(البو)
وبقول ليك (الكمانيزا كيف) وضحك ..طبعآ أنا مسطح .
.. ـ توقيع بت المنا بت مساعد ـ
ودمتم ...
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: malamih)
|
فعلا يا ملامح كلامك صاح
اول مرة اتعرف على الصاوى ..
وشابكاه الساوى الساوى واعاين للصورة ما اعرفو
...اعتذارى العميق ياسيد ..الصاوى ...انت زول اخونا مرة واحدة وشفتك فى بيتنا مع الصادق ...
اما عن حضور الشاعر عبد الواحد للبوست فلاشك انه مدعاة منا للترقب والانتظار الملون
اما انت يا ملامح فانا فى انتظار اخر لقصتك التى اتهمها بالتشويق...نسبة لابطالها الضاربين فى الجمال
واذا سالت عن عمرى ان ذاك ...فدعنى الفت نظرك الى اننى لى اليوم العلينا دة
شافعة "بالطرحة" خليك من ذاك الزمان الغابر...
وتوقيعك زاد الطين بلة
على احر من الشظى
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: elsawi)
|
عبد الواحدك يا الصاوي طلع ما كتبها...يبقي نعصر علي عبدالواحد التاني ...وبعدين يا تماضر وبدر الدين عجاج...مش انتو نبهتوا ما فيه الكفايه...وشهدتوا هذا البورد...تاني مافي عوجه تب...يعني اي عبدالواحد بعد دا يطلع يقول حقتو غالتوه عديل كده...
هسّي حليل موسي الكتبها منو؟ ومناحات كتيره حايمه ما عندها سيد...
واغلي من لؤلؤة بضة صيدت من شط البحرين كابلي يغني فيها من سنة كم وستين وبرضو ما عندها سيد....سمع اضاني دي عاما اول جاء البحرين نبّه عليها قال لقيتها في مجلة العربي وشاعرها بحريني وفي ندوه مشهوده كبيره فيها شعراء بحرينيين كتار...مافي زول قال حقتي...
وبردت للكابلي....
دحين ادّوها مريم محمد الطيب والله ايثار علي طه...مافي زول بيقدر...
يحاججن بعد دا....
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: nazar hussien)
|
Quote: دحين ادّوها مريم محمد الطيب والله ايثار علي طه...مافي زول بيقدر...
يحاججن بعد دا.... |
اديناهن...مريم وايثار يستاهلن اكتر من قصيدة وسيدها رايح على وزن "كرورية وخيتها رايح"
شكرا الصاوى على مثابرتك والتحية للشاعر عبد الواحد ، ورده "الفاحم" اتمنى ان اراه قريبا معنا هنا فى البورد (وما خاشى فى خلاف مع اى زول)
ملامح قصتك وينها؟؟
الصاوى ما شايفاك قبلت اعتذارى لعدم التعرف على ملامحك من الصورة الاولى...
تانى شنووووو؟؟
حنبدا نفتش من جديد..غير كده فى شنو تانى...
المهم نزار يجيب لينا اسم شاعر حليل موسى باقرب فرصة...ولا نطالب بتجميد عضويته فى القطب المتجمد الشمالى...
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: صديق الموج)
|
الأخت تماضر
كل سنة وانتي طيبة
والتهنئة ايضا لكل الاخوان والاخوات المشاركين في البوست
وتحية للاستاذ عجاج وهو يبحث عن شاعر القصيدة
ربما يكون الشاعر هو الفنان التشكيلي قريب الله محمد عبدالواحد وهو شاعر وتشكيلي وقاص له العديد من الاعمال المنشورة في الصحف - خاصة صحيفة الخرطوم- وقد تغنى له الفنان الراحل مصطفى سيد احمد بأغنية " وجيدة"
وكان يقيم في السعودية وعاد منها قبل سنوات الى السودان
يمكن الوصول اليه عن طريق صحيفة الخرطوم
| |
|
|
|
|
|
|
|
|
|
Re: من قائل هذه الابيات: سؤال وتحية من بدرالدين عجاج لسودانيزاونلاين.. (Re: Tumadir)
|
العزيزة تماضر
يا أختي عذرك اكثر من مقبول رغم انك ما عملت حاجة تستوجب العذر و الله لا جاب الأعذار و ما يسبق الأعذار من فعل بيننا .. سعدت جداً بتعرفك علي ملامحي .. و حقيقة الصادق صديق عزيز و تربطني به مودة و هوايات مشتركة من أيام الأهلية العليا و أيضاً الوافر ضراعو .. أتيت الي منزلكم كثيراً بصحبة الصادق إلتقيتك خلالها مرة أو مرتين أذكر منها يوم العزف المنفرد .. و التقينا ايضاً في واشنطن مرة أيام حضور دكتور الشفيع خضر ..
لك و لآل جبريل قاصيهم و دانيهم التحيات النواضر و الود المقيم..
الصاوي
| |
|
|
|
|
|
|
| |
Tumadir
Ridhaa
بدرالدين شنا
Kostawi
جمال السنوسي
ترهاقا
Omer Abdalla
mulhim
shawgi badri
sheba
wadsolfab
Dr. Moiz Bakhiet
Adil Osman
فرح
Ehab Eltayeb
Ibrahim Algrefwi
nazar hussien
HOPEFUL
عبد الله بولا
طلال عفيفي
Raja
atif anees
elsawi
صديق الموج
فيس بوك
تويتر
انستقرام
يوتيوب
بنتيريست