|
|
 اقتــــل مثـقـف..............تكــســـب ركـشـــة
|
انت يا حاج النور سمعت النضم دا؟.....قالو تقتل أي مسقف.... يدوك مليون....مليون دينار.. وشفت جنس الرخصة دي....عليك الله صدام اغلا منهم..والله جنس نضم....غايتو بس اسكت ساكت.........وانت قايل شنو؟ يا حاج النور.... الناس ديل بدل ما يبقو في قتل رقبة ودم..... يكوسو للمسقفين ديل....وكلو واحد يدوهو المليون دي....ويقولو لو..... خلي نضمك البتسوي فيهو دا......عليك امان الله يكضم كضمي تاني ما يقول بغم......حسي انا ماني مسوي فيها مسقف وقدر مافي بيت بكا.... لامي في الجماعة ومشهيهم العافية؟.... ونضم كبار كبار...واحشر في نصو كلمتين اللات انجليزي.؟...ان ادوني خمسمائة الف بس...... تاني عند اهلي مع مرتي ما انضم.......
وبعدين يا حاج النور المسقفين واضحين زي عين الشمش....... اول حاجة... تلقاهو.... سارح....وماشي ينضم براهو....ويهرج..مرة مع سيد البيت....ومرة مع سيد الدكان.....ومرات كتيرة مع الحكومة....ويتحلف عليها... ويحلف بالتكسرو انو ما يخليهم ويجيب حقو..... وهو وحات شيخي كضاب كضبا يقلب البيعة......وبعدين المسقفين ديل كلهم مشعّفين...وشعر راسهم دا اصلو ما بيحلقوهو......حتى الناس العندهم صلعة تلقاهو ما بيحلق باقي الصويفات البي جنبه....الغريبة يا حاج النور المسقف تلقاهو ما عندو ولا تعريفة...ومفلس وعينو طالعة...وينضم في الاقتصاد...والبلد لازم اقتصادها يصلح...ولابد من عدم الارتباط بالدولار...والارتباط باليورو......دحين الدولار واليورو والارتباط بهن دا بتعرفو يا حاج نور؟.....ما اظنك مسوي....نخرتك الكلها شعر من جوا دي...كان لقوها ناس الموية وصفو لنا مويتهم الكلها طين دي...
وبرضو تلقى المسقف وقت يقعد يغني..ما بيغني الغنا البتعرفو انتو ديل.......لا لا.... غناهو نضرو براهو......امونة ساعة المغربية....جات شايلة كورية....والكورية فيها لبن..واللبن غني بالبروتينات......... بتعرف البروتينات يا حاج النور؟.....ما اظنك...عامل شعر راسك الشايب وسبيبي ....وديمة عرقان زي ضهر الحمارة.....
حسي انا يا حاج النور....لي كم يوم كدي...بفكر في النضم دا.... والله عندي برندة.... دايراعرشها لي سنتين ماني لاقي لي قروش......وبعدين يا اخي داير شئ اكل رزقي منها......وما يتقطع...وقدر ما قلت الم لي قروش اشتري لي ركشة ما قدرت...........حسي بيني ويبنك....من دربي دا....وشايل الخرتوم....امشي اكوس كان اللقى لي مسقف مسقفيّن... اكتلهم.....واتم برندتي دي ....واشتري لي ركشة...... واأجرها...للوليدات ديل .....واعيش عليها.....بتعرف الركشة يا حاج النور؟ ما اظنك..... عامل شنبك الكبير دا.....التقول مسقف...
|
|
 
|
|
|
|
|
| |
سجيمان
فيس بوك
تويتر
انستقرام
يوتيوب
بنتيريست