|
|
 ماذا تعرف عن احمد فؤاد نجم
|
قصيده كلب الست
في الزمالك من سنين،وف حمى النيل العظيم،قصرمن عصر اليمين،
ملك وحده م الحريم،صيتها اعلى م الآذان،يسمعوه المسلمين
والتتر والتركمان ،والهنود والمنبوذين .
ست فاقت ع الرجال في المقام والاحترام
صيت وشهره وتل مال،يعني في غايه التمام،
قصره يعني هيه كلمه، ليها كلمه ف الحكومه
بس ربك لجل حكمه قام حرمها م الامومه
والامومه طبع ثابت جوا حواء من زمان
تعمل ايه الست جابت فوكس رومي وله ودان
فوكس ده عبقال املتك عنده دسته خدامين
يعني مش موجود في عيلتك شخص زيه ياسماعين
واسماعين دا يبقى واحد م الجماعه التعبانين
اللي داخو في المعاهد والمدارس من سنين
حب يعمل واد فكاكه ويمشي حبه في الزمالك
والقيامه والفتاكه يرموا طبعا ع المهالك
عم سمعه من قيامته حب يعمل فيها فله
بعد ما الوظ بيجامته اشترى حته مجله
قول مشي يقرا ف حكايه من حكايات الغرام
واندماجه في القرايه خلا مشيه مش تمام
ع اليمين يحدف بعيد خطوتين ويروح شمال
لمحه فوكس من الحديد قال دا صيد سهل وحلال
هوب نط ف كرشه دوغري جاب بجامته لحد ديلها
اسماعيل بدال مايجري قال يارجلي رجلي مالها
بص شاف الدم سايح من عاليها ومن واطيها
وياللي جاي وياللي رايح المجله مش لاقيها
حبه واتلموا الظنايا اللي هما البوابين
والهكايه والروايه قال لهم دا كلب مين
(البوابين... من بلاد النوبه وينطقون حرف الحا هاء )
كلب مين ماكلب ماكلب مينشي سمعه لبخ حبتين
قال له واحد منهم امشي الي جابك عنده مين
قال دا شارع يامواشي والجميع بيمر منه
اللي راكب واللي ماشي مستحيل نستغنى عنه
كلمه من دا وكلمه من دا ظاطو واترسمت فضيحه
قول نهايته والقصد من ده اسماعين اكل الطريحه
راحوا قسم الشرطه طبعا والنيابه كفيله بيهم
واترموا في الحجز جمعا لما ييجي الدور عليهم
حبه والشاويش امين قال سعيد النقشبندي
قام غريم عم اسماعين قاله محسوبك يافندي
قام سي سمعه يروح معاه الشاويش قال غور بدمك
وفوق قفاه كف طرقع ... داهيه ف امك
تفتكر يفضل سي سمعه قد ايه في القسم نايم
استضافه الحجز جمعه يابلاش آدي العزايم
شاف بلاوي ماتتحكيش م الديابه المسجونين
قال ياعالم ياشاويش يانيابه يامسؤوليين
خلصوه بعد المناهده جثه من جحر الديابه
هيه يمكن ساعه واحده كان في مكتب النيابه
قال له مالك ياسماعين.. قال له زي البمب مالي
قال له عضك فوكس فين قال له سيبني اروح لحالي
انت شوف سي فوكس يمكن خد تسمم غصب عني
الوكيل قال برضه ممكن والشاويش قعد يغني
انت فين والكلب فين انت قده يااسمماعين
طب دا كلب الست يابني وانت تطلع ابن مين
بشرى لصحاب الديول واللي له اربع رجول
بشرى لا سيادنا البهايم من جمايس او عجول
اللي صاحبه ياجماعه له غناوي في الاذاعه
راح يدوس فوق الغلابه والنيابه بالتباعه
انت تسوى في النيابه تسعميه م الغلابه
طب ياريت يافوكس كنا ولا تربطنا القرابه
هيص ياكلب الست هيص لك مقامك في البوليس
بكره تتولف وزاره للكلاب ياخدوك رئيس
__________________________
بشرى لصحاب الديول واللي له اربع رجول
بشرى لا سيادنا البهايم من جمايس او عجول
اللي صاحبه ياجماعه له غناوي في الاذاعه
راح يدوس فوق الغلابه والنيابه بالتباعه
انت تسوى في النيابه تسعميه م الغلابه
طب ياريت يافوكس كنا ولا تربطنا القرابه
هيص ياكلب الست هيص لك مقامك في البوليس
بكره تتولف وزاره للكلاب ياخدوك رئيس
|
|
 
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
البطل الثائر ملهم الجماهير الفاجومي الشاعر الحبيب
حفظه الله وامد في عمره احمد فؤاد نجم
قال عنه الشاعر الفرنسي الكبير لويس اراجون
ان فيه قوه تسقط الاسوار
واسماه الدكتورعلي الراعي الشاعر البندقيه
الرئيس الراحل السادات يسميه الشاعر البذيء
ولقب بآخر الصعاليك المحترمين
وبشاعر تكدير الامن العام
من مواليد مصر شرقيه
1929 ولد عام
بسبب شعره سجن ثمانيه عشر عاما
انسان بسيط قلبه ابيض قنوعا شجاعا
المجموعة الأولى
استغمايه
الإضراب
أبو العلا 90
بابلو نيرودا
عطشان يا صبايا 2
الشاعر الأكره
هلال العيد
شقع بقع
نيكسون جاء
رجعوا التلامذة
الانتخابات
كلمتين لمصر
السيما
جائزة نوبل
يعيش أهل بلدي
حارتنا
سلام مربع
الغربة
جنوب لبنان
موال فلسطيني مصري
الأوله بلدي
أصل الحكاية .... ولد
شوبش طرزان
يا حبايبنا
على الضريح
عدى الهوي
البتاع
نويت أصلى
على حسب وداد جلبي
الممنوعات
صبر أيوب
الخالق الناطق
الأقوال الماسورة
فى المعتقل
عشق الصبايا
الهلوسة
باحبك
اطلع من دول
نواره
سلام للارض
الشربة العجيبة
عم السيد
تذكرة مسجون
الطنبور
الخواجة الامريكانى
الصمت
فزورة
الأخلاق
رساله رقم 1
ع المحطه
صرخة جيفارا
انتظار
الحاوي
عيون الكلام
المجموعة الثانية
بهيـة
الثوري النوري
حرب الشعب
حلقه ذكر
وحدك
غنوة للشباب
غزة فى قلب العرب
الكلمات المتقاطعة
العقد
اليويو
القواد الفصيح
ميكي
رسالة إلى السجن
يا مرحرح
يا عرب
المرجيحه
الشيخ عاشور
ورقه .. من ملف القضية
بقرة حاحا
شيد قصورك
حسبة برما
نيكسون بابا
التضليل
محلا القصايد
بلدي وحبيبتي
عبدالمنعم رياض
منشور وطني علني
دعوة
يا مصر
دللي الشيكاره
الجدع جدع
انا رحت القلعة
على الربابة
ساعة العصاري
الشركسي
هلا بالحب
بيان هام
النداله
إصحى يا مصر
أول كلام
شجرة لو
هما مين
دعاء الكروان
تاجر
أخر الكلام
يا فلسطينية
بوتيكات
كلب الست
الحمدلله
بلح أبريم
الخط دا خطي
ديستان
مرّ الكلام
النيل عطشان
المجموعة الثالثة
أدي مصر
المسحراتي
أبو العلا 90 الخاتمة
عنيكي
سايجون
هوشي منه
فات الهوى
الشكر لك العمدة 4
فتحت باب من ابواب
الشعر الكلمة البندقيه
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
شكراً ليك علي هذه المعلومات
و بدوري بهديك القصيدة الجاية
البتاع
يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !
وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول
__________________
متي استعبدتم الناس و قد ولدتهم امهاتهم احرارا
| |
|
|
|
|
|
|
|
|
 Re: ماذا تعرف عن احمد فؤاد نجم (Re: 3omda4)
|
الاخ عمدة4
شكرا على تعريفنا
بهذا النجم النجم
انا اول مرة اشاهدة كان مستضاف فى برنامج خليك بالبيت
وكان روعة فى اللقاء والالقاء وكانت معه بنته الصغيرة
وبذكر القى قصيدة البتاع كانت متعة
وشكرا
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
شكراً ليك ابوقوته
ونجم مبدع فوق التصور
فانا ادعوك ان تقراء عنه و انا متاكد انك لن تندم
ولك الشكر مرة تانيه
وهذه القصيدة مهداء لك شخصياً وللجميع ايضاً
بيان هام
هنا شقلبان محطة اذاعة حلاوة زمان
من القاهره ومن كردفان
وسائر بلاد العرب
واليابان
ومن فنزويلا
وايضا ايران
ومن اي دار
أو بلد مستباحه
بفعل السياحه
مع الأمريكان
هنا شقلبان
محطة اذاعة حلاوة زمان
نقدم اليكم بكل الللغات
مراسح وسيما وجميع الفنون
صحافه ومنابر
وتليفزيونات
وخطبا ف جوامع
وجبنه و زيتون
ونقزح ونركب جميع الموجات
ونبحث ونفهم
في كل الشئون
ودايما نلعلع في كل الحالات
ولاحد سامع
ولايحزنون
وتسمع ماتسمع
دا ما يهمناش
لأن احنا أصلا
بناكل بلاش
فخليك في نفسك
وماتخليناش
نسلط عليك القلم
واللسان
***
هنا شقلبان محطة اذاعه حلاوة زمان
يسر الاذاعه
ومايسركوش
بهذي المناسبه
وما بندعيكوش
نقدم اليكم
ولاتقرفوش
شحاته المعسل
بدون الرتوش
شبندر سماسرة بلاد العمار
معمر جراسن للعب القمار
وخارب مزارع
وتاجر خضار
وعقبال أملتك
أمير الجيوش
ماتقدرش تنكر
تقول ما اعرفوش
ما تقدرش ايضا
تقول ما اسمعوش
شحاته العسل
حبيب القلوب
يزيل البقع
والهموم والكروب
يأنفس
يأفين
يبلبع حبوب
ويفضل يهلفط
ولاتفهموش
وتفهم ما تفهم
دا ما يهمناش
لأن انت فاهم
وعامل طناش
ح تنكر وتحلف
ح أقول لك بلاش
ح تلعب دماغنا
وتتعب كمان
***
هنا شقلبان
محطة اذاعه حلاوة زمان
لأن المخبي ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبه
وعن كيت وكان
وعن محسوبيه
وعن ألعبان
ظهر في المدينه
كأنه طوفان
وغرق مراكب
وسوح غيطان
وبعض المراكب
ح تغرق كمان
وأزمة مساكن
وأزمة أمان
وعالم بياكل
في عالم جعان
وريحة مؤامره
في جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما أبلغونا
جميع الودان
لهذا وذاكا.. وتلكم كمان
نقدم اليكم
عروسة وحصان
شحاته المعسل
وهذا البيان
***
هنا شقلبان
محطة اذاعة حلاوة زمان
بسم الله
سلام عليكم
وسلمون وموز
وأما المسائل
فهنجف ولوز
فيا اخوتي
ويا اخوات
اليكم بياني
كما هو آت
***
جميع المسائل
تمام التمام
وكل الكلام دا
مجرد كلام
فصبرا جميلا
ولاتقلقوش
وشغل الضغاين
أنا ما اقبلوش
مافيش أي حاجه
على الطلاق والعتاق بالتلاته
مافيه اي حاجه
وقدر كمان ان فيه أي حاجه
مافيش اي حاجه
ما لوش أـي لازمه الكلام
واللجاجه
وعيب ان عيل يسوق السماجه
ويعمل لي باللو
ويعمل ديباجه
أنا بطبعي ضد السماسره الكبار
بحكم المنافسه
وحكم الجوار
لكن مش ف طبعي
اني أعمل فضيحه
لواحد زميلي
هبش كام صفيحه
ما كل الزمايل
بتهبش صفايح
وكل اللي جاي
ماشي زي اللي رايح
فيا ايها الشعب
صهين تفلعص
مسا التنفس
مساء الروايح
***
أخويا الامير بزرميط الايراني
بعت لي السنه دي
عزمني ودعاني
أنا قبلت طبعا
ورحنا العزومه
وكانت وليمه
ماتحصلش تاني
دا ايه المحمر
وايه المكمر
وايه المشمر
وايه الصواني
وأنا دماغي تعبت
ولفت صراحه
من الفخفخه
والهنا الأصفهاني
هناك يعني مثلا
اذا شربت طافيه
تمز بكوارع
وبسطرمه ضاني
ماشفتش هناك
ناس بتحقد عليهم
ولاناس بتشتم
فلان الفلاني
لأنه اشترى عزبتين
من شطارته
وحكمة ارادته
وطلع مباني
وبعد الوليمه استلمنا الهدايا
مفضض
ومدهب
وقز وقيشاني
وطبعا أخويا الأمير
قال لي حاجه
ح اقولهالكو طبعا
اذا الوقت ناسب
ح يطلع لي عيل
بدون اي حاجه
ويعمل لي فلحس
ويقعد يحاسب
دا حقد اشتراكي أنا مااقبلوش
ولو هو ابني انا ما اعتقوش
***
كلام عن سماسره
كلام عن دعاره
حاجات مش صحيحه
جمل مستعارة
وعايزين يخلوا البلد
أردغانه
وعايزيني اسيب البلد
من زمان
وانا مش ح اسلم
واسيب الامان
ولا بالبوليس والنيابه كمان
فيا ايها الشعب
كمل جميلك
وصبرا
والزم حتيجي المصاري
وتأكل وتشرب
تبع ما يآتيلك
وتغرق في بحر العبيد والجواري
وترسم حياتك
حسب مايرائيلك
وتملا الحواري
فساقي وقصاري
تسبح بحمدك
وتشكر جميلك
وفضل الزباله
وطفح المجاري
ختاما سلاما
وآخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتي رئيسا
وأبا
وجوز
______________
متي استعبدتم الناس و قد ولدتهم امهاتهم احرارا
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
فى احدى معارض القاهرة للكتاب علن سوف يشارك الفنان المناضل الراحل الشيخ امام الذى تغنى بروائع احمد فؤاد نجم ورفيقه فى المعتقلات لم يشفع للشيخ امام انه ضرير ان يذج به فى السجون
وقبل مواعيد تلك الجلسة مع الشيخ امام فى صالة من صالات معرض الكتاب وصلت القاعة قبل ميعاد الجلسة بثلاث ساعات وقد تم اغلاق الصالة قبل مجى الراحل الشيخ امام بساعتين وتغنى باروع قصائد نجم وقد كان حضور الجلسة من الشباب مع ان الشيخ امامغير معروف عبر وسائل الاعلام لانه ممنوع
ذكرنى ذلك بجلسات الاستماع التى كنا نحضرها مع الراحل مصطفى سيد احمد
واحمد فواد نجم فى قصيدة
شقع بقع
أنا الاديب ولا تعرفنيش
تقرا لى
لكن ما تشوفنيش
كلامى لا هو مدهون ورنيش
ولا المعانى عليها غبار
شقع بقع ياديل الفار
,,,,,,,,,,,,,
شاشعب مصر ياخم النوم
ماتفوق بقى
وتشوف لك يوم
الثورة قادت فى الخرطوم
وانت اللى نايم بالمندار
شقع بقع ياديل الفار
ياشعب ثور
داهية تسمك
وشيل أصول أسباب همك
عصابة
بتمص فى دمك
ولأسم قال ظباط احرار
شقع بقع ياديل الفار
......
الشيخ امام
قال كلمة حق
الست ثومة
قالت لك لأ
وابو النجوم
على ودنه انزق
فى المعتقل
والدنيا نهار
شقع بقع
ياديل الفار
...............................................
هما مين
هم مين واحنا مين
هم الامراء والسلاطين
هما المال والحكم معهم
واحنا الفقرا المحكومين
حزر فزر شغل مخك
شوف مين فينا بيحكم مين
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
شكراً سينجاوي علي المعلومة المفيدة و نتمني منك المزيد
و الاخ امبدويات شكراً علي الوب سايد
ولكم مني المذيد
موال الفول واللحمة
عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول
__________________
متي استعبدتم الناس و قد ولدتهم امهاتهم احرارا
| |
|
|
|
|
|
|
|
|
 Re: ماذا تعرف عن احمد فؤاد نجم (Re: 3omda4)
|
الكلمات المتقاطعة
بدل الكوره
ولعب الفوره
وسط الغاغه
والبرجاس
تاكل زغده
تاكلك دبشه
تملا دماغك
بالقلقاس
ياللا نفكر
حتة لعبه
زي السكر
بالأناناس
كلمه ومعنى
رأسي وأفقي
يحكوا حكاية
تهم الناس
قرب قرب
ياللا نجرب
شغل مخك
ولا تحتاس
_ واحد رأسي؟
رأسي بتضرب
تقلب
تشغي بالأفكار
مسرح
والأفكار هوامه
في الدوامه
ليل .. ونهار
أبيض إسود
أخضر ..أحمر
بارد .. حامي
جنه ..ونار
سيبك سيبك
من تغريبك
بكره الليل
يطلع له نهار
_ اتنين رأسي ؟
حاكم حالي
كان طرطور
خان الدار
والجار
والنور
_كل ما فينا من حكام
نازلين
من خنفس .. وكافور
كذبوا _ أفكوا
قتلوا _ سفكوا
غدروا _ خانوا
فضحوا _ هتكوا
_ واحد أفقي ؟
شاعر داعر
ميت .. حي
طالع .. نازل
رايح .. جي
مادح سيده
مادد إيده
لايشوف حاجه
ولا يقول شي
_ كل ما فينا من شعارير
خونه
وهتيفة .. وخنازير
تجروا _ باعوا
لمعوا _ ذاعوا
أفلوا _ غربوا
تاهوا _ ضاعوا
_ اتنين أفقي ؟
شعرا تلاته بكلمه باروده
ناظم
بيرم
بابلو نيرودا (1)
_ كل ما فينا من عشاق
داقوا ما بينا
من أشواق
حبوا _ عشقوا
شبوا _ نشأوا
مروا _ فاتوا
غرسوا _ رشقوا
_ رأسي وأفقي ؟
شاعر واعر
لازم جي
يملا عيون العالم ضي
كل ما فينا من أحزان
تستنظر عاشق فنان
يأتي _ يقبل
طائر _ بلبل
حرفي _ فني
يشدو _ يغني
وطني سكني
أهلي .. قومي
منكم فيكم
صحوي نومي
أنتم فكري
أنتم عملي
منكم توقي
فيكم أملي
هيوا _ لبوا
ثوروا _ هبوا
يشرق _ يسطع
صبح _ مطلع
يزرع _ يبني
نحصد _ نجني
نمرح _ نلعب
نشدوا _ نغني
واحد رأسي
نشدوا نغني
اتنين أفقي
نشدوا نغني
تالت خامس
عاشر ميه
نشدوا نغني
نشدوا نغني
نملا العالم
خضرة عفيه
نشدوا نغني
نشدوا نغني
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
تذكرة مسجون
الاسم : صابر
التهمه : مصري
السن : اجهل اهل عصري
لرغم انسدال الشيب ضفاير
من شوشتى
لما لتحت خضري
المهنه : وارث
عن جدودي
والزمان
صنع الحضاره
والنضاره
والامان
البشره : قمحى
القد : رمحى
الشعر : اخشن م الدريس
لون العيون : اسود غطيس
الانف : نافر كا لحصان
الفم : ثابت فى المكان
واما جيت ازحزحه
عن مطرحه
كان اللى كان
جهه الميلاد: فى أي اوضه مضلمه
تحت السما
على ارض مصر
من أي دار وسط
النخيل
مطرح ما يجري النيل
ما دام ما يكونش قصر
الحكم: من سبع تلاف سنه
وانا راقد سجين
اطحن على ضراسي الحجر
من الضجر
وابات حزين
الاسباب : سالنى سائل
حبستك طالت
وليه
ولانى طيب
وابن نكته
ما فيش مخالفه ركبتها
ضد القانون
لانى خايف
والقانون سيفه ف اديه
تسأل عليّ المخبرين
فى أي حين
تسمع وتفهم قصتي
الف وبيه
الاسم صابر ع البلا
ايوب حمار
شيل الحمول من قسمتى
والانتظار
اغرق فى انهار العرق
طول النهار
والم همى فى المسا
وارقد عليه
عرفت ليه ؟
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
الشربة العجيبة
البلى بم بم
والبلى باه
قال لك ايه
قال لك اه
شربه عجيبه
من تركيبه
بلدي
يا بلد البلي بلي باه
قال لك ايه
قال لك اه
شوف يا موطن
شوف يا امير
واسبق شوفك بالتفكير
ناس بيقولوا السر ف بير
ادى البير
وادى غطاه
والبلى بم بم
والبلى باه
قال لك ايه
قال لك اه
قال لك
اكل الفول بيقوت
قال بيقوت
قال لك
حشو المعده يموت
قال لك
صهين
قال لك فوت
كل دا كدب
الناس كا شفاه
زى ما كشفوا
البلى بلى باه
قال لك ايه
قال لك اه
أي مواطن يا ولداه
زاده الفول
لازم تلقاه
عندهالبنكرياس
بطال
والامساق
فوق الاسهال
عنده الرهقة
عنده الدوخة
عنده انيميا
عنده عيال
قال لك
ثم الجهل مصيبه
مولف ويا العيا
تركيبه
تشرب منها
تعطش تانى
تشرب
تعطش
تشرب تاني
تعطش تشرب
خمسه ف سته
ميه نار
لو طالت جته
لازم تلحس
اثمن حته
يعني المخ يا خلق الله
ادي البير
وادي غطاه
والبلي بم بم
والبلي باه
قال لك ايه
قال لك اه
قال لك تصبر ع المكتوب
زي ما صبر النبي ايوب
يعني
تسلم للميكروب
يا خد رزقه
بفضل الله
يفضل ينحل وبرك لما
تتفر فط من وسط اللمه
خايخ نخب السوس في عضاك
خلا قوايمك
ما هي شايلاك
ويعالجوك الناس بالصبر
مع انك عيان بالصبر
قومك صبر
ونومك صبر
لحد القبر ياحول الله
وحياتك من الدار للنار
تتولف عند العطار
يسقيك الحكمه ف اشعار
ويركب م الصبر دواه
وتقربع
والداء عمال
ف عضام الابعد نحال
وتخلف للبؤس عيال
وبهيه صيبه يا ولداه
ادي البير
وادي غطاه
والبلى بم بم
والبلي باه
قال لك ايه
قال لك اه
بعد الكشف بميكرسكوب
شفنا التوب
وما تحت التوب
تشكيله امراض عشناها
واليكم فى الاتي
دواها
وصفه عجيبه من تركيبه
بلدى
يا بلدى البلى بلي باه
قال لك ايه
قال لك اه
وجع الراس ح نعالجه بايه
قال لك تدى الناس القوت
قال لك طب والجهل يا بيه
قال لك سيب الكلمه تفوت
طب والكلمه تفوت ازاي
قال لك لما الضلمه تموت
طب والضلمه تموت ازاي
قال لك لازم بالبنوت
والنبوت حنجيبه منين
قال لك لما نهز التوت
قال لك قدر خفنا نهز
قالك
نشرب صبغة يوت
ح تطهر ايوب من صبره
وتفجر كيد المكبوت
وتفوق يونس من نومته
ويفلفص
من بطن الحوت
ادي البير
وادي غطاة
وادي وجعنا
وادي دواه
والبلي بم بم
والبلي باه
قال لك ايه
قال لك اه
القاهره / 1986
ولكم التحيه
__
مكان الميلاد: فى أي اوضه مضلمه
تحت السما
على ارض بلدي
من أي دار وسط
النخيل
مطرح ما يجري النيل
ما دام ما يكونش قصر
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
لك التحية عبدو هذة القصيدة مهداء لك و
لجميع الاحباب
سلامي للجميع
عمدة
عزه
الغرام في الدم سارح
والهوى
طارح معزه
والحنين للقرب بارح
والنوى جارح
ياعزه
ياابتسامة فجر هلت
بددت ليلي الحزين
ياندى الصبح الللي سأسأ
فوق خدودي الدبلانين
بل شوقهم
صحى لون الورد فوقهم
كل خد
وشم ورده
مين يدوقهم
غيرك انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
...
الليلادي جم خدوني ياملاكي
جوز تنابله
ونص دسته
من التيران
كنت باحلم ياحبيبتي
كنت باحلم
بيكي انتي
كنا قال
انا وانتي قال
ف جنينه خضرا
ومحاوطها البرتقان
والسيسبان
وانتي جوا قرنفلايه
بالعبير بتستحمي
اجري يمك ياهوايا
تسبقيني وتجري يمي
أحضنك
واشرب عبيرك
من شفايفك
والغصون
واقفه وشايفه
بتراعينا
بس خايفه م العيون
والعيون بتقول كلام
والكلام
طاير حمام
بينادينا بالاغاني
ويهادينا بالسلام
كنت بحلم ياحبيبتي
كنت باحلم
بيكي انتي
ايوه انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
وانطلق في الجو فجأه
ياحبيبتي
صوت مفاجأه
صوت يخلي الدم يجمد
اصحى يا احمد
اصحى يااحمد
وانتهى الحلم الجميل
وابتدا الهم التقيل
_ فين امام
_ انتوا مين
_ احنا ناس مكلفين
تيجي سالك مش ح تتعب
واحنا طبعا معذورين
_ انتو دود الارض
واللآفه المخيفه
انتو ذرة رمل
في عيون الخليفه
انتو كرباج المظالم
والمآسي
انتو عله ف جسم بلدي
انتو جيفه
_ سكتوه ابن الكلاب
سففوه من التراب
فتشوا كل الاماكن
طلعوا رفوف الدولاب
...
كمموني يا حبيبتي
كتفوني يا حبيبتي
قوموني..قعدوني
كل شعره في جسمي
بالعين فتشوها
المخده من جنانهم
شرحوها
وانتهى التفتيش
مافيش
صدقيني
ماتخافيش
هو فيه ياعزه عندي ممنوعات
غير باحب الناس
وباكره السكات؟
...
بص واحد من التنابله
جوا عيني
وانتي عارفه
عنيه صافيه وطيبين
زي كل عيون بلدنا يا حبيبتي
شباكين
ع القلب دوغري موصلين
كان مناه يلمح علامة خوف بسيطه
طب حييجي الخوف منين ابن
العبيطه
هو مين فينا الجبان
ولامين فينا الللي خان
اللي قلبه بالمحبه و بالاماني
وبالربيع لاخضر مزهر
والاغاني
ولاكلب الصيد
واسياده الاباطره
أكالين لحم البشر
فوق الصواني؟
هو مين فينا الجبان
ولامين فينا اللي خان
هو بص في عيني بصه
ارتجف وف حلقه غصه
واتعوج ومال وقال
جملتين مش مفهومين
أصله شاف صورتين جمال
في العيون الطيبين
مصر في العين الشمال
وانتي في العين اليمين
________
مكان الميلاد: فى أي اوضه مضلمه
تحت السما
على ارض بلدي
من أي دار وسط
النخيل
مطرح ما يجري النيل
ما دام ما يكونش قصر
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
احبائي انتظروا المزيد مني في الايام القادمة
لكم التحية
__
مكان الميلاد: فى أي اوضه مضلمه
تحت السما
على ارض بلدي
من أي دار وسط
النخيل
مطرح ما يجري النيل
ما دام ما يكونش قصر
| |
|
|
|
|
|
|
|
|
|
Re: ماذا تعرف عن احمد فؤاد نجم (Re: 3omda4)
|
بابلو نيرودا
شيلي البارود
حطي الوعود
والتعليلات
في المهملات
سفحوا الورود
من ع الخدود
والخضره
من قلب البنات
فين الأمان
جنب الغيلان
يا ملفقين
عصر التبات ؟
لا الجرح بات
ولا إتنسي
ولا التاريخ
والذكريات
سيدنا الحسين
اسبارتاكوس
الليندي
لوركا
عب رحيم
فلاح بلدنا اللي انشوى
قبل القيامه
في جحيم
سينا الطعينه المزمنه
ارنستو
جيفارا العظيم
خميس وبقري
والشفيع
أدهم
ومواله القديم
قطب الرجال اللي ابتلي
لما تلا الذكر الحكيم
عقد العقيق اللي اتبدر
من عهد سقراط الحكيم
زاد النهارده
وانتظم
بالدره والفص اليتيم
نيرودا
زمار الصباح
نيرودا
مزمار النسيم
صابحه الصبيه
" سانتياجو "
تشرب لبنها من غناك
اتروعوا العصافير
وهاجوا
لما نعيت البوم
نعاك
وانت الشهيد
ملو البراح
جراح تعود المجروحين
ساعتين تشاور
ع الجراح
ينشد ضهر المطعونين
تتمدد إيدهم ع السلاح
وبعزم ما في الموجوعين
تطعن في شريان الطاعون
تجهز
على الداء الدفين
الشمس تطلع بالصباح
ترمي الصباح
على كل الإبد
حاضنه البنادق والجراح
بإيد وعافقه الناي
بإيد
والشمس تطلع في النهار
فوق كل قصر
وكل بيد
والشمس تسقط
في الغروب
عن بابلوا نيرودا .. الشهيد
دواره بتعدي السنين
يا أرضنا
يا ام البنين
دواره بتعدي اللي فات
يا أرضنا يا ام البنات
كروب
حروب
محن شعوب
كلاب
عذاب
ضباب
غروب
بروق
رعود
شروق
صعود
نضال
سجال حرام
حلال
والعدل .. كان
في كل آن
هو القضية
والرهان
والارض عاشت من زمان مسرح لفرسان الميدان
سيدنا الحسين
اسبارتاكوس
جيفارا
لوركا
عب رحيم
نيرودا زمار الصباح
نيرودا
مزمار النسيم
عطشان .. يا صبايا
عطشان يا صبايا
وانا عاشق .. ع السبيل
عطشان
والميه ف بلدي
على عكس ما يجري النيل
والنخل العالي مطاطي
والجذع الواطي
ذليل
والريح العاكس
كابس
والريح العاطي
بخيل
والنسمه اتعكر لونها
من هم الناس
يا خليل
عطشان والنيل في بلدي
والزرع اخضر
وجميل
وانا كنت امبارح خالي
واليوم دا
صبحت عليل
عطشان ودوايا حبيبي
يسقيني العشق دليل
ودليل الحب .. عمايل
وكلام الحب جميل
وانا كل ما أقول التوبه
تغويني .. المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع
نهر النيل
وان لاموا علينا
يلوموا
ما لهمش علينا سبيل
ما هو شوك العشق
ملامه
والشوك
في الورد أصيل
ودوني ع السبيل
ودوني ع السبيل
لك مني التحية فناننا العظيم نجم
ولكم التحية قراءه الكرام
_____
مكان الميلاد: فى أي اوضه مضلمه
تحت السما
على ارض بلدي
من أي دار وسط
النخيل
مطرح ما يجري النيل
ما دام ما يكونش قصر
| |
|
|
|
|
|
|
| |
almohndis
alfatih
abuguta
امبدويات
abdelgafar.saeed
rani
فيس بوك
تويتر
انستقرام
يوتيوب
بنتيريست