|
|
 حالتك يالخميس والله العظيم بطاله شغلت اليهود والمسلين عطاله
|
سلام مربع علي راي اختنا العذيذه شيري
تعالو نتتبع خطي اخونا السوداني السمع عن المملكه وسافر لها ولكنه وجد عكس ما كان متوقع
تعالو نتتبعه وهو يخبرنا عن المملكه
تعالو نتتبعه حتي عودته الي الخرطوم
اخوتي هذا المشوار ساعرضه في بضع حلقات فارجو من يعجبه الموضوع ويري ان صديقاً له سيسعد بقراءته فاليعفرته(فووووووق)علي راي احدي اخواننا في البورد
ولكم مني الف سلام
ملحوظه يجب ان لا يزعلو اهلنا المتواجدين يالمملكه بما مكتوب هنا
ولكم الشكر
ملحوظه
الكتابه بالدارجيه العاميه
1.
09072003
اخونا السوداني بعد تعب شديد قدر يأشر واكمل اجراءاته واستعد للسفر
فشوقه للرسول والمملكه دفعه ليوثق هذه السفريه
فقال
مشتاق للرسول شوقاً عليّ كتير
مشتاق للرسول الهادئ نبي الخير
يا اخواني الجواز الكان زمان في حيره
الليله الجواز ختو عليه التأشيره
كعب الزول بالعشا ينمده
ياخي كعب الزول من دارخليه ارتده
انا خلاص قليبي الحنين جده
في زيارة الرسول والنزول في جده
في جده النزول قبال الشروق بقليل
وكانت الافواه تحمل التهليل
الليله هللت الحناجر والدموع بتسيل
وااه شوقنا للروضه المقامه جميل
قبله المسلمين شفناه بيت الله
والصفا والمروه من شعائر الله
هللنا وكبرنا وجمله الافواه
مقام سيدي الرسول انا عمري ما بنساه
من بعد ما زرناللشفيع وحبيب
مفروض نعود بكل الجمال والطيب
اخواني المعاي جبروني علي التهريب
ركوب الصالون واذكر مهاه الجيب
قلت يا اخواتي الغبش يا هل الذكر و السجدة
تالئين القرآن عارفين مواضع السجدة
عووك يالصالحين الليله دايرين نجدة
دايركم حجاب من الدوريات والنجدة
ابواتي الغبش بيكم دوام بستملأ
عووك يالصالحين يالالف بالجملة
انتو الذاكرين بتقشو الدمع للخملة
دايركم حجاب من المجاهدين والحملة
قلت يا ابواتي الغبش يا اهل الذكر والحالة
عوك يالصالحين مسحوره السيالة
البلد الغنيه وكتير جباله
لا ضقنا العمل لا شفنا ليه رياله
حالتك يالخميس والله العظيم بطاله
شغلت اليهود والمسلين عطاله
جوة في حشاك لامي الجنسيات باشكاله
جانب الصومال والهنود والبنقاله
يا حليل الغبش الكلكم سادتنا
لديار الخميس الظروف ساقتنا
البلد الجميله السمعته جابتنا
لا لقينا العمل ولا الدوريات خلتنا
المساعد ابوي دود الخلا ا بعاجات
كراماتك مثبوته في الزمان الفات
جافينا الوطن لا جدود ولا ابوات
دايرك لي حجاب من التلات تسعات
ابواتي الغبش ليكم شكيت اغراضي
بالقضا والقدر قليبي المسيكين راضي
صغيركم كان هما يحكم في الدوائر قاضي
سمحا للبريد وكيا للموراضي
انتم اطبائي دايركم تشوفو اعراضي
من مرض القلب والجري الفي الفاضي
ابواتي ما تشمتو القالو الكلام هو فاضي
احسبو الامر يا ساداتي بينكم ماضي
قمنا للعمل في الحرج حرجنا
وظلت الهموم جوه القلب منعجنا
كسرولنا البيوت دبرنا لي مخرجنا
الريح للسليمه في المعامل سجنا
للقصر الجميل نزلنا واستأمنا
اخوانا العذاذ فيهم بشاشه اهلنا
الترحيب والكرم والله العظيم هولنا
تحيو وتعيشو يالليمكم يتمني
جيناكم قاصدين ما خاب فيكم املنا
والبسمة من افواهكم تحمل رضاكم عنا
كل الفي المعامج لحماك يا ذو المنا
من الحاسدين شر الانس و الجنا
الوضع الفيه نحنا والله مو مقبول
والبريقة بتلف سواقها تقول مسطول
السبب الخلاني ناوي الرجوع علي طول
استفزاز ببساطة وكلمة المجهول
زي ما اقول اسافر يقولو لي اتصبر
والمروق بلف مكسي السراق في العنبر
السبب الخلاني ناوي الرجوع في شهر
حالة المجهولين اصلاً دوام في خطر
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست