|
Re: التش تش حلاوة لبن (Re: alsngaq)
|
اول الحكي
الزنبيه تش تش تش تش تش حلاوه لن يا سلام عليكم الله خلوني عليكم الله ياناس خلوني
واحد (راجل)بحاول يغني ______
يحكي والعهدة على الغنايه ان راجلا بشنباتو نحن نصنفه كذلك ، وهو يابي ان ينحشر مع الرجال في خيمه واحده قالت الغنايه وهي مغتاظه منه شد غيظه ان الغناي ذاك وليس الفنان ، كما اتفقنا من شويه انه يرفض براهو ان يضع علامه صاح في الخانه التي تملاء في استماره النوع ذكرا جاتوا نيله سيبونا منه اقول ان الغنااي ذاك اصبح يزاحمهن في محلات الكريمات وبيوت الخياطات ومحلات الاقمشه حتى زيت الشعر كمله عليهن وجرت كرسيها قريبا حد انها التصقت بكرسي انا حينما رأت ان شدة انتباهتي وبريق الشمار الذي اعتلي سيماي (ماذا تعني هذه السيماء ياشباب افيدونا انا انزنقت)؟؟ كل دا عرفناهو ، طيب مالو ومال الغناء في حنة العروسه او رقيص العروس اتخيلي يااختي ، ومع انني لا ابدو باي حال من الاحوال قدر اختها ولا حتى في اخر بناتها ما علينا اعترفت لي هذه الغنايه ان هذه النوعية من الفنانين بدات تزاحمهن بشده في اكل عيشهن وحينما قلت لها مغتاظة ليه هن النسوان برضوا يجيب راجل يعلم ليهن العروسه غايتو جنس قلت ادب قلت ذلك وانا امط هذا الكلام وتخرج من خشمي مصمصه طويله .. مثل حبوبتي الله يرحمها ماكانت تفعل حينما يغيظها التصرف انت ماشوفتيهوا يااختي ؟؟ تاني عادت هذه اللايووقه لتقول علي اختي ؟؟ الله يسامحها كيفن الكلام دا؟؟ اجبت انا ، وانا انتظر ان تأتيني ببقيه الشمار يا اختي دا قال ليك لمن يقول كده ويقول ليك الزنبيه تش تش تش تش حلاوة لبن وينفنس ليك كده . فنسة البنيات لحدهن لمن الظهر يبقي زي اليوو تيرن والساعةاللي يقول ليك للعروس اديتاك دي فدعيهن كده ويابت هو خليي نشافه العضم دي جدعيي لي شعرك كده اها عاد زي دا كيف نلقط معاهو عدادنا مع انني لم افهم ماذا تعني بالعداد هذا لكني المحت لها انني فمهت قصدها ولعنته معها لعنا كبيرا حتى كدت ان اسويه مع ملوك العرب لكن تراجعت وقلت ياحراااام دا لسعة جاهل وصغير وهو برضو لا باخر ولا بقدم وقلت لها كويس اهو نلقى معانا بعدين ناس يشتغلوا في التمريض ومداواة الجرحي والغناء للابطال حينما تهاجم امريكا السودان
ويارجاااال هو امشوا لموا غنايكم دا بدل ارفع عليكم دعوي باشانه سمعة الغناياة وخراب عيشتهن ومزاحمتهن
على الاقل نحن نغني لنعبر عن واقعنا في هذا الزمن الاغبر .. عيانه شيلوني . . في السرير ختوني ساعة ساعة اتفقدوني حرام كده تنسوني .. وحينما يعيينا الجري وراء العرسان الذين طفشوا في بلاد الله الواسعة وانتظار امثال شروم الذي اعلنا عليه الحرب في جمعية ايجاد عريس لثلاث نسوان حتى نلبي طلبات البايركس الذين تزايد اعدادهن بصورة ملحوظة شكيتك على الله ياشروم الكان جبت لينا الكلام عايز تعرس نانسي بت عجرم تتجازي انت وتبور بيناتنا او حينما نقول الله يازي الازانا وين البلال مالو ماجاء
.. او حينما نتفاءل بدرجات عشقنا ونلعنه على الملأ .. عشان بريدوا اديتو وردة بيضا زادت علي الريده لمحبة قلوبنا ما بنفترش ياصيدا وان افترقنا في الجنه تاني نعيدها ارأيتم كم نحن متفاؤلون في هذا الزمن الاغبر حتى ان فاتنا القطر وتبيركسنا نعاين للجنه سنه ياالجنه ... او حينما نغلب من عواره العرسان وطناشنهم نلجأ الى ماوراء ذلك .. ابوي يا الصائم ديمه مرضي مامرض عزيمه ما قال بمشي وبجينا بشوفتو ببقى شديده .. او عنادا لي امه الفقريه وغصبا عنها الجأ الى سكة الفكي
وروووك بجيبوا بالعروق يا ابشرا. ..
او حينما تعيينا كل الحيل .. ابوي قال لي ماتقيفي في الدرب
بقيف الدرب عشان اجيب مغترب جوه النار يا الله
واخيرا وحينما تتقفل كل الدروب نضري باقتسام العريس
بالضري بالضري انشاء الله راجل مره يا ابشرا
وبرضو نحن بنغني لواقعنا السجم الانتو السبب فيهو
لكن تعال اقنعني لما لا يرضي ذاك الغناي بواقعه ويبطل يزاحم النسوينات في سوقهن
والزنبيه تش تش تش حلاوة لبن يا سلام عليك الله خلوني عليكم الله ياناس خلوني
___________ شكيتكم على الله يابوش وبليير وصدام
|
|
|
|
|
|
|
العنوان |
الكاتب |
Date |
التش تش حلاوة لبن | اساسي | 04-16-03, 07:58 AM |
Re: التش تش حلاوة لبن | قرشـــو | 04-16-03, 08:09 AM |
Re: التش تش حلاوة لبن | اساسي | 04-16-03, 09:55 AM |
Re: التش تش حلاوة لبن | alsngaq | 04-16-03, 08:21 AM |
Re: التش تش حلاوة لبن | shiry | 04-16-03, 09:27 AM |
Re: التش تش حلاوة لبن | اساسي | 04-16-03, 09:57 AM |
Re: التش تش حلاوة لبن | شرووم | 04-16-03, 10:23 AM |
التش تش | Abd-Elrhman sorkati | 04-16-03, 10:30 AM |
Re: التش تش | ebrahim_ali | 04-16-03, 11:15 AM |
Re: التش تش حلاوة لبن | almulaomar | 10-13-03, 04:26 PM |
Re: التش تش حلاوة لبن | wd al geran | 10-13-03, 06:50 PM |
Re: التش تش حلاوة لبن | almulaomar | 10-14-03, 08:09 AM |
|
|
|