الحبيب وهبة: لئن دخلتم لأزيدنكم!!

Quote: قوم ياوهبة أفصل دبنق من الجهاز..

يادكتور بلة
ليك وحشة والله
المرة دي انت وودحسين مرقتو برة ومضاف ليكم بتاع السي آي أيه لانو الزول دا انا ما رفدتو بالعكس انا كنت معجب بيهو جدا .
حتى بالامارة كنت بقول ليهو تعرف ياودبوك ( لقب) اكتر حاجة بتعجبني فيك شنو ؟
يقوم يقول لي شنو (بوجه مبتسم وشبه ضاحك)
بقول ليهو : اكتر حاجة قاعد تعجبني فيك بلادتك دي وينفجر ضاحكاً ( كان طيب خلاس )
وعندو جملة بقولها لي طوالي : والله ياعمك ( ويواصل الضحك )
واواصل كلامي معاهو واقول ليهو : ياجورج انت ما بتنفع في المخابرات لانو مقدراتك الذهنية مش ولا بد .
ويسأل وهو لا يزال يضحك : طيب بنفع لشنو ؟
وارد ليهو : انت ياعمك ممكن تكون جياشي نفر كدا
المهم ما اطول عليك يوم ونحن قاعدين نفطر سوا واحد ود حرام لقط الكلام دا وما يكضب جري على عمك قوش ، عمك ما صدق لكن ختاهو في راسو وبدا يلاحظ ليهو مثلا صحبي ما بقدر يعمل حاجتين في وكت واحد وعمل ليهو كم كمين واختبار يعني لو قالوا ليهو امشي اقبض نقد بعد شوية ينسى وتلقاهو حول ليك رصيد .
لكن قاصمة الظهر وين عارف . . . .
جاييك شيل الصبر بس قاصمة الظهر يوم عمك كنا شغالين سهرة وبالليل كدا بعد العشا ضربنا لينا 3 شاي وقعدنا برة في الجنينة بتاعة الجهاز .
قوش كان داير يطلع الموبايل بتاعو لقى في جيبو صندوق بتاع لبان طلعو اداني انا وادا صحبك وقال لينا سلوا نفسكم .
ودا زي ما انت عارف تعليمات تاكل لبان تاكل لبان وتطقطقو كمان .
اهاااا عمك بوش لاحظ لصاحبك ( على خلفية انو ما بيقدر يعمل حاجتين في وكت واحد ) انو لما يمشي بوقف خشمو من مضغ اللبان عشان يركز . لما يمضغ بقيف من المشي عمك عمل لي حركة بعينو كدا (حركة امنية) معناتا اكحل صحبك .
تاني يوم يازول طلعوا ليهو جوابو ونقلوهو المطار وبعد داك عديم العشرة ما لاقيتو الا في البورد هنا متنكر بالاسم دا وعمل بنصيحتي واشتغل بالجيش .
لكن شايفو بقى يتبوبر ويتطنقع علي تصدق لكن انا ما شغال بيهو ما دام نسى العشرة واختار سوانا حبيب خليتو للايام او لضميرو حسيب .
بجيك راجع اكيد . .