قصة ثورة "الملحمة"كلمات: هاشم صدّيق
لما الليل الظالم طوّل
فجر النور من عينّا إتحول
قلنا نعيد الماضي الأول
ماضي جدودنا الهزموا الباغي
وهدوا قلاع الظلم الطاغي
وفي ليلة وكنا حشود بتصارع
عهد الظلم الشبّ حواجز شبّ موانع
جانا هتاف من عند الشارع
قسماً قسماً لن ننهار
طريق الثورة هدى الأحرار
والشارع ثار
وغضب الأمة إتمدد نار
والكل يا وطني حشود ثوار
وهزمنا الليل
وهزمنا الليل
والنور في الآخر طل الدار
والعزة أخضرت بالأحرار
وطني أنحنا سيوف أمجادك
نحن مواكب تفدي ترابك
ولسة الشارع بيشهد لينا
في يوم الغضبة حصاد ماضينا
مشينا نعطر حقل الثورة
بدم نفديها بلادنا الحرة
وكان أكتوبر فجر الغضبة
كسرنا قيود الماضي الصعبة
لمّا مشينا مواكب صامدة
تهدر وتغلي وتهتف راعدة
الرصاص لن يفنينا
الرصاص لن يفنينا
وسال الدم بأرض الوادي
فدينا النور بالروح يابلادي
وكانت صفحة حكاها العالم
وفجر أكتوبر طلّ وسالَم
كان في الجامعة موكب هادر
صمم يجلو الليل السادر
وكان الليل السادر غادر
فجّر غدرو سموم دخان
ورصاص من صوتو صحى السودان
والشعب الثائر صمم هادر
يصرع ليلنا الداجي الطوّل
وكان القرشي شهيدنا الأول
وما تراجعنا
حلفنا نقاوم ليلنا وسرنا
نذرنا الروح مسكنا دربنا
للشمس النايرة قطعنا بحور
حلفنا نموت أو نلقى النور
وكان في الخطوة بنلقى شهيد
بدمو بيرسم فجر العيد
وهزمنا الليل
وهزمنا الليل
يا أكتوبر
أنحنا العشنا ثواني زمان
في قيود ومظالم وليل وهوان
كان في صدورنا غضب بركان
وكنا بنقسم بالأوطان
نسطر إسمك يا سودان
بدمانا السّالت راوية الساحة
حلفنا نسير ما نضوق الراحة
شهرنا سيوف عصيانّا المدني
وكانت وحدة صف يا وطني
إيد في إيد حلفنا نقاوم
ما بنتراجع وما بنساوم
خطانا تسير في درب النصر
هتافنا يدوي يهز القصر
كسرنا حواجز
أزلنا موانع
صفنا واحد
عامل وطالب، زارع وصانع
يا ساحة القصر يا حقل الثار
يا واحة بتحضن دم (نصّار)
روينا ورودك دم ثوار
وشتلنا فضاك هتاف أحرار
خطينا ترابك أحرف نايرة
بتحكي سطور أيامنا الثايرة
وشلنا الشهداء مشينا ونهتف
وجرح النار في قلوبنا بينزف
سجينا الشهداء وجينا نقاوم
ما بنتراجع وما بنساوم
بينا وبينك ثار يا ظالم
وفجأة ونحن صفوف بتصمم
زغرد فجر الغضبة الحالم
وهزمنا الليل
وهزمنا الليل
قسماً قسماً يا أكتوبر نحمي شعارك
ونجني ثمارك
ونرفع راية الثورة الغالية
عالية ترفرف فوق السارية
عليها شعار الثورة الأكبر
رسمو الزاهي وأخضر
ولسة بنقسم يا أكتوبر
لما يطل في فجرنا ظالم
نحمي شعار الثورة نقاوم
نبقى صفوف تتمدد وتهتف
حتى يعود الفجر الحالم