|
|
 عقل للبيع !!
|
قررت أن أبيع عقلي
نعم قررت أن أبيعه ..
لم يجلب لي هذا العقل سوى المشاكل والتعب
بتدخله في الذي يعنيه والذي لا يعنيه ..
ولطالما أفسد على مشاريع جميلة كانت لتتم
لولا تدخله اللعين ..
يحشر نفسه في كل شؤوني دون تردد
ويبادر بالرد دون مشورتي
أيظن أنه الناطق الرسمي بإسمي ؟
لالا , لابد أن أضع حداً لهذا ..
لقد قررت أن أعيش بدونك يا عقلي العزيز !
كيفية البيع
سيتم البيع عن طريق المزاد العلني
على الراغبين والمهتمين الحضور في الموعد المحدد
والذي يبدأ منذ اللحظة ..
سيفتح المزاد بـ ألف دولار تكمل أو ترد ..
الضمان
ليس ضمان مدى الحياة ولا حتي لسنتين أو ثلاث
بصراحة ما عندو ضمان ..
المحتويات
سيتم إستعراض المحتويات الأساسية أثناء المزاد
والمحتويات الثانوية مع من يقع عليه المزاد
وما عدا ذلك سيكتشفه بمرور الأيام !
حسناً .. سنبتدئ الآن ....
|
|
 
|
|
|
|
|
|
|
 Re: عقل للبيع !! (Re: تيسير عووضة)
|
تيسير
هسي بعد كلامك ده
Quote: لم يجلب لي هذا العقل سوى المشاكل والتعب
بتدخله في الذي يعنيه والذي لا يعنيه ..
ولطالما أفسد على مشاريع جميلة كانت لتتم
لولا تدخله اللعين ..
يحشر نفسه في كل شؤوني دون تردد
ويبادر بالرد دون مشورتي
أيظن أنه الناطق الرسمي بإسمي ؟
لالا , لابد أن أضع حداً لهذا .. |
كان اديتيني معاو مليون دولار بقبل !!!
تشتري مني و لا تبيعي لي معاكي !!!
| |
|
|
|
|
|
|
|
|
|
Re: عقل للبيع !! (Re: فيصل نوبي)
|
يا فيصل نوبي ..
| Quote: كان اديتيني معاو مليون دولار بقبل !!! |
| Quote: تشتري مني و لا تبيعي لي معاكي !!! |
طيب ما نمشي نفرش بيهم جمب الجامع الكبير ..
| |
|
|
|
|
|
|
|
|
 Re: عقل للبيع !! (Re: تيسير عووضة)
|
يلا علينا جاي عقول للبيع ..
أشتري واحد تحصل على التاني مجاناً ..
يا بلااااااااااااااش ..
يا تيسير الناس دي طلعت مريحة عقولها خالس ..
وما شغالة بالحاجة دي ..
يعني عقولنا دي طلعت فشنك ساي ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
الاخت / تيسسير
لك التحية لشخصك وعقلك
اولا : بما انى اول الراغبين فى الشراء احتفظ بحقى فى ( حق الشفعة ) وهى افضلية
الشراء من افضل العروض المقدمة .
وبهذا يشترط موافقتى قبل اتمام اى عملية بيع متوقعة
ولى عودة ....
معاوية الطيب
| |
|
|
|
|
|
|
|
|
|
Re: عقل للبيع !! (Re: Mouawia El Tayeb)
|
يا معاوية الطيب ..
| Quote: وبهذا يشترط موافقتى قبل اتمام اى عملية بيع متوقعة |
بكرة كمان يجونا واحدين يعملوا فيها ورثة المرحوم
أحسن نبيع سرعة سرعة ..
* يا معاوية , موافقتك دي بي كم ؟ 
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
احكى ليك القصة دى كانت بتحكيها أمى الله يرحمها
قالوا فى مرة فى القضارف مسكيييييينة وطيبة ولجنا "لجناء" يعنى بتنطق الجيم دال..
شايلة ليها جلد دايره تبيعو ..
تكورك "دلد دلد دلد" تقصد طبعا جلد جلد جلد..
اها لما يجى زول يشوف الجلد تقول ليهو
دلد السواد..مدد تلو
يعنى "جلد السواد مقدد كلو"
احييييييا القصة دى كانت بتحننى حنين...مبالغة
حسة انتى بتبيعى فى الدلد وتقولى دلد السواد مدد تلو..البشتريه منك منو؟؟
ادينى ليه انا دى ..اصنفرو وارجعه ليك تستعمليه انتى ستو..
اتفقنا؟؟
يللا فرتقى اللمة دى وبلاش طمسة!!!!
| |
|
|
|
|
|
|
|
|
|
Re: عقل للبيع !! (Re: Tumadir)
|
تماتم العسل ..
هسي كان جيت قلت ليكم
عقل راجح
ومليان ثقافة
وعارف أي شئ
سياسة .. دين .. موسيقى .. ادب .. فنون
كله .. كله
وكمان حلال مشاكل وفكاك عقد
كنتوا حاتصدقوني
كان حتقولوا مجنونة ساي
أنا هسي قطعت عليكم السكة
دا نوع من الـ promotion technices يا ست الناس ..
| |
|
|
|
|
|
|
|
|
|
Re: عقل للبيع !! (Re: Adil Osman)
|
999,000,000,000,000,000,000,000,000,000,000,000,000,000,000,000,000,000,000,000,000,000,000,000,000
و لو ما كنتا مفلّس !!
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
اليوم التفكي عقلك ده ياكي الباريتي الدجاج ..
اركزي يابت خلى النضم الني ..
دي صورةادم فاكينو من الجنة ؟؟
الزول ده باين عليهو واقع تيوب لس ..
| |
|
|
|
|
|
|
|
|
|
Re: عقل للبيع !! (Re: DKEEN)
|
يا دكين ..
أي زول عارض شئ للبيع بيقولوا ليهو كدا
بيحاولوا يذكروهو بمآثر ذلك الشئ ..
بعدين الجداد(وليس الدجاج) مالو ؟
مامرتاح وراسو رايق ..
إنت بس قول ماعندك قروش ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
الجداد مشكلو انورايق يا تيسير..
المروقين ديل الواحد يتروق يتروق الليل كلو ويجي ما يعرف يبرطم في شنو؟
تبقى روقة وخراب ديار..
| Quote: إنت بس قول ماعندك قروش .. |
القروش هينة ..
الكلام المروة..
| |
|
|
|
|
|
|
|
|
|
Re: عقل للبيع !! (Re: DKEEN)
|
يا دكين ..
أنا روقتي (بعد ما أبيع عقلي )
ما ليها علاقة بالليل ولا أصحابه ..
وما فيها برطمة ,,
ليها علاقة بالراحة والإستجمام
وبس !!
إنت شكلك داير تخرب المزاد دا
| |
|
|
|
|
|
|
|
|
|
Re: عقل للبيع !! (Re: Abdulgadir Dongos)
|
عبد القادر دنقس ..
بصراحة فيهو مكيفات
يتعاطى الشاي والقهوة الطازجة والقهوة سريعة التحضير ..
لا يتعاطى كل ما لم يرد ذكره فوق ..
امتحن كتير جداً
أما الإنجازات تدخل تحت بند (يكتشفه بمرور الأيام)
* راجع شروط المزاد
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
تيسير أنا بدفـع
أعلى سعر
ألف دولار أعلى من أي عـرض
وجادي وما بنــط,
بس لازم عقـل ومتعلقاتـه,
يعني دورة دمويـة
ووو
قـلــب
تحياتي,
| |
|
|
|
|
|
|
|
|
|
Re: عقل للبيع !! (Re: أحمد الشايقي)
|
لكن يا تيسير شروط المذاد ما واقعه لي، يعني في أي أعراض سرحان أو دقسات تصاحبها خسارة مادية أو معنوية. وبعدين انت قلت بالحرف (لم يجلب لي هذا العقل سوى المشاكل والتعب) ، وبصراحة ما عاوز أتوكح ساكت. ما ذكرت شئ عن الطرب والفرفشة ، ولا التوجه السياسي. يعني أنا أنسان علماني أعمل شنو لو لقيتو وهابي طالباني. أرجو التفاصيل ده عقل يعني مخ ما تاخديه بالعفوية دي.
لك الود.
دنقس.
| |
|
|
|
|
|
|
|
|
|
Re: عقل للبيع !! (Re: Abdulgadir Dongos)
|
يا دنقس ..
| Quote: يعني في أي أعراض سرحان أو دقسات تصاحبها خسارة مادية أو معنوية |
لا من الناحية دي اطمئن لأنو أنا قلت
Quote: لم يجلب لي هذا العقل سوى المشاكل والتعب
بتدخله في الذي يعنيه والذي لا يعنيه ..
|
معناها شغال بكفاءة أكتر من المطلوب
| Quote: ما ذكرت شئ عن الطرب والفرفشة ، ولا التوجه السياسي. يعني أنا أنسان علماني أعمل شنو لو لقيتو وهابي طالباني |
بالنسبة لما ذكر :
يحب الطرب جداً وقليل من الفرفشة ,,
وليس له أي توجه سياسي لأن المتوفر لايفي بالغرض
وإن كان متابعاً لما يدور في الساحة ,,
وبالتأكيد ليس وهابي أو طالباني ,,
| |
|
|
|
|
|
|
|
|
|
Re: عقل للبيع !! (Re: أحمد الشايقي)
|
أحمد الشايقي ..
Quote: تيسير أنا بدفـع
أعلى سعر
ألف دولار أعلى من أي عـرض
وجادي وما بنــط, |
كلامك نجيض ..
لكن المعروض عقل بس بدون أكسيسوريز زي الدورة الدموية
أما القلب فغير معروض للبيع ..
القلب دا يقعد معزز مكرم لمن يجي صاحب النصيب !!
أها قلت شنو ؟
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
ست الكل تيسير
جاية تبيعي الشاقيك لمنو؟
عقلك ده ابقي عليه عشرة عشرة
ببقى ليك لو قلبك باعك
لو خذلتك مشاعرك
عقلك سندك يا يمه
ما تقولي حرمك من سعاده
ما تقولي وقف مراكب سايره
ماتقولي سرق اللحظة
ماكنتي انتي انتي لو ما سمعتي منو
العاقل بعقله شقي
والجاهل في نعيم
وكان جيتي للجد،
عقل زي عقلك ما بيشتريه إلا اللي بيدور الشقا
أشقي، واسعي للشقا
أخير من نعيم جهالة ...
وكان مصرة، بديك عقلي مقايضة واتم ليك فرق العملة محبة ودعوات صادقة ...
شن قولك؟
| |
|
|
|
|
|
|
|
|
|
Re: عقل للبيع !! (Re: Afifi Mahamed)
|
وما أصدق أبى الطيب القائل
ذو العقل يشقى فى النعيم بعقله*** وأخو الجهالة فى الشقاوة ينعم
على العموم تقايضى وأدفع ليكى الفرق وكان حجيتى فى رجب ما تلومى إلا نفسك!!
جنى
| |
|
|
|
|
|
|
|
|
|
Re: عقل للبيع !! (Re: jini)
|
يا جني ..
إنت أخدتها من قاصرا وسميت روحك جني وبعدت من الشقاوة ..
Quote: على العموم تقايضى وأدفع ليكى الفرق
وكان حجيتى فى رجب ما تلومى إلا نفسك!! |
كان قايضت يمكن ما أحج من أصلو ..
| |
|
|
|
|
|
|
|
|
|
Re: عقل للبيع !! (Re: عزاز شامي)
|
عزوز يا جميلة ..
تسلمي ويسلم عقلك ..
قلت أبيع الشاقيني للمحتاج ليهو
أنا ما عايزاهو ..
عمري كلو معتمدة عليهو
ومتكلة فيهو ..
وعشان يمشيني صاح
قسى علي يا عزاز
ما بقدر يكون معاي وما أسمع كلامو عشان كدا قررت أفارقو ..
قلت أجرب أعيش بدونو يمكن الحال ينعدل ..
كلام بيني وبينك
البوست دا كان محض هظار
لكن لما خلصت قراية كلامك لقيت روحي ببكي ..
كلامك دخل جوة يا عزاز !
| |
|
|
|
|
|
|
|
|
 Re: عقل للبيع !! (Re: تيسير عووضة)
|
Quote: كلام بيني وبينك
البوست دا كان محض هظار
لكن لما خلصت قراية كلامك لقيت روحي ببكي ..
كلامك دخل جوة يا عزاز ! |
ست البنات
تبري من البكى ومن الحزن!
عارفه يا حبيبة،
من يملك عقلك لا يمكنه الهروب منه
وعقلك و الـ (جوة) ديل ما بيفترقوا!
وعلشان سلامة ( الجوة)عقلك بيقسى عليك
لأنو عارفك
وداير ليك دائما الأفضل
وأنت تستحقيه!
زي ما الأم بتقسى على أولادها
عقلك بيقسى عليك
بس من محنة
من محبة
لانو عارفك
وخابرك
ويريد لك ما أنت جديرة به، الأفضل!
عارفة يا تيسير،
أتمنيت زماااان انو ابقى مجنونة! واجر الدور الفوقاني مفروش
بس ما قدرت!
لقيتني بقيت ما أنا!
ولقيتني برجع تاني أفكر
وأحلل
وأقسى
واشقي
واتحرمت من حاجات بحبها
وكبلت نفسي بنفسي
بس لغاية حسي، انا الكسبانه!
أخير هو يقسى
برضو غقلي أحن علي من الزمن والناس!
********
تيسير،
خصمتك بالنبي
أمانة ما تبكي
دمعتك غالية!
الزّيك اتخلق للفرح و بس!
| |
|
|
|
|
|
|
|
|
|
Re: عقل للبيع !! (Re: عزاز شامي)
|
عزوز الحنينة ..
ها قد انتصر علي هذا اللعين مرة أخرى
وهذه المرة بمعاونتك ..
هو يعرف أنك مؤثرة
استعان بك لتؤثرين على
وقد نجح ..
كلما حاولت التنصل منه أجده يتبعني
ويحشد (الأجاويد) حتى يرافقني !
وها أنا مرة أخرى
أعلن الإستسلام له مدى الحياة
وأرفع الراية البيضاء
سأحاول أن أكمل ما بقي لي من عمر معه
وزي ما قلت ما في زول أحن علي منو ..
خلاص يا عقلي سماح المرة دي عزاز حجزتك مني
لو ما هي هسه كان تكون مع سيدك الجديد ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
Quote: عقلك سندك يا يمه
ما تقولي حرمك من سعاده
ما تقولي وقف مراكب سايره
ماتقولي سرق اللحظة
ماكنتي انتي انتي لو ما سمعتي منو |
شفتي البنوت العاقلات بفكرو كيف يا تيسير؟؟
قد تركن جميع الدجاجات خلفهن ..
عقبال دجاجتك الرايقة دي الماخمج
| |
|
|
|
|
|
|
|
|
|
Re: عقل للبيع !! (Re: DKEEN)
|
خناس
Quote: قالوا فى مرة فى القضارف مسكيييييينة وطيبة ولجنا "لجناء" يعنى بتنطق الجيم دال..
شايلة ليها جلد دايره تبيعو ..
تكورك "دلد دلد دلد" تقصد طبعا جلد جلد جلد..
اها لما يجى زول يشوف الجلد تقول ليهو
دلد السواد..مدد تلو
|
الغريبة ناس السحاير بى دلدم المدد تلو داعد يبيعوا بيع الدن!
ولك تحياتى أيتها المونقة الخواطر
جنى
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
ياتيسير عقلك دا الا يخش مقايطة
وانا عندى مكنة تلاجة مستعملة وطربيزة مكوة بى حالة جيدة استعمال خفيف
لو موافقة على العرض دا اتصلى على الرقم (112)
| |
|
|
|
|
|
|
|
|
|
Re: عقل للبيع !! (Re: كوليل)
|
| Quote: لقد قررت أن أعيش بدونك يا عقلي العزيز ! |
تـايسـا حـبيبتي
أوعـي تتهـوري بعـدين ماتلقي أحـسـن منه..
وبعـدين نقعـد نقـول ياريت اللي جـري مـاكـان!
مـني
| |
|
|
|
|
|
|
|
|
|
Re: عقل للبيع !! (Re: Muna Khugali)
|
Quote: أوعـي تتهـوري بعـدين ماتلقي أحـسـن منه..
وبعـدين نقعـد نقـول ياريت اللي جـري مـاكـان!
|
اسمعى كلام الببكيك
هو انتى يامنى بتبكى؟
| |
|
|
|
|
|
|
|
|
|
Re: عقل للبيع !! (Re: Ishraga Mustafa)
|
Quote: اسمعى كلام الببكيك
هو انتى يامنى بتبكى؟ |
أنـا في السـبعتاشـر السنة الفاتت بكـيت ثلاثة مـرات مـرات بس.....أقصـد بكـا جـد جـد مش بكـا لعب عيـال...
مـرة في استشـهاد أخـوي.... ومـرة في مـوت جـدتي.... ومـرة أخـيرة في انتقـال والـدي...
يعـني ياشـروقـة لـو أي زول عايزني أبكـي 'الا يمـوت لي' !!
غـير كـده ياحـبيبتي أنـا 'بابكـي بس مـن الضـحـك'
| |
|
|
|
|
|
|
|
|
|
Re: عقل للبيع !! (Re: Muna Khugali)
|
منّو يا عسل ..
Quote: أوعـي تتهـوري بعـدين ماتلقي أحـسـن منه..
وبعـدين نقعـد نقـول ياريت اللي جـري مـاكـان! |
أحسن منه شنو أنا ما عايزة ولا أحسن منه ولا هو ذاتو
تسلم الست حين قالت :
أعطني حريتي أطلق يديا إنني أعطيت ما استبقيت شيا
آه من قيدك أدمى معصمي لمَ أبقيه .. وما أبقى عليا
| |
|
|
|
|
|
|
|
|
|
Re: عقل للبيع !! (Re: كوليل)
|
كوليل ..
أنا ذاتي غلطانة ..
ثقافة المزادات دي ماعند السودانيين
عند الناس البيقيموا الأشياء ..
يا سيدي ما مشكلة مقايضة مقايضة
بس حاول صلحها شوية
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
| Quote: أقرأ ردي على عزاز .. |
يا ام مخ فيونكة انتي ..
تكتبي لي رد زيي زي اي زول هنا ..
موش تقولي لي امشي اقرا رد عزاز ..
ناقص كراع ولا يد انا ؟؟
بعدين يا حبة
ليست عزاز من احتاج لاقرا ردها ..
عزاز دي العايزة تقولو بعد تلاتة شهور انا حاسي بيهو..
| |
|
|
|
|
|
|
|
|
|
Re: عقل للبيع !! (Re: DKEEN)
|
| Quote: كان قايضت يمكن ما أحج من أصلو |
تيسير متعددة المواهب
البورد دا مليان روسين نيفة يقوم واحد يقايطك بى راس واحد كيلو بايت إلا تفرمتيهو فى اليوم مليون مرة راسك المية جيجابيت دا أبقى عليهو عشرة!
تحياتى للأسد غاتس وين الأيام دى!
جنى
| |
|
|
|
|
|
|
|
|
|
Re: عقل للبيع !! (Re: jini)
|
جني ..
ملاحظة ليهم كلهم مركزين على موضوع المقايضة دا أنا كان بقايض
ما أخير لي عقلي البعرفو وبيعرفني ..
وعل قول أهلنا :
الجن التعرفو ولا اليغباك ..
| |
|
|
|
|
|
|
|
|
|
Re: عقل للبيع !! (Re: DKEEN)
|
يا دكين ..
| Quote: يا ام مخ فيونكة انتي .. |
دا حالتو لسه ما بعنا ..
بعدين يا مشندل إنت
لما يكون نفس الكلام الدايرة أقولو ليك قلتو لعزاز
في داعي أكتبو تاني ؟
بعدين إنت وعزاز واحد ومعزتكم عندي واحدة
(مع الإعتذار لعزاز أن حشرتها في زمرتك يا وغد) ..
| |
|
|
|
|
|
|
|
|
|
Re: عقل للبيع !! (Re: كوليل)
|
كوليـل ..
جبت من الآخر قلت أحسن كدا
بيني وبينك الخواجات ديل شغلهم نجيض مش زينا
لكن شكلي كدا حا خلي البيع ..
في إعلان حيصدر بعد شوية تاني
خليكم متابعين ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
تيسير
لا تبيعي ولو منحوك عقلا ( بديلا ) من ذهب ...
كل الموضوع إنك أهملتي تبريد غرفة عقلك كم يوم كده ، عشان كده جاك الإحساس بتاع إنو عقلك هو منبع مشاكلك ...
زيدي مستوى التبريد ، وستجدين أجهزة العقل كلها استعادت توازنها وأصبحت تعمل بكفاءة عالية ...
اسمعي كلام عمك ... ولا تبيعي ...
| |
|
|
|
|
|
|
|
|
|
Re: عقل للبيع !! (Re: ودقاسم)
|
Quote: جني ..
ملاحظة ليهم كلهم مركزين على موضوع المقايضة دا أنا كان بقايض
ما أخير لي عقلي البعرفو وبيعرفني ..
وعل قول أهلنا :
الجن التعرفو ولا اليغباك |
فى ناس فى البورد دا مخهم 128 بايت بس يعنى مخهم كان فطرهم ما بغديهم!
ناطرين المية جيجابيت حقتك دى ودا شعر ما عندهم ليهو إضنين بس فشخرة ساكت!
جنى
| |
|
|
|
|
|
|
|
|
|
Re: عقل للبيع !! (Re: jini)
|
يا جني اللذيذ ..
أنا لو كنت بعت ماكنت حاخت واحد بدل البعتو
كان الهارديسك حيكون مفرمت مع operating system جديد
قدر ما يشغل لي كروت الشاشة والصوت لزوم الشوف والسمع
وبس ..
| |
|
|
|
|
|
|
|
|
|
Re: عقل للبيع !! (Re: ودقاسم)
|
عمو ود قاسم ..
قلت كدي يا عمو
كلامك على العين والراس ..
عملت بالنصيحة وزدت مستوى التبريد وهسه شغال
أحسن من الأول (ودي المشكلة) !
الله يخليك لينا ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
يا جماعة تيسير دى عقلها يوزن بلد على ( بكسر العين) هى بت مسخوطة ساى دايرة تغشكم
عموما أعملو حسابكم يا ناس المنبر يقع فيهو يبقى زى المركب ليهو مكنة مارسيدس فى بودى اتوس.
الماعندو زى مخ تيسير يبعد بعيد تحسبا لسلامة جسمه
| |
|
|
|
|
|
|
|
|
|
Re: عقل للبيع !! (Re: هشام المجمر)
|
يا هشام ..
أنا ما غشيتم والله بالجد دا الحاصل ..
| Quote: يبقى زى المركب ليهو مكنة مارسيدس فى بودى اتوس |
بالغت فيها دي
ما قدر دا يا باشمهندس ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
يااااااااااااااه يا تيسير عووضة
والله ما في أروع من كدا
ذكرتيني صديقتي الظريفة (توما) الله يرجعها للبورد مرة أخرى
Quote: أيظن أنه الناطق الرسمي بإسمي ؟
لالا , لابد أن أضع حداً لهذا .. |
أنا مستمتع حد الإستمتاع
يا تيسير عقل يفهم مرامي دكين البعيدة ويصفده تصفيدا لا يجوز بيعه
| |
|
|
|
|
|
|
|
|
|
Re: عقل للبيع !! (Re: بدرالدين شنا)
|
بدرالدين(وبس) ..
قلنا نضع حد ونبيع
قام عقلي جرى وكلم الناس
ودخلهم أجاويد
وقال دايرين يبيعوني
وقالوا علي شقي ومجنون ..
هسه الكلام جانا من فوق
إنو ما في بيع ولا مقايضة
وما بنقدر نعصى الأوامر ..
شفت البقيت فيها !
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
تيسير
لما أبيتي المقايطة يبقى قصدك التخلص نهائياً..
في كتاب "دع القلق وأبدأ الحياة" الكاتب في تعريفه للمجنون قال (في ما معناه) " هو الشخص الذي لم يحتمل عقله تعارض أمانيه ورؤيته للعالم مع الواقع، فانفصل عن هذا العالم وكوّن عالمه الخاص الذي فيه كل أمنياته محققة".
من الآخر كدا يا تيسير البتاع دا ما حا تلقي عاقل يشتريه..
أما لو عرضتيه على مجنون حا يضحك فيك..
المجنون دا أعقل زول في الدنيا..
أمنياته كلها محققة وبعد دا رُفع عنه القلم (حتى يعقل)
يعقل!!
تاااااااااني!
| |
|
|
|
|
|
|
|
|
|
Re: عقل للبيع !! (Re: محمد السر)
|
محمد السر ..
Quote: الكاتب في تعريفه للمجنون قال (في ما معناه)
" هو الشخص الذي لم يحتمل عقله تعارض أمانيه ورؤيته للعالم مع الواقع،
فانفصل عن هذا العالم وكوّن عالمه الخاص الذي فيه كل أمنياته محققة". |
الكلام دا اقرب للشيزوفرينيا إن لم يكن هي ..
العقل داير ينفصل عن صاحبه ..
لكن في حالتي دي
صاحبه الداير ينفصل عن العقل ..
عرفت الفرق
Quote: المجنون دا أعقل زول في الدنيا..
أمنياته كلها محققة وبعد دا رُفع عنه القلم |
قلنا كدا أبيتو ..
عملتوها لينا أماني ومها
| |
|
|
|
|
|
|
|
|
|
Re: إعلان هام .. (Re: تيسير عووضة)
|
إعلان هام
بعد المداولة والمباحثات وإستعراض ما جاء في حيثيات الدفاع
رأت اللجنة القائمة على المزاد إلغاء عملية البيع المشار إليها
وإصدار عفو عام للعقل المراد بيعه , وهو الآن بصحبتي ماداً لسانه
ومعلناً إنتصاره علي مرة أخرى .
يسري هذا الإعلان من تاريخ صدوره
السابع عشر من شهر أبريل المجيد لسنة ستة وألفين (على قول ناس الفضائية السودانية)
صدر تحت توقيعي
تيسير عووضة
المدعي العام
| |
|
|
|
|
|
|
|
|
|
Re: إعلان هام .. (Re: تيسير عووضة)
|
إستئناف رقم !/عقل/بيع/2006
الاطراف
ظهر أمامى اليوم السابع عشر من ابريل، والذى يصادف عيد ميلادى الالف، المستأنف عقل، ويشار اليه بالطرف الاول، مستأنفآ ضد المستأنف ضده، تيسير عووضة، ويشار اليها بالطرف الثانى.
طبيعة الاستئناف
يستأنف عقل ضد قرار المستأنف ضده تيسير بالعدول عن بيعه فى مزاد علنى فى وكالة (سودانيزاونلاين).
سبب الاستئناف وعلته
يرى عقل ان عدول تيسير عن بيعه كما تقدم، يحرمه من حقه الطبيعى والانسانى فى الانتقال من ملكية تيسير الى ملكية شخص اخر. وهذا الانتقال، فى حال حدوثه، يعنى فرصة حياة جديدة، وتجربة جديدة، وتحرر من عزلة المكان المألوف. لهذا السبب، سبب تفويت حقه فى حياة جديدة، يتقدم المستأنف عقل بهذا الطلب.
الطلب
يطلب المستأنف من حضرتى، انا القاضى الفاضى، ان ابطل قرار تيسير بالعدول عن بيع عقلها. لانه يخالف المادة صفر من قانون ( لا خرخرة فى القرارات المصيرية).
قرار المحكمة
بعد الاطلاع على القانون المذكور والقوانين المجاورة!، قررنا ما يلى:
1- إبطال قرار تيسير على الفور.
2- إعادة عقل الى المزاد العلنى لبيعه كما تقدم.
3- اى شخص يحاول التأثير على قرارات تيسير (مثل عزاز شامى) سوف يعرّض نفسه لطائلة القانون المذكور اعلاه. وسوف يقدم للمحاكمة لاخلاله بامن القرارات المصيرية.
4- ينفذ هذا القرار فور نشره فى الجريدة الرسمية لسودانيزاولاين.
5- تتحمل تيسير اى اعباء نفسية او عاطفية تترتب على هذا القرار.
6- لا نامت اعين الجبناء والجبانات!
حضرتنا
عادل عثمان
القاضى الفاضى.
صدر تحت توقيعى وختم المحكمة
اليوم 17 ابريل الذى يصادف عيد ميلادى الذى لم يأبه به احد. ولا نامت اعين الجبناء والجبانات!
| |
|
|
|
|
|
|
|
|
|
Re: إعلان هام .. (Re: Adil Osman)
|
عادل وتيسير ياوهم
اولا فى نظامنا العدلى ( محاكم طؤارى السلطان) لا وجود لاستنأف ولا عريضة دعوى نحن نمثل كل الاطراف حسب توجيهات السلطان.
ثانيا المدعى مدان مكذلك المدعى عليه.
ثالثا عقلك يا تيسير ليس ملكك مطلقا يعنى ليس ملك حر فهو حكر بالتالى ليس لك مطلق التصرف فيه فلا يحق التنازل عنه او التصرف فيه باى تصرف ناقل للملكية او المنفعة كالبيع الهبة او التنازل الا بعد اخذ الاذن اللازم.
لما تقدم تبطل كل الاجراءات الصادرة منك بما فيها قراركم بالتنازل عن مابدر منكم بعدم رغبتكم فى الاستمرار فى عملية البيع وكذلك يبطل قرار محكمة استنأفكم الوهم ويبطل ويصلب القاضى الوهم عادل بن عثمان السنجكى ويسحل كذلك.
ومن يتجول يقتل
محكمة طؤارى رقم (0)
اسم القاضى ودرجته: لايوجد اسم ولا درجة
| |
|
|
|
|
|
|
|
|
|
Re: إعلان هام .. (Re: Afifi Mahamed)
|
مولاناعفيفي ..
غبت شوية وجيت لقيتك سبقتني و جبت آخر الموضوع
وأنا لسه عندي عريضة طعن ما قدمتها
Quote: ثالثا عقلك يا تيسير ليس ملكك مطلقا يعنى ليس ملك حر
فهو حكر بالتالى ليس لك مطلق التصرف فيه فلا يحق التنازل عنه
او التصرف فيه باى تصرف ناقل للملكية او المنفعة كالبيع الهبة
او التنازل الا بعد اخذ الاذن اللازم. |
شفت دي بالذات أول سبب من أسباب الطعن المقدم
أنت هسي كدا ما أديتنا أي فرصة دي شنو محكمتك الزي محاكم صدام زمان دي ..
البوست دا براهو فيهو أربعة قانونيين ضليعين :
عادل عثمان , أحمد الشايقي , دكين , عفيفي محمد
خليهم يشوفوا شغلهم ..
| |
|
|
|
|
|
|
|
|
|
Re: إعلان هام .. (Re: Adil Osman)
|
عريضة طعن في الحكم
محكمةسودانيزاونلاين
المؤلفة من مولانا عادل عثمان قاضي الجلسة
وعضوية مولانا أحمد الشايقي
بحضور رئيس النيابة مولانا دكين
في الجلسة المنعقدة يوم عيد ميلاد القاضي الفاضي
قد صدر حكم بإبطال قرار بيع تيسير عووضة(طرف ثاني) لعقل (طرف أول)
اتقدم أنا تيسير عووضة المدعي العام بالطعن في الحكم الصادر عن سيادتكم للأسباب التالي ذكرها :
(1) أنا المالك الرسمي والشرعي والوحيد للمدعو (عقل) ويحق لي التصرف فيه بالبيع أو الرهن أو الإستئجار شأنه شأن باقي الممتلكات التي تخصني .
(2) لي كامل الحق في استشارة من تراه مناسباً قبل إتمام عملية البيع خاصة الصديقات و الأصدقاء وألي الأمر طالما لم يتضرر أحدهم من هذه الإستشارة .
(3)(عقل) نفسه رافض مبدأ البيع ويريد البقاء مع صاحبته تيسير(سيد الحق راضي شن دخّل القاضي) ويرى أن ما حدث لا يعدو كونه سوء تفاهم وتمت ازالة بمعاونة الحادبين على مصلحة الطرفين
ولهذه الأسباب نرى أن على المحكمة إعادة النظر في الحكم الصادر لصالح (عقل)
المدعي العام
تيسير عووضة
بتاريخ 17 أبريل المجيد 2006 الموافق يوم عيد ميلاد القاضي الفاضي
| |
|
|
|
|
|
|
|
|
|
Re: إعلان هام .. (Re: تيسير عووضة)
|
Quote: (1) أنا المالك الرسمي والشرعي والوحيد للمدعو (عقل) ويحق لي التصرف فيه بالبيع أو الرهن أو الإستئجار شأنه شأن باقي الممتلكات التي تخصني .
|
ياتيسير يا تيسسسسسسسسسسسسسسسسسير...... ماتزهجنا
وكما اسلفنا سابقا فان عقلك ليس ملكا حر فهو ملك الدولة يعنى حكر يعنى علاقة تعاقدية فهو ملكنا نحن ومنحناه لك على سبيل الاجارة ويحق لنا استرجاعه متى ماشئنا واقتضت بذلك المصلحة العامة فهو ملك للدولة والدولة ملك لله ونحن مستخلفين على الارض بما فيها الدولة والان نريد ان نقلب هذا العقل كبرى للسيارات والدواب والمارة ،،،، اها عندك بعد دا كلام
| |
|
|
|
|
|
|
|
|
|
Re: إعلان هام .. (Re: Afifi Mahamed)
|
يا عفيفي ..
يا خليفة الله في الأرض
كدي واحدة واحدة :
أنا ما تزهجينا وليس ما تزهجنا
خلفاء وما عارفين الرعايا بتاعينكم , إيه دا ؟
| Quote: ويحق لنا استرجاعه متى ماشئنا واقتضت بذلك المصلحة العامة |
ولما كان منشف ريقي إنتو كنتو وين
أها هسي جابت ليها محاكم ..
| Quote: والان نريد ان نقلب هذا العقل كبرى للسيارات والدواب والمارة |
سجمي !!
| |
|
|
|
|
|
|
|
|
|
Re: إعلان هام .. (Re: تيسير عووضة)
|
Quote: أنا ما تزهجينا وليس ما تزهجنا
|
طيب ياتيسير المسألة جابت ليها لماضة كمان تعرفى دا فى ادب المحاكم بسموه اهانة محكمة يعنى باختصار بتحول المدعى لمهين محكمة وتقتص منو المحكمة اولا حقها وتشفو حقو لو فضل ليهو حق.
اما فى ما يتعلق بعقلك ووفقا لتحرياتنا واعترافك القضائى امامنا بانك ما تزهجينا بدلا عن ماتزهجنا وبما انه عقل ناقص ولا يعتد بشهادته منفردا الا اذا ذكره عقل ناقص مثله يعنى نص شهادة فعليه نقرر الاتى :-
يلغى الحكم السابق والقاضى بتحويل العقل لكبرى للمارة والدواب ويعدل القرار بان يصبح العقل والذى هو 2/1 الى موقف للمواصلات العامة على ان لايتضرر سكان المناطق الطرفية من هذا التعديل.
| |
|
|
|
|
|
|
|
|
|
Re: إعلان هام .. (Re: Afifi Mahamed)
|
مولانا عفيفي ..
| Quote: دا فى ادب المحاكم بسموه اهانة محكمة |
ودا في أدب المظالم بسموه إهانة مواطن
يعني أنا female كاملة الأهلية تجي تطلعني male ,,
أنا أحتج 
Quote: وبما انه عقل ناقص ولا يعتد بشهادته منفردا
الا اذا ذكره عقل ناقص مثله يعنى نص شهادة |
هاهاهاهاهاهاهاهاها
كان زمان .. قبل تصريحات خليفة الله في الأرض حسن الترابي
هسه الكتوف اتلاحقت وبقينا سوا ..
أما بالنسبة لتحويل العقل إلي كبري ثم تعديل ذلك إلى موقف مواصلات
فأنا أقترح على هيئة المحكمة إحالة الموضوع إلى وزارة النقل والمواصلات
والتي قد تفيدتم أكثر في هذا الموضوع ..
(أنا خوفي وزارة المواصلات تحول العقل لكشك لبيع تذاكر البصات السفرية)
| |
|
|
|
|
|
|
|
|
|
Re: إعلان هام .. (Re: تيسير عووضة)
|
Quote: كان زمان .. قبل تصريحات خليفة الله في الأرض حسن الترابي
هسه الكتوف اتلاحقت وبقينا سوا ..
|
والله زمن،،،،،، دا مش نفس الراجل الكان كلامو شنو مابعرفو ليك حسع بقى واحد من المراجع والتى تحاولن التستر والتمترس خلفها
عليه وبما ان العقل بدا يخرف ويتكلم برا قررنا جلده اربيعين جلدة وهى حد التخريف وان يشهد جلده طائفة من الناس على ان يتم الجلد بميدان عام ويفضل ابو جنزير او ابو حمامة
| |
|
|
|
|
|
|
|
|
|
Re: إعلان هام .. (Re: Afifi Mahamed)
|
عفيفي ..
ياخ الزول الأيام دي متجندر ومتفنجر
وعامل فيها نصير المرأة ونحن الكسبانات إنت زعلان مالك ؟
أما بخصوص التخريف , فبما أنو المرجعية الأنا استندت عليها خرفانة
إذاً من الطبيعي أن يتأثر عقلي بها ويصير مثلها لذا من الأحرى
إقامة الحد عليها هي أولاً ..
والله من وراء القصد ,,
| |
|
|
|
|
|
|
|
|
|
Re: إعلان هام .. (Re: Adil Osman)
|
حضرة القاضي
كل سنة وانت طيب وعقبال ألف ومليون سنة ...
| Quote: 3- اى شخص يحاول التأثير على قرارات تيسير (مثل عزاز شامى) سوف يعرّض نفسه لطائلة القانون المذكور اعلاه. وسوف يقدم للمحاكمة لاخلاله بامن القرارات المصيرية. |
انا عزاز شامي حاضرة لتمثيل نفسي أمام محكمة الاستئناف لسببين:
1- تأيدا لقرار تيسير في العدول عن طرح عقلها في المزاد، وهو قرار شاركها فيه العقل منذ البدء. مما ينفي فحوى دعواكم بأنه حرمان للعقل من اكتشاف أفق جديدة، هو مشارك في كلا القرارين!
2- أبراء لذمتي من جرم التأثير في القرارات المصيرية لمن يقعون في محيط محبتي، ومعي ما يثبت إني لا أملك قرار نفسي في الوقت الراهن ولفترة مقبلة قد تطول أو تقصر، بالتالي لا املك التأثير على من أحب، وتأكد لو قدرت، لكنت أحلق الآن في السماء!
أرجو من محكمتكم الموقرة النظر بعين الاعتبار لمشاركة العقل في القرار، مما يدل على تمتعه بكافة حقوقة المنصوص عليها في اتفاقية التعايش السلمي.
وشكرا،
| |
|
|
|
|
|
|
|
|
|
Re: إعلان هام .. (Re: عزاز شامي)
|
مثلت عزاز شامي أمام هيئة المحكمة
بصفتها أحد المحرضين والمؤثرين على القرارات (بحسب ما جاء على لسان القاضي)
وبعد أن قامت بدحض التهمة ونفيها عن نفسها
ولحين حضور هيئة المحكمة الموقرة رأينا أن :
(1) نشكرها على ما قامت به تجاهنا من موقف مشرف لا يصدر إلا من انسان جميل زيها.
(2) الإعتذار عن ما حاق بها من أذي بسببنا والذي إبتدأ بالوقوف أمام المحاكم
وما معروف ينتهي وين .
(3)نقدم لها كباية نسكافيه بالحليب ريثما تحضر الهيئة .
المدعي العام
تيسير عووضة
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
ما دمــت عضـو في المحكمـة,
Quote: حضرتنا
عادل عثمان
القاضى الفاضى.
صدر تحت توقيعى وختم المحكمة
اليوم 17 ابريل |
I concur,
Mr. Justice
Ahmed Alshaigi
| |
|
|
|
|
|
|
|
|
|
Re: عقل للبيع !! (Re: أحمد الشايقي)
|
مولانا أحمد الشايقي ..
نشكر حسن تعاونكم
ونأمل أن تكونوا ساعد دفع لهذه المحكمة نحو العدالة
كما ونحيطكم علماً بأن القاضي عادل عثمان دا ولا عادل ولا حاجة
فحاولوا تتفاهموا معاهو ..
المدعي العام
تيسير عووضة
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
في دراسة لجامعات بارما الايطالية وتوكسون الأمريكية اوضحت قدرة العقل على حل المشكلات ومواجهتها وخصوصا ًالعاطفية والعلاقات الإنسانية بين الناس أكبر من تلك القدرة المعنية بالتفكير المجرد ..
ويقول العلماء أن الحب مكانه العقل وليس القلب ..
ولكل انسان خريطة موجوده داخل عقله تساعده في إختيار الشخص المناسب للإرتباط به ..
وهي مجموعة من الصفات التي يرغبها في الشخص الذي يريد الإرتباط به .
أها يا تيسير هسي بقيتي على شنو ؟
عقلك دا لسه بايعاهو ؟
| |
|
|
|
|
|
|
|
|
|
Re: عقل للبيع !! (Re: معتصم دفع الله)
|
Quote: اوضحت قدرة العقل على حل المشكلات ومواجهتها وخصوصا ًالعاطفية
والعلاقات الإنسانية بين الناس أكبر من تلك القدرة المعنية بالتفكير المجرد .. |
يا معتصم لما تحصل مشكلة عاطفية ولا إجتماعية أول حاجة بتتأثر هي العقل دا
هو البيفسر وبيحلل وبينسى وبيتذكر ..
إنت قايل أنا عرضتو للبيع ليه ؟
ما عشان الشوبار بتاعو دا
| Quote: ويقول العلماء أن الحب مكانه العقل وليس القلب .. |
يعني لو كنت بعت كنت حاكون من جوة زي باغة الموية ,, الله ستر !!
والله يا معتصم يا أخوي بعد كلامك دا وكلام الناس ديل كلهم
أنا خليت البيع بس المشكلة المحكمة رفضت العدول عن قرار البيع ..
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
من مولانا دكين عشا البايتات وكيل اول نيابة البيع بالتجزئة ..الى المدعوة تيسير عوووووضة (الواو هنا مقصودة)
وبما انه نما لدي انك تعدين العدة لبيع العقل الذي انعم به الله عليك الى السادة البورداباب وذلك حسب الاعلان الذ نزل بالمنبر في التاريخ المبين اعلاه(مستند رقم (1)).
وحيث انه نما ايضا الينا ان العقل المشار اليه هو منتوج ميراث دنقلاوي بحت.
بالتالي فانك الان بصدد انتهاك المادة 474 – بيع من لا يملك لمن لايستحق .
لذا فانتي مطالبة بالمثول امامنا لشرح مقتضى احوال ما نشرتي .. والاسباب الداعية الى ذلك .
صدر تحت توقيعي وختمي في اليوم الاول من ايلول 2006
دكين ضحوي الحسن عشا الباياتات- وكيل اول نيابة البيع بالقطاعي المقيم.
نوت:
- ختي في بالك الاسباب الداعية الى ذلك والتحتها خطين وتعالي مدرعة .
| |
|
|
|
|
|
|
|
|
|
Re: عقل للبيع !! (Re: Elkhawad)
|
يا خواض ..
| Quote: دحين ان ما بتعاطي سعوط بفتح الله |
أحسن ليك يكون ما بيتعاطى حاجة (على الزيرو)
عشان لما تشتريهو تربيهو بطريقتك ..
| |
|
|
|
|
|
|
|
|
|
Re: عقل للبيع !! (Re: DKEEN)
|
| Quote: الى المدعوة تيسير عوووووضة (الواو هنا مقصودة) |
دا شنو يا مولانا ..
ــــــــــــــــــــــــــــــــــــــ
مولانا دكين عشا البايتات
فيما يلي شرح تفصيلي لما ورد في إعلان البيع :
كنت أعتقد أنني مالك هذا العقل والمتصرف بشؤونه(وإن قلتم بغير ذلك)
ولأن هذا العقل ظل بصحبتي لزمن طويل فإنني وجدته مؤخراً قد رفع الكلفة بيننا
وعمل البساط أحمدي ونصّب نفسه مديراً لشؤوني ومتصرفاً بحياتي الأمر الذي سبب لي عدد من الصعوبات أواجههاالآن لذا اتخذت قراراً ببيعه عن طريق المزاد العلني علني أرتاح ويرتاح هو .
الاسباب الداعية الى ذلك
(1) الركون إلى الراحة والهدوء .
(2) ممارسة حياتي القادمة برؤية مختلفة .
(3)التخلص من الجفاف الذي سببه لي هذا العقل بتدخله في أموري العاطفية
فالعقلانية غير مطلوبة بكثرة في هذه الأمور .
(4) حتى لو لم تتم عملية البيع فقد يعتبر هذا الإعلان بمثابة زاجر له .
(5) يكثر التفكير هذه الأيام في الأمور الخاصة بالعقيدة والدين وأخاف أن يذهب بعيداً
هذا وبالله التوفيق
تيسير عووضة
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
Quote: الاسباب الداعية الى ذلك
(1) الركون إلى الراحة والهدوء .
(2) ممارسة حياتي القادمة برؤية مختلفة .
(3)التخلص من الجفاف الذي سببه لي هذا العقل بتدخله في أموري العاطفية
فالعقلانية غير مطلوبة بكثرة في هذه الأمور .
(4) حتى لو لم تتم عملية البيع فقد يعتبر هذا الإعلان بمثابة زاجر له .
(5) يكثر التفكير هذه الأيام في الأمور الخاصة بالعقيدة والدين وأخاف أن يذهب بعيداً |
تشكر النيابة المدعوة لاستجابتها للمثول امامنا في زمنٍ عز فيه الامتثال والانصياع لحكم القانون ومقتضيات العدالة.
وبالنظر الى الاسباب اعلاه لم نجد إلا السببب رقم تلاتة للنظر فيه وليس لقبوله وتم رد باقي الاسباب جملة وتفصيلا مع التنويه على ان السبب رقم 5 قد يؤدي بك الى محاكم العدالة الناجزة ..
ويامل وكيل النيابة في دفوعك القادمة الحذر دون الولوغ الى ماقد ينتهى بك الى مالانعلم.
فيما يختص بالسبب الذي تم قبوله للنظر فيه الوارد بالرقم تلاتة :
النيابة الان يجري في بالها جميع البوستات السابقة لي المدعوة وتحديدا بعض التعليقات التي تنم على عواطف جياشة من بعض البورداباب في بعض المداخلات وايضا يجري في البال بعض البورداباب الذين تكرر وجودهم في كم بوست بدون مداخلات مفيدة وانما سجلو حضور لمجرد الحضور وتكرر حضورهم وكسيرهم للتلج في الداعي والمافي داعي وكانهم يودون القول جهرة (إنا هاهنا فانظرينا).
والسؤال الذي توجهه النيابة الان هو ما المقصود تحديدا بالجفاف الناتج من الامور العاطفية؟؟
تنويه:
النيابة تحذر المتهمة من انكار مسالة العواطف الجياشة التي تم ضبطها في المحضر اعلاه ، ولاسبيل الى انكارها فقد شوهدت بواسطة وكيل النيابة نفسه في مروره العام على احوال البورد والبورداباب.
وفي حالة الانكار فانها سوف تضطر آسفة الى ايراد الكوتات المستشهد بها مما قد يسبب حرجا اوماشابه للذين تدفقو في عواطفهم دون قيد او شرط.
لذا تامل النيابة فقط الاجابة على السؤال اعلاه ، وعدم الخوض والانكار في هذه المسالة والتسليم بها كما وردت تفاديا للحرج والجرسة وقصة واي واي والله ما قاصد/ين/ة.
ختم الوكالة وتوقيعي
دكين عشا البايتات
وكيل اول نيابة البيع بالتجزئة
ايلول 2006 - الملز
| |
|
|
|
|
|
|
|
|
|
Re: عقل للبيع !! (Re: DKEEN)
|
| Quote: مع التنويه على ان السبب رقم 5 قد يؤدي بك الى محاكم العدالة الناجزة .. |
ـــــــــــــــــــــــــــ
مولانا دكين عشاالبايتات ..
قبل الإجابة على سؤال عدالتكم نود أن نحيطكم علماً بأن حياتنا الخاصة لادخل لها بأمور القضاء كما وأن القائمين على أمر القضاء لا يحق لهم كذلك التدخل فيها أو التجسس عليها , وإننا حين نورد الحديث عنها كجزء من حيثيات الدفاع فهذا لا يعني مطلقاً أنها يمكن أن تنشر لعامة الناس كدا في السهلة .
| Quote: وفي حالة الانكار فانها سوف تضطر آسفة الى ايراد الكوتات المستشهد بها مما قد يسبب حرجا اوماشابه للذين تدفقو في عواطفهم دون قيد او شرط. |
نرى في حديثكم أعلاه نبرة تهديد من محكمتكم الموقرة ومحاولة للضغط علينا ولوى ذراعنا للإعتراف بأشياء خصوصية على الملأ وهذا أيضاً يعتبر غير مقبول .
إقتراح لعدالتكم
في حال إقامة جلسة سرية تنعقد بحضور هيئة المحكمة الموقرة وممثلي الدفاع بالإضافة لشهود العِيان يمكن أن نجيب على تساؤلاتكم .
تيسير عووضة
المدعي العام وحاضر عن المتهم في نفس الوقت
بتاريخ 19 نيسان 2006
| |
|
|
|
|
|
|
|
|
|
Re: عقل للبيع !! (Re: تيسير عووضة)
|
على رسلكم ان مكتبة الكونغرس لا تسع كل هذا الابداع السودانــــي
تيسيرQuote:
قررت أن أبيع عقلي
نعم قررت أن أبيعه ..
لم يجلب لي هذا العقل سوى المشاكل والتعب
بتدخله في الذي يعنيه والذي لا يعنيه ..
ولطالما أفسد على مشاريع جميلة كانت لتتم
لولا تدخله اللعين ..
يحشر نفسه في كل شؤوني دون تردد
ويبادر بالرد دون مشورتي
أيظن أنه الناطق الرسمي بإسمي ؟
لالا , لابد أن أضع حداً لهذا ..
لقد قررت أن أعيش بدونك يا عقلي العزيز !
كيفية البيع
سيتم البيع عن طريق المزاد العلني
على الراغبين والمهتمين الحضور في الموعد المحدد
والذي يبدأ منذ اللحظة ..
سيفتح المزاد بـ ألف دولار تكمل أو ترد ..
الضمان
ليس ضمان مدى الحياة ولا حتي لسنتين أو ثلاث
بصراحة ما عندو ضمان ..
المحتويات
سيتم إستعراض المحتويات الأساسية أثناء المزاد
والمحتويات الثانوية مع من يقع عليه المزاد
وما عدا ذلك سيكتشفه بمرور الأيام !
حسناً .. سنبتدئ الآن .... |
تماضر Quote: احكى ليك القصة دى كانت بتحكيها أمى الله يرحمها
قالوا فى مرة فى القضارف مسكيييييينة وطيبة ولجنا "لجناء" يعنى بتنطق الجيم دال..
شايلة ليها جلد دايره تبيعو ..
..
..
...
يللا فرتقى اللمة دى وبلاش طمسة!!!! |
عزازQuote: ست الكل تيسير
جاية تبيعي الشاقيك لمنو؟
عقلك ده ابقي عليه عشرة عشرة
ببقى ليك لو قلبك باعك
لو خذلتك مشاعرك
عقلك سندك يا يمه
ما تقولي حرمك من سعاده
ما تقولي وقف مراكب سايره
ماتقولي سرق اللحظة
ماكنتي انتي انتي لو ما سمعتي منو
العاقل بعقله شقي
والجاهل في نعيم
وكان جيتي للجد،
عقل زي عقلك ما بيشتريه إلا اللي بيدور الشقا
أشقي، واسعي للشقا
أخير من نعيم جهالة ...
وكان مصرة، بديك عقلي مقايضة واتم ليك فرق العملة محبة ودعوات صادقة ...
شن قولك؟ |
عادل عثمان Quote: إستئناف رقم !/عقل/بيع/2006
الاطراف
ظهر أمامى اليوم السابع عشر من ابريل، والذى يصادف عيد ميلادى الالف، المستأنف عقل، ويشار اليه بالطرف الاول، مستأنفآ ضد المستأنف ضده، تيسير عووضة، ويشار اليها بالطرف الثانى.
طبيعة الاستئناف
يستأنف عقل ضد قرار المستأنف ضده تيسير بالعدول عن بيعه فى مزاد علنى فى وكالة (سودانيزاونلاين).
سبب الاستئناف وعلته
يرى عقل ان عدول تيسير عن بيعه كما تقدم، يحرمه من حقه الطبيعى والانسانى فى الانتقال من ملكية تيسير الى ملكية شخص اخر.... |
عزاز Quote:
انا عزاز شامي حاضرة لتمثيل نفسي أمام محكمة الاستئناف لسببين:
1- تأيدا لقرار تيسير في العدول عن طرح عقلها في المزاد، وهو قرار شاركها فيه العقل منذ البدء. مما ينفي فحوى دعواكم بأنه حرمان للعقل من اكتشاف أفق جديدة، هو مشارك في كلا القرارين!
2- أبراء لذمتي من جرم التأثير في القرارات المصيرية لمن يقعون في محيط محبتي، ومعي ما يثبت إني لا أملك قرار نفسي في الوقت الراهن ولفترة مقبلة قد تطول أو تقصر، بالتالي لا املك التأثير على من أحب، وتأكد لو قدرت، لكنت أحلق الآن في السماء!
أرجو من محكمتكم الموقرة النظر بعين الاعتبار لمشاركة العقل في القرار، مما يدل على تمتعه بكافة حقوقة المنصوص عليها في اتفاقية التعايش السلمي.
وشكرا، |
دكين Quote: من مولانا دكين عشا البايتات وكيل اول نيابة البيع بالتجزئة ..الى المدعوة تيسير عوووووضة (الواو هنا مقصودة)
وبما انه نما لدي انك تعدين العدة لبيع العقل الذي انعم به الله عليك الى السادة البورداباب وذلك حسب الاعلان الذ نزل بالمنبر في التاريخ المبين اعلاه(مستند رقم (1)).
وحيث انه نما ايضا الينا ان العقل المشار اليه هو منتوج ميراث دنقلاوي بحت.
بالتالي فانك الان بصدد انتهاك المادة 474 – بيع من لا يملك لمن لايستحق .
لذا فانتي مطالبة بالمثول امامنا لشرح مقتضى احوال ما نشرتي .. والاسباب الداعية الى ذلك .
صدر تحت توقيعي وختمي في اليوم الاول من ايلول 2006
دكين ضحوي الحسن عشا الباياتات- وكيل اول نيابة البيع بالقطاعي المقيم.
نوت:
- ختي في بالك الاسباب الداعية الى ذلك والتحتها خطين وتعالي مدرعة . |
تم اختصار التوثيق في المداخلات اعلاه فقط خوفاعلى الباند ويدث
| |
|
|
|
|
|
|
| |
تيسير عووضة
فيصل نوبي
معتصم دفع الله
Mouawia El Tayeb
Soumeta
Tumadir
Adil Osman
Afifi Mahamed
jini
Muna Khugali
Ishraga Mustafa
ودقاسم
هشام المجمر
بدرالدين شنا
Ahmed Abdallah
hatim
انعام عبد الحفيظ
Osama Ahmed
فيس بوك
تويتر
انستقرام
يوتيوب
بنتيريست