|
|
 Re: صور من حلتنا .. (Re: تيسير عووضة)
|
تيسير!
قماش السعودية ما بدورو! بعمل لى حساسية. انا داير قماش من القطن السودانى ده. من المصنع السودانى ده. من يد عاملة الغزل والنسيج السودانية السمحة دى. شن قولك؟
| |
 
|
|
|
|
|
|
|
|
Re: صور من حلتنا .. (Re: Adil Osman)
|
سجمي يا عادل ..
الأمريكان بيعرفوا ينجدوا المراتب
أمال مراتب الـ easy sleep دي سووها لي منو ؟
لكن بيني وبينك شغلهم نضيف
بيعرفوا يستفيدوا من الفايض في حل الأزمات الإقتصادية ..
ولا عم حسن الطاهر المنجِّد الفي حلتنا
صحي ذكرتني ما تجيب لي نساج عناقريب أمريكي
تلقاهو بينسج العناقريب بالريموت كنترول ..
| |
|
|
|
|
|
|
|
|
|
Re: صور من حلتنا .. (Re: Adil Osman)
|
| Quote: عليك الله اكوى لى جلابيتى السمنية. الليلة معزومين غدا فى الثورة |
أنا كويت ليك الجلابية بمكوة بخار .. ما شايفا مهفهفة كيف ؟
مكوة الفحم المرة الفاتت طارت منها شرارة قدت الجلابية وخربتا ..
وبعدين في شوية تمر شيلو معاك لزميلكم المكسور دا
البلح برضو بيجبر الكسور ..
وقول ليهو دا من تيسير الدنقلاوية ..
| |
|
|
|
|
|
|
|
|
|
Re: صور من حلتنا .. (Re: khaleel)
|
Quote: وحرجل ومحريب وشوية حلبة
باقي ولدي دي مقبوض
عندو حمي وباليل قعورد |
حلبة يا خليل
وحرجل
ما لقيت محريب لانى ما عرفتو. لقيت ليك شيح. تعرف الشيح؟ دوا المغص ووجع البطن..
| |
|
|
|
|
|
|
|
|
|
Re: صور من حلتنا .. (Re: khaleel)
|
Quote: ما عندكم شوية حلومر
باقي رمضان قرب |
يا خليل ..
جبتا ليك الحلومر وكمان معاهو
واحد عرديب و واحد قنقوليز ..
سلامة ولدك المقبوض ..
خليهو يسف حلبة حصا الجابا عادل دي
وإن شاء الله يصبح تمام ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
شكرآ يا تيسير الدنقلاوية. شكرآ على المكوة. وشكرآ على البلح. وشكرآ على ظرفك. وعلى كل شئ. شوفى المنظر ده من دنقلا. بت صغيرونة قاعدة تحت حيطة بيتهم. حلاتها:
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
نزوق من الخلوه ..
ومن التسميع .. يا إما البحر جاك زول
ومنها الجناين جاك بلا ..
فتيل الزيت المخلوط مع الصابون مسوحنا
لتغطية الجريمه من اعين الوالده التي
( تشختك ) بي صباعها في صدرك عشان الغباشه
تكشفك ..
لم جينا البندر صعدنا لدوري الدرجه الاولي
وكنا بنلعب سباق باللساتك ( الدراتير )
وقت العصاري .. هذا بعد ان نقضي معظم النهار
في طحن الفحم وخلطه بالماء وتكوين ورنيش اللساتك
لإظهار جمالها اثناء السباق ..
امام باب الشارع الجالوص عمك رجب المكانيكي وفرحان
جدا عشان الليله مافي كوره حا تطير ليه في بيتهم
وعشان اللساتك بنات العربات اللي هو دكتورها ..
| |
|
|
|
|
|
|
|
|
|
Re: صور من حلتنا .. (Re: عمار بيلي)
|
سودانية فى دارفور تضرب الطوب لبناء شفخانة فى احد معسكرات النازحين.
معسكر النازحين طبعآ حلة مؤقتة تضم الاف السودانيين الذين هجروا حلالهم وقراهم بسبب عنف الحكومة والمليشيات التابعة لها..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
درجة عاشرة لا ما صاح انا بقترح نديهم درجة تانية لكن بعد ما السودان يتوحد ومشكلة دارفور تتحلى ونشيل الحصة الكاملة من البترول ونعيش في وطن حر ديمقراطي بعد دا ما نفكر نديهم ياتو درجة لانها الدرجة التانية جاهزة ليهم( اسف اذا حولت شكل الكلام في البوست)
| |
|
|
|
|
|
|
|
|
|
Re: صور من حلتنا .. (Re: almahsi)
|
المحسي
إزيك ..
حبوبتك لسه زعلانة مني 
Quote: درجة عاشرة لا ما صاح انا بقترح نديهم درجة تانية لكن بعد ما السودان يتوحد
ومشكلة دارفور تتحلى ونشيل الحصة الكاملة من البترول
ونعيش في وطن حر ديمقراطي بعد دا ما نفكر نديهم ياتو درجة
لانها الدرجة التانية جاهزة ليهم |
بعد ما السودان يتوحد ومشكلة دارفور تتحل تاني ما في درجات
المواطنين كلهم حيكونوا سواسية .. بس لكن الكلام دا حيحصل سنة كم يا ربي ؟
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
لا انا الزعلان لانو زهراء قالت لي انك جيتي وشربت القهوة وانا مافي على العموم محل ما يسري يمري وبالهنا
وحدة السودان لازم تكون زي ما قلتي اخلاقية قبل ما تكون سياسية يعني لازم نتأدب ادب السلام والديمقراطية عليك نور يا بت عووضة ( مكان ولا اسم؟) واسف مرة تانية للحوار شبة السياسي اجتماعي في البوست دا. الادب دا مهم
| |
|
|
|
|
|
|
|
|
|
Re: صور من حلتنا .. (Re: almahsi)
|
المحسي ..
قهوة حبوبة زهراء كانت حلوة إنت كنت وين ؟
وبعدين البوست يا محسي عام لانو عن حلتنا
وحلتنا فيها كل الأشياء بما فيها السياسة والكورة والفن
وانت قايل الرجال العجايز الجمب دكان الطيب ديل
بيتكلموا في شنو ما في السياسة دا ذاتا
يا زول ولا يهمك ..
| Quote: يا بت عووضة ( مكان ولا اسم؟) |
بت عووضة اسم (ما ليهو علاقة بمارنجان عووضة)
| |
|
|
|
|
|
|
|
|
|
Re: صور من حلتنا .. (Re: عمار بيلي)
|
عمار بيلي
إزيك ..
Quote: وكنا بنلعب سباق باللساتك ( الدراتير )
وقت العصاري .. هذا بعد ان نقضي معظم النهار
في طحن الفحم وخلطه بالماء وتكوين ورنيش اللساتك
لإظهار جمالها اثناء السباق .. |
صورة فيها كل براءة الطفولة وجمالها ..
والأجمل اعتزاز كل طفل بعربيتو المفترضة
ومحاولة الحفاظ عليها وتزيينها ..
نحن -البنات- كنا برضو بنعتني بأدوات اللعب ..
بت الدلاقين .. كل واحدة شايفة عروستا أجمل
الحصى بتاع أم الحفر والذي يتم انتقاؤه بعناية شديدة ..
الحجر بتاع الحجلة يكون نضيف وأملس وكل بت تتباهى بحجرها
وحاجات تانية كتييرة
تسلم يا بيلي ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
تيسير ..
تثيرين ( البلاوي ) .. دائما
يا زولة يا رايعة ..
غريبة هي حلتنا ..
ليس من صور لها ..
بل عرض مستمر لفيلم روائي .. طويل .
تدخلها شمالاً من شارع ترابي عريض .. يبدأ بحوش فاروق ( المقابر ) ثم .. لا ينتهي منطقيا ، لكنه يتلاشى بين ( خيران .. ومباني متطاولة .. أخرى مموهة الشكل ) .. وتماما من حيث يبدأ ذاك الدرب الترابي ( قديماً ) تبدأ هرولة صور ذاكراتي تنازلياً ..
.....
( عثمان كوتود ) ..
كان حرياً تسميته ( عثمان كطود ) .. فكالطود هو .. قُدَّ من طينة أخرى ( أو ربما كنت أراه كذلك ) .. كان أسودا كالح السواد .. قصيراً في جَسَمةٍ صلبة .. لا تكاد تتبين له عمرا ، لكن بعض الشيبات الجعداء أعلى صدغيه تجاوز به الأربعين ، قال ( عوض جِنّي ) : يازووووول ، ده جريدة يدو واحدة .. ( و مازلت مؤمنا بذلك ) ، شفتاه غليظتان .. بل إنها المعلم الوحيد الذي يسرق عينيك في وجهه الوديع ، عيناه صغيرتان كعيني أم قيردون .. تلمعان ، تلازم ( سفته ) شفته السفلى - وردية اللون - وتظل تسترق عيناك الطريق إلي ابتسامته الخجول .
نهاره ظِلُ تلك ( اللالوبة ) كثيفة الخضرة قرب السور الشرقي للمقابر . لالوبة غريبة .. صنعت أغصانها المدلاة حولها ما يشبه الكهف .. ( قيل لنا أن تلك الشجرة تشرب دم الميتين .. و مسكونة بالشياطين .. فلا نقربها أو نأكل من ثمرها ) .. و كنا نمر بعيدا عنها متوجسين و في النفس شهوة لالتقاط حباتها العسلية الضخمة متناثرة تحت ظلها العظيم ذاك . وحده عثمان تذوق لالوبها العسلي الحرام .. وحده استظل بها ، وحرُّ الصيف لافحٌ للقبور العتيقة تلك .. و الأسوار الحديدية الصدئة ( لجَّبانات ) عليّة القوم .. و الخنافس السوداء لامعة الطهر ( خدامة العقرب ) .. و العظاءات الذهبية تتقافز كللمحات الخواطف بين ( شواهد ) الطين المتآكلة و الأحجار الصخرية المتناثرة .
وحده عثمان كان متآلفاً مع ذاك ( الوجود ) وسط تلك السكينة ( العدم ) .
غريب كان عثمان ..
ودوداً حد الريبة في وده ذاك ، مهاباً .. يخافه ( الرباطة ) حين يلف الليل عتمور ( فاروق ) ، فلا يعبرها إلا قطاع الطرق .. و لا يتخذ سورها الجنوبي ( مسطبةً ) سواهم ( ندماء الكؤوس الليلية ) .. و الغناء البَكّاء .
قليلاً ما تراه يرتاد الأزقة شرايين بيوتنا الطينية تلك ، لا يفعل ذلك إلا في طريقه لـ ( فريق السوق ) - تمر أبونا - كما تسميه حبوبة كُبري ، يملأ ( حُقّته ) مستنشقا عميقاً تلك الرائحة النافذة قبل أن ( يعبيء ) شفته السفلى بها .. ثم يبصق ميمماً تجاه الشمال في خطوه الخفيف على الطريق الترابي .. منتهياً إلى عالمه الأليف .. ( الجّبانة ) .
غريبٌ كان عثمان ..
لم تكن تبصر - وأنت عابر أسوار الجبانة الأربعة - إلا رشقات التراب تخرج من جوف الأرض في إيقاع منتظم .. تدرك حينها أن عثمان داخل تلك الحفرة .. يعدها لتكون قبرا ، سبعة .. عشرة .. إثنا عشر .. ما كان يحسب عددا للقبور التي يعدها لتضم أجداث ساكني الحي جنوب المقابر .. الحي الشعبي الوحيد جنوب المقابر .. ديم ( كوريا ) ثم حلتنا : ديم التعايشة .. تصطف خلفه بقية الديوم الوادعة في فوران تفاصيل الحياة .
شمال ( حوش فاروق ) كانت ( الخرطوم 2 ) : مجموعة من الفلل الصغيرة وطيئة الأسوار .. تتمرد أغصان أشجارها مادةً أغصانها خارجهُ .. كأنما تبحث عن فكاك من ذاك الصمت الإستقراطي في الداخل .. وسيارات و نساء ( كالجن ) طيبات العبير حين يعبرنك - متوجسات - و عيونهم تتهمك بالـ .. فقر المسكين .. المريب .
غربها مدرسة .. وعدد من الأسوار ذوات ( الجهنميات الحمراء ) .. تحجب ماهية المبنى خلفها . المساحة المتربة بين سور المقابر المتهالك و الجدران المأهولات تخذها الناس ( كوشة ) .. تمرح فيها ( غنيمات ) جدي مكاوي مع رفيقاتهن الراجلات إليها - في رحلة يومية - من بيوت الطين فقيرة ( الكوش ) .. و بعض أبناء الشوارع التعيسة .
شرق سورها العظيم السميك .. وأحجاره من ( الطوب الأحمر ) لا تشبه تلك التي نصنع منها أشياؤنا العجيبة بعد نحتها في أعمدة الكهرباء .
كان السور سميكاً .. يستلقي عليه بعد الغروب باعة ( الترمس ) .. وعمال ( كشك التلج ) .. وبعض الغرباء العابرين .
الشرق كان ( العمارات ) .. كائنٌ لا يشبهنا في شيء .. يرعب كما ترعب رائحة البخور و همهمات المشتكين و الحواريين و أنا أخبيء رأس في طيات ( توب الزراق ) تلبسه جدتي الزلال عند زيارة الفكي السنوسي . ليست قدسية تلك التي أحس حين أعبر شوارع ( العمارات ) الأسفلتية اللامعة حينها ( كانت الطرقات بين البيوت مسفلتة - لدهشتي - .. إذ كيف يتزاور الناس حينها إذ - يفصلهم - هذا السواد البارد اللامع ؟؟ .. عجيب ) . . غير أني كنت أعبرها من وسط الشوارع الصناعية تلك .
عيناي تلتقطان أحرف اللافتات يمنة و يسرى : إحترس من الكلب / فيللا ستاوروس / منزل أحمد المصطفى !!! كيف كان يغنى إذن في ( راديونا ) الخشبي في ( برندتنا ) : في ناس في المُره جافونا وبكره الحلوة بتجينا ؟؟؟ وهو ينام هنا .. في العمارات ؟؟؟
زجاجات الحليب فوق أسوار المنازل .. بيضاء ( تيترون ) رسمت عليها بقرة سوداء لامعة .. في خلفية خضرة أشجار الحدائق .
أعبر كل ذلك ( العالم ) متجهاً إلى الفضاء الذي يسبق المطار .. لأشرِّك للطير .
غريبٌ كان عثمان
يقول وهو خارجٌ من ود اللحد - بعد أن تأكد من تمام ( جمالية ) عمله .. يقول ناثراً ما تجمع في سبابته الغليظة من عرق غطى جبهته الضيقة : ( لله و الرسول .. لله والرسول ) .. ثم خفيفا يتقافز فوق القبور المتراصة في أبدية موتها ( تمامُ تراصها في حميمية حيواتها ) .. باصقاً ما علق في شفته من ( صعود ) .. مكوراً سفةً أخرى .. لقبرٍ جديد .
غريبٌ كان عثمان يا تيسير ..
و غريبٌ أن تزحمني - وإياك - تفاصيله اللصيقة بالذاكرة .
حبيبةٌ هي حلتنا .. بعيدة ..
بعيدٌ كل شيء الآن ..
و .. أقرب ما يكون .
تعبت ..
لك التحايا
| |
|
|
|
|
|
|
|
|
|
Re: صور من حلتنا .. (Re: Emad Abdulla)
|
عماد
يا زول يا أروع ..
دي ما صورة من حلتكم
دي رواية متماسكة الأطراف ..
لمن بقيت أسأل روحي
ياربي دا كلو عندكم
(مقابر فاروق) ومحيطها
والأحياء على جنباتها الأربعة
نمرة اتنين و العمارات
والديوم
وعثمان الغريب
والالوبة المحرمة والجهنمية
وصفتها وصف ولا أعمق ..
زي الكأني واقفة حالياً جمب الكشك بتاع التلج
يديك العافية يا عماد ..
| |
|
|
|
|
|
|
|
|
|
Re: صور من حلتنا .. (Re: مهيرة)
|
مهيرة
إزيك ..
دايماً تلقي نسوان الحلة يتلموا ويمشوا سوق الخضار سوا
يشتروا سوا ويجوا راجعين لو في ملوخية يورقوها مع بعض
لو في بامية يقمعوها مع بعض .. كانوا بيتشاركوا في كل شئ ..
عشان كدا حياتهم كانت جميلة وصافية ..
شكراً عزيزتي ..
وتسلمي على الصور الجميلة ..
| |
|
|
|
|
|
|
|
|
|
Re: صور من حلتنا .. (Re: حمد فتح الرحمن)
|
حمد الرحمن ..
التركين دا الطبق الرئيسي والأكثر شعبية أيام الجمع والعطلات الرسمية
كما و أنه وجبة قومية تبرز هويتنا نحن بني دنقل وأبناء عمومتنا من المحس ..
على جنب ..
مرة جاية من السودان أبوي ضرب قال لي جيبي معاك تركين
تاني بعد شوية ضرب قال لي وجيبي معاك تمباك
قلت ليهو الاتنين مستحيل اختار واحد بس
لانو يمكن ما يدخلوني الطيارة
وقلت أكيد حيختار التمباك (كنوع من الكيف)
تتخيل يا حمد اختار التركين !
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
خارجي / نهار :
: أريتو يا يُمه برسيم وشك .. مِن بشير ، عاد الليلة نازل مِنّو .
: الله واحد .. أريتو يدوم ، عِلا هُوْ ... !! بري .. الشكية لي اب إيداً قويه .
: اصُبري يا دي .. إتّي ناس بت الولي ديل .. المات ليهم منو ؟؟
: هي يا يُُمه حليل أبوي .. أمِس القريبة دي ، ما حدّستك نفيسة بت الياس ؟؟.. أجي يا يُمه !!
: بري و اللهي .. يطرشني .. ما سمعت وحات أبوي .. إن ما في الخدار سمعت محجوب الجزار يناغم في أم الحسن بت أب ضُراع ..
: النبي ؟
: أها عاد أكان كنت عارفه .. البيقعدني شنو ؟.. هووووي يا فاطنه هوي ، المطاعنه خليها .. آآآي .
: أجي يا اخواتي ؟.. قادر الله ، ما خشمي ده ؟.. أها قدرت عليهو .
: قدرتي ولا ما قدرتي .. ما يا هو كلامك عاد .. دايره تلوِّميني معَ بت الولي ؟؟ ، باكر تقول الرضية ما جات عزتني .. ما بعرفك أنا ؟؟
: ووب على ووب علي .. هسي يا اخواني المره دي أنا حدستها ؟؟.. هوي يا ختي هوي ، أنا ما فاضية ليك .. أكان بتكوسي ليك سبلة ، شوفي غيري . يعلم الله بي أضاني الماشي ياكولا الدود دي و قدام بيت ناس ود الأزرق ، أمونه علي كلمتك و قات ليك أكان بتمشي بيت البكا تعالي لينا .. نحن ماشات بعد الفطور .. أجي يا اخواتي !!
: شكيتك علي الله كان هجمتيني .. شاهد هوْ عاد .. يطرشني طراش الصح داك أكان سمعت ، لكين إتي !! الفيك انعرفت يا اللخباته يا السواطه .. أديتك القدرك عاد .
: هوي هه .. إتّي زااااتك شن طعمك مع الحريم البتلومن ؟.. أول إن عزيتيها ولا لأ ، ماشه تفرقي معاها ؟؟ قادر الله .
: سعدية هوي .. يقدر عليك القدرك اشا الله .. رجيت الله عليك ، ما الإستبالية دي ؟؟ خليتا ليك يا سعدية ، أها !! عندك كلام تاني ؟
: استغفر الله ، انتن يا حريم جنيتن ؟.. حسي الكلام ده لزومو شنو ؟..
: مريم هوي .. خشمِك و عليكْ ، حسّع في زول سعِلكْ ؟ ولّا يا هو .. غُزُّونا ما تنسونا ؟..
: أرحكي يا مريم .. المشتهي الحنيطير يطير ..
: أمشن .. قطر عجيب اشّا الله .. شوفي الخِِلقه و سِتَّها !!
: قااااادر الله .. سمحه يا يُمه الفلهَمَه عند أهلا ..... بِس .
: تبِسّي كديسه اشّا الله ..
: ........
( حلتنا .. حلاتنا ) ..
| |
|
|
|
|
|
|
|
|
|
Re: صور من حلتنا .. (Re: Emad Abdulla)
|
يا عماد ..
شكلة ليها ضل ..
لكن الرضية بالغت مالا شرانية كدي ؟
بالجد لكن حوار حلو وعفوي لا تخلو منه أي لمة نسوان
والظريف بعد دقيقتين برجعوا زي الماحاصل شي
لأنو قلوبهم نضيفة ..
أعجبني الحوار جداً
تسلم يا عماد ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
بيت ناس ست البنات والتومة جمب بعض ..
جيران حيطة بالحيطة , وبيناتهم طاقة ..
أها اليوم داك فانوس ناس التومة ماكان فيهو جاز
قامت ست البنات ختت الفانوس في الطاقة عشان يضوي البيتين !
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
كُرو رو رو رو رو رووور،،،
البوست البحبو و فيهو احبابي،،
إزييييييييكم،،
تيسيييير الصبوووحة الصبيحة،،
يا فرير داموور المسخ الارياح،،
مش انا عندي ليكم الشوق هنا؟
عمو عادل الحبيب،،
مطالب بعدد واحد صورة لعروسة مولد او اي شي ليهو علاقة بي الحلاوات المولدية،،
اصلو روحي مشحتفة علي سمسمية،، :S
| |
|
|
|
|
|
|
|
|
|
Re: صور من حلتنا .. (Re: Soumeta)
|
حبيبة قساي سوميتا ..
إنتي جيتي ؟
وينك دا كلو البوست البتحبيهو فاقدك وأحبابك مشتاقين ..
يعني إلا المولد حتى تجي
خلاص لغاية ما عمو عادل يجيب الحلاوة هاك دي
عشان ما تطلعي من المولد بدون حمص 
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
تيسووووورة،،
إنتي بتخربي طبعي كدة،،
عروستين مرة وحدة،،
ده انا كل حلمي قطمة سمسمية،،
عارفة انا مرة كبيرة كدة و متمنية يوم امشي مولد،،
و اجي كرعيني غبارن لي السما،،
و بي سفنجة،،
و لافحة توب امي،،
دي من الصور الحلوة الإتمنين اخدها،،
| |
|
|
|
|
|
|
|
|
|
Re: صور من حلتنا .. (Re: Soumeta)
|
سبحة اللالوب
الدراويش اللابسين أخدر
عروسة المولد والحصان
السمسمية والفولية والحمصية
وحلاوة لكوم
صوت الطار البيدخل جوة الروح
مُدّاح الرسول الكريم
والنوبة
وفتة الرز
والشفع الفرحانين
وسوميتا لافحة توب أمها
وكرعينا مكتحات وشايلة حتة سمسمية بتاكل فيه
وعيونا بيلمعو زي انوار ميدان المولد من الفرحة ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
عمو عاااااادل إزيك،،
قدر ما سغرت عيوني ما عرفت ده شنو؟
دووم؟ نان العرب شن عرفتن بي دومنا،،
لالوب،، بري ،، لالوبنا اسغر،، و برضو شن عرفتن،،
نبق،، فااااااااملي سايز،، برضك ما اظنش،،
و الصورة التانية ما ظاهرة،،
| |
|
|
|
|
|
|
|
|
|
Re: صور من حلتنا .. (Re: Soumeta)
|
تيسير وسوميتا..
بالغتوا لكن!
ما عرفتوا الفاكهة السودانية دى؟
حالتى قايلكم سودانيات قحات!
مش سودانيات بتاعين "بلاد برّة"!!
طيب هاكم الصورة دى لنفس الفاكهة السودانية.
الصورة دى انا "لطشتها" من بوست عصام عبد الحفيظ (ابق قليلآ).
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
عارفة يا يسوورة،،
عندي حاجة غريبة مع المديح و النوبات و الحاجات دي،،
قبل مدة كان كتبت بوست عن الموضوع ده،، في مكان آخر،،
المِهِم،،
بتجرسني و بتبكيني بعد مرات و بتمتعني مرات تانية،، غايتو شغالة فيني الله ينرو يا قول المصاروة،،
لكن تاني ما بمرق يا قولك كان لقيت جنس ده،،
في صورة سمحة خلاس جاية قولي إنشاءالله القاها،،
| |
|
|
|
|
|
|
|
|
|
Re: صور من حلتنا .. (Re: Soumeta)
|
سوميتا ..
فعلاً الحاجات دي بتشدك ليها بقوة
صوت الطار دا فيهو جاذبية غريبة !!
في ناس بيخشوا في عوالم تانية بصوت الطار والذكر والنوبة
شكلنا لو تابعنا الحاجات دي حنبقى زيهم ..
* مستنية الصورة ..
| |
|
|
|
|
|
|
|
|
|
Re: صور من حلتنا .. (Re: Adil Osman)
|
فاكهة سودانية ..
تكون بندق ياربي ؟
شكلها قريب للبندق
لكن البندق ما فاكهة
يكون شنو ؟
يا عادل بالمناسبة الصورة ما ظاهرة
ممكن تنزلا تاني , يمكن نعرفا ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
يسوورة،، الصورة التانية الإنتي ما شايفها عروسة مولد قدر الضربة،، نوع المافي زول بشتريها ديك،،
ولي قصدك حقت النبق!،، غايتو كلهن ظاهرات عندي بقن،،
و مشبهة الحتة علي الحسين! بس ما متأكدة،،
ويااااااااااا حليلو المولد في الحُسين و البرناااامج،،
دي صورة من حلة في الذاكرة ساي ،، ما حلتنا،،
| |
|
|
|
|
|
|
|
|
|
Re: صور من حلتنا .. (Re: Soumeta)
|
سوميتا ..
الماظهرت حقت النبق ..
لقيت صورة بتاعت حلاوة لكوم منزلها عمو عادل في البوست دا ذاتو
بس أبت تنزل لي نهائي (عشان لافحاها)
غايتو اعتبريها نزلت وتعالي ناكلها
| |
|
|
|
|
|
|
|
|
|
Re: صور من حلتنا .. (Re: Adil Osman)
|
هي يا عمو عادل!
كدي اقرا انا مش خمنت ليك نبق نص الخمينات؟
لكن ده نبق عجيب!
وبلاهي في زول غيرنا بعرفها؟
الهواميق زي ما بتقول لي ماما،،
غلادة نبق!
قادر الله،،
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
عمو عااااادل و يسووورة ،،
بي مناسبة المدايح و النوبة و الحاجات الجميلة دي،،
تعالو اسمعو معاي المنبهجة بين حمزة سليمان و الختمية،،
| |
|
|
|
|
|
|
|
|
|
Re: صور من حلتنا .. (Re: معتصم دفع الله)
|
معتصم ..
بت حلتنا الحلوة دي نورت البوست وأدتو طعم تاني ..
شكراً لصلاح شتات
وشكراً ليك يا ذوق ..
وبعدبن القبب الفي الصورة دي بتديك احساس انها مبنية من زمن الأهرام
بحسها عريقة فعلاً وروحانية ومقدسة عديل ..
| |
|
|
|
|
|
|
|
|
|
Re: صور من حلتنا .. (Re: تيسير عووضة)
|
حاجة ستنا راقدة فوق العنقريب وبتتكلم مع جارتا بالحيطة :
عليك الله يا مقبولة لو عندك فندك حديد مديهو لي أدق بيهو البن
عشان العندي دا فندك خشب
وريحتو توم وبهارات بيخرب البن ..
تقوم مقبولة تخت الفندك في الحيطة
وحاجة ستنا ترسل بتها تنزل الفندك من الحيطة ..
| |
|
|
|
|
|
|
| |
Adil Osman
تيسير عووضة
احمد العربي
khaleel
Soumeta
Emad Abdulla
مهيرة
حمد فتح الرحمن
معتصم دفع الله
انعام عبد الحفيظ
فيس بوك
تويتر
انستقرام
يوتيوب
بنتيريست