|
Re: يوميات زلابية الحنّانة (Re: هشام آدم)
|
( كلام في السياسة )
(عديله) التي فرشت على الأرض دفاترها وكتبها وتنهمك في الدراسة رغم بغضها الشديد للمناهج الدراسية ، فهي ترى أن ما يقدم لهم في المدرسة ما هو إلا سخف يجب عليها أن تقبل به من أجل ألا تضطر لترك المدرسة ، وهي في ذلك إنما تحرص على عدم تفويت متعة الشغب الذي تجده هناك وليس لشيء آخر. ويقال أنها كانت في أيامها الأولى في المدرسة - عندما كانت تذهب مع والدها على ظهر العربة الكارو في طريقه إلى سوق الفحم - باكية ومستاءة أشد ما يكون الاستياء . وقد تولد هذا الشعور البغيض لديها للمدرسة وكل ما فيه وما يرتبط به من عملية الاستيقاظ المبكرة التي تعنيها المدرسة . وهي التي كانت تنام حتى العاشرة صباحاً لتستيقظ على أصوات أطفال الشارع فتذهب دون أن تغسل وجهها ، وقبل أن تمر على الحمام أولاً لتدخل معهم مباشرة في اللعب. (زلابية) هي الأخرى تتذكر يوم أن جاءت (عديله) في أول يوم دراسي لها باكية وساخطة على كل ما يتعلق بالمدرسة ، وكأنها تريد بذلك التأكيد على استياءها الذي أبدته صباحاً ، وعندما سألت عن سبب سخطها على المدرسة قالت رأيها بكل صراحة:
* الأستاذ قال لينا أكتبو (أحمد) في الكراريس
- ومالو يا عديلة ... ده ما علم ، ما دايرة تتعلمي يا ماما؟
* وأنحنا كان بنعرف نكتب (أحمد) كان مشينا المدرسة؟
فنظرت (زلابية) إلى (حمد) - الذي وقف شامخاً معتزاً بابنته – وهي تهمس له:
- شكلو بتك دي ما حتنفع في القراية بتعريفة
وفي غمرة انشغالها بالدراسة وفروضات المدرسة ، سمعت في مذياع أبيها الذي نام وهو يستمع إلى أخبار منتصف النهار : "هذا وقد صرح رئيس الوزراء الإسرائيلي إريل شارون خلال المؤتمر الصحفي الذي عقده أمس عزم بلاده على المواصلة في إقامة الجدار الفاصل ...."
= يابا ... يابا
يرد (حمد) وهو يغالب النعاس ويمسح فمه بباطن كفه:
- في شنو ؟
= إنتا الجدار الفاصل ده يعني كيف؟
- عديله عليك الله داير أنوم لي ساعة كده قبل ما أرجع الشغل
= عليك الله يا أبوي .. يعني شنو الجدار الفاصل ده ؟
- يعني ما ننوم في البيت ده وله شنو يعني؟
= بس وريني ونوم .....
- ما جدار .. يعني حيطة بين اليهود والجماعة الفلسطينيين ديل
= عشان ما يفلعوهن بالحجار؟
- آآآي ...
= طيب ما ممكن يقوموا يلفوا بالجهة التانية !!!!
- عديلة !!! الحيطة دي داير ما يدور البلد ديك كلها ...
هنا تشترك زلابية في الحوار السياسي عندما سمعت جملة حمد الأخيرة ، فتركت صينية الرز التي كانت تنظفها :
* سجمنا ... وحيلقوا الطوب ده كلو من وين؟
- لا حول ولا قوة إلا بالله
* صحي ... عارف (علي ود الرضية) ده عشان يسور البيت بتاعون الفي جبرة.. جايب ليهو أربع أدوار لواري طوب ، كلفتو الشي الفلاني .. تقول لي المساخيت ديل دايرين يسوّروا بلد بي حالا ؟؟؟
- زلابية ... إنك قايله المساخيت ديل مفلسين زي ود الرضية ده؟
* أصلو قروشون دي شن قدُرا عشان يكملوها كلها في حيطة؟
- إنت دافعة حاجة من جيبك؟ ولا مشاركاهن فوقو؟
* أكان كملوا قروشون فوق الحيطة دي ... ياكلوا من وين؟
- إنتِ في هم ياكلوا كيف؟ ولا أنا أنوم كيف؟ أقوم أسيب ليكم البيت وأطفش وله كيف يعني؟
* آآ راجل يعني ما نتكلم وله شنو؟
تتدخل عديله قبل أن تستفحل المشكلة كعادتها :
= شكلهن حيسور الشارع بتاع سوق الخدار . أستاذة فوزية قالت لينا إنو فلسطين فوقا زيتون كتيييييير
* شنو ؟ زيتون؟ والزيتون ده كمان شن طعمو؟
= ما سمعتي (التين والزيتون) ؟
* يطرشني ... القال كده منو؟
= ده في القرآن يا أمي ...
* قالوا (التين والزيتون) ديل؟
= آآآآي
* يعني شيتن سمح؟
= آآآآي
* إن شاالله أعدمك يا بت بطن ما سمعت بيهن!!! سجمنا ... نموت فطيس قبال ما نشوف الدنيا دي فيها شنو ... أبوكِ ده عمرو ما خش علي غير بالقرع البيجيبو من العيد للعيد
ينهض (حمد) في هدوء تام وقد ارتسمت على وجه علامات الإرهاق والغضب المكبوت وارتدا طاقيته البرتقالية ومركوبه وخرج في صمت ، بينما لم تكلّف (زلابية) خاطرا أن تسأله عن وجهته بل كانت منشغلة مع (عديله) التي بدأت توصف لها شكل الزيتون وطعمه . وفجأة تنتبه (عديله) و (زلابية) لخروج (حمد) بعد ان سمعتا صوت (رزع) الباب بقوة ... :
* إنتِ أبوكي ده مالوا الليلة؟
ترفع كتفيها ثم تنحني على كتبها ودفاترها وتواصل الدراسة ، بينما تعود (زلابية) لتنظيف الرز من جديد ... !!!!!!!!!
|
|
|
|
|
|
|
العنوان |
الكاتب |
Date |
يوميات زلابية الحنّانة | هشام آدم | 01-21-06, 01:51 PM |
Re: يوميات زلابية الحنّانة | القلب النابض | 01-21-06, 02:35 PM |
Re: يوميات زلابية الحنّانة | هشام آدم | 01-21-06, 02:46 PM |
Re: يوميات زلابية الحنّانة | هشام آدم | 01-21-06, 03:17 PM |
Re: يوميات زلابية الحنّانة | يوسف السماني يوسف | 01-21-06, 03:48 PM |
Re: يوميات زلابية الحنّانة | هشام آدم | 01-22-06, 10:42 AM |
Re: يوميات زلابية الحنّانة | ناصر محمد خليل | 01-22-06, 02:09 PM |
Re: يوميات زلابية الحنّانة | هشام آدم | 01-22-06, 02:25 PM |
Re: يوميات زلابية الحنّانة | ناصر محمد خليل | 01-22-06, 02:58 PM |
Re: يوميات زلابية الحنّانة | هشام آدم | 01-23-06, 08:41 AM |
Re: يوميات زلابية الحنّانة | elham ahmed | 01-23-06, 08:47 AM |
Re: يوميات زلابية الحنّانة | هشام آدم | 01-23-06, 04:53 PM |
Re: يوميات زلابية الحنّانة | هشام آدم | 01-24-06, 12:27 PM |
Re: يوميات زلابية الحنّانة | هشام آدم | 01-29-06, 10:12 AM |
Re: يوميات زلابية الحنّانة | هشام آدم | 01-30-06, 10:05 AM |
Re: يوميات زلابية الحنّانة | هشام آدم | 02-01-06, 04:06 PM |
|
|
|