|
Re: يوميات زلابية الحنّانة (Re: ناصر محمد خليل)
|
( النسوان وفلسفة اللبان )
(حمد) الذي ربط حماره على باب البيت، ونام تحت شجرة الحناء، كان قد عاد للتو من سوق الفحم، عندما دخلت عليه (زلابية) وهي تخلع عنها ثوبها بعد أن ركلت الباب بقدمها:
* لا حولة الله !!!!!
يرفع (حمد) رأسه بتثاقل وهو يلتفت إلى (زلابية)
- مالك في شنو؟
* عاد لاكين بنات الزمن ديل ما بقن صعبات عديييل كده.
عاد (حمد) إلى وضعيته الأولى بعد أن عرف أن الموضوع فيه (نقه) طويلة، ولم يسألها عن التفاصيل، ولكن (زلابية) لم تنتظر أن يسألها فواصلت كلامه:
* (إشراقة بت عبد الجليل) الخياط! البيتهم مطرطش داك! جمب المحطة! عرفتها؟
- أها أها .. مالا؟
* من يوم ما قالوا خشت الجامعة وهي رافعة نخرتا، ومافي زول قادر يتكلم معاها.
- حسي الموضوع ده مضايقك في شنو يا (زلابية) دي ما شئون داخلية يا بت الناس!!
* شئون شنو يا راجل، هو ناس الحلة كلهم بيتكلم فوق الموضوع ده.
- حسي الجديد شنو في الموضوع ده؟ (إشراقة) دي مش خشت الجامعة السنة الفاتت؟ الجديد شنو حسي في الموضوع ده؟
* لا ما قبييل، وأنا جاية من بيت ناس (ود الفكي)، لاقيتا واقفة في المحطة، والله يا (حمد) أكان تشوفا . . . أخخخخخخ. جِنس حنكشة! فوق كم ما عارفة. لا والغريبة واقفة تلوك ليها في لُبان . . عاين البت الما بتختشي دي عليك الله.
- يا (زلابية) عليكِ الله حسي ده موضوع، قومي أكلتِ الجداد ديل ، انا قبيل نظفت موية الحمام وكشحتو بره .
نهضت (زلابية) وهي ما تزال تثرثر بكلمات لم يكترث لها (حمد) كثيراً، سألها:
- إنتِ عندك مشاوير الليلة؟
* حمشي أحنن بت ناس (كلتوم)، طهورا الليلة. في حاجة؟
- لا بس، شايفك ما جبتِ سيرة.
* وأنا عاد شفتك متين من الصباح عِلّ حسي؟
دخلت (زلابية) المطبخ، لتجد (عديله) وهي نائمة في البرندة المقابلة للمطبخ. فبدأت تغمغم:
- الفطيسة دي كمان قدر ما أعاين ليها يا نايمة يا بتسوي خراب . غايتو حالة!!!
كان (حمد) يستغرب كثيراً في قدرة زوجته على الكلام المتواصل دون توقف ، وعرف أنها سوف لن يهدأ لها بال إن لم تجرجره للخوض في موضوع ما معها . ففكر قليلاً ثم استدار بجسمه ورأسه ناحية المطبخ :
* إنت يا زلابية ؟؟؟
- آآآآي .... أها ؟
* علاقة النسوان باللبان ده شنو ؟
لم ترد زلابية ولكنها جاءت مسرعة وقد شمرت كمها عن ساعديها ويداها ما زالتا ملطختين برغوة الصابون وبدأت في سحب (بنبر) بقدمها كان على مقربة من بيت الدجاج فجلست أمام سرير حمد الذي ابتسم ابتسامة المنتصر:
- والله يا حمد يا خوي النسوان ديل عجيبات خلاس .. هي يا حنكشة منهن ما تفهم ، لياقة منهن ما تفهم ، يا كمان لمن ما يلقن حاجة يقولنّها بيقعدوا يلوكوا في اللبان ده ساااااي ... عشان خشمن ما يقعد مقفول ساي. لاكين ساعة تلقى ليها فرقة بتاعت نضمي ، تبزغ اللبان وهاااااك يا نضمي.
انقلب حمد إلى الجهة الثانية وهو يقول بكل برود :
* أكان كده بشتري ليك شواااال بتاع لبان من بكره دي!!!!!!!
|
|
|
|
|
|
|
العنوان |
الكاتب |
Date |
يوميات زلابية الحنّانة | هشام آدم | 01-21-06, 01:51 PM |
Re: يوميات زلابية الحنّانة | القلب النابض | 01-21-06, 02:35 PM |
Re: يوميات زلابية الحنّانة | هشام آدم | 01-21-06, 02:46 PM |
Re: يوميات زلابية الحنّانة | هشام آدم | 01-21-06, 03:17 PM |
Re: يوميات زلابية الحنّانة | يوسف السماني يوسف | 01-21-06, 03:48 PM |
Re: يوميات زلابية الحنّانة | هشام آدم | 01-22-06, 10:42 AM |
Re: يوميات زلابية الحنّانة | ناصر محمد خليل | 01-22-06, 02:09 PM |
Re: يوميات زلابية الحنّانة | هشام آدم | 01-22-06, 02:25 PM |
Re: يوميات زلابية الحنّانة | ناصر محمد خليل | 01-22-06, 02:58 PM |
Re: يوميات زلابية الحنّانة | هشام آدم | 01-23-06, 08:41 AM |
Re: يوميات زلابية الحنّانة | elham ahmed | 01-23-06, 08:47 AM |
Re: يوميات زلابية الحنّانة | هشام آدم | 01-23-06, 04:53 PM |
Re: يوميات زلابية الحنّانة | هشام آدم | 01-24-06, 12:27 PM |
Re: يوميات زلابية الحنّانة | هشام آدم | 01-29-06, 10:12 AM |
Re: يوميات زلابية الحنّانة | هشام آدم | 01-30-06, 10:05 AM |
Re: يوميات زلابية الحنّانة | هشام آدم | 02-01-06, 04:06 PM |
|
|
|