|
Re: رسالة صغيرة الى صديقى الكاتب النوبى (المصرى) حجاج ادول.. حجاج سكينة.. لا تحزن... (Re: Mannan)
|
أستاذنا نور الدين منان ..
كلام جميل ورنان .. كلام موزون .. قول كمان وكمان .. داير ليهو فنان .. بعود وكمان .. لكن المشكلة مشكلة .. الأضان .. لا زولا يسمع .. ولا زولا يفهم .. ياهو كلام ضبان طنان .. الكضب بالكوم .. أطنان أطنان .. حقة صعوط .. وحفرة دخان .. مع لفة سيجارة صاحبها سطلان .. سلطان زمانه .. آخر الليل .. ماعارف سكة بيته ضهبان .. والتانى .. عرقى بلح .. عبار مريسة ولا عسلية ..ان شاالله شربوت .. برضه سكران .. تقول شريعة .. آخرتها جلدة .. ولا غياب مرضان ..
وبعدين .. تقول النوبة ..!! .. أرض .. يا اخوانا الارض حقتنا .. النيل غرقنا .. بلادنا غرقت غرقان .. فى نصة نهار .. كان وقفت .. فى نص الشارع .. تحاحى .. وتحوحى .. مويتك تصب عرق .. عرقان .. ناس بجلاليب .. يعاينو .. ومنهم يتاوق من شقوق البيبان .. وناس تضحك .. تقول .. دا مجنون خليك منه .. والتانى .. سيبك منه .. دا واحد عقله تعبان ..
ياهو دا حال النوبة فى الشمال .. الدينكا .. الشلك ..النوير .. الزاندى فى الجنوب .. وكمان ياهم ناس الغرب فى دارفور .. ولا البجا فى الشرق .. كل زول ممكون وصابر .. لكن الصبر .. له نهاية .. أنا خايف .. من النهاية تكون شكاية .. لرب العالمين .. وهنا يعطى الظالمين درسا سوف لا ينسوه ..
المهم أنا معاك يا أخى نور الدين .. ومع أستاذنا الأديب حجاج أدول .. نشجعه ونقول ليهو لا تيأس .. ولا تبتئس .. ان غدا لناظره قريب ..
ونردد مع الشاعر القائل ..
واصبر على ما يأتى الزمان به *** صبر الحسام بكف الدارع البطل
و أخيرا .. سلامى وتحياتى لشخصكم الحبيب .. وسلامى وتحياتى للأستاذ الأديب حجاج حسن أدول ..
أخوك الماعجوز .. عشان ماتزعل .. أرنست
|
|
|
|
|
|
|
|
|