|
|
 الى روح البطل الكوشى.. الشهيد يوسف كوة فى الذكرى السادسة لرحيله... قصـــيدة
|
يوسف كوة
مثل قذيقة
سوت فى حيطة المستقبل كوة
كنت لطيفا مثل غمامة
مرت فوق جبال النوبة
متل القبلى وبرقو علامة
يا يوسف كوة
كنت بتحلم زينا انت
بعالم ابسط من قطية
فى قلب الهامش اتحكرت
وحي فى وجدانهم ما زلت
وبقيت فى وجدان الهامش سلوة
يا يوسف كوة
حي ما مت
....
ديلة وحوش المركز وجيفو
خلو الوطن الغالى تكية
قرمشو عضمو واكلو خريفو
وخلو الناس تطرى التركية
وفجأة رحلت
يا يوسف كوة
وناس الهامش
لا حول ولا قوة
رحلت بعيد للملأ الاعلى
صاحب مبدا ورمز قضية
فوق جمر السودان القادم
يا الاغبش ومثلنا الاعلى
للمغبونين اهل الهامش
وسيرتك عندنا تحلا وتعلا
نعبى كؤوس الذكرى ونملا
ونركز ساعة الشدة ونقوى
يا يوسف كوة
عمدناك بالحب والخوة
ودسيناك فى قلوبنا محبة
وختيناك فى جوة الجوة
يا يوسف كوة
يامعلمنا فى لحظة ضعفنا معنى القوة
يا سند الناس المغبونين فى اللحظة الرخوة
وعينا الصاحية فى زمن الغفوة
يا يوسف كوة
الله عليك يا ود النوبة
يا ابن ملوك نوباتيا وسوبا
ورفيق دكتور جون وربيكا
وسليل ترهاقا وشبتاكا
وامانى رديس الكنداكة
ويحى على الارض المنهوبة
يا نوباوى .. يا ود النوبة
يا ركيزتنا وفارس الحوبة
وراس الحربة
وآخر سهم فى زمن الغفلة
لم تجفل فى ساعة الجفلة
وكنت مهاب فى وداعة طفلة
مين للنوبة
ومين لى علوة
يا يوسف كوة؟
جونا الجلابة الاكذوبة
ولعبو بارضنا كالالعوبة
وشفنا عجوبة
الخربت سوبا
يا يوسف كوة
نم فى عليائك مزهوا
نبنى جديد سودانا سويا
وطنا جبارا وقويا
ونهدم اسوار الجلابة
ونرفع راية الهامش عالية
ترفرف فى الصحرا والغابة
وتمسح دمعة محرومين وغلابة
يا يوسف كوة..
رحلت بعيد وازددت علوا
وانت معانا تزيدنا فتوة
نفتح للمستقبل كوة
يا يوسف كوة
بيك فى غيابك
وبيك فى حضورك
نقرا كتاب السودان
جوة سطورك
ونقرا معاك فى كتاب نيفاشا
واحلام الجوعى الشماشة
والماتوا فى فكى كماشة
فى ترابستان الغشاشة
نمسك فى كتابك يا كوة
ونفتح كوة
لوطن اجمل
موعود بالوحدة الجذابة
بارادة شعبى الغلابة
موعود بى وطن المستقبل
وطنى الاجمل
ونبقى معاك يا يوسف كوة
وما بنتحول..
نورالدين منان
|
|
 
|
|
|
|
|
| |
Mannan
فيس بوك
تويتر
انستقرام
يوتيوب
بنتيريست