مجموعة النيل الموسيقية ستتالق في حفلها الاول يوم ?? نوفمبر القادم

Quote: المهم فى الموضوع هو التمنى والأمل فى إنه موسيقيينا السودانيين، خاصة ناس التأليف والما بنشك أبدا فى مواهبهم ومقدراتهم الأصيلة، يا ريت نقدر نطلع إيقاعاتنا السودانية، المافى زيها فى الدنيا كلها، مع التركيز على الحتة دى، وتطويعها أو مزجها مع قوالب موسيقية ومع فرق مؤسسة بشكل جيد من ناحية الآلات طبعا، وقطعا ما بعوزنا العازفين المؤهلين الموهوبين، يعنى ليه مثلا حافظ عبد الرحمن ما يتوسع فى التأليف ويكتب أعمال كبيرة وضخمة يدخل فى أى واحد منها شوية مردوم وشوية دليب وشوية سيرة الخ، وذكرت حافظ عبد الرحمن بالتحديد لأنه موسيقار طموح جدا ومثابر وفنان، والباقين كتار برضو وما أظن فى شئ ممكن يرفع إسم الشعوب ويسمو بيها ويعمل ليها مكانة زى الفنون، والموسيقى على راسها شوف يعنى، الناس ما قاعدين يتذكرو "اليونانيين" إلا لما تجى سيرة الفلاسفة العظام، ارسطوطاليس وافلاطون وسقراط، أو يتذكروا زول الإلياذة والأوديسا هوميروس أو آلهة الأساطير ناس زيوس وبرومثيوس وأثينا، ومن الزمن داك انقطعت صلة اليونانيين بالذكر والخلود لحد ما طلع ليهم "يانى" فتى الأولمب الذهبى لو قلت لى أى زول بتعرف شنو عن "رومانيا" بعد ما يقول ليك "نيكولاى تشاوشيسكو" يمكن يقدر يتذكر "نادية كومانشى" لكين وبكل سهولة حيقول ليك الللله ديل ناس "زامفير" والناس قبل فترة ما كانت بتعرف حاجة عن جنوب افريقيا غير إنه فيها تمييز عنصرى عرقى، لكين بعرفو "مريم ماكيبا" والأمثلة كتيرة وعريضة والموسيقى موية الروح