الشمالية مهمشة ؟؟!! .. إهدار الأموال في شبكات طرق حديثة في منطقة لا تساهم في الدخل القومي !!!!

Quote: يا تاج الدين والله البسمع كلامكم دا يقول إنتوا جاين من المريخ ... ياناس إنتوا بي جدكم! يا تاج الدين ... طلبة المدارس الماتوا في العيلفون ديك ماتوا ليه وقتلم منو؟ آآلاف الصبية الذين كانوا يطاردونهم في ازقة الخرطوم ويصطادونهم كما الرقيق لإرسالهم قسراً الى الموت، ديل كانوا من وين؟ واولاد منو؟ الناس الماتوا قبل اقل من شهرين في كجبار ديل جنسهم شنو؟ وماتوا ليه؟ ياخوانا ما تقولوا بسم الله! يا تاج الدين ... بلادنا مأزومة من اقصاها الى اقصاها، وصدقني لن يزيدنا التلاوم والتنابز والإقتتال والغٌلاط إلا شقاقاً وازمات، ولن يأتينا حلاً لا من الخارج ولا من السماء. إنما هو بأيدينا نحن. ياخي الدولة الكعبة دي إتجاوزوها ياخ، على الاقل موقتاً عشان خاطر اهلكم. وهي بالمناسبة يا تاج الدين الدولة دي ذاتا جاتنا نازلة من فوق، ونحن ما بنعرفا. نحن يا تاج الدين محتاجين نقوم بالدولة حقتنا من تحت، محتاجين ننشر السلام الإجتماعي بيناتنا اولاً، محتاجين نوعي الناس كيف بكون العيش المشترك وما هي الحقوق وما هو القانون، حتين بعد داك نطلع للدولة والعقد والسيادة، إنت فاهمني؟ نحنا يا تاج لازلنا في الحالة الاولية للإنسان، the state of nature ، الحالة البيكون فيها الضراع هو الحل، نحن يا تاج لم نرتقي بعد الى مرحلة الدولة، الشغلة الراجيانا لسة كتيرة يا تاج عشان كدة يا تاج مفترض نكون إيجابيين شوية في تفكيرنا، ونبطّل الاوهام الفي راسكنا دي، ونحاول نعمل بقدر الإمكان لصالح العمران وليس العكس. يعني مثلاً إنتو الناس الفاهمين ديل شوفوا ممكن تعملوا شنو (على المستوي المدني) لإعادة الحياة لأرضكم الميتة تلك و إعادة الإستقرار اليها. وبالمناسبة يا تاج الدين ... الى الآن لم اقراء ولم اسمع عن، لا من جانب الحركات المعارضة ولا من جانب اي جهة اجنبية - جانب الحكومة دا اسي خليهو لانو بجيب الزعل - لم اسمع عن اياً من الخطط او المشاريع المقترحة لإعادة إعمار ما دمرته الحرب. الناس الحيرجعوا من المعسكرات ديل يا تاج، ح يرجعوا وين، وح يرجعوا يعملوا شنوا؟ وهل وجود القوات الدوليه هو الحل النهائي للمشكلة؟ وكدي حاول إتخيل معي يا تاج الدين إنو فقط رُبع التكلفة المالية للقوات الدولية دي تم تخصيصها - قصراً وبضمانات ذات المجتمع الدولي - لمشاريع إعادة تأهيل ما دمره الجفاف من موارد بيئية في الكم وعشرين سنة الماضية، وبسط مراعي للرُّّحل من سكان الإقليم (مع تشجيع إستقرارهم)، وبسط مشاريع زراعية تنموية، و إتاحة فرص علاج وتعليم مناسبة لأبناء وبنات المناطق الاكثر تأثراًً، كيف ح تكون النتجة يا تاج الدين؟ وهنا يا تاج الدين بيجي دوركم ... يعني بدل ما تقعدوا ليلكم ونهاركم تنبذوا في ناس الشمال، اقعدوا اكتبوا دراسات جدوى عن ما يمكن إنجازه من عمل مفيد يعود بالمنفعة لكم ولأهلكم، وزي ما لقيتوا ناس كتار من المجتمع المجتمع الدولي وقفوا معاكم بشدة في حروبكم ومأآسيكم، حتلقوا ناس كتار "تانين غير ديك" من ذات المجتمع الدولي بيقيفوا معاكم بشدتين لعماركم وإستقراركم، اصلو المجتمع الدولي دا ذاتو خشم بيوت. واظنك فاهمني يا محمد سليمان.