بـُــري

Quote: السلام عليكم ورحمة الله تعالى وبركاته ألاخ ماضي أعرفك بنفسي وأكيد بتعرفني هدى محمد أبراهيم- بري المحس-بت خالك محمد ابراهيم أحمد) المهم عجبني جدا البوست عن بري لكن ليكم بعض اللوم كل المتداخلين اتكلمو عن بري اللاماب والدرايسه وناصر الا انتو اولاد المحس ما اديتوها حقها معلومه سريعه عن بري وساوافيك فيما بعد باكبر معلومات عنها اولا بري كانت مكان مدرسة الراهبات وكنيستها وحتى جامعة الخرطوم ولما الانجليز عايزين يبنو كنيسة ما حلى ليهم الا حلة اهلنا المحس (لاحظ حتى وقت قريب اهلنا كانو بزرعو في الجروف القصاد جامعة الخرطوم) ورحلوهم في المنطقة الفيها قارن سيتي الان وكانت اسمها الحليلة واسم بري يقال انه اطلقوه الانجليز من اسم الكنيسة البنوها كانتربري وصوت لوم ليك لانك قصرت في سرد كتير من شخصيات لعبت دور كبير في بري منهم عمك الباشكاتب محمد ابراهيم احمد سليمان وهو الذي استخرج التصديق لمدرسة بري المحس الابتدائية للبنات وهو الذى سعى لانشاء مدرسة قرنفلي المتوسطة وهذه لها قصة اسردها ليك سعي هو بعض رجالات بري لقيام مدرسة اهلية متوسطة للبنين فذهب هو وابنه المحامي على للسيد اميل قرنفلي رجل الاعمال وكان على هو المحامي لقرنفلي مما سهل الوضوع ولم يتانى السيد قرنفلي لتلبية الطلب بل رحب وقام بالتنفيذ وقامت لجنة المدرسة بتسميتها باسمه عرفاناً بجميله ونسيت انو اول فريق هو فريق بري المحس وده ممكن اكلمكم عنه حيدر امين برواية ابوه لانه من اللاعبين في ذلك الفريق وما تنسى ابراهيم كبير لاعب المريخ وبيوتات كبيره داخلها شخصيات لعبت ادوار في الحياة الاجتماعية في بري وغيرها وفي المجال السياسي عندك مثلاً عليى محمد ابراهيم المحامي هو الذي نادى بالاضراب السياسى في ثورة اكتوبر وده كان في اجتماع الهيئة والتي كانت تضم الاحزاب الساسية والمحاميين والقضاة والاطباء والعمال وقد ذكر هذا الحدث الاستاذ ميرغني النصري نقيب المحاميين في برنامج اسماء في حياتنا مع المذيع عمر الجزلي طولت عليك لكن هناك الكثير والكثير عن المحس وشايفه ابن عمي عمر الشيخ ارباب انضم للكواكب المنيرة من اولاد المحس تحتاتي له وحيدر امين سينضم وياريت القى فرصه لانه فعلا موقع مميز وانا اول شي بعمله الصباح بدخل عليه واتصيد الاخطاء خاصة الاملائية وما اكترها لك التحايا ولمحمد واعذرني ان طولت عليك