يا طلاب وخريجي جامعة جوبا وثقوا تجاربكم هنا..

Quote: كردفان‎ من: amal mohammad sulieman‏ ([email protected]) تاريخ الإرسال: 22/جمادى الثانية/1429 03:42:23 م إلى: ‏[email protected]‏ ([email protected]) الاخ عبداللطيف والله يظهر انه فعلا احنا فايقين !لكن الحمدلله دى فياقة ايجابية اللى بتخلينا ننفض غبار السنين العالق فى ذاكرتنا وترجعنا سنينا عددا لى ورا فنبدو صغارا يافعين ويظل شريط الذكريات ماثلا امامنا بافراحه واحزانه . واليوم اجتر لكم ذكرياتى مع رابطة طلاب كردفان بجامعة جوبا ، فعند دخولنا الجامعة استرع انتباهنا تكوين الروابط الاقليمية والاكاديمية فى الجامعة - ورغم اننى من المقيمين فى الخرطوم بحكم المولد والنشأة الا ان المرحوم نديم على محمد وصحبه الميامين كانوا سباقين لانضمامنا فى رابطة كردفان الاقليمية بحكم الانتماء والجذور للمنطقة فكنا اعضاء فى الرابطة واول مرة نسمع فيها بانعقاد جمعية عمومية دى كانت حاجة جديدة لنج وغريبة بالنسبة لينا والواحد ما عنده خلفية عن العمل العام - المهم ذهبنا لحضور الجمعية العمومية والاستماع لخطاب الدورة والميزانية - واتذكر من السناير فى رابطة كردفان : ادم حمد - يحيى يس- الفكى عمر- المرحومان نديم على محمد وكمال خليفة وناجى دهب وبعد تلاوة خطاب الدورة بدأ النقاش والمناكفات بين الاعضاء القدامى الفاهمين الحاصل والبيعرفو اللعب كويس ونحن فى حيرة من الموقف- معقول الناس ديل طلبة- وتلقى ناس ما فاضل ليها الا تضرب بعض وآخرين محافظين على رباط جأشهم ونحن نرتجف من هول الموقف وبنقول يا ربي البحصل قدامنا ده شنو؟ - بعد خطابي الدورة كان فى انتخاب اللجنة التنفيذية الجديدة واللى كان بتم بصورة متقنة للغاية . فادم حمد عليه بناس شمال كردفان ونديم جنوب كردفان وعلى الاساس ده كان بيتم الانتخاب للرابطة واذكر انى حضرت دورتين للرابطة الاولى برئاسة عثمان الدرديرى الذى عملت اثناء قيادته والثانية كان يترأسها رمضان محمد معتوق . ومن الاحتفالات اللى ظلت عالقة كان احتفالنا بالطلبة الجدد 1991- وذلك يتنظيم رحلة لهم فاذكر انه ذهبنا للسوق المركزى برفقة الاخوان عثمان واخرين والاخوات فاطمة الصافى ومنى عباس وقمنا بتجهيز مستلزمات الرحلة بمنزل شقيقة الزميلة سلمى ادريس واذكر كيف اننا لم نذق طعم النوم فى تلك الليلة وظللنا مساهرين طوال الليل ونحن نعد للرحلة ثم حضر الينا الزملاء صباحا ليحملوا ما جهزناه وقد كنا فى حالة يرثى لها من التعب والفتور حتى انه لم تكن لدينا القدرة على الذهاب وكل ما نريده هو قسط من الراحة الا ان الاخوان اصروا على ذهابنا وتحت الحاحهم ذهبنا لكن انا يخيل لى انه انحنا شفنا لينا مكان واخدنا فيه نومة قصيرة علها تساعدنا على الوقوف -طبعا شايفين الجماعة عملوا برنامجهم لكن حضرناه بنصف عين - المهم بعد الرحلة رجعوا الجماعة مبسوطين وفرحانين ودى كانت بالنسبة لينا حاجة مريحة انه تطلع الرحلة بالشكل المطلوب لكن بينى وبينكم انا اسبوع كامل عندى فروقات نوم كملتها حتى قدرت استوعب الحاصل شنو ونلقاكم امال نورين Quote: طبعا شايفين الجماعة عملوا برنامجهم لكن حضرناه بنصف عين - المهم بعد الرحلة رجعوا الجماعة مبسوطين وفرحانين ودى كانت بالنسبة لينا حاجة مريحة انه تطلع الرحلة بالشكل المطلوب