يا طلاب وخريجي جامعة جوبا وثقوا تجاربكم هنا..

Quote: الاخ عبداللطيف و الزملاء بالجامعة سلام تاكم الليلة الكلام عن بداية دخولنا للجامعة ، بعد اعلان قبولنا بجامعة جوبا قمنا باجراءات التسجيل الاولية واللى كانت بمدرسة الاحفاد وصراحة قبل الجامعة انا كنت لا افقه فى ام درمان شيئا وما عارفة الاحفاد دى وين - رغم انى من سكان الخرطوم وتحديدا كوبر - لكن كتر خير اخينا ( عبدالرحمن صالح المحامى الان وهو كان صديق لاخى عبدالفضيل - وبالمناسبة هم زملاء ودفعة د عامر تاج الدين خريج طب جوبا فى ثانوية الخرطوم القديمة ) قام ارشدنى لموقع المدرسة اللى فيها التسجيل - وشفت الواحد تقول ذى الماشين يسجلوه للمدرسة اول مرة - اها يا زول ودتنى زولة جارتنا وهى كانت تسبقنى فى الدراسة ( ثريا) لغايت ما قمت بالتسجيل والواحد كان فرحان ومتشوق شديد للمرحلة الجديدة بكل خفاياها واسرارها - لكن بعض الاخوة على ما اظن بعض السناير قالوا لينا انتو بعد ده امشوا ارقدوا ليكم سنة كاملة حتى تنزلوا ؟؟؟؟؟؟؟ لانه نظامها كدة ( انه اى دفعة بتجمد سنة ) وفعلا صدقنا لانه دفعة 89 كانت فى بداية السنة الاولى و جانا ليك احباط شديد وقررت انى امشى اقدم استقالتى من الجامعة واجلس مرة تانية للشهادة السودانية، لكن طبعا ما لقيت زول ايدنى فى كلامى وقالوا لى انتظرى السنة بتمر سريع - اها بعد داك استسلمت وقررت الصبر على السنة وفى احد الايام تجى الزميلة رجاء قدف ( الله يطراها بالخير ) الى منزلنا بكوبر وتخبرنى بان (intensive course)قد بدأ وبالفعل ذهبت الى امدرمان حيث مقر الدراسة والسكن بداخلية المعلمات با مدرمان ، وبصراحة الفترة بتاعة الكورس دى مغزاها كبير جد وهى بتعتبر النواة والبذرة للأنتماء الحقيقى للجامعة لانه طلاب الكليات الخمس بيدرسوا فى مكان واحد وفى مواد مشتركة بينهم فبالتالى الواحد بلقى نفسوا بيعرف كل ناس دفعتوا( الا لمن ابى ) وطبعا اخوانا السناير الله يطراهم بالخير كل ناس ولاية جايين يشوفوا طلبتهم الجدد منهوا وكل زول داير يستقطب ليهو زول واحنا المساكين ما جايبين خبر للشغلانه دى - من المواقف الطريفة اللى بتذكرها انه فى احد الايام وانا راجعة مساء الجمعة للداخلية با مدرمان وانا راكبة فى الحافلة قام ركب واحد ولما جاء يجلس فى المقعد ومن غير ما يقصد ضربنى بيده على راسي واعتذر لى فى الحال - اها بعد ما نزلت اعتذر ذلك الشخص للمرة الثانية وطبعا لما شافنى شايلة شنطت وعاملة ليك فيها طالبة جامعه قام سالنى وبصورة مباشرة وقال لى انتى بتقرى فى جوبا ؟ قلت ليهوا باندهاش ايوه - فقام مباشرة عرفنى بنفسه وقالى لى انا ( كمال خليفة طالب موارد فى جوبا ) ودى كانت اول مرة الاقى فيها واحد من السناير مصادفة واتعرف عليه ( فالف رحمة تنزل عليه وجميع من فقدناهم بالجامعة حاجة تانية بتذكر استاذ تعبان بتاع التربية ادانا مادة عن التربية فى الكورس وكانت بتتكلم عن بدايات التعليم فى مناطق السودان المختلفة والصعوبات اللى واجهته - فقام ذكر انه فى منطقة معينة بالسودان ابتعثت ليها وزارة التربية احد المعلمين للتدريس فقام اهالى المنطقة بقتله لاعتبارات معينه فى ذلك الوقت - وحقيقة كلام الاستاذ ما عجبنى ( وراس السوط هبشنى - لانى من الولاية اللى حدثت فيها الواقعة ، فقمت تحت - تحت احتجيت وقلت ليهوا الكلام ده ما سمعت بيهوا - ما رد على فى لحظتها وقام بعد المحاضرة وانا بالحوش نادانى ومسكنى فى يدى بحنيًة الاستاذ المربي وسالنى من منطقتى وذكرتها ليهوا - فقام قال لى المنطقة الحصلت فيها الواقعه بالتحديد وبتاريخها وقال لى يا بتى انتى الوقت داك امك ما عرسوها بعد فترة شهرين الكورس اللى قاموا السناير سموها ( بالتصبيرة ) رجعنا الى منازلنا الى حين انتهاء العام لبداية السنة الجديدة - ولكن تأتى بركات السماء وتقرر ادارة جامعة جوبا والحاقا لرصفائنا الطلاب فى بقية الجامعات وعدم تضييع سنة دراسية من عمر الطلاب بدء العام الدراسي لنا فى ذات الفترة وبالفعل بدأنا السنة الاولى جنبا الى جنب مع طلاب الدفعة 89م ليتم دمج الدفعتين 89+90 فى السنة الثانية لتصبح دفعة واحدة وللحديث بقية امال نورين اقتصاد90