{{{ المره مره والعب عب }}}......وحكاية الحمى النزفية!!

Quote: بعد الزيارة العاصفة التي قامت بها السرة الى هذا الجزء من المنزل لاول مرة في حياتها ... اتتهم تحمل غضبها وعنجهيتها واذدراءها ورفضها ... هيمن صوتها على فضاء المنزل وهي تصرخ بصوتها الجهوري .. - بخيت ... العينة ... انتو وين ؟؟!!.. خرج بخيت من غرفته مفزوعاً وعلامات التوجس تملا وجهه الكالح .. بينما اتت العينة مهرولة وهي تحمل يديها الملطختين بالعجين ... بادرتها العينة بالتحية .. - السرة ؟؟!! ... اهلاً حبابك .. اتفضلي لجوة ... البيت نوّر ... قاطعتها السرة الهائجة بحدة .. - السرة كدة ساكت يالعينة ؟؟ انا ستك السرة .. ولا انتي نسيتي انتي منو وانا منو ؟؟!! .. وانت كمان نسيت يا بخيت ؟؟ .. واضح جداً انكم نسيتوا .. لانكم لو كنتوا متذكرين ما كنتوا غشيتوا ولدي وجرجرتوهو عشان يعرس بتكم ... ولدي انا ؟؟!! ابراهيم ود ابراهيم ود العمدة الامين يعرس بت بخيت والعينة ؟؟!! ... صحي نسب يشرف ويرفع الراس ... اسمعوا هنا ... قاطعتها حبيبة التي وقفت بانزعاج وهي تتامل والديها الذليلين امام سطوة السرة الجارحة ... - لو سمحتي يا خالتي السرة مافي داعي للاهانات دي كلها ... ولدك مافي زول غشاهو ولا جرجرو !! ولدك جانا براهو وعشان ترتاحي انا رفضتو وقلت ليهو ما عاوزاك ... يبقى خلاص انتهينا .. التفتت اليها السرة بتحفز وهي تكور قبضتي يديها كانها تهم بضربها ... اتسعت عينا بخيت وندت عن العينة صرخة واهنة بينما تراجعت حبيبة خطوة الى الوراء .. - خالتي السرة ؟؟!! انشاء خلل الضروس .. خالتك بوين يا بت العينة ؟؟!! اوعك اسمعك تقولي خالتي دي تاني ... وكان نكرتي من هسة للسنة الجاية ما حاصدقك ... ايوة غشيتيهو وجرجرتيهو .. بس وريني عملتوا شنو ؟؟ ... كتبتوهو ؟؟ اصلكم بتاعين فقرا .. تكونوا ليكم سنين بتشربوا العروق والمحايات .. لمن عميتو عيونو ... هو كان ما عميان صحي صحي يقول عاوز يعرسك انتي ؟؟!! .. ليه من جمالك ولا من اصلك ولا من قروش ابوك ؟؟ ولا يمكن تكوني حامل ؟؟!! ما هو مافي سبب تاني يجبرو يعرسك الا اذا كنتي حامل منو ... ولدي انا عارفاهو ولد اصول ومتربي صح ... بيكون عاوز يتحمل مسئوليته ... وانتو ياهو دة اسلوبكم من زمان .. بتعملوا كدة عشان تجبروا اسيادكم يعرسوكم ... لكن اسمعوني هنا وفتحوا عيونكم ... خلاص انتهى الزمن البيجي فيهو السيد يقول الخادم حامل لبسوها توب وشبشب وما تخلوها تعوس وتخدم .. اها يا بت العينة اكان دايرة توب وشبشب باديك .. لكن عرس ليك مافي .. دايرة قروش باديك ... لكن ولدي لا .. اهون علي اقطعه وارميه للكلاب ولا يعرسك انتي .. وكان قايلة روحك بتغشيني بكلام انك رفضتيهو تبقى غلطانة ... انتي ترفضي ولدي ؟؟!! هو انتي اصلا كنتي تحلمي انك تلقيهو عشان ترفضيهو ؟؟ جاية تقولي الكلام دة بعد ما سكيتيهو لمن روحك طلعت ؟؟؟ لكن مليت خشمي بالله ... ابراهيم ما يعرسك طول ما انا حية ... رفعت حبيبة الموجوعة من اهانات السرة لها ولوالديها راسها بتحدي واتي ردها باردا ... - طيب يا السرة بدون خالتي ... شفتي عشان كلامك دة انا حاوافق على ابراهيم .. وحاعرسه .. واتحداك لو بتقدري تمنعي الحاجة دي .. وهسة لو سمحتي اتفضلي برة من غير مطرود ..كفاية السم السمعناهو منك من لحظة ما عتبتي الباب ... اتفضلي برة ... بدات حبيبة تتجه نحو السرة المسمرة من الدهشة بخطوات مهددة وهي تحس بالغضب لانكماش ابيها ودموع امها العاجزة ... - انتي بتطرديني يا بت العينة ؟؟ .. بتطرديني من بيتي .. والله دة كلام !! يا قليلة الادب يا ما مربية ... بتطريني من ملكي وحقي ؟؟ دي قوة عين انا ما شفت زيها ... لكن ما غريبة على صنفكم دة ... طيب والله عشان قلة ادبك دي الا ابيتكم الليلة في الشارع ... لموا كروركم دة واطلعوا من بيتي ... امشوا شوفوا ليكم راكوبة ولا ضل شجرة اقعدوا تحتوا ... اصلا داك حيكون مكانكم الطبيعي ... وقفت حبيبة في وجهها بتحفز ويداها مغروزتان في وسطها ... كانت نظراتها تلمع بالتشفي والسخرية - بيتك ؟؟؟ ملكك ؟؟ بيت شنو الملكك يا ام بيت انتي ؟؟ انتي ما عارفة انو عمي حامد كتب البيت دة لابوي بيع وشرا وسجله في المحكمة قبل عشرة سنين ؟؟ .. شكلك ما عارفة ؟؟ لكن ما بالومه لانو دسّ منك .. لانه عارفك انسانة عنصرية ومليانة كراهية وحقد ... متوهمة انك احسن من الناس ... ولسة عاوزة تصنفي البشر اسياد وعبيد ... عايشة في الماضي وما قادرة تستوعبي انو الزمن اتغير والناس اتغيرت والافكار اتغيرت !! وقع الخبر كالصاعقة على راس السرة .. مفاجاة البيت الذي وهبه حامد لبخيت دون علمها اخرستها اصبحت كالتمثال وهي تسمع عبارات حبيبة الشامتة ... كانت نظراتها تدور بين افراد الاسرة بفم مفتوح ... ظلت تبحث عن صوتها حتى وجدته فاتى خشنا ومبحوحاً .. خرجت كلماتها مخلوطة برزاز بصاقها الذي تناثر في وجه حبيبة ... - تعرفي يا بت العينة .. مش لو اتعلمتي ولا دخلتي جامعة ولا حتى جبتي دكتوراه تفتكري انك ممكن تبقى زينا ولا حتى توصلي طرف مكانتنا ... مهما عملتي حتفضلي طول عمرك حبيبة بت بخيت والعينة ..وكان رضيتي ولا ابيتي .. انا ستكم وبت اسيادكم ... وولدي باقتله بايدي قبل ما يعرسك ويفضحني بيك قدام الناس ... استدرات ..وسارت بخطوات متعبة دون ان تهتم برفع طرف ثوبها الذي تبعها ماسحاً الارض خلفها فرفعت حبيبة صوتها وهي تاكد لها ... - طيب يا السرة .. حنشوف ... انا ولا انتي ؟؟ وبكرة ولدك يعرس الخادم غصباً عنك .. كان رضيتي ولا ابيتي ..وحاقعد ليك في قلبك ... حابقى ليك زي شوكة الحوت .. وشوفي حتقدري تعملي شنو ...

(عدل بواسطة sanaa gaffer on 12-24-2007, 09:56 PM)