|
من طرائف واصل ولدى فى السودان : مهداه لهدهد
|
رغم ان زيارتنا للسودان كان فيها كثير من المعاناة خاصة فى الاسبوع الاخير ودى حا افرد ليها بوست خاص رغما عن ذلك عشنا أيام وسط الاهل وتسلحت من جديد ضد غربتى
واصل ولدى عمره اربعة سنوات، مشيت بيهو اول مرة كان عمره سنتين ونص وفى المرة الاولى لم تتركه الملاريا اللعينه فى حاله، مرتين جاته فى خلال اسبوع ام هذه المره فقد استمتع بشكل افرحنى رغم مرض مرافىء الشديد
واليكم تفاصيل طرائف واصل:
كان مندهش للغاية بانه الكلاب بتمشى براها فى الشارع من غير زول وذادت دهشته لمن شاف كديسه ومد يده الصغيره معلقا بدهشه وبعربى كان مكسر،ماما شايفه كنيسه براه ويقصد بذلك كديسه براها
كان يوم عصريه والاهل متلمين وكانوا فرحين لمحاولاته وهو يتحدث بالعربى ولما ضحكوا فيهو علق بغضب طفولى مرح وباللغة الالمانية بما معناه مافى حاجة تدعو للضحك ولما ترجمت ليهم كلامه ضحكوا اكثر وبعدها غضب واصل مهددا اياهم بالالمانى بانه حا يكلم ليهم البوليس
كان يجرى وراء الذباب ويطارده حتى يتخيل الواحد منا انه جارى وراء فراشات
يوم عيد ميلاده كان مندهش بانه الاطفال المدعويين يرمون قشر الموز والبرتقان فى الشارع يعنى مافى الزباله وكان راسه الصغير يتحرك كمروحه وكان الطفل الوحيد اللى خلى القشر فى صحنه واداه لاختى عشان ترميهه فى الزباله وزعل لمن رمت اختى القشر فى الواطة وعلق واصل حزينا يا ماما كده ما كويس
سؤاله المكرر عن قطوعات الكهرباءومن يقطعها وحقيقه تكرار ذلك زهجهم فهم اعتادوا خلاص على هذه الهموم فردت اختى: دى الحكومه ياواصل قطعتها ورد وكأنه يعرف معنى ما قالت، رد باللغة الالمانيه بما معناه بان هذا غباء يدعو للسخريه قضينا شهر فى السودان مشى فيهم واصل ثلاثه حضانات مختلفات حسب تنقلنا للاهل ومايفرحنا بانه يدرك تماما بان له لغتين وانهما لغتين مختلفتين تماما وكنا منذ ولادته متفقين ان لا نحكى معه الا بالعربى ولما جاء راجع من السودان يكرر ما كنا نقوله فى البيت عربى بس وفى الروضه المانى
فى الاسبوع الاول جنن أختى لانه يوميا عاوز بيتزا هوت وطبعا هى غاليه جدا فى السودان وعلقت لمن بدأ يكرر امنيته وكل مرة تشتريها ليهو وسألتنا انتوا يا جماعة قاعدين كم عشان استلف ماهية الشهر الجاى عشان بيتزا واصل ولمن ضاقتها امى علقت يا يمه اكل اليابا وليداتى وهك
كان ناس بيتنا مغيوظين بانى بقطع كلامى معاهم لمن واصل يسألنى سؤال وارد ليهو كأنه زول كبير ولمن يزعل منى يكرر ماما اعتزرى وفعلا لمن اكون أخطأت بعتزر ليهو واخواتى شايفيناها قلة أدب وعلقوا ادى الولد قرصة خليهو يطلع ليك راجل
القصص كتير وهى محاولة لرصد تصرفات اطفالنا المولودين فى اصقاع الدنيا
لكم محبتى ام واصل ومرافىء
|
|
|
|
|
|
|
العنوان |
الكاتب |
Date |
من طرائف واصل ولدى فى السودان : مهداه لهدهد | Ishraga Mustafa | 03-27-03, 09:13 PM |
Re: من طرائف واصل ولدى فى السودان : مهداه لهدهد | مريم بنت الحسين | 03-27-03, 11:57 PM |
Re: من طرائف واصل ولدى فى السودان : مهداه لهدهد | Ishraga Mustafa | 03-28-03, 00:09 AM |
Re: من طرائف واصل ولدى فى السودان : مهداه لهدهد | مريم بنت الحسين | 03-28-03, 00:22 AM |
Re: من طرائف واصل ولدى فى السودان : مهداه لهدهد | الجندرية | 03-28-03, 03:49 PM |
Re: من طرائف واصل ولدى فى السودان : مهداه لهدهد | waleed500 | 03-28-03, 09:39 PM |
Re: من طرائف واصل ولدى فى السودان : مهداه لهدهد | Ishraga Mustafa | 03-28-03, 10:26 PM |
Re: من طرائف واصل ولدى فى السودان : مهداه لهدهد | هدهد | 03-29-03, 07:45 PM |
Re: من طرائف واصل ولدى فى السودان : مهداه لهدهد | تراث | 03-29-03, 09:01 PM |
Re: من طرائف واصل ولدى فى السودان : مهداه لهدهد | قرنفل | 04-01-03, 00:26 AM |
Re: من طرائف واصل ولدى فى السودان : مهداه لهدهد | هدهد | 04-02-03, 12:56 PM |
|
|
|