يا ناس الخرطوم أسعار الأراضى بالخرطوم.......................

Quote: سوق أم دفسوا أهون ،، و على الأقل ليه تاريخ و بقى واحد من حكاوى التراث و برضه عندو قوانينه و قواعده القابلة للفهم و التفسير و ليهو محل بتلاقوا فيهو الناس و بضاعة معروضة للبيع عندها سيد ،، و بدل المشترى البرغب فيها و بسوما يوجد العشرات ،،، و القروش حاضرة ،،، و فيهو الكاش بوقف النقاش ،، و ما فيهو سيد بضاعة ببيع بالخسارة و لا سايم بشترى بالغالى،،، لكن قصة الشقة البتكلف ليها 120 الف دولار ،،، و بتتباع ب 240 الف دولار يعنى بمعدل ربح 100% ،، دى قصة تانية ،،، و ده سوق غسالين و مكوجية و شغل مافيا ،، و مافيا خايبة كمان و ممسوخة ما بتشبه مافيا الزمن الكلاسيكى البفهموها ناس ديفيد ريكاردو و آدم سميث ،، الكانت بتدخل البيوت من أبوابها ،،، و كان شعارها المشهورة بيهو أنه "المافيا شريفة" ،، و فيها شئ من قيم الهمباتة و تقاليدهم "الغير حق الرجال ما عندهم تعيين" و كانت برضه ليها حسنات و بتعمل عمل خير و بتشيل من الغنى و بتدى الفقير ،،، و زى ما فى مافيا شريفة بتفرض نفسها بالتكنلوجيا و إقتصاديات الحجم الكبير (Economics of scale) ،، برضه فى مافيا قذرة بتشتغل فى البودرة و مشتقاتها و توابعها و ما شابهها من الأزلام و رجز عمل الشيطان ،، و هى برضه بتوظف خبراء و متخصصين و بتعرف قوانين السوق و بتحسب حسبتها بأحدث ما توصل ليهو علم الحساب "إشترى بعد يكون السعر العادل أقل من سعر السوق و بيع بعد ما يكون أعلى منه" و "كلما زادت المخاطر زادت نسبة الفائدة" ،،، و طالما تجارة البودرة مخاطرها عالية و عقوبتها المؤبد و فى بعض البلدان إعدام فلازم الجرام يتباع بما لا يقل عن نسبة ربح 250% ،،، و ال 250% دى بتشمل حق الغسيل و المكوة ،،، و جماعتنا بالواضح كده شغالين غسيل و مكوة من يوم ما كتلوا "مجدى محجوب محمد أحمد" و "جرجس القس يسقف" بتهمة الإتجار فى العملة ،، و من يوم ما سفروا بن لادن أفغانستان ،،، و سلموا كارلوس للفرنساويين ،،، و من يوم ما بدأ أباطرة الخصخصة "عبد الرحيم حمدى" و "تاج السر مصطفى" فى بيع أطيانا و بلداتنا بالمزاد العلنى على كل من هب و دب من تجار الدين و البودرة و الأزلام و السلاح ،،، و جعلوا من الخرطوم و بكل فخر أكبر سوق لغسيل الأموال و تمويل الإرهاب و تجارة السلاح ،،، و تربعت مؤسساتنا الوطنية الفضلنا نبنى فيها على مدار أكثر من 50 عام على رأس قائمة غسيل الأموال التى يتم تداولها فى بنك التسويات بالنمسا و معظم البنوك المركزية فى العالم "بنك السودان ، مؤسسة الأسواق الحرة ،، مؤسسة الأقطان السودانية ،، شركة السكر السودانية ،، سوداتل ،، شركة سكر كنانة ،، و غيرها ،،، بجانب الوكلاء المعتمدون من رجال الدين و الدولة (سيأتى يوم لذكر الأسماء) لمافيا المخدرات و غسل الأموال من شتى بقاع الأرض (بنما ،، البرازيل ،، كولومبيا ،، شيلى ،، البيرو ،، جزر الكايمان ،، أفغانستان ،، باكستان ،، الهند ،، روسيا ،، رومانيا ،، هولندا ،، أفريقيا ،، و غيرها) و القائمة طويلة و مرصودة بالوثائق و المستندات الرسمية ،، و "كل شئ إنكشف و بان" كما يقول عبدالمنعم مدبولى ،،، و كله بظهر و بطلع فى الوقت المناسب ،،، و طالما هامش الربح كبير فال 240 الف دولار البشتروا بيها الشقة مكلفاهم أصلا 60 الف دولار مخدرات و بالتالى لو باعوها ب 150 الف دولار بكونوا حققوا ربح 100% مضافا إليه 30 الف دولار حق الغسيل و المكوة و مسح الشوارب ،،،، و بكون المكوجى الباع ليهم الشقة ب 240 الف دولار و عمل معاهم عقد البيع و استلم المبلغ بجى تانى بعد يومين حسبما هو مخطط و متفق عليه سلفا بشتريها منهم ب 150 الف دولار و بكون فى يومين كل واحد منهم حقق ربح 90 الف دولار ،،، و هم بستلموا قروشهم بشيك مسحوب على واحد من بنوكنا الواخدة على أفاها و غرقانة للباطوس ،،، و كده بتكون العملية إتقننت و صار عندها عقود و مستندات و إتظبطت و اتمنجهت و القروش دخلت جاكوزى البنوك و بتطلع منه مغسولة بالشامبو و مكوية بالبخار و مطبقة و مرتبة و مختوم عليها بختم بنك السودان و شعار صقر الجديان،،، و الناس الطيبين بقوموا بصدقوا القصة بأنه سعر الشقة 240 الف دولار ،،، و لأنه السوق حر و ما فيه قائمة أسعار بزيدوا أسعارهم هم كمان "و قد يلقى الواحد منهم مغترب دايش ما سمع بالخبر و لا عرف أصل الحكاية و يبيع ليهو" ،،، و لكن فى أغلب الأحيان بجوا بكتشفوا الحقيقة بعد ما يجوا يبيعوا و ما يلقوا مشترى بنصف السعر ده و يقنعوا أنفسهم بأنه القصة كانت مجرد زوبعة فى فنجان ،،، و لكن مصيرهم يجى يوم و يعرفوا أنه غسيل القروش بضعفها و بهد حيلها و بقلل قيمتها و بخليها مجرد قزم قدام تضخم الأسعار ،،،