شعراء وشاعرات منبرنا معا كل يوم قصيدة

Quote: تحفـــــــــة عيونك تحفة أسطورة مركبة بانسجام لأمن أعاين ليها وحاتك يا غالية يغلبني الكلام وأنبهم ما اقدر أقول أي كلمه بعد السلام يا نخلة من خير أرضنا عالية أنت شاقة صدر الغمام والطير المهاجر بعد سفرا طويل حط فوق كفك ونام وأنا ما قادر أطول واحصل هامتك ولا أسرع عشان الحق ضل ايدك أتمني لو اتمدد في فضاك وأتوسد من التعب لحاك واحكي ليك حكاية زول شرب من سلافة تمرك كاس معتق بنخب حروفك لأمن سكر بي هواك تعرفي لآمن قلت ليك داير ألقاك وطلعت قولة إنشاء الله خير من خشمك ساهرت الليل اتونس باسمك لحد ما طلع النهار وأشكل من نجمو لوحة تحمل رسمك فيها البنفسج للضوء خط انكسار وكبت ليك في الزمن أسرع قطار عشان اجيك وسبقني ليك قلبي المن زمان مشتهيك ياربتو كان يلحق وساعة لقيتك لا قدرت أشيل خطاي وامشي عليك لأقدر صوتي يطلع ووبنده ليك ورجعت منكسر ولي بعدك هميت لكن يارايعة بس داير أقول ليك كل ما يطول سفري لي مدن عينيك واقطع ليها سهول وبحار وألاقي في سكتك عجائب وأشوف الخضرة على ضفة الأنهار بحس بي متعة الترحال وفي خاطر عيونك مابيغلبني الانتظار لان خطاي في دربك الأمل احتمال يمكن اصل... يمكن اصل ابريل 2001