|
|
 هرطقات ..
|
تصحى الصباح تتسوّك بي فرشة منكوشة وبقايا من ابو وردة رغوة المعجون جوة خشمك وتقنع نفسك بي إنو صوت السواك على شكل لحن أغنية الحبيييب مالو ما جا وييييين مالو ما جا ..وإنتظرتو لما ما جا روحت زرتو ..من الوهلة الأولى تكتشف إنك بتكلفت في السواك وإلا لكنت إخترت لحناً أطول وانت تردد من يوووووم ما شوفتك قلبي للدنيا ابتسم ..لكن يبدو أن بقايا المعجون لا تكفي !!!
تخش الحمام عشان تستحمّ تلاقي ليك برضو بقايا صابون يمنة ويسرى ولكن ليست على خطى الشهيد أحمر اخضر أصفر أو كما يغني الكاشف شي صابونة غسيل وشي صابونة فنيك وشي صابونة لوكس وما ادراك ما لايف بوي ..تجمّع كوتة الصابونات ديل عشان تطلع ليك بي رغوة بنكهة اللاشئ ورائحة ال ولاااا شي تفط سطر وتغسل سطر تفط سطر وتغسل سطر واكيد اكيد بين كل هذه السطور فإن ضهرك غير وارد ضمن الحسبة ..
تمشي المطبخ عشان الشاي تكتشف إنك اخر زوّار المطبخ وبررررضو تلاقي بقايا شاي ..كبابي فيها بواقي شاي ناس البيت ..صينية فيها سكّر مكشّح في كل الاتجاهات وعلامات لقعور الكبابي تدل على جوغمة كبيرة جداً لا تتناسب وحجم الشلاليف ليكون نصيبك شاي نص كبايتو تفل ..
بعدين مش خليل إبراهيم ده دخل امدرمان بي صابرين ؟ طيب الجموعية علاقتهم شنو بي الموضوع ؟؟ سعدية بنية سمحة ..أي نعم لابسة ليها إسكيرتي مورّد وانا جني وجن الإسكيرتات المورّدة لكن سعدية النصيحة سمحة والإسكيرتي ما بيناتنا بيدوك بدل لبس وبتغيريهو ..!! هي سعدية شغالة وين ؟؟
إيران لمن خصّبت اليورانيوم ما تفتكرو الموضوع بقا عندو علاقة بي أطفال الأنابيب ولا تفتكرو الحكاية فيها عجز جنسي ما تراهو مشورع الجزيرة فيهو اراضي خصبة حصل سمعتو بيهو قاعد يلد ؟؟؟ إنتو قايلنو مشروع الجزيرة ولّا فلسطينية ؟؟ بالمناسبة كل ما شيرين ابو عاقلة مراسلة قناة الجزيرة في غزة تغيب ليها يومين بحس إنو المرا دي بتكون والدة ليي ما عارف !!!وعلى ذكر المراسلين فما هي أخر اخبار مراسلين بلا حدود ؟؟
علي شافع جيرانا لقيتو ليك سايق ليهو ترتار وبيغني ابو لي بي ابو لي بي يا اللبن ابو لي بي ..ده شنو يا علي قال ليك بغني ..قلت ليهو سمح غنّي ..بالمناسبة علي لسة عمرو اربعة سنوات وغالباً غالباً لمن يبقا عمرو 10 سنوات اهلو حا يضربوهو ما عشان الصلاة لالالا عشان حاجة تانية هي شنو والله ما عارفة لكن الزول ده حا ينضر ب حا ينضرب..والموضوع ما عندو علاقة بي اخوهو خالد الكورك للأستاذة في فصل سنة خامسة استاذة استاذة الدخان ماااااااا عندك لكن ..
|
|
 
|
|
|
|
|
| العنوان |
الكاتب |
Date |
| هرطقات .. | عمر الفاروق | 06-14-08, 05:24 PM |
| Re: هرطقات .. | اساسي | 06-14-08, 05:51 PM |
| Re: هرطقات .. | اساسي | 06-14-08, 05:52 PM |
| Re: هرطقات .. | اساسي | 06-14-08, 05:58 PM |
| Re: هرطقات .. | عبدالفتاح أبوشيمة | 06-14-08, 05:52 PM |
| Re: هرطقات .. | عمر الفاروق | 06-14-08, 05:55 PM |
| Re: هرطقات .. | عمر الفاروق | 06-15-08, 06:22 AM |
 Re: هرطقات .. | عواطف ادريس اسماعيل | 06-15-08, 06:30 AM |
 Re: هرطقات .. | عماد محمود علي | 06-15-08, 07:35 AM |
| Re: هرطقات .. | عمر الفاروق | 06-15-08, 07:07 AM |
 Re: هرطقات .. | عواطف ادريس اسماعيل | 06-15-08, 07:20 AM |
| Re: هرطقات .. | abuguta | 06-15-08, 07:23 AM |
|
| |
عمر الفاروق
فيس بوك
تويتر
انستقرام
يوتيوب
بنتيريست