( شروق) ابو (الناس) إلتف حولها جمع من (الناس) فكانت (غروباً) على(الناس)..!!

Quote: مع انو بوستك هذا جاء بعد الحلقة الثانية تحديدا واشرت لهذه الحلقة تحديدا وحتي بالاماره تحدثت عنها بالتفاصيل وبتجيك الا أنك زوغنجي وتنفع جناح شمال زي جاد الله بتاع المريخ زمان أكبر مرواغ ولك حنكة مقدرة في منطقة المناورات عايز تفاصيل بجيبها ليك من بوستك ده ذاتو لكن لو آمنت مافي مشكله يعني كلامك في التسجيل الاول انتهى في بوستك الاول.

Quote: عموما خلي بالك حسب التوزيع البيعي هو الاكثر مبيعا لعلمك أمشي تأكد وتعال

نعم وعندك حق ..
لكن ما تنسى يا استاذ إنو هي الأعلى مبيعاً لأنها ظهرت في وقت كانت الناس بتعتمد على تسجيل الحفلات يعني انت وبتسمع في الشريط فجأة يجيك صوت زغرودة أيوووووووووي يوووووووي يوووووي..
وكمان تسمع صوت واحدة بتتكلم مع صحبتها يا علوية عليك الله جيبي ليك قزازة البيبسي ديك ..
وممكن عااااادي جداً تسمع ليك شكلة في العشا بين اهل العريس والعروس..
حصاد عندما انتجت شريط خالد محجوب كانت طفرة في التسجيل وحتى اسلوب التسجيل كان جميل وهنا نشيد بحصاد لأنها وضعة اللبنة الأولى للتنافس بين الشركات ..
ورغماً عن ذلك يا موصلي وبما انك تقيس بالمبيعات والاموال فهل تعلم كم يبلغ سعر الشريط في منصفون ؟؟؟؟؟؟
كل الاشرطة في السودان كان سعرها 5 الف جنيه ولكن اي شريط لمنصفون سعره 15 الف او 12 الف بالرغم من إنو التسجيل قديم !!!!

Quote: والمعلومه التانيه هي من توزيع الماهر ماهر تاج السر وهي ليست اليكترونيه وسجلوها كمنجات محمديه وميرغني الزين واحمد باص ومجدي العاقب وميكائيل ماقلت أهبش اضانك وفتشها وتاكد من معلوماتك؟؟؟

ما هو يا انت عايز تفقع مرارتي والسلام يا امك عارفني قاصد شنو وبتعمل رايح يا اما كمان انا بيخوني التعبير في الوصفة وبالتالي بتفهمها غلط ..
يا موصلي والله العظيم انا اول حاجة بقراها الناس السجلوا الشريط قبل ما اسمعو عشان اعرف منو الورا العمل ده ..
الكنت بقصدو في عملية التسجيل الاكتروني هو صوت الإيقاعات يعني تسجيل ما بيشبه صوت البنقز العادي داك وناس كررررررررررررك دبق دبق كنج كررررربك ..
انا صراحة ما عارف الإستايل ده إسمو شنو لكن بيديني إحساس إيقاع الأورغن فده القاصدو ليك ..
يا موصلي اسمع ليك كل الشرايط السجلها محمود كان وراها منو ؟؟؟
اوريك محمود كان بيتصور وين للالبومات ؟؟؟
احكي ليك كم مرة دخلت وحضرت بروفات تسجيل لي شرايط محمود ؟؟؟
والله يا موصلي شفت محمود ده بقا الما بتغالط فيهو وصدقني مش لو انت موسيقار ومقددا لكن نحن الشماشة الساااااي ديل بنحفظ ليك عازفين محمود وتسجيلاتو زي جوع بطنا ده ..
عشان كده انا عارف منو القام بتسجيل شريط خلي بالك ولو عايز كمان نكتب ليك اسامي الروس السجلوا شريط سكت الرباب !!!!
صدقني يا موصلي عمري ما بتزاوغ والما بعرفو بقول عديييييييل ..

Quote: عليك الله ياعمر امشي اشتري شريط تاني وأقرا المعلومات في الغلاف شوف منو الوزع الاغاني دي أما ياخاين فهي توزيع المرهف ميرغني الزين أما المصير فهي توزيع الجميل ميكائيل كدي أمشي فتش تاني يمكن تلقي حاجه بتاعتي بعدين ياخي ابن ابراهيم عوض مبسوط جدا وقال للراحل هذه الاغنيات وضعت في اجمل القوالب !!!!

حقيقي يا موصلي انا زمان زرت شركة حصاد في الخرطوم وقريت في مرة زمااااان لقاء صحفي لي واحد من المسؤولين فيها لا استحضر إسمو وحقيقة انا قريت إنو هم بيتعاملوا مع موسيقيين كبار اولهم الموصلي الذي يقف وراء هذه الاعمال الموسيقية ومن يومها وانت مرتبط لي بحصاد وانا لا اعاتب الموصلي على توزيع هذه او تلك ولكن اعاتب الموصلي الذي استحدث طريقة تتوزيع الاغاني بتلك الطريقة التي تخفي الايقاع السوداني (بنقز وطبلة) مع علمي بأن هذه الالات حتى هي غير سودانية صرفة ولكنها دخلت الينا من بلاد اخرى الا انها ارتبطت بوجداننا..
تسجيل الحزن النبيل فيه هذا النموذج من التسجيل وكذلك طفل العالم الثالث وهنا مقصدي ..
يا موصلي حقو عشان تفهمني تنزلوا عمل من الحزن النبيل وانا بنزل ليكم عمل من اغانينا العادية البي التوزيع الموسيقي البسيط حق الدربكة والبنقز زي ما بيقولوا

Quote: تعرف ياعمر بالرغم من انك غيرت الموضوع من شروق للموصلي وبالرغم من اسلوبك الرشيق في المراوغة ألا انه يعجبني فيك أنك مهذب وابن ناس وانا احب التحاور معك

صدقني يا موصلي انا ما غيرت الموضوع وبالجد في سؤال قائم انت زمان إتجاهلتو لي وقلت انا بتزاوغ وانا عشان ارجع ليك الامور لي نصابها حا اكررو تاني وانا جادي فيهو :
ما هو الذي يميز شروق صوتياً مما يجعلها ظاهرة ستحدث التغيير في الغناء السوداني؟؟؟
لماذا يرى الموسيقار الموصلي في شروق الفنانة التي ستنال الشهرة وتحقق النجاحات ؟؟
حقيقة يا موصلي انا حا استعين بي متخصص في علم الاصوات وحا اخليهو يسمع شروق وحا اجي انزل ليكم كلامو العلمي هنا وما تسألوني ده معناهو شنو لأنو حا يكون كلام علم ساي بعد ما ابيتو كلام الشارع ..
بالمناسبة شهادتك الجميلة دي حا تخرب علي السوق ولو بديت ارخي معاك في الحوار حا يقولوا لي الموصلي دقسك يا فراة وكتل قلبك بي الكلام الحنين ده ؟؟
اها عشاااااااااااان كده حقو الواحد يخرمج معاك
تخريمة :
تأكد يا استاذ بأنني اتحاور معك من اجل الوصول لنتيجة فيا غلبتك ونجحت انا في تثبيت ان شروق فنانة عادية مثلها من هذه الظواهر التي تزول بزوال المؤثر أو اقنعتني فتجدني الصق صور شروق في دولابي وعامل اغنياتها نغمات في الموبايل
وانوه بأنني قد اغيب ليوم غدا وبعد غد لظروف الإجازة وبجيك السبت بي رواق إن شاء الله ..

اها شفت الزوغة الجد جد