كتب الكاتب الفاتح جبرا المتوفرة بمعرض الدوحة
|
|
 بكري ابوبكري دحين انت باباك ده باب المندب؟ الشي يطرقوا فيهو سااااي!!!
|
عوضية مقاشيش تطرق بابك فهلّا أذنت لها يا بكري؟
النعيم جادين يقف عند الأبواب في إنتظار الدخول !!
يا شباب الهند كومارو ابو شلخة عند باب بكري فهلّا فضلتموه!!
الخلوق النعمنو ينتظر الإشارة فهل توافق يا بكري؟
الرائعة تهاني مجروس تحتاجكم يا بورداب قطر فهل ترشحوها لبكري؟
علوية حواجب إضافة حقيقية لبورداب الرياض فأذنوا لها بالدخول!!
يا جماعة انا من ما سجلت في المنبر ده (داخل في السنة التالتة) وكل يوم أقرا لي زول بيطرق في باب بكري ده !!!
الغريبة اصلو ماف زول فكّر يضرب الجرس وكلهم شغالين " كو كو كو " ومرات في ناس بالعكاز في بطن الباب..
وفي نوع كده لو ما فتحوا ليهم تلقاهو يمد رقبتو بي فوق الباب ويتاوق يا ربي الناس ديل قاعدين وما عايزين يفتحو ؟
البيحيرني في الموضوع إنو كل الناس البيطرقوا باب بكري ده بيفتحوا ليهم الباب لكن تعالوا شوفوا العجيبة شنو !!!!
العجيبة إنو معظم (لو ما قلنا كل) الببتكونوا عاملين لينا بيهم فلقة في راسنا ديل وانهم رائعين وانهم يطرقون من سنة "دو" الواحد منهم بيجي يكتب بوست واحد بس " شكراً لك بكري فقد حقق أمنيتي"
الغريبة انا ما عارف معقول يكون في زول امنيتو انو يكتب في الانترنت ؟؟؟
ياخ دي أمنية ضاربة جدا جدا !!!!
وبعدها طوالي يجي يكتب ليك " معليش يا شباب مشغولياتي كتيرة ولكن لي عودة"
طيب ياخ الواحد منكم لو ما عايز يكتب وما بيقدر يدخل النت أو ما فاضي من أول مالو عامل لينا وجع راس بي طرقو ودقّو للباب ده لمن الجيران طلعوا يتاوقوا!!!!!
اسمع باسماء كثيرة وكثيرة جداً تم ترشيحها بل وذهب البعض لأبعد من ذلك ويقولوا ليك :"
فلان ده إضافة حقيقية للمنبر" ...
ويا كافي البلا فلان ده لا يبقا إضافة ولا نعت ولا جار ومجرور اللهم إضافة عضو جديد وضياع باسوورد في السايبر..
كل مرة بسأل روحي سؤال هو الناس ديل وين ؟؟ وبيسوو في شنو ؟؟ وفلسفتهم شنو زمان لمن قالوا نحن عايزين نشترك ونبقا اعضاء في المنبر؟؟؟
في كل موسم تسجيلات يتم تسجيل 100 نفر مثلاً ولا يظهر من هؤلاء إلا إتنين تلاتة !!!!!!!
بالله يا شباب تاني ماف زول يطرق لينا الباب ده والعايز يدخل يضرب أول شي يشوفنا قاعدين ولا مافيشين ..
والبيطرق وما نفتح ليهو بالله ما يشيل لينا فحمة ويخرب لينا جير الحيطة بي "حضرت ولم أجدكم "أو يدنقر بي تحت الباب يكشّف أو ينطط زي الأهبل بي فوق الحيطة !!!!!
ويا جماعة في إختراع إسمو " الجرس" دقوهوا الله يرضى عليكم !!!
والبنفتح ليهو الباب الله يرضى عليكم يقعد يتونس مش يجي ويشرب العصير والشاي ويقول لينا " أها يا جماعة النقوم نمشي " ..
تخريمة :
أماني باروكة تطرق بابك يا بكري !!! أها نقول ليها شنو ؟
|
|
 
|
|
|
|
|
| |
عمر الفاروق
فيس بوك
تويتر
انستقرام
يوتيوب
بنتيريست