|
Re: كلمة السيد رئيس رابطة أبناء دنقلا في لقاء مجلس الجالية بالرياض (Re: حمزاوي)
|
Quote: ولابد لنا فى هذه السانحة ان نتقدم بالشكر لسعادة السفير محمد امين الكارب، وسعادة الاستاذ احمد يوسف الوزير المفوض والسيد تاج الدين المهدى الامين العام لشئون العاملين بالخارج على احاطتهم بامر الجالية وعلى صبرهم وعملهم الدؤوب على تجاوز الخلافات بين مكونات الجالية. |
السفير محمد امين الكارب .. مهمتو دبلوماسية في علاقات عموم البلدين ..وهو ادرى بها.. الاستاذ احمد يوسف شكروهو معظم الكيانات في الرياض وهم ادرى به..
السيد تاج الدين ده علاقتو بي شنو بالضبط انا المغترب الكحيان ده.. عكلتة في ذلك الجهاز وتاخير معاملات وجبايات بلا مبرر ومكيفات يرزح تحتها موظفين ينظرون اليك من وراء المصاحف.. استعداد مُـسبق لتكذيبك .. يفطرو في ساعة كاملة ..ويتناولون مشروباتهم بايدي مخضوبة بالحناء في ربع ساعة... بشيلو رسوم تحت مسمى الخدمات ولاخدمات.. يعفوك من الضرائب عشان يقلعوها منك بي مضاعفة رسوم مايسمى بالخدمات.. ياخي نحنا جيناهم قنا ليهم اخدمونا؟؟ ما زمان نص اهلنا ديل سافرو عن طريق اجهزة وزارة الداخلية .. لاجهاز ولارسوم خدمة .. انتو تعملو الجهاز وتجو تعملو فيهو رسوم خدمة ؟؟ الله الغني ياخ.. شيلوالجهاز وشيلو الخدمة وريحونا وريحو الجمال..
مية الف دي قلعوها مني في خطاب .. ورقة A4 وسبعة سطور.. - المية الف بتاعة شنو يخوانا؟ - دي رسوم شركة المهاجر لموزين.. - وطيب المهاجر لموزين دخلها شنو بي عربتي الانتا جبتها لي ناس البيت ماجبتها للنجاشي ملك الحبشة .. - يازول النجاشي ده مابنعرفو ؟ البنعرفو نحنا محتكرين التربتك في السودان.. - طيب يعني شنو محتكر الترتبك في السودان؟ - يعني اي عربية بتجي عن طريقنا نحنا ونحنا بنشيل عليها رسوم.. وليه تشيلو انتو رسوم على اي عربية ..دافعين معاي فيها شنو عربتي دي لامن تشيلو رسوم مني ؟ وكيف يعني عن طريقك..ما هدي انا وصلتها من خشم بيتنا في الرياض لحدي خشم بيتنا في الخرطوم لاقيتك وين في الطريق الطويل ده او لاقيتني انتا وين غير الحتة المكيفة الانتا فيها دي عشان تشيل مني رسوم؟!! - يازول الفكرة ماكده ..دي شركة تابعة لي جهاز شؤون العاملين بالخارج والغرض منها خدمة المغترب اولا واخيرا.. - يا خوي وينها الخدمة دي هسي الانتا بتكلم عنها؟؟ - اهو ده هسى عايز اخدمك عشان اديك خطاب لي ناس الجمارك تخلص بيهو عربتك دي..دي موش خدمة؟؟ - ياخوي انا ماعايز خطابك ده بس ناس الجمارك هم القالو لازم خطاب منكم.. - خلاص دي مشكلة ناس الجمارك.. - ناس الجمارك يقولوا انتو الطالبين مسالة الخطاب دي وانتو بتقولو دي مشكلة ناس الجمارك ..شنو هي عصابات ولاشنو ؟؟ - يازول احترم نفسك ولا هسي اوديك في حتة ماتشوف فيها الشمس.. ياخوي لا شمس ولا ضل ..انا عايز افهم شي واحد بس لو منطقتني فيهو انا بديك المية الف دي عن طيب خاطر..انتو ياشركة المهاجر لموزين علاقتكم شنو بي عربيتي الواقفة تحت دي؟؟ - ياخوي كان منطقناك ولاكان ما منطقناك انتا عايز تخلص عربيتك دي لازم تدفع ما عايز امشى اتوكل.. ذلك جزء من حوار في شركة تابعة (لهولا الناس).. ــــــــــــــــــ هسي وبي كل ادب واحترام يملية واجب احترام الكبير.. والبشرى زول كبيرنا ..واحترامنا ليهو واجب ومسالة إكزست حتى من قبل ان يكون رئيسا لرابطة ابناء دنقلا.. احترام تمليه اولا صلات القربى والمودة والنسب ..وتملية ثانيا اخلاقه وشخصيته ودبلوماسيته وعموم حاله ..احترام هو اهلٌ له .. كونه محترماُ في ذاته وبين اهله وفي الاقربين وفي عموم عشيرته .. عرفناهو خدوما هميماً بحال اهلنا وباحوالهم.. مواجباً ويصل الاقربين ومن كان بعيدا.. ولا يدانينا شكٌ قط في سعيه الدؤوب لصلاح اهله في الشمال وفي عموم السودان..
اقول مُـستصحباُ كل هذا الاحترام الثقيل.. يا البشرى هانحن قد فوضناك لما انت اهلٌ له .. ومع علمي التام بمدى مشغولياتك والتزاماتك الكثيرة الى جانب تكليفك برئاسة ابناء دنقلا.. بس انا عايز اعرف من السيد / تاج الدين ده -كوني مكتوي بجهالتي - عايز اعرف : 1- الرسوم الانا دفعتها في المينا كتامين مسترد الى اي قانون استند وماهي مبررات وجوده ومادور علاقة هيئة المواني بها كرسم ُمـتحصل على سيارة عابرة..ولما رفضت الجمارك ان تضاف قيمة الرسم الى قيمة مبلغ الجمرك لامن جيت اخلصها علما بان الايصال المالي هو ايصال 15 بتاع وزارة المالية.. 2- المية الف الانا دفعتها لي شركة المهاجر دي على اي قانون استندت وماهي مبرراتها وماعلاقة شركة المهاجر بالاكسنت حقتي؟! 3- ماهية الخدمات التي تستوجب ذلك المبلغ الضخم من الرسوم في الجهاز شرق مدينة الصحافة؟ هذه الاسئلة قد لاتصل مني لي السيد تاج الدين كون الوصول الى مكتبه معاناة مابعدها معناة.. وانا حاولتا تلاتة مرات وبحيل مختلفة ان اصله فرفض القائمين على مكتبه الفكرة.. لذا ولانو انا واحد من ابناء منطقة دنقلا الذين كُـلفت بهم .. ومعاناتي دي احسب انو عانى منها جميع العابرين بسيارات من ابناء دنقلا وغيرهم من ابناء السودان.. عايز بس ردود في شكل قوانين او لوائح مستندة الى قوانين .. ورق بس مكتوب فيهو هذه التفاصيل التي ُتعنى بهذه الرسوم.. ورق بس وماشي تاني.. اقراهو واقتنع بيهو وبعد داك ادفع ليهم عن طيب خاطر..انا والله مازول حرابة ولاني قاصد زول وماعندي معاهو سابق معرفة.. بس انا مكتوي بما تحت يديه من عمالة وشغيلة واداريين.. انا احسب نفسي من الذين نالو قسطا من التعليم في مؤسسات التعليم السودانية .. علمني دكتور : ذكي عبد الرحمن ود.عبد الله ادريس ود. اكولدا مان تير والاستاذ الفاصل طارق المبارك المجذوب واخرين اعتز جدا بتدريسهم علموني ان ابحث في الاسباب وان لا اقبل شيئا دون ان افهم طبيعة وجوده.. ويسؤوني جدا انو يتم تغييبي عن صفات الرسوم التي ادفعها ومبرراتها.. تلك اشياء تجعل من كل تلك السنين هباءا منثورا.. وانا بصراحة اعتد كثيرا بتلك السنين.. واعتز كثيرا بما نلته من اؤلئك النفر الكريم.. انا اقبل جدا وبكل اريحية ان تتقدم بالشكر باسمي الى معالي السيد السفير وسعادة الاستاذ احمد يوسف ..كونهم سفراء لبلدي في هذه البلاد التي فيها معاشي..لان وجودهم هنا ُتمليه العادات والاعراف الدبلوماسية ولانني لم اخبر مايؤسني منهم .. ولا اقبل جدا ان تتقدم بالشكر باسمي للسيد تاج الدين لانه لم يبرر لي على اي اساس تُجبى مني رسوم الامنية في ميناء سواكن .. ولانه لم يوظف اكفاء يستطيعون تبرير تحصيلهم لرسمٍ معين مفروض من قبل الجهاز الذي يرأسه.. ولانه لم يجد متسعا من الوقت ولمدة ثلاثة ايام متتالية لمقابلتي بينما هو في الاصل يجلس في منصبة لاجلي ولاجل من هم على شاكلتي.. ولانني ادفع رسوم مساهمة وطنية وغيري داخل السودان لايدفعها ونحن سواء في المواطنة.. لانه لم يستطيع رعاية شؤوني داخل البلد خليك من خارجها.. ولانو علاقتو بي كمغترب ..انا ما طلبتها ولا دايرها ذاتو.. ووجوده في حياتي لا تمليها العادات والاعراف الدبلوماسية..
مرة اخرى اكرر وافر احترامي للمتسشار البشرى عبد الحميد.. سائلا له التوفيق في مهمامه الثقيلة لخدمة ابناء النوبة خاصة وابناء السودان بصورة عامة وان يجمع شمل ابناء المنطقة النوبية على كلمة سواء ..
|
|
|
|
|
|
|
العنوان |
الكاتب |
Date |
كلمة السيد رئيس رابطة أبناء دنقلا في لقاء مجلس الجالية بالرياض | حمزاوي | 02-02-08, 09:04 AM |
Re: كلمة السيد رئيس رابطة أبناء دنقلا في لقاء مجلس الجالية بالرياض | حمزاوي | 02-02-08, 11:01 AM |
Re: كلمة السيد رئيس رابطة أبناء دنقلا في لقاء مجلس الجالية بالرياض | ود الباوقة | 02-02-08, 11:07 AM |
Re: كلمة السيد رئيس رابطة أبناء دنقلا في لقاء مجلس الجالية بالرياض | علاء الدين صلاح محمد | 02-02-08, 01:20 PM |
Re: كلمة السيد رئيس رابطة أبناء دنقلا في لقاء مجلس الجالية بالرياض | الرفاعي عبدالعاطي حجر | 02-05-08, 10:50 AM |
Re: كلمة السيد رئيس رابطة أبناء دنقلا في لقاء مجلس الجالية بالرياض | welyab | 02-02-08, 02:42 PM |
Re: كلمة السيد رئيس رابطة أبناء دنقلا في لقاء مجلس الجالية بالرياض | DKEEN | 02-02-08, 05:58 PM |
Re: كلمة السيد رئيس رابطة أبناء دنقلا في لقاء مجلس الجالية بالرياض | حمزاوي | 02-05-08, 12:09 PM |
Re: كلمة السيد رئيس رابطة أبناء دنقلا في لقاء مجلس الجالية بالرياض | الشيخ صاح محمد | 02-05-08, 12:58 PM |
Re: كلمة السيد رئيس رابطة أبناء دنقلا في لقاء مجلس الجالية بالرياض | الرفاعي عبدالعاطي حجر | 02-09-08, 04:49 PM |
|
|
|