|
|
 Re: فنان إبن فنان (Re: almulaomar)
|
الملا بن عمر :
وحذفت الألف لوقوعها بين إسمين ولو كان الإسم في أخر السطر والإسم الثاني في أول السطر الثاني وجبت كتابة الألف ( كتاب النحو سنة رابعة ولا خامسة ما عارف )..
نرجع لي موضوعنا الأساسي:
معظم الوز ينتج لنا أوزّاً لا علاقة له بالعوم والمشكلة الأكبر في وز زااااتو ما بيعرف يعوم ..
أستغرب دخول بعض من أبناء الماحي سليمان الوسط الفني (نزار ما بطال ) لكن داك كععب عدييل كده ..
أستغرب غناء عز الدين أحمد المصطفى وهو الذي لا يجيد العوم وطوااااااااااالي في حالة غرق..
محمد خضر بشير عوام شديد ويعجبني فيه تقديم أغاني والده بتحديث موسيقي جمييل للحد البعيد ..
أستغرب غناء واحدة جابوها في سهرة وهي بنت أبو داؤود والوز في وادي وهي في وادي تاااني خالص وأبو داؤود ده ما ظنيت بيجيب ليهو عواماً زيّو ولو حاول الجميع ..
نجم الدين الفاضل عندو ولد برضو ما عندو علاقة بي الغنا والغريبة بيكتب إسمو كااااامل نظام انا ولد نجم الدين الفاضل ..(هو نجم الدين زااااتو لو ما قالوا قطعت سكر كان ضاع)
وردي يقال من زماااااااااان ما بيدور عبد الوهاب وقال ده بشتن الغنا وعولقو وأتوقع كان في بيناتهم مشاكل عبر الصحف وتصريحات تصادمية ..
ود اللمين أولادو بعيديييين عن الجوانب الفنية (على الأقل حالياً )..
تكمن الخطورة في حكاية فنان إبن فنان في إنو معظم أبناء الفنانين يظهرون بعض وفاة الأباء ودي فيها جانب يخدم إبن الفنان فيكسب عاطفة المستمعين ومنهم من يفشل ومنهم من تلفق معاهو ..
القلع عبد الحفيظ عندو ولدو إسمو عبد العزيز أظنو برضو نفس الحنك والقلع مصر وملح إنو يمتلك أسرة فنية متكاملة من بنات وأولاد ..
أعجبتني أسة شرحبيل أحمد فهم عوّامون من دون أبوهم وما إحتاجو لي إسمو وأثبتوا روحهم بي روحهم وكل واحد سلك طريق مختلف في الموسيقى فمنهم العازف والملحن والمغني ..
وفي سهرة من السهرات ظهر بنات شرحبيل بصوت جميل ونجحوا في التجربة ولكن واحدة تستهويها الأكروبات والثانية ربما في مشغولة بحياتها الأسرية فرفضن المواصلة ..
شاكر عازف الجيتار له أسرة مبدعة للحد البعيد فمنهم عازفة الدرمز ومنهم الرسامة ومنهم عازفة الجيتار ..
وبدل فنان إبن فنان فهناك لعّاب إبن لعّاب ومنهم أولاد سيرجلي (كاريكا أخوان) حمد النيل والريح وحسن مصطفى ..
والغريبة كل هذه الأسرة تلعب الكورة إلا الأخ الأصغر أيمن سيرجلي فهو ماهر جداً في الة الأورغن وهو العازف الأول لندى القلعة  إضافة لإجادته للكرة الطائرة ..
الدحيش عندو ولد جابو الهلال بي الإسم ساي لكن مااااا خالص كده ..
حتى أكرم الهادي سليم خدمتو الظروف وضربات الجزاء..
|
|
 
|
|
|
|
|
| |
عمر الفاروق
فيس بوك
تويتر
انستقرام
يوتيوب
بنتيريست