وما برحل - ديوان شعر جديد - للشاعرة صلحة الكارب

Quote: وما برحل وما برحل إذا سافرت ولا بقيت وأنا البــي أهلي مسكونة وليك ياربــي ممنونة وما بقنع ودعواتتي جيــًابىـ وشاحداك بلا كُلـفة وكـل ما أكون مع نفسي أحوم جواي أشـوف الدنيا مختلفة الاقـي الشمعة والشرفة أسالم الونسة والعرفة، ويبقى النور أمل ضوّاي أنادي الناس وما بفرز حباب اليمة حبابّـة، بريدالعزة في يابا هداك القلبـوُ ما نسـّاي ألاقي بلادي وترابـها حِــداي الإلفة جـوّابة واعود أضحك ،واقول بــي فرحة شفافة، وفوق أحلامي طوافة أنا والله معاي أهلـي وماني براي وايامي غادية ضـُراع وخريفي ما ونـّاي بــرق قبــلي وسيل طرفة معاي ناس آمــنة جــوة البيت ، معاي أمولة في معنا وقت احتار واقول ياريت معاي ربوبة ست ريــدي وباقية الشاطي والمرفأ وخنوسة، بقدر الشوق بترجاني وصوتي ينادي ، حياني أنادي الريـدو جواني، أنادي الطعمو سودانــي وراجية بريـدو بي لهفـة وما برحل إذا سافرت واللا بقيت وانا البي أهلي مسكونة وانا البــي حبـي معترفة وانا اليوماتي في رحلة، شايلاني وخاتاني اتـانـي وطول دربي مخــاوياني ويوم ناس عشة جايينّـي، فرحت كـل أشيائي هللت أحياييني وبقيــت أضحك ولا طُرفــة وطعم الدنيـا –قادر الله- زاد لذة وزي المويـة راوييني وكل أيامي صارت عيــد ويوم وقفــة ومابرحل كان سافرت واللا بقيت وكان طولت من حنتــوب ومن البيت أشوف روحي كأني هناك وما زلت واسمع كلام وسلام، والقلــنا والقــالوا ، وكل الونسة بالحتــة البهرج والزعلان ،وخلــوه الدوام حردان وخبــر المات واتوفى والجايي زيارة بالصدفة، والعندو ملاريـا بي رجفة والمتـموم خلاص وفّــى والناقص وما كــفّى سامعة كل شي ياناس، لكن شايفاه بالإحساس شي تانــي شايفة الفال والزفة ، والخاطــر المجبور، وكميات من الإلفة وخلال لحظات ما بتنقاس أحس روحـي طربانة، واحس إيــدي مليانة واشوف أفراحـي مصطفة والقانــي ، مالكة الدنيا كل الدنيــا، بـي تاجها وإيوانــها وصنع الفرحة لــي حرفـة وما برحل إذا سافرت واللا بقيت وانا البـي أهلي مسكونة وانــا البي حُبـي مُعتــرفة وبين ما كنت وما كــاينة أشوف أولادي في عيوني ، واشوف في عيونهم إنساني واسمع بابا يا بابا جناح بأمانهُ غطانا وويين ما كنا لمانـا ووصلنا، وبــي رفقة لي عند بيتنـا ختانا وتلقاني مشيت تانـي ووسط أهلــي أهي مكانــي وهاك ياونسة وهاك يارحلــة إيماني سكينـة البيها عنوانــي وفيها أمانّا والدفّــة وريدتنا اللــي ما بتنقــاس وما بتستنـى فــي اللــفة وما برحل إذا سافرت واللا بقيت وانا البـي أهلي مسكونة وزي درويش مع الشفع لي راسي غرقانــة ووسطل الزعلة فرحانة وقلبــي يرف وروحي تشــف واقوم اهرج وريقــي يجف وتتشكل صور أيام، ومستقبل ملان ألوان وحبر أقلامــي ما جف واشيل الصورة ريــد جواي يكون بروازها وجدانــي وازيد لي لونها من معناي واضيف لمســات شعر وبيــان ولما ترجح الكفــة ، القى مُنــاي جنبي عيــان ومركبنـــا عاجبنا شامخ راســي فــي الضفــة