|
|
 "كرومه" لعب وغنى لنادى الهلال
|
مبروك للهلال
فرح شديد والله فى زمن ندرت فيهو الأفراح والأخبار السمحة
وإنجاز هائل، كونه الهلال يفوز على الترجى التونسى، وما أدراك ما الترجى
أنا بحب الهلال لتلاتة اسباب
أول سبب
لأنه وأنا لسه شافع صغير جدا وما فارز الكورة كويس
لكين شايف الناس كلهم يا هلالاب يا مريخاب
سألت أول صديق لى فى حياتى
الوالد عليه الرحمة، قلت ليهو إنت هلالابى ولا مريخابى
قال لى أنا هلالابى
ومنها قررت إنى أكون هلالابى، وبعدها بقيت مفتون بى جكسا وأمين وسبت
تانى سبب
لأنى بعشق اللون الأزرق، سلطان الألوان
وأعتقد، والله أعلم، إنه هو لون الله المفضل لأنه خلق السماء لونها أزرق والبحار لونها أزرق
وتالت سبب
عشان سيد الطرب وزعيمه الأوحد عبد الكريم عبد الله مختار "كرومه" كان لاعب فى فريق الهلال وترك الكورة واتفرغ للغناء
وبمناسبة الفوز السمح ده
كرومة عنده أغنية مخصوص للهلال
هلا الهلال
والأيام صفنلو
وفيها تمجيد وتعظيم للنادى الأزرق ووصف لكل خانات الملعب وللاعبين
ما عارف ليه ناس الإذاعة ما بذيعو الأغنية دى
غالبا ما يكون عندهم ليها تسجيل، أو يمكن كمان ما يكونو عارفنها اصلا، ودى تبقى مصيبة
لكين معقول "عوض بابكر" ما يكون عنده فكرة، اشك فى ذلك
المهم أنا عندى تسجيل للأغنية فى شريط كاسيت قديم جدا، وللأسف يبدو إنه حتى النص الأصبى فى الأسطوانة ما كان مسجل كويس أو الأسطوانة برضو كانت قديمة عشان كده فيهو "شخشخة" كتيرة وأجزاء كبيرة من الأغنية غير واضحة
بالله يا جماعة أى زول عنده فكرة كويسه عن الأغنية دى، يتحفنا بيها، خاصة الكلمات
إيدك معانا يا صديق يا موج
ويا كل المهتمين بالحقيبة
ويا كل عشاق الأزرق
|
|
 
|
|
|
|
أبوذر بابكر
فيس بوك
تويتر
انستقرام
يوتيوب
بنتيريست