أوتوجراف..عزاز شامي!

Quote: ألسي محسن وسيد ديكو : إنتقاء الألفاظ شئ جميل والسرد ممتع للحد البعيد لكن يبقى السؤال جدّياً : هل ده إحساسكم فعلاً وده تفكيركم أم هي لحظات مداخلات تزول بزوال المؤثر ؟ يا محسن خالد البيقرا اخر مداخلة ليك يشعر بي رغبتك الجادة في الزواج وبي المواصفات السودانية .. تعرف يا السي محسن ومعليش للصراحة دي لكن بتذكرني شلّتنا في الجامعة شفّاتا ومقرمين وبتاعين بنات للحد البعيد يختاروا ليك أجمل بنات في الجامعة يجكسوهن ليك زي الما حصل شي ويخلطوهن ليك زي الترتيب ..بنات سمحات مرتاحات لبيسات أنيقات إستايلات الواحد في الجماعة يتمنى بس تسلم عليهو خليك من تتونس معاهو ..أها فردنا ديل يا محسن يكون طاعل ونازل معاهن ومحسود عديييييييييل من باقي الشباب أها يا عزيزي لمن يجي يقعد معاك ويقول ليك عايز أعرس لكن ما لاقي البت ..نتخلع ونقول الزول ده جنّ ولا شنو !!!! يقول ليك يا عمر ده براهو وده براهو وبناتنا ديل ماااااااا للعرس !!!! يتقلب 180 درجة يا السي محسن وتستغرب جداً وإنت بتسمعوا وهو بيتكلم عن مواصفات من يريد الإرتباط بيها !!!! تشوف عمايلو في الجامعة تقول الزول ده بيعرس ليهو واحدة بتجي يوم العرس لابسة ردا وفنيلة فوق الصرة .. تسمع كلامو تحلف تقول عرسو حا يكون في جامع الشيخ السنهوري وحدّو العقد .. تعرف يا محسن خالد انا قاعد أحس بيك من النوع اللي زي ده !!! قلة أدبك الكتابية(ركز على الكتابية دي ) وإنتقاء المفردات المثيرة للجدل والتعابير الشوراعية في وادي وتفكيرك الجادي في وادي تاني .. ما بعرف ده إسمو شنو يا السي محسن هل هو عدم لخبطة كيمان هل هو تناقض في التفكير هل هو عدم توافق ما بين العملي والنظري .. اللي زيك ده يا محسن خالد باقي لي أتيحت ليهو فرص الزواج مرات كتيرة والمعجبات ما بيدوك الدرب وتبدو لي من الوهلة الأولى إنك شخص محبوب من الجكس بدرجة الجنون وكل بت تقعد معاك بتجيب راسا بتجيب راسا ورغماً عن ذلك إنت لابد فوق راي بالنسبة للعرس .. مااااااا ظنيت إنت من النوع البيتعذر بي القروش يا السي محسن ..ولاااااااا من النوع البيعرس عشان السماحة وبس .. وفي نفس الوقت مك الزول البيقول عايزا بت ناس والسلام .. صدقني يا السي محسن إنت لابد لك فوق راي نوعك ده عرسو صعب بالحيل نوعك ده نو ناس وقال يا إنتي يا أغرق ..بتديني إحساس بي الزول الما كان مشهور أها يلا كان بيحب ليهو زولة من زمااااااااان حب شدييييييييد وهي بتحبو أشدّ عايشين قصة حب من النوع اللطيف نوع في عرس الجيران تدسّ ليك صحن عشا لحدي ما تجي وفي بكيات القرايب تجيب ليك الشاي خلسة وتسألك بي حنيّة إتغدّيت ؟ ولمن تضيق بيها الدنيا في بيتهم من جوطة أخوها ونهرة أبوها تلجأ ليك ما عشان بتكره أهلها لالالالا عشان بتعتمد عليك إنت وتهدّيها وتروقها وهوّن عليها القواسي .. اها يا السي محسن في الجو الجميل ده تظهر عليك عواكل تعرية سواء شهرة أو إغتراب تبقا فنان تبقا لاعب كورة المهم تبقا شخصية جماهيرية وتحتك بيك البنات أشكال وألوان والناس لمن تحسدك عدييييييل كده للدرجة البتخلّي الناس ترسم شكل شريكة حياتك ووضعها الإجتماعي وساكنا في عمارة شكلها كيف ولونها كيف وقوامها كيف و و و و و و .. تعرف يا السي محسن نوعك ده في العرس الحا يكون ياتو نوع ؟ النوع البيكون وإنت قاعد في الكوشة ومبسوط للحد البعيد وتكاد تطير من الفرح مع عروستك و كل المعازيم في الخيمة يهمهموا بي عبارات مفادها : " الزولة دي ما بتشبهو عرسا كيف ؟ "