|
|
|
 Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
استاذي الفنان السني
سلام نضيييييييييييييف
لا زلت تحتضن الجمال
كاتبنا الرائع حمدنا الله عبدالقادر في مسرحية خطوبة سهير قال في حوار بين سهير واباها
الوسخ الحقيقي هو الوسخ الما بنضف بالصابون وسخ الضمير
أتمنى أن تهتم وزارة البلديات (يا ربي عندنا وزارة بالإسم دا) بالمنظر العام للمدن والأرياف والطرقات
دائماً إنت نضيييييف وحليو
| |
 
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: بدرالدين شنا)
|
بدر الدين
لازلنا ومازلنا نحمل الجمال اينما انزرعنا
ياخوي ما لاحظت للون الزرعي القايم في البوست بتاعي
قايل جابو تمبس ،، تمبس بتاع حنانك!!
تاني كل موضوع بي لون ايه رايك ما فتنا تمبس زاتو ؟؟
ايه رايك الردود بالأسود والموضوع بواصل فيه بالأخضر !!
شفت الشفتنة دي كيف قال تمبس عاش في الديم !!
ده ما أنا !! فقري وبياكل تبش
الجمال قالوا عندكم مدنكم آيه من النظافة
تحياتي لعمال البلدية
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الجميل فى كل حين .... محمد السنى دفع الله
يؤرقنى دوماً افتقارنا للجمال فى الأقوال والفعال ، ولعل المتتبع لما آل إليه واقع مجتمعنا السودانى يدرك التدهور المريع الذى أصاب كافة مناحى الحياة ، والمحزن فى الأمر أننا ركنا للكثير من المسلمات والقناعات الجوفاء عن تميزنا على كافة شعوب العالم مما أقعدنا عن العمل مطمئنين لهذا الموروث فتراجعنا للصفوف الخلفية فى ركب الحضارة والتقدم ، قبل عدة أشهر أقيمت بالبحرين فعاليات الخرطوم عاصمة الثقافة بالمتحف الوطنى ، ومارسنا كالعادة فوضانا السلوكية فأخذ الأطفال يعبثون بكل شىء داخل المتحف مما تسبب فى العديد من التلفيات لمقتنيات تاريخية عمرها مئات السنين ، فقررت إدارة المتحف الإعتذار عن استضافة أية فعاليات سودانية فى المستقبل ، وهكذا أضحينا والهمج سواء ... ولى عودة
خارج النص : أعتزم نشر هذا البوست بمنتديات ودمدنى لأهميته .. وانتظر موافقتك الكريمة أو حضورك الشخصى هناك - قالوا سمح القول فى خشيم سيدو
www.wadmadani.com
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
أخي محمد سني دفع الله
إحساس فنان ، البلد يا أخوي بي خيرها طالما فيها أناس طيبين زيك ، زمان كان أسبوع الشجرة لكن ومع شديد الأسف أتى علينا زمن حتى المزارع ترك أدواته وإشتغل عاطل في العاصمة القومية بسبب توجهنا الحضارى.
الشوارع حدث ولا حرج والله يا السني يا أخوي في حفرة بعد ما تمرق من كوبري شمبات متجهاً للصينية المقابلة لبيت الزعيم الأزهري دي شرك عديل كده ولو جيت راكب حمار يجيهو فصل في الأنكل وتمزق في عضلة الساق يا أخوي شوارعنا بعد ما كانت شوارع ظلط بقت شوارع تراب محشي ظلط الشارع تحلف تقول ضريرة أو ودك مجلوط في نص رأس زول بالجنبات تراب وفي النص أسفلت.
الطريف في حكاية بيع الموية دي يا سني إنو حتى الكلمات القديمة ما تغيرت أو إتعدلت وظ يرددها الباعة يعني حتى المناداة على بضاعتهم لم يشملها التطور.
أما الزي أو اللبس فالله الله من الجلاليب الكاروهات ونحن طبعاً أحسن شعب بيتأثر بالآخرين وديل ناس جامعة إفريقيا العالمية جونا بجلاليب زحمة ألوان زي ما قال المبدع عركي وزمان ياها الجلابية اليضاء أو السمنية وخلاص لمن الواحد يشطح ويجي يشترها بديها جلابية رصاصية ، والآن في الخرطوم إتفرج ويا سلام.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
almulaomar
تحياتي ومودتي فتحت طريق جواني بودي لي شارع الترزية
البس بقى لبس عنقالة
وحتى الناس العاملة فاهمة بتلبس البدلة الافريقية بي هبالة والألوان حدث ولا حرج
نحن كان الفنان الاول صاحب نظرية وطريقة وعرف حاجة اولاد البلد لي ياتو لون وياتو خامة من القماش !! ولون الدنيا بالدمور واللون الأبيض والفاتحة للنسوان ..اليوم الطرحة عند البنات بقت سودة والأسود يجذب السخانة ..والألوان الداكنة جلبوها للصباياوالسيدات ؟؟؟
وحتى البلبسوا الجلابية بقت شربانة وسخانة وناس بتلبسة من غير شال ولاطاقية وحتى في ناس بقت بتمرق بالبجامة !!
واتفرج ياسلام
مودتي
| |
|
|
|
|
|
|
|
|
 Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الجميل /محمد السني دفع الله
مساء الجمال ,,,,,
=============================
ومن تكن نفسه بغير جمل لا يري في الوجود شي جميلا
بمعني الحكاية منبعه النفوس ...........
وممكن جماليات النفوس هنا مختلفة في نظرته !!!!!!!
ومنظورة ببقي غابات الاسمنت ,,,, ومجسمات لا ذوق فيها ولا جمال
مع أنوا ياخي الحته أبسط من بسيطة وشجرة خضراء مزهرة ممكن تملاء النفوس براحة ما عادية
وحقيقي أي مباني أو مجسمات في الطرق من غير مساحة خضراء
حتبقي عبارة عن جدران ميته تفتقد الحياة
(وأوعك تقطع صفق الشجرة ..........عشان ما يجينا جفاف وتصحر )
وكمان......... توتر
وأخلاق ضيقة
وقلت ذوق
ونفوس تعبانة !!!!!
وبحيك للكلمات الصادقة الجميلة من كلام المسغفاتية ده للعنقالة ................
وزمان قالوا (الماء والخضرة والوجه الحسن ) ثلاث من أهم الجماليات في الدنيا
ولا شنوا !!!!!!!!!!!!!!!!
==========================
ولك خوالص الود ,,,,
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: عبد الناصر الخطيب)
|
ابوبكر حامد الأمين
الجميل في كل حين نحن نعيش في جلباب الوهم دائما ما يجرنا الحنين الى عصور ســـاحقة وماحقة ،، والعالم من حولنا يتطور ونحن نتخلف نعتقد اننا اخطر ناس في الكورة وانغولا جات فاتت الكبار والصغار واخطر ناس بندق انجليزى ومدارسنا اصبح العربي في تلتلة يلاقي مكان من النحو ومسافة للأعراب عن نفسه،هناك ياصديقي جملة ذهبية كان يكتبها ((الفكي عبدالرحمن ))
عند الإعلان لكل مسرحية من اول موسم مسرحي وهي ممنوع إصطحاب الاطفال ..وطلعوا لينا ناس عاملين فاهمين وعارفين حقوق الخلق ،ن وهم طلعوا فشوش . ياخوي الاطفال لهم مسرحهم وكل عرض مسرحي لازم تكتب فيه السن والعمر لكن نحنا بنحب الجوبيك .الاطفال نسوقهم اي مكان وكية للفهم !! وتقول ليا كسروا مقتنيات ثمينة لاتقدر بثمن !! وطبعا اهاليهم فرحانين ولسان حالهم بقول ديل ماأولاد صغار !! طيب ليه ماكلموهم من البيت ان يلزموا حدهم ؟؟؟
الفاقد للنوذج الجمالي ماذا يقدم للمجتمع سوى الحسرة !!
نحن عندنا ناس والله لمن اكونوا جايين علينا تقول بقولوا لي أولادهم :: ما تكسروا حاجة في البيت نحن ماشين ناس عمو السنى وفعلا بصلوا ويعيثوا فسادا !!ضغطك ارتفع السكري ازيد مامهم طالما هم فرحانين ارجع ارتب اللوحات وارص الورد والزهور واعمل استرخاء حتى يرجع ضغطي للوضع الطبيعي ونواصل
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: عبد الناصر الخطيب)
|
الخطيب الجميل جمال الخطيب وجكســـا وكمال عبدالوهاب عشان المريخاب ما يزعلوا
بحييك على الكلمات الجميلة وجادة ولك كل المنى ان تكون جميلا ومتوردا كوردة
ونحن احوج ما نكون للحلول والعمل الجاد من اجل الانسان السوداني الذي ما حارب الجهل حتى احاطته الأمية الجمالية من كل صوب وحدب حتى احدودب كسلحفاة ..
عزيزي لك المحبة وكل الود وجميلة جدا ومهضومة خوالص الود بتاعتك دي !!!
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
السني ازيك ,,
المسألة مرتبطة بالنهضة ,,
هنالك شعوب تتميز بصفة النهضة واخرى لا ...
هذه المسالة في نسيج الدي ان ايه ..
ممكن تدخل بيت في الحلة اصحابه فقرا ماليا ولكن بيتهم نضيف وزيرهم مغطى وعنقريبهم مرتب ..
وممكن تقارن الوضع بين شعب وآخر ,,
هل زرت الهند مثلا ,, الهنود بتاعين رياضيات وفلسفة لكنهم ما نهضويين ,, بالعكس تماما الصينيين اهل نهضة , كل الشعوب الصينية ,, شفت المدن البنوها في شرق الصين , شانغهاي وشنيزيهن ,, شفت الصناعة والفن والمدن القديمة , شفت النضافة في الشوراع ...
قارن بين لبنان وباقي البلاد العربية ,, شوف اثر اللبنانيين في اميركا اللايتينة ,, طبعا زرت المطاعم اللبنانية ,, قارن بينهم وبين المصريين او حتى بينهم وبين السوريين اولاد اعمامهم ..
وفي مكان ما في الخرطوم فتح احد اللبنانين محل كافتيريا ,,و جنبه كشك ليمون عمره 30 سنة صاحبه يستخدم كيزان مطفقة اكل ومقددة ,, وفي زاوية الكشك القديم لستك مدفون لي نصه وآثار بول الكلاب يتجدد كل يوم ,, وذباب وصراصير وكديسة نايمة جوة الكشك وجرايد مجدعة ودلاقين وسخانة لزوم النضافة ..
اللببناني عمل في محله ديكور يجنن وملا الرفوف بالفواكه الطازجة وانواع المشروبات والباسطات , وسحب الزبائن من جاره المسكين ,, وبعد سنة واحدة غير الديكور ووسع المكان وفتح واحد تاني في سوق ام درمان ,, وبعد ستة شهور فتح تلاتة محلات جديدة وشغل عدد كبير من العمال وناس الديكور وافران الباسطة ,,,اما صاحب كشك الليمون فلم يستفد من وضعه سوى جيوش الذباب والصراصير ,, لكن الكديسة ماتت من الاهمال ,,, هذا هو الفرق بين ان تكون نهضويا او تكون غير ذلك
(عدل بواسطة Dr.Abbas Mustafa on 06-03-2006, 12:20 PM)
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: Dr.Abbas Mustafa)
|
الفنان السني
ساتناول جانب العنقالة فهم كثر ويخمجون ويخرمجون ويعثون في
كل المجالات ناثرين جربنديهم ويشوهون كل الاشياء الجميلة
..العنقلة صفة جاءت من حركة الاسواق وهي مهنة من لا مهنة له..
لك ان تقول(سبابي) وهذه تطلق علي عنقالي سوق البقر..
وهنالك (السمساري)..وهوعنقالي التجارة...ليس له قيم همه الكسب الساهل..
وهو كالمنشار..ماكل طالع ..نازل..
ولكن اخطر انواع العنقلة هم العنقالة في المجالات المرتبطة بحياة الانسان
فمثلا منذ سنين ظهرت في السودان العنقالي الدكاترة والمهندسين
تراهم يزاولون هذه المهن دون اي تاهيل اكاديمي ..واثروا وقتلوا ارواح كثيرة
حتي تكشف امرهم...
شخصيا ممرت علي حالتين من العنقالة المهندسين..فاكتشفت تماما عالم العنقالة
ومقدرتهم العالية علي التزوير و المرواغة..والتزييف..
وهنالك العنقالي الصحفي
والعنقالي المغني
والعنقالي بتاع كل عنقلة (عنقالي من طرف)..
وهذا قيل له في اللغة الشعبية الذكية (ناس تاكل عيش)...
ودمتم ايها الاصيل.....
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: amira abdelrahman)
|
السنى ارجو مخلصا احتمالى
تتكلم عن الجمال بمعزل عن التكوين والنشأة والسلوك التواصلى
لن اورد امثلة من التاريخ
انت قمت باخراج ثلاثة افلام وثائقية لمؤتمر الدوحة العالمى لفنون التصميم
فى ودوراته الثلاثة وانا مدير الشركة المنتجة ونجاحك فى الاول هو الذى قادنا
للثانى والثالث هل لديك أى نسخة من تلك الافلام وهل طلبت بان يكون لديك نسخة منها
انت تعرفت من خلال هذا المؤتمر على فنانين عالميين واحبوك بل ووصفتك
ساندرا الزنجية استاذة تصميم الازياء بجاعمة فرجينا فرع الدوحة بأنك مليان بعمق
لتفاصيل ذاكرة هوليود هل حصل رفعت سماعة التلفون محليا او خارجيا لاى احد منهم
وكمان بتسأل عن النموذج و الفرق بين العنقالى والمثقف وانت اعظم قاسم مشترك بينهم
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: بدر الدين الأمير)
|
ايها الفنان...الجمال..
لعلك تسال عن الزمن الجميل..عندما كانت بصمات الجمال فى كل ركن وشارع ومفرق طرق.بدأ من ملامح تقاسيم وجوه الناس الى خضرة المشتل.الى الذوق الرفيع فى الملبس ..والبساطه فى الاناقه..ورهف الحس وفن الحديث.وحتى المشى..وذلك الاحساس بسطوة تملك الجمال الذى تراه فى كل شىء...وتعشقه وهو يتلبس اقدار الناس..ويختلط بين سماتهم...
ولعل زمن الانحسار الذى طال كل الدنيا الان..والذى جعل نوافير الدماء تعطى مساحات الكون.يجعلنا نحس باننا قد قتلنا الجمال فى ربوع بلادنا حنما اتاها الطاغوت..منذ ستينيات القرن الماضى.عندما بدا التسلل بوهج الاعتاق.لياتى بمششانق الظلم التى قتلت كل ازمنة الجمال..وختمت باختامها على المصير
ولعلك ايها الفنان الوقع والرقم...والعطاء
تدرك فى خلايا حسك واحساسك الفنى...اضطراب كل توازن الرؤيا نتاج لما يحيط بالواقع..والواقع هو مبعث الالهام..ومصدر طاقة الابداع
ودعونا نعيد التحسر على الزمن الجميل..واشراقات الضياء فى كل شىء.. لقد طمستها معالم ظلام مدلهم.غيب العقول وطغى باحقاده على ينابيع الجمال فاهال عليها الركام..
العزيز الفنان السنى..
لا زلتم انتم بفنكم وزمنكم وعطائكم الثر. ينابيع جمال مستمر..برغم جحافل فيالق التتار..التى غشيت الكون.زوغدا ستشرق شموس الجمال فى ارتقاء ابهارها
لك عميق الاعزاز..وكثيف المنى..
واصدح برؤى تشكيل الجمال.فانت موكل به..
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: عصمت العالم)
|
أيها الفنان المنزوي في المنافي البعيدة
عــصمت العالم
ياحليل أولاد العالم كلهم ،، لكم الشوق الجد في الشتات
نعم اسأل عن الزمن الجميل وأبحث عن الزمن الأجمل .. وأريد أن اجعل أبنائي من أطفال الوطن ،
ملائكة الأرض الســـمراء أن يعيشوا الجمال الحق ..
لانريد ان نتحســـر على الزمن الجميل بل نريد أن تشــع اشراقات الضباء في كل شئ.. نريد أن تعم البهجة كل النفوس ،، كتير علينا ،، يدك معانا عصمت ،لنعلم الأجيال جمال الوطن .. لابد من توجه جديد لنعيد الألق للشارع ونجعل الجمال حركة يومية تلقائية
هل ؟؟؟؟
مودتي
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: بدر الدين الأمير)
|
بدر الدين الوجيه الفنان
ياخوي انا بشتون لكن ما للدرجة دي انا واثق من مكتبتكم سوف تحفظ لي حقوقي واشرطتي وكل الأفلام التي صورتها عندكم وقت ما اطلبها سوف اجدها اما بخصوص اتصالتي الحمدلله انو نظمنا حالنا كمحترفين وخلقنا مركز عالمي لربطنا بالعالم والفضل لكم ونشكر ربنا في ان هناك من ينظم لنا اعمالنا وهذا مهم للفنان نسبة للفوضى الضاربة بداخله فدائما هناك منينظم له هذه الفوضى
اماباقي الأشياء فانت تعرف لماذا كان الأختيار لك لتنظم فرقتنا شتات لأن التجربة اكدت ان خير ما يدير فرق الفنانين هم الأداريين المحترفين والفنانين التشكيليين
لك كل الجمال ونقدك في محلو ومودتي
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الاخ السني دفع الله
اصبح المفقود هو جمال الداخل اللي بالتاكيد حيخلي جمال بره اعمق واقوى
تلقى كل واحد ماشي وداقش في الحياة دي او بالاصح (كاشت) .. الناس بقت بتسيطر عليها فكرة الموت بشكل كبير يمكن لرحيل الكثيرين في حياتهم عشان كدا في معظم الاحيان اصبح ما في مساحة لاحياء الجمال في اي شيء .. كانما هناك معاندة للحياة ...
ذكرتني كتب وزراة التربية زمان ، الطالب يقرا الكتاب وهو آيل للهلاك ، دونما اهتمام بوضح لمسة جمالية تفتح نفسه للمذاكرة ..
تعود الناس ازدراد شناة الحاجات والمظهر ..
لكن ما بدأت الاحظه حاليا ان الشعب السوداني (الفضّل) اصبح يهتم قليلا باللمسات الجمالية في حياته.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: maia)
|
مايا
أحدث برنامج في الغرافييك اسمو مايا ليهو علاقة بيك يعنى انت من اسرة مايا ولااسمك كده ( تخريمة)
حينما نفقد الجمال الداخلي ماذا بقي لنا؟؟؟؟
لاشــــــــــــــــــــــــئ
حينما نتعود على الشـــــــــــــــــنا
نكون دخلنا في مصيبة نحتاج لي زمن عشان نطلع منها !!!
الناس بدت تهتم لكنو عبزنو فعل يومي
كيف ؟؟؟؟؟؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الاخ العزيز محمد السني
رغم التعود على الشنا الا انه ما زال هناك امل انه الناس تقاوم وتفسح مساحات اكبر للجمال في حياتها
عارف مرات ممكن الجمال يكون في جلسة تحت ضل نيمة مع دندنة عود ، قاعد في حافلة كراسيها شينة لكن في شريط تنبعث منه اغنية لود اللمين وممكن جدا تكون في هلمة مناظر غير جميلة من حولك ن لكن رغم ذلك مساحة الجمال الصغيرونة دي حتسيب اثر كبير وتكبر شوية شوية الى ان تصبح شيء عظيم ..
الناس محتاجة بس تصنفر احساسها بالجمال من جوه عشان تقدر تعيش بروعة
مرات عوامل تعرية الزمن بتكون صعبة شوية وليها اثرها ، لكن احساس الجمال الجوه زي سريان النهر ..
ولك تقديري
تخريمة :
التحية لناس برنامج مايا رغم انهم ما استشاروني في الاسم
تسلم يا استاذ ومزيد من الابداع
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
أخونا محمد السني دفع الله الباحث عن الجمال في أجمل بقاع العالم أرض النيلين والتي فعلت بها براقش ما لم تفعله بنفسها وأهلها كما حدثنا التاريخ فجنت عليها وعلى أهلها وأصبحنا جميعاً نحاكي إبل الرحيل شايله السقا وعطشانه وفي رواية أخرى كالعير يقتلها الظمأ والماء يعبوه في قوارير لزوم التصوير التلفزيوني المصاحب لنشرات الأخبار.
والله يا السني بقت أى حاجة أعاين ليها أشعر بعدم إرتياح نفسي حتى صورتي في المرايا ما بشوفها إلا وأنا مغمض وبخاف أقول ليها كلميني يا مرايا مشيت لي فايقة الوداعية قالت لي أسمع أغنية أعاين فيهو وأضحك ، سمعتها لكين ما نفعت مشيت لي فكي ... ما عرف حاجة المهم يوم كده قاعد بدردش مع عبودي وهو رجل عادة ما لا يفيق من سطلته لسخطه على الواقع قال لي تعرف يا مان ده بسموهو التلوث البصري وربما يكون نوع من أنواع انعدام التذوق الفني ، أو اختفاء الصورة الجمالية لكل شئ يحيط بنا شوف حيطة البيت دي شكلها كيف شوف الشارع والخور وأشكال الناس الماشه دي ونوع العربات ... بالله عليك دي حافله دي شوف السواق وشو قميص الكمساري ده كان لونو شنو شوف حتى الجو مليان غبار وكتاحه من مشي الناس والعربات وريحة البلاعات وعوادم الركشات وشوف سيد اللبن شكلو كيف وشكل حمارو كيف والمواعين الببيع بيها اللبن يا أخ أنا لي أربعه سنين بطلت شراب الشاي عشان سيد اللبن ده ، لا وشنو أى فسحه في حي يا عملوها روضة أطفال أو جامع يعني التخطيط العمراني القديم الكان معمول بيهو جونا الجماعه ديل ووزعوا الفراغات بيناتهم وبقت أى فسحه جامع تقول ناقصين مصلين وبقينا محشورين حشر ، وكنا حا نقبل على مضض لو دخلونا في ..... وزه لكين أن يدخلوا الوزة فهذا أمر لا طاقة لنا به ، شوف عمود الكهرباء يا أخي ده لمن يولع إلا تغني ليهو يا الحلة تنوري تقول كهربتو دي 3 فولت تصور نور عمود الشارع ونور قبوره لمبة الجاز أم خيط واحد ، والغريب كل شهر تجيك واحده شايله ليها دفتر وتقطع فيك كم ألف وتقول ليك رسوم نفايات وهي البلد كلها بقت زيها وزي الكوشه أنا ما عارف النفايات دي شنو وبشيلوها من وين وبدوها وين وعلى رأي صاحبنا المفك قالي بفسحوها .
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
آلمووو
براقش جنت على أهلها ولكن ماذا نفعل في الذين لايدرسون التاريخ ولا يعتبرون منه
وأبل السقا بنات الناس ديل.. ده نحنا زي ما قالت مايا اتعودنا على الشناااا
وتعال منو ستالودع الاسمها فايقة ، علىكده حبوبتكم اسمها داليا ؟؟
المسألة فعلا محتاجة لي سجارة حمراء لانو السجاير الأخضر بقى ما بجيب همو وغي النهاية اطلعوك قليل أدب ويتاع بنقو
بوظت حكاية سيد اللبن خالص ، انا بالمناسبة كديســـة عديل لكن بعد كلامك حأتحول لي فار وتفتيحة
وابطل شراب اللبن والروب
شكرا للمعلومة الهامة عرفت النفايات بتمشي وين !!!
بفسوحوها ؟؟؟ عليك الله كان ماوريتني جبتها من وين الشديدة اللضييضة دي ؟؟
اسمح لي حوارك بتاع الوزة سوف استفيد منه في مسرحيتي ( هناي ))
لانك كتبتو بصورة ظريفة جدا
مودتي
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
العزيز.. السنى دفع الله
أول حاجه أنا حزين حزن شديد على انى ما لاقيت ناس ساميه وسوسن
وابننا العزيز الغالى أحمد فيصل.. كان عندى انفلونزا شديده جدا..
وبعدين ماكنا متصورين انهم حيقعدو خمسه يوم بس! تحياتى لهم جميعا
وياحليلم.. ياحليلم.. وياحليلنا!!
نجى لى موضوع اختفاء الجمال من حياتنا.. نحن مش فقدنا بوصلة
الجمال وبس.. نحن فقدنا البوصله البتحدد هويتنا كلها..والبنعرف
بيها موقعنا من الاعراب!.. ياخوى ده بلد محتاج لى اعادة تأهيل فى
كل شى!! والى صياغه من أول وجديد!!... اعادة تأهيل فى كل بنياته
الاساسيه.. وكل تنظيماته.. وتشكيلاته.. ومجموعاته..... والى اعادة
صياغه فى كل شى.. المفاهيم.. النظم التعليميه..الادارات.. الاحزاب
الاتجاهات الفكريه..كل شى!!.... أزمات السودان ومشكلاته محتاجه لى
خبير خبراء فى كل جانب.. وفى كل مجال من المجالات...بل يخيل لى أنها
محتاجه لى خبراء من خارج هذا الكون! عشان على الاقل أول حاجه يشخصو
لينا نوعية المرض.. وأين يكمن الداء! والاشكاليه وين...والحاصل ده
شنو؟!..... نحن ذاتنا كلنا محتاجين لى اعادة صياغه من أول وجديد
وبالذات المتعلمين مننا!! لأنو للأسف(القلم مازال بلم).. وفى ناس
متكالبين على المناصب.. وجاثمين على صدر الشعب السودانى..ولا هم
برحمو( ولا بخلو رحمة الله تنزل)..ناس عايشين فى نطاق ضيق وأفق أضيق
منو..عاجزين ومكبلين بى وهم كبير... وماعندهم أى قدره على أى نوع
من أنواع الخلق والابداع!... محتاجين لى اعادة صياغه وحركة تغيير
شامله لى طريقة تفكيرنا.. طريقة تعليمنا.. نمط حياتنا.. حتى طريقة
مشيتنا على الارض!.... كدى بالله اتصور معاى!! مين يقدر اتصورأنو بلد
جارى فيها أطول نهر فى العالم.. فى مليون ميل مربع.. ولسه تلك المدن
العظيمه العريقه القديمه.. الضاربه فى القدم!! والتى ترقد على ضفتى
ذلك النهر العظيم.. ما زالت مدمره قاحله كئيبه.. ومتخلفه فى كل شى..
وهى تفتقر الى أدنى مقومات الحياه العصريه والى أبجديات المدنيه الحديثه..
ومين يقدر يصدق أنو ألآن فى مدن قامت فى كبد الصحراء... وفى بلدان كثيره
مويه ما فيها.. ولا حتى نهر صغير بجرى فيها!... لكنهاالآن مزروعه وعلى مد
البصر.. خضره وبساتين وحدائق ومزارع ومنتزهات...... وبيئات سليمه صحيحه
ومعافيه من الاوبئه والامراض.. التى حصدت من أرواح الشعب السودانى المغلوب
على أمره, أكثر مما فعلته الحروب والمعارك العبثيه!! مدن فى قلب الصحراء
هى الآن أكثر تنظيماوخضرة وجمالا واشراقا.. من مدن قديمه وعريقه ترقد على
ضفتى أعظم نهر يجرى على سطح الكره الآرضيه!! يالها من مفارقه غريبه!!!!
ابن أختك: ( مامون) ودسكينه بت حليمه محمد صديق ...
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: Abu Eltayeb)
|
Quote: مدن فى قلب الصحراء
هى الآن أكثر تنظيماوخضرة وجمالا واشراقا.. من مدن قديمه وعريقه ترقد على
ضفتى أعظم نهر يجرى على سطح الكره الآرضيه!! يالها من مفارقه غريبه!!!! |
كانت اخواتي، قبيل العيد، يقطعن الجرائد في شكل مثلثات، كي تزين الفضية
ويجيرن التكل، بالرماد...
كل شئ جميل، حين ينبع الجمال من الداخل،
في زيارة سعيدة، لمركز راشد دياب للفنون، فوجئنا بأنه يستعمل اشياء بسيطة، بسيطة جدا،
اغلبها من سوق السكراب، ولكنه نفخ فيها الروح... واغرب مافي المركز هي الاضاءة، فقد
اعتمد على اضاءة الشمس فقط، طوال النهار، وبتوزيع ساحر، نحن لا نستغل مواهبنا، وثرواتنا
وان قلت، وشحت، فالجمال هو فكن الممكن، واجمل ثروة هي القلب الإنساني، ذو الخيال الخلاق
والتذوق المرهف، وهذه الثروة تسكن كل صدور بني آدم...
متى نصحو، ألم يقل الجميل، الشعبي يحي حقي (في رائعته قنديل ام هاشم)، للشعب المصري، اصح، تحرك فقد تحرك الجماد..
نحتاج لثورة على مستوى الافراد، وعلى مستوى المؤسسات، حقا، ثورة تزلزل كل فرد، كي يعي
دوره الخاص، في بلورة مفهوم جمالي، في الزي، وفي العمل، وفي الشارع وفي البيت..
الفراشات، تزخرف بغريزتها اجنحتها البهية..
الشجرة، تستل من الطين الصلصال أجمل الألوان، ففي الارض، تحت اقدامنا كل الالوان، من جير وحصى
ولكن الحس الجمالي نائم
لمن تدق الاجراس،
لي، كي اسرح شعري كما يجب، وانظف نعلي كما يجب، وكذا الشارع والمدينة، والذوق، وقبل
ذلك القلب...
كن جميلا، ترى الوجود جميلا...
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
السنى عندى ملاحظات من خلال التجربة المهنية
بس ماعندى تصور لصياغتها فى شكل اسئلة وا مداخلة المهم ياسادتى
كثيرا ماتجمعنى الظروف بتاعت المؤتمرات والندوات والفعاليات الاخرى
بالكثير من النساء من مختلف بقاع الدنيا وبمجرد مانتجازب عمق الحديث
وليس اطرافه عن الجمال والتجمل يسالونى عن روعة وجمال نقش الحناء عند المراة
السودانية وعن قدرات الحنانة السودانية فى الابتكار اوالحناية بلغة الخليج
وهنا ازهو وانتفخ بالحديث عن قدرات المراة السودانية فى التجمل والتجمل الذى يثير
الزوج فقط 0 الخمرة بضم الخاء والدلكة والدخان وولخ
وحين اعود الى مضجعى تعتصرنى تعتصرنى هواجس اخرى
هل المراة السودانية تفعل هذا من باب التعبير عن النقص الانثوى الحقيقى اى الختان
وهل تلك صاحبة المثل الشهير حين شالت الموس عشان تختن خدعتنا بظاهر عيبها لتحتفظ
لنفسها بتلك الخصوصية لانثوية وهى الميزة وليس العيب
وحتى الحنانة هى دوما من الاسر المهمشة او الهامشية فقرا او عرقا
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: بدر الدين الأمير)
|
عبد الغني كرمالله
ابها الروائي الجميل
شكرا على هذه المداخلة الجميلة جمال دواخلك
حقيقة كان العيد والمناسبات الكبيرة في وطني مساحة للجمال العفوي والتلقائي
من السعافة التي ننظف بها الأركان من بيوت العناكب الصغيرة والى قش المساحةالتي امام البيوت
النظافة جزء من السلوك اليومي من تفتيش الملابس في طابور الصباح وحتى نظافة الصف الدراسي
من كان يجرؤ على وساخة صفه الذي نظفه بنفسه
لك الحب وكل الجمال لكل الناس الحلوة
| |
|
|
|
|
|
|
|
|
|
القانوني العنقالي (Re: محمد سنى دفع الله)
|
يا صاحبي الباهي ..
هذا سلام ..
و قيل - العهدة على الراوي - أن صاحبنا ذاك اجتاز كافة خطوات المعاينات بتفوق , جعله المرشح الأوحد لتلك الوظيفة القيادية : المستشار القانوني لواحدة من كبريات الشركات العربية التابعة للجامعة العربية , شركة مساهمة ضخمة فخمة تمتد أفرعها في معظم الدول العربية . كان هو الوحيد الذي وقع عليه الإختيار من جملة آلاف المتقدمين للوظيفة من حملة الشهادات الكبرى , فقد كان يحمل درجة الدكتوراه في القانون و هو أيضا قاض سابق في المحكمة العليا, و كان أستاذا للقانون في عدد من الجامعات و مستشارا لعدد من الشركات و عضوا في مجلس إدارة الكثير من المؤسسات و الجمعيات الأهلية .
طلب منه الحضور إلى الرياض للمقابلة الشخصية , جاء و تم إسكانه في فندق خمس نجوم . يوم اللقاء باللجنة المكونة من رئيس و أعضاء مجلس الإدارة و العضو المنتدب للشركة دخل صاحبنا القاعة فأسقط في يد اللجنة .. كان مرتديا جلابية و يضع العمة على كتفه و ينتعل صندلا جلديا و يحمل حقيبة جلدية أكل عليها الدهر و شرب .
تجاوز المجلس عن ذلك و أفاض الرجل في تلك المقابلة من علمه ما جعل الحضور يقتنعون بأنه الخيار السليم كفاءة و خبرة و إمكانيات .
بعد انفضاض المعاينة انفرد به رئيس مجلس الإدارة مهنئا و متمنيا له التوفيق في موقعه الجديد ثم أردف مازحا : أرجو أن لا أضايقك إن طلبت منك الحضور إلى مكتبك بالبدلة الكاملة , حيث أنك ستكون مديرا لإدارة قانونية يعمل فيها تحت إمرتك المئات من الكفاءات العالية و الجنسيات المختلفة , و بحكم وظيفتك فإنك ستجد نفسك ملزما بالتعامل مع منظمات إقليمية و دولية و اجتماعات هنا و هناك و سفر لا يتوقف ..
هب صاحبنا واقفا و غاضبا : بعد كل المعاينات دي و معرفتكم بإمكانياتي و خبراتي هسه عايزين تنتقدوا زينا الوطني و تعيبوني بيهو ؟؟ .. أنا ما ح أتخلى عن الجلابية لأني بعتز بيها , و الوظيفة ليست مظهر , عليكم بجوهر الأشياء و التخلي عن هذه الطريقة المتخلفة بقياس الآخرين من مظهرهم . يؤسفني رفض العمل مع نوعية ناس بتفكر بالطريقة دي , أرفض الوظيفة دي .. شكرا ليكم .
السلام عليكم ..
وعليكم السلام .
السني : تتكيف منه زول زي ده .. ولا تعتبره عنقالي ساكت ؟؟؟؟؟
| |
|
|
|
|
|
|
|
|
|
Re: القانوني العنقالي (Re: Emad Abdulla)
|
PURPLE] الغالي عماد
عارف العنقالي بتاعك ده وهم وزيو كتار
من قال انو الجلابية هي الزي القومي لينا؟؟ ومنالذي صمم الزي الوطني ؟؟ ياخوي نحن دايما شايلين الحكاية رجالة !!هسي لو سألوه العنقالي بتاعك ده هايج في شنو ؟؟ الراجل طلبوا منو القيافة . لوكان جا بالجلابية ناصعة البياض وداك يالشال الفنجري انشالله ابو تلاته خطوط وديك يالملفحة وعباية تراري نص الليل كان في واحد سألوا ؟؟؟
من اتوجد الوطن في هالدنيا ونحن بنلبس اكتر من قطعة يعني عاين للجداريات الكوشيةوشوف بساطة الأزياء شوف صور الحملة الاستعماريةهذا الجلباب يتم لبسه من قبل العرب وشبوخ الدين المتأثرين بلبس الفرجية بطريقة الوافدين الشوام والمصريين وخاصة الذين درسوا في الأزهر الشريف لكن لو راجعت كتب التاريخ القديمة وتشوف ناس الممالك القديمة كيف لبسوا قطعتين القميص والبنطلون _ السروال_بأشكال مختلفة _وعرفوا الحرير والموهير وكل الخامات من القطن لي الصوف وابدعوا لينا في الدمور والكلام ده كلو في بلدنا ده ناس المسبعات عرفوا الحريرالصيني والقطيفة البتتلاصف مع الشمس زي جلد الحربوية !! يعني هسي لو جاني واحد من الإمباررو لبس هدومو الأبيض واسود ومخيطة من غير مكنة اقوليه امشي وتعال لي بالزي القومي !!ولاواحد من القبايل النيلية جا بالاوو اقوليه وين القومي ياقومي ولاأبوفاطنة والسربادوق أودي وين ؟؟؟؟
دبل كلهم لو اللبس النظيف ومهندم بمش على اتخن تخين حتى لو أناولا في اتخن منا ياجماعة الخير ؟؟ياوهم ديل ناس عايشين على الماضي وهو الماضي ما كان العصر الذهبي كان بداية النهضة ولكن واه من لكن قبل ما ننهض وننطلق للوثبة ،، نقف ثابت مكانك ونجتر الذكريات ..ياخوي عاين حولك نخنا الوحيدين الفي الخليج البتضبع مننا الفرص وبياخدوها الناس القبافة الشيك وما عندهم نص الشهادات العندك صاح ؟؟طيب وقت صاح فاتح خشمك وواقف قدامي ليه ؟؟ نتكلم عن الأزياء والتحول في المداخلة الجاية في ناس عايز ارد عليهم منكن ؟؟
| |
|
|
|
|
|
|
|
|
|
Re: القانوني العنقالي (Re: محمد سنى دفع الله)
|
| Quote: طيب وقت صاح فاتح خشمك وواقف قدامي ليه |
إنت زعلت ولا شنو يا دكتور ؟؟؟
بونا ملوال ( السني معليش , خليني شويه كدة أسرح ) .. بونا ملوال لمن كان سفيرنا في بريطانيا أيام نميري , قامو قالو الملكة عاملة حفلة للدبلوماسيين كلهم , و الحضور بـ ( الزي الوطني ) للبلد . دكتور بونا وصل للقصر مكان الحفل في عربية السفارة السودانية و العلم يرفرف فيها , فتحوا ليهو الباب , نزل لابس بدلة كاملة آخر موديل و أنيق أناقة لوردات . لجنة الإستقبال و قفتو في المدخل بلباقة انقليزية باردة : سيدي , عفوا .. أأنت السفير السوداني ( ده باللنقليزي طبعا ) .. دكتور بونا قال ليهم : يس ( يعني نعم باللنقليزي .. مش يس يعني ياسين ) . حسنا, سيدي لا يمكنك الدخول و تحية الملكة إلا بالزي الوطني .. معذرة . دكتور بونا طوالي قلع الجاكيت و قال للخواجه : أمسك . الخواجه مسك , ابتدى الدكتور يفتح زراير القميص , و خشم الخواجة انفتح . قلع دكتور بونا القميص و قال للخواجه : هاك , الخواجه هكك ( على وزن مسك ) ولسه الخواجة يزيد إنفتاحا . دكتور بونا فك الحزام بتاع البنطلون و الخواجة فك القميص و الجاكيت وقعوا في الأرض , الخواجة صرخ : سير !!!!! ( سير يعني سيدي باللنقليزي يا سني .. قرض على كده ) بونا ملوال قال ليهو : سير بتاع شنو ؟؟ .. دايرين الزي الوطني ياهو .. بملص ليكم عريان . نحنا دينكا , قبيلة محاربين من قبل جليد القطب الشمالي يخلي بريطانيا و يزح شمالا . وما عندنا إلا الكوكاب و الدرقة و جلد نغطي بيهو مفاتتنا و نتجمل باللون و السكسك و الخرز .. و الباقي عريان . لسه دايرني أخش بـ ( الزي الوطني ) ؟؟؟ ..
قال ليك الخواجه رقد رز .. وطوالي كبر اللفه .
وفي الحفلة ديك ..
بونا ملوال كان ( أطول ) زول .
خلاص خلصت .. يللا قول إنت .
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الاستاذ محمد السنى اسف بس انتا عارف وانا عارف وكلنا عارفين وانتا سيد العارفين بان الجمال فى بلادى مقتول مقتول بالقانون وسلطة الدولة والمسكوت عنة كثير
اتقالت من قبل مكان السجن مستشفى والطلقة عصفورة تحلق حول نافورة ..الخ اتغشينا ساكت كان نغنى غنى ابعد من كدة امكن كان يجيب نتيجة
الجماعة ديل واقصد جماعة الحكم والفهم القاعدين فى قصور وبساتين بلادى والمفروض تكون قصور للثقافة والفكر ديل بقتلوا كل احم جميلة فما بالك بمعالجة شاملة وياخى الغريبة انو الدولة بتخرج فنانين كل سنة شى فنون جميلة وشى مسرح وشى تصميم وديكور ..الخ بس الانسان فى. لكن العمل ممنوع؟ والله ممنوع تقول تشجر بيتكم بجيك ضريبة كان ما من الضرايب من طابور الدفاتر والتحصيل الحكومى دى حكاية طويلة مدينة مدنى اخصب بقعة سودانية قارن بين الامس واليوم تجد هذة المدينة اشبة ببيوت الاشباح الان من ما كانت علية فقط هو الاستهداف وعدم التوازن فى الصرف والتنمية البشرية والعمرانية بس لكن الصرف للسفسفة والرمرمة والكلام الفارغ حدث ولا حرج
جدنا كركساوى حكى انو الخرطوم دى زمان كانت حاجة تانية الشوارع كلها مزروعة وكل شارع مسما باسمو وكل بيت مرقم وعندو عنوان والعندو بهائم ربنا يزيدو كان لازم يوديها الزريبة زريبة البهائم من الصباح عشان ما تحوم ساكت فى الشوارع وتاكل الشجر والمساء يطلقوها وكان الناس زارعا المنقة والجوافة والليمون فى البيوت والشوارع كانت الدنيا بخير يا اولادى بس ياجدى الحاصل هسة هو العكس الناس هى البودوها الزريبة من الصباح والبهائم هى الحايمة فى الشوارع والعندوا زراعة زاربا ومحوشةمن البشر عشان قعاد الضللة
تخيل ياستاذ السنى الاطفال بيجرو جرى من المدرسة الى البيوت عند سماع الجرس عشان الواحد فيهم عطشان وما لاقيى ليهو شوية موية باردة وانا بتكلم عن اولاد بلدى البسطاء
الجلد بالسوط بدل الفهم والتربية بالذوق التشوية بيبدا من المدرسة وفاقد الشى لا يعطية
سوال اخير عاوز عشرة فانين فقط الدولة معيناهم ضمن موسسات تجميل المدن وعاوز عشرة اقسام من هذة الموسسات موجودة ونشطة حقيقة عاوز عشرة مشاتل تتبع للدولة فى عشرة مدن سودانية تباع فيها الشتلة بفهم تاكيد الجمال ونشر ثقافة التشجير
عاوز عشرة تماثيل او عشرة جداريات تمثل رموز بلادى عاوزين حارة واحدة فقط تم ترقيم جميع شوارعا طولا وعرطا وترقيم كل المنازل والبنايات التى توجد بها حتى يصل اليها بريد من كتم او جوبا او مدنى او الخرطوم نفسها
وياستاذ سنى انا عارف كلامى زهج بس احنا لسة بنوصف لبعض شفتاشجرة النيم الجمب الدكان بس البيت التالت منو على اليمن بابو ازرق تلاتة ضلف
على العموم انا زارع حديقة جبم بيتناوكاتب رقم بيتا وبيتنا بتوصف من الظلطين لانوا ناصية وظاهر استاذ السنى يديك العافية
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: النسر)
|
النسر المحلق للشمس
تابع احلامك وأحلم وأحلم
اتمنى ان يتحقق الفحلم في يوم من الأيام
انك بتحس بالغلابا ده المهم ، كلما فكرنا في كل الناس نجد الحلول
والمهم نحن بدينا الحلم في مشروع خير ويدك معانا
ولك الشكر ايها النسر المحلق للشمس
ومشروع حلمك ابوعشرة فنانين وعشرة تماثيل وعشرةحدائق جميلة
لابد من تحقيقه شنو الصعب فيهو ؟؟؟
الكلية مليانة تماثيل ما عارفة توديها وين
في اكتر من المهندسين الزراعيين
نعمل حدائق ونشجر الشوارع
يلا نعمل شاركنا الحلم
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
أستاذنا الجميل السنى
لك التحية
وصدق الشاعر حينما قال
والذى نفسه بغير جمال *** لا يرى فى الوجود شيئا جميلا
حقا يمكن ان نجمل حياتنا واحياءنا وشوارعنا بالجهد القليل جدا
وان نجمل اسواقنا بما تيسر ( لو خلتنا البلدية )
وان نجمل انفسنا ولو بالكلمة الطيبة
وصحى يا سيدى
ليه ما نكون زى الخواجات جمالا ( مثلاً )
أو زى الاندلس روعة وحفاوة ( مثلا )
سوريا دولة فقيرة ولكن شوارع دمشق تغسل بالماء كل صباح
لماذا نحن فقط ؟؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: قرشـــو)
|
عمدتنا الرائع قرشو
موية شنو البنغسل بيها الشوارع يا مان دي مويه نغسل بيها الأثمال التي نرتديها ما لا قينها وديل عبو المويه كلها في قزايز وباقي ليهم يعبو الهواء زاتو ، يا معلم المويه قاطعه وإلا تعمل ليك طلمبة شفط عشان تجر بيها الموية وتعطش باقي الحلة والما عندو قروش يموت كنكوش أو كنتوش ، تصور يا قرشو من الصناعات الرائجة صناعة خزانات المياه ناس فايبرجلاس وكده.
اي إنسان فيهو شئ من الجمال وممكن يشوف ويحسن من البيئة التي حوله ويصنع منها بيئة أكثر جمالا لكين لمن الإنسان يصاب بمرض خطير زي التلوث البصري حا يرتد إليه البصر خاسئاً وهو حسير أى حاجة في السودان تدعو للحسرة حتى شجر شارع النيل كنكش ويبس ومات ، البلد فلم كبير والسيناريو واحد ناس شابت من الهم والغبار والكتاحة والحر وناس لايصه وما عارفه دايره شنو وماشه وين أو شايته على وين ناس بتفكر في بكره وناس ما عندها أى ملامح لا بكره لا أمس لا اليوم ، الجمال ما مبني الإمباير ستيت ولا برج العرب ولا غيرهاعلى سبيل المثال الجمال ممكن يكون قطية مرتبه أو بيت طين متواضع منظم مرتب مسور بأشجار يعني حاجة بسيطة ممكن تغير حتى مزاج البشر.
تقوم من الصباح تندفس ليك مع كم وعشرين نفر في صندوق حديد يسمى زندقة بالحافلة الناس كلها مهمومة الوجه كالحة والتراب يجيك من جميع الجهات والحافلة أكثر إتساخا من الكمساري ورائحته الكريهة وفظاظة السائق وسولكه العدائي في الشارع والزحام الغير مبرر بسبب أرتال العربات التي تملأ الأفق والشوارع المتواضعة التي تفتقر للتخطيط والتحديث والصيانة حتى ، القذارة تملأ الدنيا وتزكم الأنوف حتى يخيل ليك أن براميل القمامة مخزومة فعندما يتم رفعها إلى عربات النظافة ترتفع عاليا في الهواء غير أن الزبالة تبقي في مكانها ، عمال النظافة يفعلون بالجو ما لم تفعله خيل عنتره وأمرؤ القيس في زمان غير زماننا هذا وفي كرهم وفرهم بإثارتها للغبار
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
المبدع محمد السني دفع الله
حكاية تمرق بالبيجامه دي عادي وحكاية تتسوك في الشارع قدام بيتكم وبي فنيله عضلاتيه برضو بقت عادي على الأقل الناس تعرف إنك صاحي من النوم وإنك بتتسوك وإنو عندك فرشاة أسنان وفي بيتكم معجون أسنان سيجنال 2 وتمارس عزفك المنفرد في الشارع ، وأنا بقترح زي ما كان بيتكبو ممنوع الـ ... يا حمار برضو يكتبو ممنوع السواك في الشارع يا حمار يا أبن الحمار يا سليل قبيلة الحمير التي ينتهي نسبها إلى حمير بكسر الحاء وتسكين الميم وتشديد الياء حد القطم. يعني إتخيل تصطبح بمنظر زي ده من أول اليوم باقي اليوم يكون كيف.
السني المفروض منظر شارع محفر وكتاحتو قايمه والحفر الفيهو مليانه مويات غسيل عدة وغسيل هدوم كان في البيت أو المكوجي وغسيل بشر بما يفيض ويسيل من البالوعات يتم محاكمة جميع سكانه لأنهم بذلك يتسببون في أذي أنفسهم قبل أذي الآخرين.
تعرف يا السني مرة كده فكرت أرفع دعوي ضد المجلس البلدي لحلتنا والسبب إنو بيتنا في الصيف بتجيهو ريحة إسطبلات حصين السواري والإشلاق والريحة الأولى أخير من التانية لأسباب ، ومن الأسباب أيضاً التي أردت أن أدعم بها شكوتي هو صوت القطر the train كل ما يقرب من حلتنا يقوم يصفر وأنا ما عارف الوهم ده منو الكتب ليهو صفر وهو كمان العوير ما يصدق يصفر ، وبرضو ريحة المصانع حدث ولا حرج ، والإزعاج العام الذي يمارسه الباعة الجائلون في وقت تكون فيهو درجة الحرارة حاجة وأربعين درجة في الضل ، ناقشت المسألة دي مع أخونا مونج وهو رجل هادئ ورزين ويقيس الأمور بواقعية ، قال لي حا تشتكي منو لي منو ، قلت ليهو حا أشتكي الدفاع الشعبي في السوق الشعبي ، أنا من الصباح بأذن في مالطا ، قال لي ما تزعل وتنفعل ده سؤال إستفزازي إستنكاري لأنو شكوتك دي ما حا تجيب أى حاجة ولا في واحد بسمعك ولو واحد سمعك أو إتبرع فقط ليرد عليك حا يقول ليك إنت ساكن في حي شعبي وكان ما عجبك أرحل إلى الأحياء الراقية أو فلتصمت إلى الأبد.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
محمد السني دفع الله
البوست ده يا أخوي جبتو ليك والله من الصفحة التانيه ولو طنشت وعملت نايم عليك أمان الله في الويك إند تلقاهو في صفحة سته وتاني وداعيه ما تطلعو ليك ،أها يا أخوي أنا فترت عديل كده وده بوستك وإنت سيدو داير تحرسو علي كيفك داير تحضر كأس العالم كمان على كيفيك بس الأزيار القدام بيتكم دي شوف ليها أغطيه نحن والغنم بقينا نشرب سوا سوا الغنمايه ضانها طويله ومعطونه جوه الزير والله أنا قايل ملصين ليه فرده سفنجه مقاس حاجه وأربعين ناس 14 وما فوق
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
ايها الصديق السني الجميل
البؤس ليس فينا ياأخي
بل الجمال مسكون فينا
ولقد عمرنا وجملنا بلاد الخليج وغيرها
ولكن !!! أوافقك الرأى لماذا هذا البؤس الموجود في شوارعنا
وأسواقناومطاعمنا ومسارحنا وحدائقناوغيرها وغيرها ....
وحتى تلفزيوننا أصابه البؤس الشديد
هذا الجمال المسكون فينا
أما أن الأوان أن نطلق سراحه
لنجمل بلادنا لنباهي بها أوطان العالم
مع مودتي ..
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: عثمان سيد أحمد)
|
الجميل المبدع
محمد السني دفع الله
لك الود
عجبني الموضوع شديد ..الله يقطع الشنا محل ما تبقى
لكن
الجمال في البدايه ببدا من تالا
وتالا في بلد الغلابه المحزونين بقت موزعه على كثير:
عيشه
وغربه
ومرض
وموت
وجوع
وجهل
وحرابه
ووووووو...........!!!!!!!!
عارف
لانهم شينييييين من يوم ما ختوا كراعهم فيها وكانهم بقوا بشيلوا السمح ويزرعوا محله شجرة شنا ...
لو سالتني بعد سنين غربه طويله نفسي في شنو لما ارجع ...اقول ليك ...
من زمن زياره لينا واحنا في الابتدائي وانا عندي اعتقاد انو اجمل وانضف حته في الخرطوم كانت المتحف -التاريخ الطبيعي - شارع النيل !!!
بتمنى لحدي ما ارجع ما يكون باعوه..
تحياتي للجمال الفيك محمد السني ..
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
أخوي السمح ..
أذكر أنني و في عهد الديمقراطية الثالثة , و كنت أعمل حينها مخرجا صحفيا بجريدة الأيام كتبت فيها مقالا أسميته – أظن - : ( على من نطلق النار ؟؟ ) منتقدا فيه بشدة محافظة الخرطوم ( حينها ) لتصريحها ببناء مسجد داخل حرم كلية الطب و يطل من ناحية سورها الجنوبي على محطة السكك الحديدية في الخرطوم . و كان مثار اعتراضي ( ليس ضد المساجد و الإسلام كما قيل ) ولكنه مبنيا على فكرة أن تصميم البناء أولا ومن الناحية الهندسية ينتمي إلى المدرسة الحديثة في فن العمارة , من حيث شكل قبته و المئذنة و كافة تفاصيل التصميم – و مازال المسجد قائما – ثم أنه يقع تماما غرب القبة الشهيرة لكلية الطب و التي تشكل توأما مع نظيرتها الشرقية المواجهة لها – قبة معمل لي ستاك أو مستشفى الذرة - و يفصلهما شارع القصر جنوب و يتوسط المسافة بينهما تماما و بأمتار قليلة جنوبا و في مواجهة بوابة محطة السكك الحديدية العتيقة , يتوسط تلك السيمفونية المعمارية نصب الجندي المجهول ( علمت أنهم هدموه .. أصدقاؤنا طرزانات الحيكومة ) .
وحيث أن القبتين و النصب التذكاري و البوابة العتيقة كلها تحمل الطراز الفيكتوري في التصميم و نوعية المواد التي بنيت بها , فإن وجود ذلك البناء ( المسجد ) من شأنه أن يدمر تماما الفكرة الجمالية العبقرية و النسق الهندسي الفريد الذي كان ينتظم تلك المنطقة قبل أن يتغول عليها ( عنقالة الحيكومة ) . و أن ذلك البناء الحديث يقع ( كع ) في العين حين يقرأ بصرك تلك اللوحة . و أجاز رئيس التحرير الأستاذ محجوب محمد صالح المقال و طبع .
في صبيحة اليوم الذي نشر فيه المقال , طلب مني سكرتير التحرير حينها العزيز محمد لطيف أن ( أتضاير ) لأني زعلت الكيزان و كتبوا كلام فاضي و اتصلوا قالوا كلام أفضى – أشبه بالتهديد –
الحمدلله ناس الحيكومة دي ساطوها تمااااام .. يعني المنطقة ديك بقت لحمة راس . ولا في فيكتوري ولا دافوري ولا يحزنون .. بالتالي طبعا كلام المسغفاتية بتاع الجمال و الهارموني و اللاندسكيبينق و الإيقاع .. كله انتفى , تاني الزعل في شنو ؟؟ كده عملوا هم الهارموني بتاعهم برااااااهم ( عيني باردة ) .
و أي زول عندو كلام ملولو يبلو و يشرب مويتو .. حاضر ؟؟
في مشكلة ؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: Emad Abdulla)
|
[أخوي الأسمح
هو انت الكتبت المقال داك اذكر ونحن صغار قريت المقال وكنا طلبة في المعهد
طبعا كنت صغير لكن ولد عبقري
المهم في الموضوع والشاهد في الأمر انو كلامك وقع لي في جرح عديل
عارف جا زمن كده وقعوا ليك في التماثيل كسير ، عندنا ممر في فرقة الفنون الشعبية السودانية للرقص عدد من التماثيل التي ترمز لألعاب الشفع والرقصات المشهورة
عليك الله سألنا الصباح بعد مالقيناها مرمية على وشها العمل كده منو قالوا لينا ديل ناس الديش ..قلت ليهم ناس الديش ديل قاعدين ومروا عليهم 3حيكومات دياشة و3 حيكومات حزابة على وزن عزابةلأنوماحصل زواج بين الديمو وقوراطية..وما عملو جنس ده!!وناس الديش ديل ما بعرفوا الجندي المجهول قيمتو شنو ؟؟؟الجندي الذي اتصف بالشجاعة والقيافة والشياكة منجنود كوش رماة الحدق ، عليك الله ما تكيفت من الحدق دي؟؟والجندي الذي حارب المستعمر والكتيبة المكسيكية والحاربوا في كرن وكوريا وغنينا ليهم أحمل غنى والحاربو في الحرب العالميةودافعوا عن البلد دي عشان تكون وطن واحد ديل كلهم البمثلوا العسكرية الوطنية الشريفة ما بستحقوا هنبول ؟؟؟
ياخي انا كان بملاني الفخار لمن اشوف الجندي الرسوم على الرخام الرماي في اسفل النصب التذكاري وان لافي الصينيةجاي من على الديم وماشي للمعهد والصور قدامي زي الفيلم السينمائي
انا بحي كل الهندسوا سوق واقف وأعادوا له مجده القديم في الدوحة طلع قانون اي واحد عايز ابني حول سوق واقف عليه الحفاظ على الطابع المعماري وقد كان شوف الروعة وكل السوق اتخذشكل موحدوجميل تقولي احافظوا على الشكل الفيكتوري ديل جابوا الشكل الفكفكوني نحن الأن نريد حلا ؟
دعونا من اجترار الحنين والتباكي على الماضي القريب نريد حلا ؟؟؟؟؟؟؟؟؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
تعرف يا السنى بوستك دا من بسم الله لى آمين بى نفس واحد زى قعدة المسلسل بوست جميل أقترح تضمينه فى مناهج التربيه والتعليم وكل المجالس من مجلس الوزراء ومجالس البلديات ومجالس البوليس ومجالس العنقاله... أى زول لازم يعرف كيف يظهر بأحسن مظهر وأقترح تعيين فنان فى كل شارع فى كل حى عشان يهذب ويشذب الناس إلى ان يصير الأمر عادى زى الونسه....................
يالسنى والله البوست دا مفروض تهديه لولاة ولايات السودان
منصور
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
الفنان المبدع محمد السني دفع الله
شكراً على التسمية الجديدة ألمو ، بس بصراحة طلعتني من جبال تورا بورا إلى الهضبة الأثيوبية فألمو هو إسم الدلع لألم ويمكن أن يكون ألمي وبعد أن كنت من الأفغان العرب بحكم التسمية أصبحت من الجكس الحبشي الشارب موية النيل الأزرق بحكم التسمية الجديدة أيضاًَ.
السني خليني أتمنى ، يعني أتمنى تكوين هيئة من فنانين بمختلف تخصصاتهم تعنى بشئون تجميل العاصمة القومية - كخطوة أولي – تزيل كل تلك التشوهات والفوضي التي تغطي العاصمة وشوارعها ومحلاتها التجارية وحتى وسائل المواصلات فيها ، يمشوا دكان دكان ويعاينو لي اليافطه والرفوف وطريقة العرض ولون المنقا – عفواً – لون بوهية الأبواب والجدران وحتى هدوم البياع في المحل ويمشوا لي ناس الحافلات يفتشوها تفتيش شديد يعاينو المقاعد والمسامير الطالعة منها ويلغوا حاجة إسمها مقعد النص نهائي يا أخي قبل ما تأخذ نفسك يلكزك واحد يقول ليك نازلين يا أبن العم أو أفتح للنازل يا شاب المهم لمن تصل بيتكم يجيك تمزق عضلي من القومه والقعدة ، بس فحص المركبات العامة يجب أن تشرف عليه جهة لا علاقة لها بناس الحركة وكثرة الرشاوي يعني يقولو للأعور أعور في عينو حتى لو تتعور ويبقي أعمي. ويفهموا ناس الحافلات إنو مهمتهم نقل البشر بين القري والحضر وداخل المدن وأن هكذا مهمة تتطلب منهم إحترام الذوق العام والآداب العامة وما يشغلوا لينا شريط فنان من الله خلقنا ما سمعنا بيهو إلا في الحافلة.
وبرضو يا السني بتمني إنو نعيد تجميل الشوارع بنظافتها وردم الحفر الفيها وزراعة الأشجار على جانبيها ، كمان أى فسحه إحتلوها ناس اللجان الشعبية الحرامية من الفسحات التي خطط لها أن تكون متنفساً لسكان الحي أن يتم هدم المباني المقامة عليها حتى لو جامع وإزالتها ويتم عمل حديقة بدلاً من تلك الكتل الأسمنتيه إنتو قايلين الصيف عندنا 12 شهر في السنة ليه كدي واحد فيكم يركب ليهو طياره ويطير فوق أجواء العاصمة ويتف سفتو من فوق والله لو ما وقعت ليها فيها بيت ناس من شدة زحمة البيوت يكون أكبر محفظوظ وأحرف واحد في تف السفه.
وخلينا نبداها من بيوتنا يا السني عندنا باب بيت من الصباح قمت عليهو بي ليفه حبل وجردل موية وصابون وخليتو ليك يضوي الباب ده ما ما ركبوه ما ضاق مويه إلا في الخريف ، وطبعاً الناس الماشه وجايه في الشارع يعلقوا بين السر والجهر ده فايق ده ما عندو شغله ده مجنون وده عاطل ده مسطول ده ..... يا جماعه الواحد شايل دقنو وحايم بينها – بالمناسبه أنا ما عندي دقن ولا لحيه ذاتو – إنتو حارقكم وين ووجعكم شنو.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
اتمنى ياآلمو
والله تستاهل الأسم بدون ألم المو بشبه رقتك وشفتنتك وجمالك طالما ماعندك لحية وعلى فكرة الدقن براهل واللحية دي حاجة تاني خلاص ..
هناك العديد من المحاولات قام بها نفر كريم من المحافظين ورؤساء البلديات على مر الزمن
ولكن كترة العنقالى وهروب الناس القيافى جاط الساحة وخلاها دافوري زي ماقال العمدة
المواقف وكرسي النص والبكاسي والأمجاد وتجميل الشوارع !!!!! اااااااااااااااخ
يآلمو لوكل واحد زرع شجرة قدام بابوونظف قدام الحوش ماتبقى النظافة من عيد لي عيد!!
بحصل شنو؟؟
والســـــــــــــــــــــــــــــــــــــــفة
وانت ســــــــــــــــــــــــــــــــــــــــــــافي ليه من الأول
كورهتي في الدنيا لمن واحد سافي اتف ليك السفة في المزهرية هنا بركبني 70 عفريت ليه بقولو 60 عفريتاهو انا زيدتهم ليكم
عايزين الحل ؟؟؟؟؟؟؟؟؟؟؟؟؟
اتمنى وجيب الحل معاك وتعال ياحلى آلموووووووووووووووووووووووو
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
أنا بفتكر نحنا كسودانيين نفتقر إلى ثقافة العمل الطوعي الخيري كان زمان مسألة النفير وهي بالضرورة تشبه العمل الطوعي غير أنها ربما تكون من منطق scratch my back I scratch yours لأنو المزارع على سبيل المثال البشتل معاك البصل أو البطاطس في يوم زراعتك بتوقع رد الدين في يوم زراعتو ، المهم مافي الحافز الذاتي البخليك تشيل الكوريك وتردم ليك حفرة في نص الشارع أو تخم الوساخه بدل ما تزحها على بيت ناس فلان أو ترش موية البلاعة في الشارع بدل ما تخليها تسيل لأنو بيتكم ناصية وما بتستخدمو الباب الفي إتجاه البلاعة.
الزراعة حاجة تبهج وتبعث الجمال والروح في النفس وتنشط مراكز الجمال والإبداع وتخليك تحس بي عظمة الخالق ، السودان بلد فيها نيل حدادي مداداي وفيها مياه جوفيه وفيها مناخات جغرافية متعددة يعني ثروات وبيئات يحسدنا عليها الصديق قبل العدو ومع ذلك نحن لا نعرف حتي كيف نتعامل معها أو نستفيد منها فالناظر إلى طرقاتها يستشف الغبار والوساخة لا إخضرار ولا يحزنون بلد كان من المفترض أن تكون تحفة بل آية من الجمال تغطيها الخضرة والحدائق وتتنوع ألوان أزهارها ، والله يا السني يا أخوي الخدره حتى في الملاح بقت مسيخه ، والمسألة ما عاوزه ليها أمكانيات ولا يحزنون شوية همة وبس.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
استاذنا الجميل
محمد السني دفع الله
عاشقالورد، غالبا ماتجده يحمل
ورده ، يفرحنى انه ما زال عاشقاالورد
وراعي الجمال ، تعرف استاذ السني اتخيلك
وانتقيك كمسؤول لحزب البيئة والسلام لانه
يشبهك ولان الجمال فيك طبع وعشق
الجمال فيك طبيعي مثلك هو من يجب ان يرعي
الجمال ويؤسس قيم الاخضر وثقافة النقاء
أخطبك لحزبنا ومن غيرنايعطي لهذا الشعب
أن يعيش وينتصر على القبح والشر
وتسلم
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
قبل مؤتمر القمة الاول والاخير في الخرطوم ، تم تلميع الشوارع وتنضيفها وعمل الارصفة واقاموا كورنيش للنيل (المسكين الماري ليهو زي خرطومية سنة ضوئية) ..ولمعوا الخرطوم زي البيت ليلة العيد .. واخلوا وسط الخرطوم من الشماسة تماما ..
وبعد ذلك عادت حليمة لعادتها القديمة .. فقط بقي الكورنيش والحدائق العامة جميلة واتمنى ان تدوم..
اتذكر دايما يوم المفتشين يكونوا جايين زيارة المدرسة .. الدنيا كلها تقيف لنضافة المدرسة وتلمعيها زي المرايا.. حتى السبورة يتم تلميعها جيدا ، والطبشير من النوع الملون ، مع الكتابة على السبورة بطريقة جميلة جدا بالالوان و باستخدام المسطرة ، والممعلمة تكون بتتكلم بصوت هاديء ورايق .. اشياء كنا لا نراها الا في السنة مرتين عند زيارة المفتشين فقط ..
تخريمة:
| Quote: ياخوي المتحف حتى الان جميل ونضيف لانو المسكوه معظم حلقاويين والحلفاويين معروفيين بالنظافة بحلوجو البيت عديل وبتمروا |
تشكر يا استاذ السني ، دي نقيف ليها احترام
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
شفت الثنائية دي كيف
عندنا بحرين ونيلين وزعيمين
وريسين وهلال ومريخ
وعلمين
وماعارفين نزرع بلدنا شتلتين
الواحد لو زرع شجرة قدام كل بيت قول شتجرتين
وغسل الباب زي ما غسلت بابك
ونضفنا السهلة وحرقنا الأوراق الفي الخور وكل الوسخ البتطاير مع أكياس النايلون
باقي ليك مابتحول حالنا ونكون أسحن ؟؟؟؟؟
أكياس النايلون !!!!!!!
القفة ماله ؟؟ مأأجملة، وبعدين من المواد البئية وبتنفع النسوان الحرفة البعملوها ، وبتتغسل
ويتشيل كمية كبيرة وأورجنال
شنو حكاية الأكياس ؟؟؟؟؟؟؟
لعن الله الأكياس حاملها وشاريها وجادعها والمطيرة عشان ترك في الأسلاك الشائكة والشجر المثمر بلاستيك ملون
الرحمة يا بلديات تعبنا من التمكين شوفوا لينا التنفيذ
نفذوا ما هو مطلوب منكم وراعوا صحة البئية
الرحـــــــــــــــــــــــــــــــمــــــــــــــــــــــــــــــــــــــة
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
محمد سني دفع الله
جيرانا زعلان منهم زعل شديد ، عندهم شوية قروش محرقة روحهم الله يزدهم ويبارك ليهم إشترو يوم الخميس بالليل خروف ستة شنكل وربطوهو في حوشهم في الحيطة الفاصلة بيني ما بينهم أها الخروف الليل كلو يكورك ياع باع باع لمن قربت أقول ليهو يا أخ ما يبيع ولا يشتري ما لنا ومال الكلام ده خلينا ننوم ، أها بالله بس الشمس قربت تطلع أولاد الجيران صحو من النوم وجري على الخروف وضحك وضرب ما حلاهم منو إلا الجزار ، والجزار في نص الشارع أو قارعة الطريق يقوم يشمر ليك أكمام عراقي لونو ولون الخروف واحد المهم ضبح ليك الكابتن وسال الدم بأرض الشارع وبعدها يقوم يعلق ليك الخروف في الباب بقي زي بتاعين الجمباز في رياضة المتوازي أها وهاك يا سلخ .. هاك يا سلخ جيب كل ضبانك تعال جيب المحن ، المهم ثورة ضبان وريحة فرت وكمية بتاعة دماء وكلو في الشارع والجزار يقوم بعد ده كلو يغسل أدواته ويلحس الجلد ويقبض التمن ويشيل ليهو شوية لحمة في الجلد في غفلة من صاحب الخروف ويتف ليهو سفه مااااكنه في عتبة باب بيتنا ، وبعد ده كلو سيد الخروف جارنا العزيز يقول كيف أخبارك وما يعزمني أو يمد لي كوم حتى تخيلو ا ، ومن يومها حلفت بالطلاق والزواج في آن واحد إنو جاري ده تاني كان عطس ما أشمته شمتو قرنتيه إن شاء الله
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
السنى الجميل اول حاجة العزاء موصول فى احد قاماتنا المسرحية والفنية الفنانة حياة حسين ، توفيت امس وقبلها رحل الجميل هاشم ميرغنى والان ترحل غابة ام بارونة وحزام الابيض الواقى ، وكذا الحزام الاخضر واختفى عيد الشجرة من الابيض ، والحدائق اصبحت جدباء يا سنى حديقة الحيوان فى عداد الغيب ، ليس من مكان تنظر اليه الا واعتراه القبح ، حتى قصر الشباب ال الى قبح وماذا اقول ايها الذى اجترح علينا الحزب الجمالى ذات يوم جميل ،حزينة لما اعترى بلادنا من قبح،حتى الناس لم يعودوا كما الفناهم اقرب الاقربين للاسف يا سنى ، المهم اننى كنت فى بلاد لم تزل جميلة فلقد وقفت على بلاد ما زال اهلها من الجمال بمكان انت تزورهم فيقف شعر راسك من كرمهم ونبلهم يا لهم يا سنى من بشر جميل ولكنه بلد تعيس
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
حبيبنا الشفيف السني
مفارقات ..
النيمة .. التي كانت مرتع للونسة والمثقافة الشفاهية التي لا تخلو من قراءة جريدة أو مجلة أو استلاف كتاب .. وأو استنباط استكتش .. من وحي حركة الشارع .. حتى لحظة صحن ملاح من هنا وآخر من هناك .. ثم كدارتي وكدارتك .. وضرب الشربات على الساق لنفض الطين العالق .. والمشي التمرين أو الدافوري
اختفاء القعاد تحت النيمة .. كشة الالزامية
مدعاة لعدم الاهتمام بالنيمة .. موت الكلورفيل
في أسس علم الجمال الماركسي اللينيني الجمال = الحركة
والحركة= التواصل مع أماكن الابداع
أماكن الابداع + تجمع = مرتع جيد للكشة
أماكن الابداع - تجمع = عدم كشة( موت إبداع )
والنيمة العطشانه الفاضية من قاعد أولاد الحلة = عدم كشة
تموت النيمة الواقفة قبالة باب البيت عشان في الإجازة ما بتترشة
الانهيار يا صديقي لا يبدأ من قمة المبنى فقط
يموت الخضار تنزرع محنة
وودي
ياسر حامد
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
فكرة الترتوار أو الإطار حول النجيلة بالطوب الأحمر كانت فكرة بسيطة بس جميلة لأنو فيها الكثير من الفن والإبداع والجمال وبتدي المكان لمسة جمال غير عادية.
الفنان في النهاية يا جماعة لازم يؤمن برسالتو وبعد كده يخلص فيها عشان يبدع وينتج ليك عمل ينبض بالحياة.
السودان عاوز رئيس فنان وطباخ فنان ووزير فنان وطبيب فنان ومعلم فنان ومطرب فنان ومسرحي فنان وكاتب فنان وشاعر فنان وديل موجودين بس لو لقوا الفرصة أكيد حا يكون شكل السودان غير.
بعدين يا السني إنت رجل فنان رأيك شنو في ناس المسرح ما مقصرين يعني دورهم وين مش المسرح أبو الفنون بل هو الضوء الذي ينير للناس الطريق، يعني ببساطه ممكن أقتنع بأن أكنس وأنظف قدام بيتنا من توجيه مسرحي أو إسكتش زي ما بقول بدر الدين شنا وممكن ما أدفق موية البلاعة في الشارع وممكن أزرع شجرة وممكن أكافح وأحارب الملاريا وممكن تتغير حاجات وعادات وتقاليد كتيرة في المجتمع مش من أجل التغيير بل للأحسن والمسرح ما لازم يكون المسرح القومي بأمدرمان دار عرض ممكن يكون مسرح مدرسي مسرح في حي أو في نادي أو أى فسحه المهم النص والهدف
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
كان الوقت جميل والدنيا عصر ونحن شايلين المدونة وندون فيها الطقس وانواع الأكل واتجاه الرياح ..
كانوا رابطننا مع البئية والمجتمع هسي المدارس احدث وما مربوطين الا مع القرش والجري والشوف لي جوة ذواتنا الأطفال بقوا كوم بتاع انانية
وقلة أدب لو قلتليه قش ارد عليك انا خدام ابوك
في المدارس كنا نلعب الكورة بي فنايل دمورية فريق له شريط أحمر والتاني شريط أزرق وكنا حرفا
الأن الفنايل مالية البلد والموهبة ما معروفة
وكنا بنقش الفصول وبنعرف قيمة النضافة !!
شنو القيم السائدة ؟؟؟؟
عايزين نعمل نداء ســــــــــامعني يالمولا عمر
انا فكرت وتوصلت لعمل وطني يشارك فيه كل المجتمع والفن والثقافة يعني حضر حالك
المــــــــــــــــــــــشـــــــــــــــروع
الأغــــــــــصــــــــــــان الـخــــــــــــضـــراء[/GREEN]
حملة من أجل الجمال
ايه رايك مولا عمر
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: Yassir Hamid)
|
بحري الجميلة
شفت يا ود حامد خليفة شارع النص بتاع السوق ، ما بتعرفو يا جبان الشارع الذي يبدأ من بيت ناس صروجه البشق كمبوديا "ديوم بحري" أيوه كده خلي ذاكرتك ترللي ، المهم الشارع ده كان بعد الخور الكبير في إتجاه السوق يعني من الشمال إلى الجنوب فيهو شجر نيم ضلها في الصباح يصل لغاية ميدان عقرب وفي العصر يصل الختميه وشارع المعونه نفسو وحلة حمد وحلة خوجلي وحلة الميري والوابورات وشاعر أحمد بن أحمد الأسود فالفي كرش الفيل الذي يمر بخلوة الفكي صالح يا أخي كانت كمية بتاعت أشجار وظلال لمن غلط ده غير الأشجار التي يتم زراعتها أمام المنازل لكين شوف الوضع الآن صحراء جرداء.
كان في أسبوع شجرة يا ودحامد وكان في شتول توزع بالمجان وكان في تحفيز لزراعة الشجرة لكين للأسف أصبحت دي في توجهنا الحضاري المزعوم من الموبقات فشجرة شنو بدل الشجرة نعمل عمارة للتمليك وتشطيب ديلوكس والبيع بالتقسيط وحتى غابة السنط إنتحرت أو في سبيلها للإنتحار يا أخي الأسد في جنيجة الحيوانات قبل أن تفرتق ملك الغابة عملو ليهو متعهد ، المتعهد يلحس نص اللحمة ويدي الأسد كسره بي مويه لغاية ما جاتو أنيميا حادة ومات في الأسر بالكسره والكسره البايته كمان.
ما في أى means of entertainments في السودان حتى دور السينمات ما فيها جديد ده إذا قدرت تستحمل الروائح الكريهة والتي تكونت بفعل التبول الإرادي واللا إرادي للبشر وبخاصة رواد السينمات ، فقد أبتت تلك التلال من القاذورات أن السوائل يمكن أن تتراكم وتكون جبالاً لا كما هو معروف لديكم كونها تحفر وتجرف لتكون خيرانا وجداولاً. يعني ما في سينما ما في حفلات لا عامة لا خاصة ما في حدائق ما في حرية ما في أى حاجة تطلع من بيتكم عشان تاني ترجع وتدخل بيتكم.
الغربية كل تلك الأطلال وما تبقي من جمال هو قبل كل تلك السنوات العجاف من محاولات العسس و إدعائهم محاولات إنقاذنا تخيل..
المستشفي المفروض مكان يداوي ويطبب المرضي ، عندنا إذا دخلت المستفي لابد أن تخرج وخروجك يكون لأحد أمرين إما أن يكون في أسرتك شخص عاقل ويرفض تنويمك في هذا المسمى مشفى ومن ثم يأخذك للبيت أو أن تخرج خروجاً لا عودة بعده ولا خيرة لك أو لغيرك فيه. عنابر وغرف مرضي تثير الإشمئزاز ، هياكل عظيمة ترقد في أسرة تفتقر لأبسط معاني النظافة ، جدران حدث ولا حرج روائح كريهة وقطط تمارس هواية التنطيط في أى مكان ، رجال يبتاعون قناني وفتايل أدوية من الفراشات لإعادة تعبئتها بأرواح تستخدم في ما يطفحه البشر من مرطبات لا تراعي أبسط قواعد الصحة ، ذباب وبعض وكلاب وسحالي ، باعة وممرضات لا علاقة بينهم وبين الرحمة المزعومة والتي من المفترض أن تكون الواحدة منهن ملاك رحمة ، أطباء يحاولون جاهدين مجهدين إنقاذ ما يمكن إنقاذه.
يا جماعة الصالح العام أن تخضر الشوارع وتزدهر الحدائق وتعود كل تلك الفسحات التي إختطها الهندسة المعمارية سيرتها الأولى بعد أن تسلط عليها بناء مسجد أو روضة أطفال وبين المسجد والمسجد مسجد وبين الروضة والروضة روضه
أنا ومع شديد الأسف من أسرة تحترف الزراعة إلى زمان قريب فأنقرض جيل الزراع وأصبحت أراضينا جدباء بور بعد أن ضاقت علينا الأمور فهاجر من هاجر وتاجر من تاجر ولكن يبقى في القلب حب الماء والخضرة وكلاهما أينما وجدا أصبحت الوجوه حسنة ليكتمل الثالوث وننعم بجمال الحياة.
أخوك الملا عمر
عضو لجنة الأغصان الخضر المهاجرة
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
سونينا الباحث عن الجمال .. تحياتى لك وللمارين برواقك الجميل
نكتة :
قالوا فى واحد جا زيارة لاهلوا يعنى ( بلك ) النوع البتكل طوالى وبجرها بدل يوم اسبوع
المهم ( عنقالينا ) ده لشلاقتو قام لما الباب دقا مشى فتح الباب وكانوا جماعة ما يسمى
( النفايات ) فسالوه عندكم وسخ ؟
قام قال ليهم دقيقة بس ومشا سال ناس البيت جوة وجاهم راجع وقال ليهم قالوا ليكم اى فى
وسخ وقفل الباب
انتهى
زول خترى مش كده
ياربى ده يكون بوهيمى !!
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
قديمة مافي كلمة بتكون لازمة في الموسيقى
وبتكون قديمة
بعدين رمضان ده كان فلته
وبحري بتعني لي الكتير
ان كنت فيها من خلال بيت الشاعر والممثل
الدكتور عزالدين هلالي
ومن خلال بيته احببت بحري
وقتها بحري كانت هالة من النضافة وكان امام بيت هلالي
شجرتين نيم وزيرين نضاف طول العام وموية باردة ودعوات متواصلة
عايزين نزرع شجرة امام كل بيت
ده مستحيل ؟؟؟؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
تيتا
يابديع
كفاية مرورك وانا عارف انو ما عندك وقت خالص
لكن زولك عنقالي للطيش
عارف نحن بقينا ماشين
على نص عبثي مليان بالمفارقات والامعقولية
زي زولك العنقالي ده!!
البلد حتتملي وسخ العناكب حتنسج خيوطها على الناس والبيوت
والشوارع والشجر سوف يؤجر للسيمبر والرهو والحكاية تجوط
ونبقى طير في بلاد الخرتيت
مافي حل غير الأغصان الخضراء
جماعة من اجل الجمال والنماء
ايه رايك ؟؟؟؟؟
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد سنى دفع الله)
|
محمد السني دفع الله
أبشرك بدأت العمل في مشرو ع الأغصان الخضراء ، زرعت ستة أشجار وعملت أحواض صغيرة من جوالين البلاستيك الفاضية بتاعت زيت العربات وزيت الملاح وزرعت فيها ورد صباح الخير وشوية ياسمين وزرعت لبلاب في الراكوبة وظبطت ليك حمالات ازيار الشارع وعملت ليك فيهم شوالات نظام تبريد وكده وحكيت الأزيار بالطوبة لمن الزير قرب يبقى شفاف وبرضو جبت علبة نيدو وفورموست family size فاضيه طبعاً وزركشتها بباقي بوهية بقت حاجة رائعة وعملتها ماعون لي نقاع الزير ، أها باقي علينا سلة الزبالة دي لازم نقوم ننسج ليك فيها بي شوالات البلاستيك ونعمل منها منظر يعني حاجات بسيطة ممكن تعمل منها إبداع وأنا بصراحة أشكرك جزيل الشكر لأنك قدرت تصحي فينا حاجات جميلة وبسيطة وإن شاء الله حا أحرض جميع سكان الحي على ثورة الأغصان الخضراء وأى واحد ناشف يا يرحل يا يعتزل الناس لأنو من عاشر قوماً أربعين يوماً صار منهم أو فر منهم.
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: almulaomar)
|
و رد الصباح
والندى
والجمال المستتر جواك
وابهجتني حتى البكاء
يها المحرية فيك يالدخري
شوفت الحكاية بسيطة كيف ؟؟
وقت وموجود
وموية وعندنا بحري ونقاع الزير وموية المكيف
عارف ديل بسقو الزرع اصلو الزرع عايز موبة حبة
والراكوبة كلها شهر وتلقى زهور الأبلاب طالة بألألوان
والله حكاية ابسط من الواقع الجاب ليه اسهال مائي وشايف بزرزرو في وزبرة الصحة
والعلاج موجود
نظف بيتك
ونــفــســــك
وصفي الموية ولا سخنة
عسل اكلك
انت مش كان في حصة تدبير منزلي راحت وين؟؟؟؟؟
احبك يالمو
| |
|
|
|
|
|
|
|
|
|
Re: بؤس النموذج الجمالي ــــمن المســغف للعنـغــالـي ــــــ (Re: محمد أبوعاقلة الطريفي)
|
الصديق محمد السني دفع الله
التحايا والأشواق
أعجبني ما تطرحه هنا لزرع الجمال
وأعجبتني مبادرة أستاذنا الملا عمر في تزينه لما حول البيت عملا بأن توقد شمعة خير ألف مرة من أن تلعن الظلام .. الدعوة لكل الأحباء بتبني الفكرة وليوقد كل فرد في هذا البورد شمعة حتى ينداح الظلام
صادق الود والمحبة لك ولكل الجميلين المتداخلين في هذا البوست الرائع
عاطف
| |
|
|
|
|
|
|
| |
محمد سنى دفع الله
بدرالدين شنا
احمد العربي
أبوبكر حامد الأمين
almulaomar
عبدالكريم الامين احمد
بدر الدين الأمير
عبدالغني كرم الله بشير
Emad Abdulla
قرشـــو
عثمان سيد أحمد
Aymen Tabir
munswor almophtah
عشة بت فاطنة
سلمى الشيخ سلامة
عامر تيتاوى
محمد أبوعاقلة الطريفي
عاطف عبدالله
فيس بوك
تويتر
انستقرام
يوتيوب
بنتيريست