|
|
 Re: ـــــــــــ أمــــــــي ــــــــ (Re: محمد سنى دفع الله)
|
سلام يا أستاذ السنى
ياسنى أمك علم عالى من اعلام علم التوليد فى مستشفيات بلادى
سجل ناصع فى ذاك الحقل لها الدعوات الطيبات .....
ستونه وجه سعيد مبتسم. لقد علمت الاطفال الضحكة الاولى والفرح
سوف احكى لك عن ستونه امك السيرة العطرة
لقد اعطيناها اوسكار التفا نى والمحبة....
عثمان
| |
 
|
|
|
|
|
|
|
|
Re: ـــــــــــ أمــــــــي ــــــــ (Re: Osman Musa)
|
عثمان موسى
التحية والمحبة
شكرا على أوسكار المحبة
وربنا اديها الصحة وإزيل منها الجلطة التي المت بها
ست ستونه تنقلت بين مدن السودان وقراه وتنقلت بين الوظائف
الى ان نزلت المعاش وهي مفتشة التمريض والقابلات بولاية الجزيرة
وكانت رئيس جمعية محاربة العادات الضارة
وكانت فنانة ورسامةأثرت علينا خاصة سامية التي تعشق الديكور
وصلاح الدين الذي يعشق الرسم والسنوغرافيا
ود موسى اديك قدر أحلامك وفي كل خطوة نجاح
مودتي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
أمي
أب ديت المحنة
يابة يجبر خاترك
ويعليك فوق المابيك
وعافية منك وراضية عنك
دنيا وأخرى ياجمل شيلي
كانت آخر ماقد سمعت
وأنا أضع سماعة التلفون
تراجعت سنيني باك وورد
دسست جسمي الصغير في تلافيف دفئها
ونمت بعمق
وحين صحوت من حلمي الخيال
تلفت يمنى ويسار
لعل أحدهم قد لحظ تحولي
أخرجت أصبعي من فمي
وقد فاجأني الصحو
وعدت
أكملت ماقد بدأت في دفتر التحضير
ثم لغيت ماقد كتبت
نعم
فدرسي الجديد ليوم غد
فقط
عنك ياأمي
وليدك
نورالهادي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
بترحم على أمي الحاجة ستنا
التي كانت بتعمل لينا فطور الصباح في المدرسة
مش في حبوبات وناسات وبعرفن كيف الحجى الجميل
اها في حبوبات بعملن الأكل النضيف وأمينات على أولاد المدارس
مابذكر يوم في مدرستنا زول اتسمم ولا جاهو مرض في بطنو
البمشوا بي دفتر العيادة كلهم شديدين بس كابين الزوغه من التسميع
حيويه ستنا السلام والرحمه والمغفرة وسامحينا
كنا بنتزاحم ونكورك ونتصايح زي الطير
سامحينا على المدافرة والعجاج البقوم من دافوري الصباح وبلخبط كيانك
كانت تخاف من التراب والغبره
تقولولي إصحاح البيئة
الناس كانت نضيفة وقلوبا نضيفة
يوم مافي زول فينا اتغشه
سلطة الروب هي هي
سلطة الأسود نفس الطعم لسه في لساني
هسي بقولوا عليها بابا غنوج
حبوبة ستنا سامحينا
وربنا ‘عليك في بديع الجنان
حيوية ستنا ليك السلام
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
Quote: بترحم على أمي الحاجة ستنا
التي كانت بتعمل لينا فطور الصباح في المدرسة
مش في حبوبات وناسات وبعرفن كيف الحجى الجميل
اها في حبوبات بعملن الأكل النضيف وأمينات على أولاد المدارس |
ونترحم معك عزيزي محمد السني .. وشكراً وكتر خيرك للكتابة السمحة دي
يومياً كنت حضوراً بالفرجة اليوم قررت الدخول الي هنا .
شكراً ايها الانسان
خضر
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: خضر حسين خليل)
|
خضر الفنان
الشاعر الشفيف
ياسلام والله لو شفتني فرحان كيف كان جيتني بالباب
ياخضر انا ما كتاب لكن بكوب إحساسي والتجي تجي
انا لو لقيت شاعريتك وكتابة الجن بتاعتك دي كنت نجضت ليك المثقفين الما حقيقيين
وجننتك انت زاتك
اكتب لينا البوست ده مفتوح لكل النساء العاملات
مفتوح لكل الأمهات
مفتوح لكل الأطفال
لمن نتكلم عن المرأة اكيد بكون باقي الكلام الأطفال
وقلمك معانا
مودتي وفرحان بيك
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: Elmosley)
|
ياسلام الموصلي جايني يدك فاضية
وين بكتب ليك رسالة طويلة يأأمي
سيد التوزيع لوكنت مدور التوزيع مع فنانين الليلة
كان الغنى السوداني انتشر في العالم كلو
وسلام الى كل الأمهات الغنو لينا
النوم النوم
النوم تعال
النوم تعال
سكت الجهال
النوم النوم
بكريك بالدوم
***
والكري الدفع مقابل شئ لأنوا زمان الناس يتعمل كل شئ براها بالنفير ولمة اولاد الجيران والحلة
اهاالبكروا .. بدفعوا ليه ..تخيل التاكسي عندنا في الدوحة اسمو ـ كروة ـ
مودتي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
Quote: ست ستونه تنقلت بين مدن السودان وقراه وتنقلت بين الوظائف
الى ان نزلت المعاش وهي مفتشة التمريض والقابلات بولاية الجزيرة
وكانت رئيس جمعية محاربة العادات الضارة
وكانت فنانة ورسامةأثرت علينا خاصة سامية التي تعشق الديكور
وصلاح الدين الذي يعشق الرسم والسنوغرافيا |
ربنا يديها العافية
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: وصال عالم)
|
وصال عالم
مأجمل الإسم
وصال وعالم من البهجة والمودة برقتك
ووصال دائم بين كل من تحبين
والتحية لي كل الأمهات
الجمال في عالمك البديع
شكرا على الكلمات الرقيقة
والرحمة والمغفرة لكل الأمهات الائي رحلن للخلود
وكل عام وكل أم بيننا المحبة الأبدية والمودة الدائمة
مودتي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: معتصم دفع الله)
|
بكتب ليك رسالة طويلة يا أمي
واقالدك فيها ........يا أمي
واضمك ساعة في حضني ..يا أمي
****
وحاتك لا بخط عنوان
وما بكتب اسم انسان
وما برمي الجواب في بريد
وما بديه لزولاً كمان في الايد
كفاية اقيف وانقش في جناح الريح
كلامي الدايرو يوصل ليك
اخلي الريح تنثر في المسافة عروس
تحيل كل الصحارى بروش
مضفرة بي سعف بلدي
مرسله ليك يا أمي
التحية للوالده ستونة محمد سلمان .. والتحية للوالدة / فائزة عابدين ( من عندينا – عطبراوية )
والتحية لكل الأمهات في عيدهم .. لهم الله في صبرهم .. لهم الله في عطائهم .. لهم الله في قلبهم الديمه هامي بينا .. ومشغول بينا .. نسأل الله أن يرزقنا برهم .. وأن يدخلنا بهم الجنة .. كما قال صلى الله عليه وسلم ( رغم أنف إمرٍ أدركه أبويه أحدهما أو كلاهما ولم يدخلانه الجنة ) .
والتحية لجميع الأمهات في عيدهم .. والتحية إلى أمهات بلادي الصابرات في مناطق الحروب والكوارث .. في دارفورنا الحبيب .. وفي الشرق وفي الجنوب وفي الشمال .. والتحية لكل أم تهبنا الحياة .. وتغرس فينا كل جميل .
والتحية والتجلة للوالده خديجة أبشر ( عطبرة ) .. أتذكر في يوم ماء وعندما كنت في المتوسطة أتيتها وقلت لها .. أريد أن أدخن سجائر .. وأذهب إلى السينما .. فضحكت .. وقالت لي مافي مشكلة
.. بس دايره منك حاجة .. قلت ليه شــنو قالت أصبر شوية لمن تدخل الثانوي العالي .. أنا بديك قروش السجائر وقروش السينما .. قلته ليها إتفقنا .. قالت لي طيب أوعدني إنك ماتشرب سجائر وماتمشي السينما بالدس لغايت ماتدخل العالي .. قلت ليها موافق ..
ومرت الأيام .. ودخلت السنوي العالي .. بل دخلت الغربة من أوسع أبوابها .. وكذلك الحياة .. إتزوجت .. وأثقلتني الهموم ... ولم أدخن سجارة واحدة .. سبحان الله لم أجد وقت لتدخين السجائر فقد كان هنالك ما هو أهم .. ولكنني وعيت الدرس .. وأصبح نبراساً لي في دربي مع أبنائي .
... يايمـــــه رســلي عفــــوك ..
ينجينـــــي من جــــور الزمان ...
الرائع الســــني ..
لك الود أجمله .. والمحبة أكملها ..
أخوك /
خالد الأرباب
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: Khalid Saeed)
|
خالد العطبراوي
التحية والتقدير
والمحبة والمودة النقية
طبعا ناس عطبرة ناس حلوين
وبعرفوا بعض وبعرفوا عجلة كل واحد في الشارع
شكرا للمداخلة الجميلة
وتقبل تحيات اماتنا
وشكرا على القصيدة
كمان لو لقيت لينا الأغنية ونزلتها لينا
ياسلام
وربنا اخليك لي امك
واديها طول العمر
والسعادة
مودتي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: معتصم دفع الله)
|
معتصم ود أبوى
اليام دي مشتاق ليكم بشكل غريب
انت والمدعو تمبس
وكل الشلة الجميلة
من الظريف صلاح شتات
لي العملاق ابوجهينه
والرجل الكارب ود عبد الجليل
التحية وصلت للوالدة ستونه بت سلمان
وتحياتك موصولة لكل الأمهات
يا امهات الدنيا
الجنة تحت اقدامكم
ابوس اقدامكم
واتعطر بي عطركم
ادونا رضاكم
يا أمهاتي
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
بريدك كل يوم أكتر يا يمه يا شتل المحنةالله يسلمك ويديك الصحة والعافية ويقدرني على جزاءك ونيل عفوك ورضاك ، أفتخر بيك يا أيها المرأة الجميلة برغم ما كل الشلوخ التي رسمتها العادات والتقاليد البائدة والتي قست عليك فزادتك جمالاً على جمالك. أفتخر بيك وأسأل الله أن يوفقني دائما لتقديم كل ما يرضيك وأن أوفي ولو جزء يسير من دينك الكبير الذي يطوق عنقي إلى يوم الدين
| |
|
|
|
|
|
|
|
|
|
Re: ـــــــــــ أمــــــــي ــــــــ (Re: محمد سنى دفع الله)
|
يا ناس المنبر العندو أم يصلي على النبي ويرفع معاي البوست ده عشان الأم ، والبي أمو ما بهمو زي ما بيقولو ، والما عندو أم يلجأ لي – أم رقيقة أو أم بده – أو أم مغد (ما عارفها بالغين ولا القاف) وأم ضريوه ، وأم دفسو وأم برررو (كده صاح يا ناس القواعد ولا إيدي رجفت في الكيبورد).
ويا يمه كل يوم هو عيد وكل لحظه هي جديرة بأن أقف لك إجلالا وإكباراً وإعتزازا.
| |
|
|
|
|
|
|
| |
Osman Musa
محمد سنى دفع الله
خضر حسين خليل
Elmosley
Mohamed Abdelgaleel
وصال عالم
almulaomar
Rabab Elkarib
معتصم دفع الله
Khalid Saeed
عصام عبد الحفيظ
فيس بوك
تويتر
انستقرام
يوتيوب
بنتيريست