بحري طراوة... ويا ناس بحري .. قالوا بتحبوا يلا حبونا..

Quote: # الكلام ده كان سنة كم؟ - سنة 1975م. # افضل النتائج داخل السودان؟ - كنت بطلة الجمهورية لفترة 19 سنة متتالية. # من الأرقام القياسية المسجلة باسمك؟ - 50 مترا فراشة و100 متر حرة و100 متر ظهر و200 متر ظهر. # أصعب أنواع السباحة شنو؟ - الدولفين. # ليه؟ - لانو محتاج مرونة وقوة جسدية، لكن انا اتفوقت فيه كنت بحبه جداً وعندي فيه ارقام قياسية. # الفرق شنو بين السباحات زمان وهسه؟ - صعبة المقارنة نحن زمان كنا بنلقى اهتمام من كل الجهات، وعندنا احواض خاصة للتمرين، وهسه رغم انو السباحة صارت جاذبة للنساء لكن للاسف الأندية الكبرى زي الهلال والمريخ والنيل والخرطوم تلاتة اتخلت عن مسؤوليتها وبقت تهمل المناشط الاخرى غير كرة القدم، وتركت مسؤولية التدريب لمسابح الأندية الخاصة. # السباحة بقت رياضة الناس العندها قروش؟ - الأندية الكبرى الآن ما عندها ملاعب سباحة، والسباحين والسباحات اتجهوا لمسابح النادي الالماني ونادي الضباط ونادي الصيادلة والنادي الامريكي وغيرها ودي ما المشكلة. # المشكلة شنو؟ - انو السباح او السباحة بعد ما يتمرن ما بلقى نادي يستوعبه عشان يشارك في المنافسات الداخلية او الخارجية، المنافسات الآن منافسات أندية ومؤسسات خاصة، والاندية الكبرى عشان ما تصرف قروش على السباحين بقت ما بتستوعبهم، يعني يا النادي الخاص يا البحر. # إنت بصفتك عضو في اتحاد السباحة ورائدة ما صححت الاخطاء دي ليه؟ - أنا أولاً ما عضو في الاتحاد، ولا عندي بيه علاقة من قريب ولا من بعيد.. انا بره الاتحاد لوجود لوبي يتكون ايام الانتخابات، ولاسباب تانية كثيرة يمكن ان اتحدث عنها لاحقاً، والاتحاد العام للسباحة موجود لكن الاتحاد المحلي لولاية الخرطوم ما موجود، لانو ما في أندية تكونه وما في ملاعب، لذلك ما في انتخابات تكون اتحاد يعالج الاخطاء دي. # وين مسبح الحكومة؟ - غياب المسبح الحكومي من أسباب غياب الاتحاد وغرق المنشط، زمان الاتحاد كان عنده مسبح تابع للدولة بتمرنوا فيه لعيبة الأندية الماعندهم ملاعب، الآن الملعب ده ما في وشيدوا محله كبري المك نمر، يعني اللعيبة يجو الاتحاد دايرين يلعبوا ما يلقوا مسبح «تضحك» يعني إلا يلعبوا «بلي». # زمان اتمرنتِ مع نادي الهلال يعني إنت هلالابية؟ - هلالابية جداً ومتابعة أخبار فريق كرة القدم، وشايفة انو ماشي في تحسن، لكن المناشط في الهلال محزنة. # قلتِ لى في بداية الحوار انه البنات زمان بسبحن مع الرجال قدرتو تسبقوهم ولا العضلات هى البتفوز؟ - سبقناهم كثير رغم انو القوة العالية للسباح اكبر من قوة السباحة، لكن التمارين واحدة ما في فرق جوه الموية بين الراجل والمرأة. # السلطان كيجاب اشهر سباح سوداني عالمي قدرت تسبقيه؟ - انا وكيجاب عُمنا سوا وكان بيننا تحدي، وقربت اسبقو في سباقات كتيرة اشهرها سباق جبل اولياء الخرطوم، هو جاء الاول وبعدو السباح سليم، وانا وفضل وماجد طلعت فريد.. وبرضو في سباق مدني ام سنط كنت سابقاه لكن في آخر دقيقة سبقني وجيت التانية، وبذكر جريدة «الأيام» كتبت «كادت سارة أن تبتلع كيجاب». # وبلعتيه في أي سباق؟ - في سباق الحديبة عطبرة جاء السباح ممدوح مصطفى الاول، بعدو ماجد طلعت فريد، وبعدو علي عتباني، وبعدو انا و وراى كيجاب. # وقِبل كيف تفوته سباحة؟ - هو طبعاً سباح ظريف وصاحب نكتة، قال للصحافة سارة سبقتني عشان عضاني كلب، بذكر ردوا عليه وقالوا انت كنت بتسبح في النيل ولا جاري في الشارع. # كأس في الذاكرة؟ - هم حقيقة كأسين دفعة واحدة حصلت عليهما في سباق بمناسبة عيد الاستقلال، ويومها الرئيس الاسبق جعفر نميري جاء السباق وكان مسافات طويلة، وصفر صفارة البداية، ومشى يفتتح ليه محل ونحن وصلنا نقطة النهاية قبل المواعيد بـ 3 ساعات قام قطع الزيارة وجاء لخط النهاية. # والكأس كان عشان وصلتو بدري؟ - لا زمان كنا بننزل الموية سواء في وقت واحد، الرجال والنساء، وكان حسب القانون بحسبوا الجائزة للفائز الاول والثاني والثالث بغض النظر عن انو سباح ولا سباحة، ويومها جاء كيجاب الاول وانا جيت بعده الثانية مباشرة، قام الرئيس نميري قال انا بدوني كأس عشان جيت الثانية بعد كيجاب، وبدوني كأس عشان جيت الاولى على البنات، وده كان كأس ضد القانون بقرار رئاسي. # هسع السباحات السريعات البنشوفهن في الاولمبياد في القنوات الفضائية ممكن تسبقيهن؟ وهل السباحات السودانيات الحاليات بنافسنهن؟ - نحن جاهزين وواثقين من امكانياتنا وخبراتنا، لكن السباحات الجدد ممكن يلقن صعوبة، لانه لا عندهن مدرب عالمي ولا مشرف ولا طبيب مرافق، ولا دربوهن باستمرار من هن صغار زي السباحات العالميات.