خريجو حنتوب الثانوية....أين هم؟! العالم الجليل "الطيب علي" يطلق المبادرة التاريخية

Quote: مدرسة حنتوب الثانوية مُتجذرة في ذاكرة الوجدان الشعبي، في بندر أو بيادر تجد شخصا ينتسب لحنتوب، خمسون عاماً هي عمر حنتوب الثانوية 43 -1993م وأسماء عريقة وذائعة الصيت أرتبطت بالمدرسة هنا الرئيس والوزير والأكاديمي ولكن عمنا محمد محمود - صول حنتوب - حالة خاصة فعلاقته بحنتوب علاقة وجدانية وعلاقة تاريخ كيف؟ نتعرف على ذلك بعد قليل، المهم ركبنا عربة بوكس توسطها خروف والناس في ضجر وتذمر شديدين، آخر محطة للبوكس كان عمنا الصول، ينتظر المواصلات، سلمت عليه قال «ما عرفتك يا ولدي » قلت «أنا بتاع التلفزيون» سجلت معاك حلقة في رمضان الفائت رحب بيَّ للمرة الثانية. عمنا محمد محمود علاقتة بمدرسة حنتوب بدأت سنة 1946م شهر سبتمبر، وجئت إليها من فرقة المهندسين «سلاح المهندسين» التابعة لقوات دفاع السودان وتم انتدابنا اثنين من فرقة المهندسين للعمل كمدربين بمدرسة حنتوب الثانوية ومدرسة وادي سيدنا الثانوية. = حنتوب القرية الحالية كانت موجودة؟ كانت بيوت من القش مفرقة 10 -12 بيتا. = هل تذكر مديري المدرسة؟ والله كتار جداً لكن من الشخصيات التي لا تنسى :مستر بروان، إنجليزي، معاملة راقية جداً، طيب، وكان زول «دغري» والشغل ماشي زي الساعة وما في مدير بعدو يقدر يغير طريقة مستر براون، النظام الوضعو مستر بروان ماشي حتى حنتوب أنتهت. = وتاني منو من المديرين؟ هاشم ضيف الله، يا سلام هزَّ رأسه ده سيد النظام، زول مرتب جداً ما يجامل، إذ داير تخش عليه لازم تستأذن، ما في حاجة تجي داخل «تُووش» الكلام ده للأساتذة والطلبة ماعندو وقت عشان يتكلم مع أي زول. = أنت جيت حنتوب ثلاثة سنوات، قعدت 50 سنة كيف؟ صاح أنا جاي ثلاثة سنوات، خلال الثلاث سنوات دي نظمت المدرسة تمام، والشغل عجب مستر بروان، فرفض رجوعي لفرقة المهندسين، والحقني بوزارة التربية والتعليم وقعدت في حنتوب حتى سنة 1993م. = كيف يبدأ اليوم الدراسي في مدرسة حنتوب؟ الساعة 7 صباحاً يضرب الجرس الأول، في الوقت ده صول المدرسة والمدرسين يكونوا جنب الفصول والطلاب يمشوا على الفصول، الجرس الثاني، يقرع للطلاب، الساعة 15: 7 الجرس النهائي، تاني مافي زول يدخل الفصول والعقوبات تبدأ بالتوجيه وبعد ذلك الجزاءات. = حنتوب طبعاً ما قراية بس؟ حنتوب فيها كل المناشط، وموزعة توزيعا دقيقا جداً حسب الداخليات شرقية وغربية، الألعاب الرياضية تبدأ من 4-6 مساء، يوم السبت خاص بالفريق الأول «كرة سلة أو قدم» يوم الأحد للداخليات، الداخليات الشرقية تمارس كرة القدم ، التنس بكل أنواعه مضرب، طاولة، الداخليات الغربية تمارس رياضة الجري 5 ميل يوم الاثنين كل المدرسة في الجمعيات الأدبية، يوم الثلاثاء يحصل العكس الكانوا في الكورة يمشوا الجري وكده. = كيف كان جو الدراسة في حنتوب؟ الجو في حنتوب هادئ جداً، ومافي حاجة غير القراية، عشان كده قالوا فيها مثل شهير «لو قعدت تحت شدر حنتوب بتجيب الشهادة» حنتوب كانت مدرسة فريدة وأنت قايل السودان ده البحكمو منو، ما بتحكموا حنتوب! كل الوزراء والرؤساء مرقوا من حنتوب. = زي منو يعني؟ جعفرمحمد نميري، ده شخصية قوية وكان مهابا جداً مما كان طالبا وكنا نلعب معاه في فريق المدرسة وأنا كنت بتحامر معاه شديد لمن نلعب مع الطلبة وكان موهوب في الكورة وكان كابتن الفريق في المدرسة وعوام سمكة يقطع البحر زي المافي حاجة ونميري كان محبوبا جداً من مستر براون، وتلقي براون يكورك «نميري نميري». = وتاني منو من الشخصيات الهامة؟ شفت الترابي ده أشطر زول، الناس بقروأ أربع سنوات، الترابي قرأ ثلاث سنة، أمتحن وجاب الشهادة وخش القانون، ومستر براون كان مستغرب في شطارة الزول ده، والغريب الترابي ده كان هادئ جداً و غير مشاغب، وملتزم من زمان وجنو صلاة... = عملت شنو بعد حنتوب فرتقوها؟ حنتوب سودان مُصغر، الطلاب من جميع أنحاء السودان كانوا يتلاقوا في حنتوب من الشرق والغرب والشمال والجنوب، يحصل تمازج وتبادل للأفكار وانصهار بين بيئات مختلفة، مش الطلاب بس حتى الأساتذة حنتوب دي فكرة جميلة. = أنت قلت نميري ده خطير، والناس بقولوا نميري طيش حنتوب؟ الناس بقولو كده، لكن حنتوب ما بتجيب زول ساي، حنتوب فيها ثلاثة مستويات، المستوي الأول، المستوي الثاني، المستوي الثالث، نميري كان في المستوي الثالث، وزول بمسك فريق الكورة، والخواجة عاجبو شديد ده زول ساي. = بعد ما أستلم نميري الحكم في السودان، هل زارك في حنتوب؟ أنت عارف في الرؤساء ديل كلهم، الوحيد أتذكر صول حنتوب، هو نميري بعد قيام ثورة مايو طوالي جاء حنتوب وسأل عني وقلدني قدام الناس فترة طويلة، المرة الثانية سنة 1971م في العيد الفضي لمدرسة حنتوب جاء ودعا مستر براون من إنجلترا خصيصاً لليوبيل الفضي. = الدولة ما كرمتك؟ لا رئيس ولا الدولة قالت تكرم عمنا ده ، كل الوزراء والمسؤولين في الدولة دي مافي واحد قال نكرم الزول ده، والله يا ولدي سكيناهم من هم شفع، وكل زول لقي ليهو منصب انشغل فيهو. = أنت زعلان الحمد لله في أي مكان في السودان بلقي واحد من طلابي وقاعدين يقدموا ليّ خدمات طوالي ومجانية وفي دكاترة منهم يقولوا لي لازم تجينا «بقول ليهم أنا ما عيان».. وأذكر منهم عساكر وزير الإسكان عساكر ده أدي كل عمال مدرسة حنتوب مربع كامل هو مربع 15 وهسع البيت الساكن فيهو ده أداني ليهو عساكر. = حكاية صول 50 سنة عندها تأثير على حياتك الخاصة في البيت؟ شوف أنا بحب النظام شديد وأحسن منو مافي، الزول البعرف النظام بكون مرتاح، وأي حاجة ما في محلها ما بقبلها كلمتي واحدة وهي البتمشي. = أولادك درسوا في حنتوب؟ الحمد لله أولادي كلهم درسوا في حنتوب معظمهم تخرجوا في الجامعات سيف الدين مهندس كهربائي، ضياء الدين اقتصادي وهسع شغال مع منظمة سعودية في جيبوتي وصلاح ده بقي مدرس ما تخرج في الجامعة وعندي بنت مدرسة وبنت خريجة اقتصاد. = رأيك شنو لو رجعت حنتوب مرة أخرى؟ يا ريت حنتوب دي كان لازم تستمر كمدرسة قومية وديل هم البرفعوا البلد دي. المحرر: عم محمد محمود مولود سنة 1920م يعني تجاوز العقد الثامن بأربع سنوات وعمنا ماشاء الله مازال شاباً إذا رأيته لا يخالطك الشك أنه في الخمسين من عمره، مقارنة بطلابه الذين درسوا الكلية الحربية كنميري وبابكر علي التوم وغيرهم.