لما جات عربية الحكومه تاخدنا للنهود و....

Quote: رحلة القطار والمشاهدات بما فيها السيمافور ولافتة (صفِّر) وخط الثلث الخ ..:كان رائعا والله دي تفاصيل تحرّض على بوست جديد نشترك فيهو مع بعض ونسمّي نفسنا ( ثنائي الدريسه). انت ياهميم ، أو حميم ، الوالد كان ناظر مدرسه زي حالاتنا كده ولا ناظر محطّه؟ تعرف يامولاي القطر ده عالم بحالو .. ابتداء من كرتونة الزواده مرورا بقصص الغرام ( والعجب لو الخط شالو السيل ، ده مايوم المنا) .. أما الرحله دي من محطة الخرطوم لنيالا أو الأبيض فحاجه محتاجه والله لبوست خاص. لكن يا حميم رحلات زي دي بتوريك معدن السودانيين ومدى ترابطهم وكل الصفات الجميله فيهم. يعني لما نقلونا للنهود نزلنا بالليل في استراحة الحكومه في أبوزبد ، أها صبحنا دغش لقينا الحوش كلو صواني شاي مع لقيمات ونفس الشى الفطور وفي زول واحد بس ( مندوب) من الآهالي وعلمت أن هذا نهجهم بغض النظر عن من قدم الى تلك الأستراحة في الليل. أها لما جات عربية الحكومه تاخدنا للنهود من تلك الأستراحه ، وكان الموسم وقتها خريفا، فوجئنا بزواده من جديد من ناس لم نرهم من قبل ولم يرونا. قال (سنتر الخرطوم قال ) ياخ الناس ديل لسه كده. حميم أنا جاييك تاني