Quote: ورداً على ما أثاره ابنه الموسيقار عبد الوهاب (لن أعيش في جلباب أبي) أشار الأستاذ محمد وردي الى أن ابنه عبد الوهاب يمتلك فكرة التلحين والتوزيع الموسيقي ويمكن ان يبدع في هذا المجال، وأضاف وردي: لكني حذرته من الغناء لأن صوته لا يؤهله لولوج هذا المجال.. وبالنسبة لي اتمنى من كل قلبي ان يكون عبد الوهاب لنفسه شخصية فنية مستقلة لا علاقة لها بوردي وهذا شئ يسعدني، ولكنني بخبرتي الفنية أوكد انه لا مستقبل له في مجال الغناء.
مرحباً يانشأت الإمام
هناك بوست إنتقادي عن الشاعر التجاني وأيضا فيه "هبشة" لمختار دفع الله. أعمال الشاعر التجاني لم تستطع أن تحجب سؤاته الشخصية بينما روائع وردي تدي روعة حتى لبعض سلبياته الشخصية وقطعا كلامه عن أبنه عبدالوهاب ليس من السلبيات التي أقصد..عاش وردي.
Quote:
د. الماحي يشيد بـ«هوى» شروق
ابان زيارته الأخيرة لدولة الامارات العربية المتحدة للمشاركة في اجتماعات اللجنة التنفيذية للمجع العربي للموسيقى، قام الموسيقار الماحي سليمان رئيس لجنة الألحان بالمصنفات الفنية والأدبية بالسودان بزيارة للمطربة «شروق» بمقر اقامتها بالامارات.
. وأشاد د. الماحي بصوت شروق وقام باجازة صوتها فوراً، وحدد لها موعداً في مطلع يوليو القادم لمقابلة لجنة اجازة الأصوات بالخرطوم..
يذكر أن «شروق» أطلت الخميس الماضي في حلقة خاصة عبر برنامج «خليج ونيل» وقدمت فيها منوعات من الفن السوداني والخليجي، وأبرز الأغنيات التي قدمتها «لهواك» وهي من كلمات د. معز عمر بخيت وألحان الموسيقار الموصلي، وينتظر أن تصدر شروق ألبوماً خلال الأيام القادمة يحمل أسم هذه الأغنية.
شروق جمالها "حاد" الملامح وظهورها الأسبوع الماضي على قناة النيل الأزرق جاب اللوم لراكوبة وتمبس والمعز لأنهم ما قالوا لينا حاجة عنه في البورد هنا وتاني يوم ما نزلوا لينا شيء من السهرة ولكن عرفت من تمبس أنه شاف السهرة تاني يوم ونزلها في موقع اسمه عكس الريح والكلام موبايل وانا سايق ما قدرت أحفظ أو اكتب عنوان الموقع. عموما الإمارات كلها مقر إقامتها فهي مغتربة هناك وربما المقصود أن الدكتور الماحي سليمان زارها في بيتهم بصياغة متواضعة. وقبل كم يوم شفت في النيل الأزرق أو الفضائية السودانية مغني شاب اسمه نزار الماحي سليمان وقلت عيني باردة على العائلة الفنانة دي.
05-21-2006, 11:29 AM
Rakoba
Rakoba
تاريخ التسجيل: 02-05-2002
مجموع المشاركات: 5814
وردي قامة سامقة في مجال الغناء، وان كان كلامه قاسياً على ابنه.. فذلك لانه لا يجامل.. خاصة من كان له تاريخ مثل وردي.. ومن بعض متابعاتي ارى عبثية عبد الوهاب في تناوله لوالده مما قلل احترامه كثيراً لدى المتلقي.. ولشروق عافية المطر يا بناديها.. فكما يقولون.. صوت وصورة.. وما شاء الله.. برد عينك معاي ود. الماحي رجل وهب حياته للموسيقى ويتعامل بروح العالم، لذا كان طبيعياً ان يتعامل مع شروق بهذه الاريحية التي جعلته يزورها ويجيز صوتها .. فله منا كل الاحترام..
05-21-2006, 11:25 AM
Rakoba
Rakoba
تاريخ التسجيل: 02-05-2002
مجموع المشاركات: 5814
العزيز راكوبة مشتاقين اولاً بالتبادي.. وبعد داك سلام الشباب كلو عليك.. خصوصاً والبشاري هذه الايام بطرفنا.. فلك تحياته وتحيات البدوي يوسف وان شاء الله ربنا يقدرنا على المتابعة لكل ما يجري في الساحة.. والصفحة اسبوعية لانو في صفحة تانيه برضو يوم الثلاثاء.. وفي ملف ثقافي يوم الاربعاء.. يعني من نص اي اسبوع بامكانك متابعة الصفحات التلاته.. وكده بتكون مغطي تقريباً معظم النشاط.. والشمار الفني..
لك غالي المودة
05-21-2006, 11:55 AM
faisal44
faisal44
تاريخ التسجيل: 04-07-2002
مجموع المشاركات: 617
يا حليل المرحوم الفنان مصطفى سيد احمد لمن مشى عشان يجيز صوتو واعمالو ناس المصنفات رجعوهو اكتر من تلااااااااااااااااتة مرات ورفضوا ليهو ... أسة لجنة المصنفات تسافر وتمشي للناس في بيوتا عشان تجيز ليها صوتها !!!!!! لأ وكمان تطالب بي الإسراع بالحضور للسودان عشان تكمل باقي الإجراءات ....!!!!! هيييييييييييييييييييييييييييييييييييييييييييييييه دنيـــــــــــــــــــــــا..
تخريمة : ما قلت ليكم انا مشاتر يا راكوبة ؟؟؟؟ بصراحة كده اكبر غلط يا نشأت إنك تخت التلاتة في حتة واحدة لأنو ما ممكن شروق في المرحلة دي تتخت مع وردي ومحجوب شريف .. مع كل الإحترام والتقدير للموسيقار الموصلي ودكتور معز..
05-21-2006, 04:42 PM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
دكتور معز .. تحياتي يا راقي... والإيميل ده والله حيرنا طيب ياخ انت ما دكتور فايروسات كدي شوفو لينا مالو نرجع لي موضوع شروق واقول يا دكتور إنو من الكلام المكتوب في الجريدة يوجد إيحاء ان كلام الماحي سليمان لم يكن بصورة شخصية بدليل انه قطع معها موعد للحضور للسودان .. قد يكون تصادف زيارة الماحي سليمان ولكن إجراء المقابلة يبدو انه تم بصورة رسمية وليست ودية وإلا لكن الماحي سليمان اجاز نصف اصوات الشباب السوداني لأنه جلس مع اكثر من شاب وشابة بصورة ودية !!!! ان يتم إيراد إسم شروق في الصفحة الفنية هو شيئ لا نعترض عليه فنحن في الصفحات الفنية يكون لدينا اخبار متفرقة فتجد لقاء مع ود اللمين وفي نفس الصفحة لقاء مع فاطنة الجعلي !!!!!! لكن الأخ نشأت اورد الخبر وكأن هذا الثلاثي يمكن ان يتم وضعه في مرتبة واحدة وكأن شروق نجم كبير !!!!!! صراحة يا دكتور معز ومعليش للشترة دي واعتبره راي شخصي ولكن ان يتم إيراد الخبر بهذا الشكل كأنما تقرأ في الفرانس فوت بول خبر مفاده : اليوم وعلى ملعب الأولترافولد تمتعوا بمشاهدة نجوم الكرة العالمية مارادونا وبيليه وبرشم !!!!!!!! فهل يعقل ان يكون الرد بأن إيراد برشم يدل على انه مثله مثل مارادونا يلعب كرة القدم ذاتها !!!!!! مع كل إحترامي وتقديري لك ..
05-23-2006, 03:26 AM
ترهاقا
ترهاقا
تاريخ التسجيل: 07-04-2003
مجموع المشاركات: 8422
اخي عمر الفاروق تحياتي كما ذكرت ايراد خبر للفنانة شروق رديفاً لأخبار العملاق وردي.. والشاعر الوطن محجوب شريف لا غضاضة فيه.. اذ تهتم الصفحات الفنية بمختلف الاجيال الفنية، شيبها وشبابها، رعيلها الأول.. ومن هم على الدرب سائرون.. لكن اود تصويباً لعبارتك: لكن الأخ نشات أورد الخبر وكأن هذا الثلاثي يمكن وضعه في مرتبة واحدة! وما أوردته أنا أخي الفاروق، لا يسمى خبراً.. انما هو فقط عنواناً لهذا البوست.. وهناك رابط يقودك للصفحة الفنية بصحيفة الرأي العام، وعندها ستجد انها أخبار منفصلة، ولا شيء يربط بينها، اذ ان كل خبر تم ايراده على حده، وهذا ما لزم تصويبه.. ولك الشكر على ابداء ارائك، وليس في الأمر »شتارة« او شيء من هذا القبيل يا عمر، انما هو رأي من حقك أن تصدح به، ولولا اختلاف الآراء لبارت السلع، او كما يقال..
05-23-2006, 05:08 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
ما حا ابوظ عليكـ احتفائكـ بالشابه شروق و اقول ليكـ انت اختزلت تاريخ الغناء النسوي و بلا بلا بلا من النقاشات العادله في مثل هذه الاوقات انا سمعت لي شروق البروفه الموجوده في خلفيه بوستكـ في عكس الريح (رغم انها ما بروفه ) و قلت جميل دي بروفه و منتظر اشراقاتها القادمه
ونقول ليك ح تعيد صياغة تاريخ الأغنية النسائية السودانية.......
تقول لي برشم...
تعرف انا قبل ما اكتب برشم دي قلت اخليها حلوة شوية واقول للدكتور هيثم مصطفى لكن والله يا دكتور ما لقيت غير برشم اسوي شنو ؟؟؟ بالمناسبة يا دكتور خلينا نقول مبدئياً تملك واحد من المقومات التي صارت مطلوبة في غناء اليوم وهو الوجه التلفزيوني ومسحة الجمال التي ربما ستساعده في تثبيت وفرض نفسها كفنانة .. استمعت لها في بوست قديم كنتم قد انزلتوه هنا وحقيقي لم تكن بذاك المستوى الذي يحتاج لهذه الضجة كما وانني الان استمعت لجزء من الحوار في قناة النيل الأزرق وحقيقي لم اجد اختلاف بينها وبين من يستضيفهم التلفزيون من فناني هذا الجيل الذين بالكاد يخرجون جملة مفيدة واحدة فكل الذي قامت به شروق هو تسميع لأسماء الأغاني في الكاسيت ... لن نبخس الناس حاجاتهم ولا نود ان نستعجل الحكم ولكن بنفس الطريقة نتمنى ان لا يستعجل الطرف الاخر بالتصريح بانها الصاروخ القادم والناهضة بالفن السوداني و و و ... تعرف يا دكتور البت الإسمها نهلة عبد المنعم بتاعت عقد الجلاد سابقاً بت فنانة جداً وعندها حضور ما عادي وثقافة عااااااالية واسلوب حواري فريد وحقيقي كانت هي التي ستنهض بالغناء السوداني خصوصاً النسائي لما لها من رؤيا وتخطيط وفهم للغناء إضافة للصوت الجميل .. ولكن لأنها لم تجد هذا الاهتمام الأعلامي ولأنها وفي ذلة لسان ابدت رأي مخالفاً في الفهم لأغاني الحقيبة اختفت تماااااماً من الساحة الفنية وضاعت كما تضيع امال النور الان .. ذكرت هذا الحديث عرضاً ولكن على سبيل المقارنة بين ان نراهن بشروق ام نفتش على المضمون في وجود مثل امال النور ونهلة عبد المنعم لنراهن به !!!!
تخريمة : اشكر الأخ نشأت لرحابة الصدر وتقبل وجهات النظر وانا اعلم ان الخبر يقود لصفحة فنية بها اخبار متفرقة ولكن يجب ان نتفق اخ نشأت بان وضع العنوان بهذه الصورة فيه نوع من الحبكة الصحفية وإشارة إلى ان ننتبه لهذه الشروق بحكم انها جاذبة للجمهور او دعنا نقل بصورة اخرى هي لفت إنتباه للناس ..
مشكورين على تحمل القد بي الطريقة الصاااااااااااااح
05-24-2006, 02:01 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: ولكن لأنها لم تجد هذا الاهتمام الأعلامي ولأنها وفي ذلة لسان ابدت رأي مخالفاً في الفهم لأغاني الحقيبة اختفت تماااااماً من الساحة الفنية وضاعت كما تضيع امال النور الان ..
اهاااااااااااااااااااا .. صدق عرفت لي يا دكتور وجيتني من الحتة البتوجعني !!!!! من قلت روني والمان يونايتد الكلام وقف ... فعشااااااااااااااان كلامك ده يا زول شروق مش فنانة لالالالالالالالا دي امكلثوم عدييييييييييييل كده .. وإيه رأيك كمان دي حا تكون عميدة الفن السوداني .. شفت روني بيعمل شنو فينا ... اها بعد كده الشريط بيجيني في الرياض ولا ادور اجيك بي الكبري ؟؟؟
تخريمة : يا احمد يا ساطور ياخ وين الحي بيك ؟؟؟ انا متابع للبت نهلة واذكر انها في فترة سافرت لألمانيا وعادت مرة اخرى للسودان وفي تلك الفترة ايضاً كانت مختفية .. عموماً الف مبروك ليها والزي نهلة دي مفروض يكونوا حاظرين إسمها في المطار
05-24-2006, 03:11 AM
tmbis
tmbis
تاريخ التسجيل: 10-19-2002
مجموع المشاركات: 24862
تمبس يا رايق: تعرف اجمل حاجة في الفيديو بتاعك ده هو الماتشنق Matching بين الستارة وتوب شروق بالجد حاجة مباااااااااااالغة .. اضف إلى ذلك كلمات الأغنية واللحن والعزف .. لكن اسوأ ما في هذا الفيديو كليب هو صوت واداء شروق وهذا والله للحقيقة .. ارجو ان تتقبلوا نقدي اللازع ولكني صراحة مع كل صرخة لشروق في العالي اجد ان جلدة شعري قامت او بي الدارجي كده انضرست .... يا دكتور معز دعنا نكون صريحين فعذرك الأول كان البروفة ولكن يبدو ان هذه الأغنية تؤدى بصورة تسجيل وواضح انها لشريط كاسيت وحقيقة الأغنية جميلة وحقيقي حقيقي لو اني اذني الموسيقية سليمة ( هنا اترك الرأي لي خدر) فإن هذه الأغنية وبكل صراحة انسب صوت يمكن ان يؤديها هي الفنانة ماجدة الرومي وحقيقي انتابني شعور ان هذه الأغنية لماجدة الرومي وتتغنى بها شروق ... لكن اداء شروق للأغنية افقدها جمالها واضاع كل اللمحات الجمالية التي يمكن ان يضفيها صوت المغني على الأغنية فيظهر اللحن بطلعاته كما تفعل ماجدة الرومي في اغنية كلمات و اغنية ابحث عني واغنية طوق الياسمين وأخيراً أغنية اعتزلت الغرام ... يبدو ان صوت شروق صوت محدود للغاية ومساحاته الغنائية ضيقة جداً وتعتمد كلياً على الساوند والتسجيل الرقمي ولكن لو اختبرنا شروق على المسامع دون المايك صدقني سيكون الاداء اضعف من ذلك بكثير.. اكرر دوماً انني لست من المختصين في هذا المجال وانا فقط مستمع عادي وبالتالي فرأيي ايضاً عادي ...
تخريمة : يا تمبس جيت تكحلا عميتا ... ارجى الراجيك مع خدر بالرغم من إنو كيتاً فيني حا يجي يقول ليكم لا كان كده الزولة دي غنااااااااااااااااااااااااية ...
05-24-2006, 04:38 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: ارجى الراجيك مع خدر بالرغم من إنو كيتاً فيني حا يجي يقول ليكم لا كان كده الزولة دي غنااااااااااااااااااااااااية ...
والله ياعمر ده بوست ممتع جدا كونو الناس العادية تجي تتفق مع الناس ا لما عادية على الناس الساكت .. يلالا أقول ليك أنا كمتلقي عادي وعندي شوية مزيكا برضو عندي راي تاني.. انا ما سمعت شروق قبل كدا إلا في الفيديو دهـ .. وبالجد لما اللاقي لي فنان أو فنانة بتدوا بي عمل خاص ليهم .. أول حاجة ببيت حسن النية لانو معظم القامو ف يالدرب دهـ أول حاجة لازم يبدوها ليك بي ( انساك أنت أنت بتتنسي ) .. وما شابه ذلك .. حتى الاصوات النسائية العندنا مكانك سر دي أول حاجة .. يعني الواحده تظهر فجاة كدا وتاني ما تسمع بيها إلا في ( بيت العدل ) .. الحاجة التانية شروق دي في بداية المشوار .. وطالما بدت بالطريقة دي فمعناته أنو خطاته حتكون ثابته ( إذا استمرت بنفس الطريقة دي ) ـ بنجي لي مسالة الصوت والشغل التكنيك الصوتي .. وانا بعتقد لو ما ( خدر ) جا قدم عرض لي هنا أنو مساحته ممتازة .. تبقى المسالة بتاعت التمارين ومتابعة مخارج الحروف والتنفس السليم والحاجات الفنية دي .. ودي مسالة مقدور عليها ومع مرور الزمن بتظهر ملامح الاجتهاد.. وده طبعا بحتاج لي وقفة من أي متخصص بجانب شروق وطالما أنو في مبادرة من الموصلي وركز معاها على الجانب ده اكيد بتحصل الفايده.. ملاحظ معاي ( لسارة النور ) في نجوم الغد ؟؟ ملاحظ لمتابعة ( آمال النور ) ؟؟ الشي القاصد انو شروق متوفرة فيها المقومات الاساسية للصوت .. يعني مسالة الشتارة دي . ما واردة بالشكل البتقصدو لانو الشتارة في الصوت ما بتشبه الشتارة في التعبير الحركي .. يعني الاشتر ..اشتر لما يرقص وبيشتر معاهو حتى بتاع ( الطبلة ) كان عاين ليهو ساكت .. لكن الشتارة في الصوت دي معناته النشاز البطلعك بره اي حاجة وبيضرسك .. وطالما انك اتضرست في الحورف العالية لي شروق .. معناته أنت وصلت مرحلة العادية جدا وبقيت ( سمسم خدر )..
Quote: يبدو ان صوت شروق صوت محدود للغاية ومساحاته الغنائية ضيقة جداً وتعتمد كلياً على الساوند والتسجيل الرقمي ولكن لو اختبرنا شروق على المسامع دون المايك صدقني سيكون الاداء اضعف من ذلك بكثير..
كدي أنا الكلام دهـ بحولو لي خدر واشوف وجهة نظرو شنو .. تتذكر قبل كدا قال ليك شنو في ( ولد ابو صلاح ) لما غنا لي عثمان حسين .. ياريت خدر يورينا وجهة نظرو شنو ؟؟ واتمنى انو ما نستعجل بالحكم على شروق سواء كان سلبي أو إيجابي .. فقط ننتظر شوية ونشوف ونسمع عنها ونتابع ..
Quote: كما تفعل ماجدة الرومي في اغنية كلمات و اغنية ابحث عني واغنية طوق الياسمين وأخيراً أغنية اعتزلت الغرام ...
كدي حاول اسمع كلمات دي .. واشوف رايك شنو:
05-24-2006, 05:02 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
والله يا دكتور وما طالبني حليفة ومش عشان كاتب القصيدة انت وملحنها الموصلي لكن حقيقي الأغنية واللحن مكتملات تمااااااماً وبالجد ده الإستايل الحا يوصل الأغنية السودانية للقنوات العربية ... بس موضوع برشم ده كدي انساهو
05-24-2006, 05:46 AM
nashaat elemam
nashaat elemam
تاريخ التسجيل: 12-12-2004
مجموع المشاركات: 1108
الحبيب الطبيب الاديب.. د. معز تمبس الغالي.. وفنانا طارق ابو عبيدة حضور انيق جداً في هذا البوست ذي الصاحب المتواضع.. وفعلاً امتعتمونا بالحوار الجميل الهادف.. والتحليل الرصين.. وجميل جداً ما يقوم به الاخ عمر الفارق من انتقادات، فهي تفتح نفاجاً للمزيد من النقاشات الثرة..
ساكون هنا.. للمتابعة فقط.. والاستمتاع
05-24-2006, 06:10 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
تمبس الحلو : والله البوست ده بقا عامل زي المسلسل المصري يبدا هادئ وفجأة كده يسخن من الحلقة الخامسة
Quote: والله ياعمر ده بوست ممتع جدا كونو الناس العادية تجي تتفق مع الناس ا لما عادية على الناس الساكت
والله جننت الناس جن ووزعتهم زي المرارة
يلللا كفففف بسم الله نجي لي كلامك ..
Quote: الحاجة التانية شروق دي في بداية المشوار ..
إلا إذا كنت تقصد بداية المشوار في الظهور الرسمي للإعلام السوداني.. فحسب ما تكرم بتقديمه الدكتور معز فهي تكاد تكون خبيرة او خلينا نقول شغالة من بدري في المجال ده بالتالي مفروض تكون إتجاوزت حكاية التمارين دي وحكاية إنها يادوب في بداية المشوار فعمره الفني حسب ما تكرم به الدكتور فهو قبل اكثر من عشر سنوات وذلك بإفتراض انها مثلاً بدأت في العام 1996 وذلك لأن الدكتور اشار الى مشاركتها الرسمية في مهرجان دبي في العام 1998 يعني قبل 8 سنوات .. فماذا فعلت شروق طيلة هذه ال8 سنوات ؟؟؟؟
Quote: وبالجد لما اللاقي لي فنان أو فنانة بتدوا بي عمل خاص ليهم .. أول حاجة ببيت حسن النية لانو معظم القامو ف يالدرب دهـ أول حاجة لازم يبدوها ليك بي ( انساك أنت أنت بتتنسي ) .. وما شابه ذلك ..
يبقا يا تمبس اكيد وقطع شك كانت شروق في هذه الثماني سنوات تتغنى بي (انساك انت انت بتتنسي) و بي ( الامان) ومعاهم (اسمعنا مرة ) .. وليتك كنت سألت نفسك بطريقة اخرى ماذا كانت تغني شروق قبل ان يحتضنها الموصلي والمعز ويقدموا لها الأعمال والنصح ؟؟؟؟؟؟ هنا ربما سيختلف الوضع وتتغير الأقوال لتصبح ان شروق هي الفنانة الوحيدة التي وجدتها تخضع لعملية التوجيه من اجل تحسين الاداء و الإستقلال بالذات !!!!! فهمتني يا قريبك في النقطة دي ؟؟
Quote: يعني مسالة الشتارة دي . ما واردة بالشكل البتقصدو لانو الشتارة في الصوت ما بتشبه الشتارة في التعبير الحركي
انا ما قلت شروق شترا بالعكس ماسكا زمن صاح على الأقل في هذا العمل اللحني المعقد وصدقني البيقدر يأدي لحن زي ده دون الشتارة فمعناها زمنو كويس لكن انا إتكلمت عن النشاز في الصوت والذي لم يأتي مرة أو إثنين حتى نقول انه صدفة او إرهاق في الاداء ولكن يا تمبس مع كل طلعة عالية الزولة دي بتفشل في إنها تتخارج من الحتة دي وفي النهاية زي ما بتلاحظ بدت لمن تجي الحتة بتاعت الطلعة بتحاول تغير النغمة للواطي عشان تريح الحبال الصوتية وتمرق من ورطة الشد دي ..
Quote: كدي أنا الكلام دهـ بحولو لي خدر واشوف وجهة نظرو شنو .. تتذكر قبل كدا قال ليك شنو في ( ولد ابو صلاح ) لما غنا لي عثمان حسين .. ياريت خدر يورينا وجهة نظرو شنو ؟؟
في ولد ابو صلاح خدر قال كلام متناقض ففي المرة الأولى اداني إحساس بي إنو الزول ده كامل الاداء وإنو انا الطشيت شديد أو ربما خدر جاهو إحساس إنو ما انا المفروض اعلق على اداء ود ابو صلاح لأنو في المداخلة اللي بعدها بدا خدر يذكر بعض عيوب ود ابو صلاح وإمكن قال نفس الحاجات الأنا قاصدها بس ربما إختلفنا في التعبير عليها ... وبالمناسبة كلنا راجين خدر يورينا رايو في موضوع صوت البت ده والاداء للأغنية وما حا اكضب عليك إتكيفت من خدر شديد وهو يصارح الدكتور معز برأيه في موضوع شروق ده في وقت حقيقة تكثر فيه المجاملات بين الأعضاء خصوصاً عندما يكون المتداخل ومقدم العمل شخص في قامة دكتور معز (اكيد خدر ومعز فهموا قصدي شنو ) وصدقني ده اللي شجعني في مواصلة الحوار هنا والتحرر نوعاً ما في التنظير الذي ربما يكون (ساي) ...
Quote: واتمنى انو ما نستعجل بالحكم على شروق سواء كان سلبي أو إيجابي .. فقط ننتظر شوية ونشوف ونسمع عنها ونتابع ..
في كل مداخلاتي لم احكم على شروق كفنانة وهل ستستمر ام لا ولكن فقدت تكلمت عن الأغاني الإتقدمت هنا إضافة لموضوع عدم تدريج شروق في طريق الشهرة ولكن القفز بالزانة وبسرعة الصاروخ لولوج عالم الغناء في خارطة الغناء السوداني وخصوصاً النسائي منه ..
Quote: كدي حاول اسمع كلمات دي .. واشوف رايك شنو:
طبعاً يا تمبس انا اول مرة اشوف الحلقة دي واشوف اصلاً إنو شروق جات في النيل الأزرق لكن ما تتخيل اسة إتكيفت كيف إنو ياخ اضاني كويسة .. لأنو بالجد البت شكلها متأثرة بي ماجدة الرومي وبتحاول بقدر الإمكان تضع بعض اللمسات الرومية في طريقة الاداء وإمكن ده السبب الخلاني اقول الأغنية بتاعت الدكتور كانت حقيقي تناسب ماجدة الرومي لتظهر بشكلها الافضل ..
تخريمة : غايتو كان خدر خزلني وبقا معاكم فيا دكتور معز روني بتاع الساعة كم ؟؟؟ دي مارادونا عديييييييييييييييييل كده
05-24-2006, 07:54 AM
tmbis
tmbis
تاريخ التسجيل: 10-19-2002
مجموع المشاركات: 24862
العزيز جدا صديقي نشأت الإمام تحيات بالكوم .. ومشتاقين د. معز .. متابع معاك وخليك هنا لانو البوست دهـ محتاج ليك شديد .. عمــــر .. طبعا حرقت لي( الاندومي ) .. وانا زايغ من مشروع تسخين ( الفا، صول، لا ) زي ما عارف لسه ما تأهلنا للدوري الممتاز ( لسه بنلعب في الليق ..الله يهديك بس ..
Quote: إلا إذا كنت تقصد بداية المشوار في الظهور الرسمي للإعلام السوداني..
Quote: مفروض تكون إتجاوزت حكاية التمارين دي وحكاية إنها يادوب في بداية المشوار فعمره الفني حسب ما تكرم به الدكتور فهو قبل اكثر من عشر سنوات
بي صراحة انا الحته دي ما قريته والله .. انا كنت مركز على انها أول مرة تظهر في الوسط دهـ على اساس أنو العمل في الكاسيت دهـ أول مرة يقدمه للمستمعين .. حتى وإن كان دي ما مشكلة كبيرة للتقيم .. لانو الكتير من الفنانين المتمكنين وخبرتهم بالسنين في المجال دهـ والواحد فيهم لما يقول الحرف بي صوتو .. بيضربو زي ما جابو الخواجة في البيانو .. برضو بنحترمهم في عمل وفي عمل تاني بيكونو زي ( الو ا ط هـ ) .. وما زلت انا منحاز لي شروق وفي انتظار اني اسمع العمل مكتمل ويا حبذا لو كان باوركسترا كاملة ومصر برضو على انو حكاية الصوت دي يمكن معالجته بشكل اكاديمي بالاضافة لي الملكة الفطرية العندهــا..
Quote: وليتك كنت سألت نفسك بطريقة اخرى ماذا كانت تغني شروق قبل ان يحتضنها الموصلي والمعز ويقدموا لها الأعمال والنصح ؟؟؟؟؟؟
كويس .. أنا هنا بركز على حاجة معينة طالما أنو شروق بدت بداياته دي زي ما ذكرت قبل كم سنة وكانت هي بعيدة جغرافيا عن السودان وعن الوسط الفني ولونية الغناء السوداني اكيد بتكون اتاثرت بعوامل كتيرة محيطة بيها وزي ما ملاحظ اللونية الخليجية الامتازت بيهاأو السمة المميزة ليها في طريقة الاداء في نموذج ( كلمات ) وفي نموذج تاني لعبد الرب ادريس ( ليلة عمر ) ماتسرح ما عمر أنتراجع الملف المرفق .. يعني نحن نحاول نمسك من هنا من خلال التجربة دي واظنك اتفقت معانا أنو اللونية دي ممكن تعكس جانب تاني من طريقة الغناء . وممكن برضو تلقى قبول عند المتلقى الغير سوداني زي ما عملت ( اسرار بابكر ) قبل كدا .. تبقى في نقطة مهمة مسالة أنو تتنقل من مساحة الغناء بي السباعي والمفردة .. لي الخماسي بتاعنا ( العادي ) .. وما تجي تمسك لي في الخماسي والسباعي دي تقوم تفتكرني الماحي سليمان .. خليها تمر مرور عادي .. اها قلنا النقلة النوعية من مكان لي مكان .. وتوظيف الصوت زي ما عملت في اغنية ( عيش معاي الحب ) في نفس الحلقة .. شي ما ساهل يعني التعود والانتقال او الجميع بين اللونيتين بصرف النظر عن إجادة ياتو واحده فيهم اكتر من التانية. فهمتني؟
Quote: لكن انا إتكلمت عن النشاز في الصوت والذي لم يأتي مرة أو إثنين حتى نقول انه صدفة او إرهاق في الاداء ولكن يا تمبس مع كل طلعة عالية الزولة دي بتفشل في إنها تتخارج من الحتة دي وفي النهاية زي ما بتلاحظ بدت لمن تجي الحتة بتاعت الطلعة بتحاول تغير النغمة للواطي عشان تريح الحبال الصوتية وتمرق من ورطة الشد دي ..
طيب كدا وقعت لي يا عمر في نفس المكان القلتو قبيل .. عن أنو المسالة محتاجة لي شوية تكنيك في التعامل مع امكانياته الصوتية وبالذات مسالة أنها كيف تتنفس وكيف تقيف في المكان المفترض تقيف فيهو وكيف ما تورط نفسها زي ما قلت في مكان ما مفترض تدخل ليهو .. وهنا دي المرحلة القلنا انها عايزه فيها توجيه ومساعدة طالما انو مافي ( نشاز ) وطالما انها ما بتضرب ليها حاجة بره السلم المكتوب فيهو الكلام والموسيقى وبيحكمه فيهو التوزيع..
Quote: بدا خدر يذكر بعض عيوب ود ابو صلاح وإمكن قال نفس الحاجات الأنا قاصدها بس ربما إختلفنا في التعبير عليها ...
يا عمــر.. ياخي نحن الناس ( الجرباندية ) ممكن نحس الحاجة فعلا بالطريقة العادية وبتكون بتلاقى ليها حاجة مقابلاها اكاديميا منا قادرين نعبر عنها بالطريقة السليمة بعداك بنقوم نركز فيها شديد .. زي ( الترزية ) الظهرو في الفترة الفاتت الواحد يكون جايب ليهو بتاع اورغ وعامل ازعاج وفوضى وزلزال شديد جدا .. يدخل في مكان كدا يجيب ليك صوت قاطعو من راسو .. تسالو ده شنو .. يقول ليك .. عايز ( اهـــرمن ) يا يقول ليك دي بسموها ( هرمـــنة ) يكون سمع الهادي حامد مثلا أو محمد البدري بيعمل الحاجة دي وهو في قمة الوعي بي احساس كامل .. وبي اكاديمية عالية وصوت ( مصغول ومدرب ) يعني لما يضرب الهارموني بيتطابق مع نفس امكانيات الالات المصاحبة والتوزيع .. وما بيزوغ لي أي مكان تاني .. انا بالمناسبة عجبني كلام خدر المرة الفاتت لما اشتغله معاك نوته وقال ليك ود ابوصلاح قدم العمل في سلم عثمان حسين السابق لما كان في عز نضارة صوتو ووضح لينا أنو امكانية محمد ابوصلاح ما بتاهلو أنو يعمل الحاجة دي مقارنة بي صوت عثمان حسين في الوكت داك .. وفي نفس الوكت احتفظ لي محمد بكامل حقو الصوتي في انو صوت متمكن ويرجى منو الكتير ..دهـ الخلاني اشير لي كلام خدر.
Quote: وبالمناسبة كلنا راجين خدر يورينا رايو في موضوع صوت البت ده والاداء للأغنية وما حا اكضب عليك إتكيفت من خدر شديد وهو يصارح الدكتور معز برأيه في موضوع شروق ده في وقت حقيقة تكثر فيه المجاملات بين الأعضاء خصوصاً عندما يكون المتداخل ومقدم العمل شخص في قامة دكتور معز (اكيد خدر ومعز فهموا قصدي شنو ) وصدقني ده اللي شجعني في مواصلة الحوار هنا والتحرر نوعاً ما في التنظير الذي ربما يكون (ساي) ...
انا برضو والله في انتظار خدر يوقع لينا الكلام دهـ ، ومن جهة تانية أنا عايز واحد فيكم الاتنين عايز اعرف العادي فيكم منو هنا الليلة
Quote: في كل مداخلاتي لم احكم على شروق كفنانة وهل ستستمر ام لا ولكن فقدت تكلمت عن الأغاني الإتقدمت هنا إضافة لموضوع عدم تدريج شروق في طريق الشهرة ولكن القفز بالزانة وبسرعة الصاروخ لولوج عالم الغناء في خارطة الغناء السوداني وخصوصاً النسائي منه ..
تمام يا عمر وقعت لي وجهة نظرك .. واضيف برضو أنو عقد المقارنات لسه ما بنقدر عليهو .. نستمع ليهاوننتظر .. والالبوم مليان خاصة وأنو اتعامل معاها كتاب كتار يستحقون أنو نستمع ليهم الكتيابي ، مدني النخلي والكوباني بالاضافة لي عمل د. معز عنوان الالبوم..
Quote: طبعاً يا تمبس انا اول مرة اشوف الحلقة دي واشوف اصلاً إنو شروق جات في النيل الأزرق لكن ما تتخيل اسة إتكيفت كيف إنو ياخ اضاني كويسة
تعرف انا كان ممكن اتغاتت عليك واعمل ميت بي الملف بتاع كلمات البيظهر تأثره بي ماجدة الرومي لكن قلت ياود خليهو يمتعني شوية ..
Quote: غايتو كان خدر خزلني وبقا معاكم فيا دكتور معز روني بتاع الساعة كم ؟؟؟ دي مارادونا عديييييييييييييييييل كده
غايتو كان عايز كلامي .. شجع ( الصفر ) من حسع دي خدر ما ح يبرد بطنك
05-24-2006, 08:39 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
كان تعليق الدكتور الماحي سليمان على صوت شروق انو صوت في غاية الجمال وبه أبعاد رهيبة
هذا ما ذكره لي بالنص
وبعد الضجة التي أحدثها أداء شروق اتصلت بأنس العاقب وسألته عن رأيه في صوتها فقال أنه لم يسمعه ووعدني بالذهاب لقناة النيل الأزرق والإستماع لصوتها من نفس هذا التسجيل الذي لم يعجب عمر
ومساء أمس (صباح اليوم) تحدثت مع الدكتور أنس العاقب فذكر لي بالنص الآتي:
إنت عارفني يا دكتور ما بجامل في الحاجات دي على الإطلاق
وأنا ذهلت بصوت شروق وحقيقة به إمكانيات هائلة
وح أقوم على كده أعيد توزيع أغنية مع الأيام
(وهي أغنية من كلماتي وتلحين أنس العاقب) لتلائم صوت شروق وسأقوم بتسجيلها وارسالها لكم بالـ DHL
ده كلام ناس متخصصين صوت
وده برضو رأي حمزة سليمان الذي يشرف على انتاج الألبوم بتاعها
ورأي د. كوباني..
أما العملاق محجوب شريف فعندما استمع لها في زيارته للبحرين قبل أيام أعجب بصوتها وأدائها أيما إعجاب ووعدها بقصيدة خاصة لها من كلماته
ومن قبل أتت الإشادة بصوتها الجميل من شاعرنا الكبير عبد القادر الكتيابي والذي منحها أكثر من أغنية
وكذلك من الرائع مدني النخلي الذي اتصل بي من السودان بعد أن استمع إليها في النيل الأزرق
والقائمة تطول..
ده طبعاً كلو كوم ورأي أستاذنا وحبيبنا الموصلي كوم تاني
05-31-2006, 10:19 AM
Elmosley
Elmosley
تاريخ التسجيل: 03-14-2002
مجموع المشاركات: 34683
الصديقان تمبس و عمر الفاروق نقاش كليكما مشروع وجيد وكل منكما له الحق في ابداء وجهة نظره بناء علي مثلنا السائر (يغني المغني وكل على هواه) وحقيقة الامر أدهشتني الرؤي الواضحة لعمر الفاروق وقدرته علي ان يبني نقده علي اساس سمعي جيد كما أدهشتني دفوعات تمبس التي تقرأ ليس الحاضر فحسب ولكن المستقبل علي الاخص ويبدو أن تمبس من حزب (الموصلي) قرأءة الفنان علي مدي زمني أوسع فمن منا نحن الفنانون لم يخطئ في الاداء ؟؟ ظروف كثرة قد تجعل الفنان في لحظةما غير قادر علي أداء تعبير فني محدد وقد حدث ذلك لي كثيرا في حفلات وتسجيلات خاصه خصوصا عندما أغيب من الغناء لفترة أو عندما أكون نفسيا غير مرتاح أو عندما أكون مرهقا ولكن بالنسبة لشروق فلننظر ماذا تغني فهي تتغني باغنيات شديدة الصعوبة ولكنها عميقة الاثر وفي هذا تحد كبير ستقدر عليه بمرور الايام وينضح ذلك الصوت بعطر من الجمال بالتركيز علي التمرين والممارسة.
ابو التا : تعرف يا تمبس غايتو انا وانت شغالين ننظّر ساااااااااااااي الخوف يجي واحد ناقش علم موسيقى ويطلعنا انا وانت ضاربين برة التختة لكن والله سودانيز اون لاين ده جميل ياخ .. ما تتخيل انا اسة مستمتع بالنقاش معاك كيف هنا .. تعرف يا مان يعني لو لاقيتك عدييييل وبراك عارف المسافة بيناتنا فركة رجل لكن صدقني ما حا اكون مستمتع قدر ده وحتى لو لاقيتك اصلو ما حا افتح معاك الموضوع ده ..
Quote: عمــــر .. طبعا حرقت لي( الاندومي ) .. وانا زايغ من مشروع تسخين ( الفا، صول، لا )
انت يا زول اتنازلت عن مشروعنا الحضاري برنجلز والجبنة والطحنية خصوصاً وإنك زول قريب من بندة !!!
اها نرجع للدواس والتنظير وعمر الفاروق مركب مكنة محمد عبد الوهاب ... انا المرة دي يا تمبس حا اجيك بي نظرية كش من ورا ..وحا ابدا من اخر حاجة انت كتبتها .. حا ابدا من اخر فيديو وضعته لي ششروق .. اها يا تمبس بالجد جد هنا البت دي اقنعتني بي إنها غناية ولاحظ حا اقول ليك غناية لكن ما حا اقول ليك اقنعتني بي إمكانياتها الصوتية .. بالجد البت دي هنا ابدعت في اداء الأغنية بصورة يحسدها عليها الموسيقار عبد الرب إدريس نفسه ولكن كدي تعال كده وبي رواقة وتنظير نعرف ليه البت دي اجادت الأغنية دي كده .. وهنا يا مان ما تعصر علي شديد لأنو انا حا ابني كلامي على الحاسة السادسة مع ربط بعض المعلومات من كلام دكتور معز واضيف ليهم وجهة نظري الخاصة .. دكتور معز ذكر في السيرة الفنية لي شروق انها شاركت في برنامج نجم الخليج ووصلت للدور قبل النهائي كويس معاك .. يبقا قطع شك يا تمبس حا تكون معظم المشاركات إن لم تكن كلها التي تغنت بها شروق كانت اغاني خليجية واكاد اجزم ان هذه الأغنية ستكون واحدة من الاعمال التي قدمتها شروق في المسابقة وهنا انا حا اقول كلام حا يكون في صالحك ( والله كنت داير اتغاتت زيك وما اقولو ) وهو إنو شروق شكلها اتمرنت على الأغنية دي كتير وخصوصا وانك عارف كيف في برامج المسابقات العربية دي الموسيقيين واصحاب الاختصاص بيتعبوا شديد مع المتسابقين لحدي ما يوصلوهم مرحلة إجادة الأغنية (شايف قبضتني بي حكاية التمارين مش ؟ ) لذا اتوقع إنو شروق تمرست على اداء هذه الأغنية كثيراً .. نقطة مهمة تانية يا تمبس وهو إقامة شروق في الخليج مما يعني تأثر لهجتها كثيراً بالغناء الخليجي بل وربما لو سألنا شروق لقالت ان فنانها المفضل سيكون محمد عبده او ابوبكر سالم هذا ان لم تكن انقادت مع الموضة وقالت شمس او نانسي عجرم اللبنانية .. شروق إذن تعاني حتى الان عدم القدرة على التحول السريع بين الغناء الخليجي والسوداني او زي ما قلت انت موضوع السلالم ده .. وتأكيداً لي كلامي لاحظ كيف يؤدي معتز صباحي نفس هذه الأغنية ..ستجده الاداء قمة في الروعة ربما تفوق فيه على شروق نفسها وهنا نرجع لإستقرار معتز بالسعودية بالرغم من ان معتز يحسب له انه حتى في السعودية كان كثير التأثر بالغناء السوداني لذا سريعاً ما تأقلم مع سلمنا ... ولاحظ العكس لمن فنان سوداني يحاول يغني اغنية عربية او خليجية لاحظ كيف بيكون الاداء ضعيف حتى ولو اعتمد على النوتة الموسيقية ودونك اداء وليد زاكي الدين لأغنية زيديني عشقاً والتي في كثير من الاحيان ينسى نفسه فيغنيها بي الإستايل السوداني... نوعاً ما تجيد امال النور الغناء لسيدة الغناء العربي (فيروز) وانا اقول فيروز لأنها تستحق هذا اللقب ايضاً وإن كنا نعيب على امال النور إنخفاض روعة الاداء في اخر تسجيل قامت به مع السمندل فلم تكن تلك امال النور التي كانت تغني عصفور طل من الشباك و خبيني جمبك خبيني ..وايضاً محاولات منال بدر الدين ونهلة عبد المنعم في حين كان الفشل زريعاً لسمية حسن في ابوريت الحلم العربي !!!!! اما رجالياً فحدث ولا حرج فقط تغنينا بالاغاني الخفيفة توأم روحي وسفر سفر سفر وحتى ود اللمين لم يكن بتلك الروعة التي وصفها به الناس فاقنعوا انفسهم بأنه تغنى بها افضل من اسيادها في تحيز اعمى واااضح ... ربما صغت هذا الحديث يا تمبس فقط لتوضيح ان انتقال شروق من العمل الخليجي للسوداني شبيه بمحاولة غناء الفنان السوداني للحن الخليجي حيث يكون فيه صعوبة ... ومشكلة شروق انها تحاول ان تبدأ من حيث انتهى الاخرون فبدأت بداية من العيار الثقيل وتعاملت مع شعراء كبار وملحنين عظام وربما يكون هذا سلاح ذو حدين فإما ان يطير بها للنجومية المطلقة أو يهوي بها إلى قاع القاع ... بالرغم من اننا كنا نعيب على فرفور غناء الجلابية واللبن ابو لي بي إلا ان فرفور ساق الناس بسيييييتة بسييييييييتة ولاحظ اين فرفور الان وماذا اصبح يغني ..الزيارة المهرجان ليالي المقرن .... واخيراً وصل فرفور ....
Quote: زي ما عملت ( اسرار بابكر ) قبل كدا ..
اها يا تمبس اسة وين اسرار بابكر؟؟؟؟؟؟؟؟؟؟؟؟ اسرار والله صوت ما فيهو اييييييي كلام لكن صدقني برضو ما درجت روحا وفجأة كده بدت تقدم اعمال خاصة بيها في محاولة لخلع العباءة التي تعود بها عليها الجمهور دون ان تختار الوقت المناسب فبدت اسهمها في الإنخفاض وبي صراحة كده مجاهد زاتو حش الفكرة شديد وبقا بينظر للبت دي كتير عموماً نبشر دكتور معز إنو تمبس ماشي كويس وغايتو لحدي بالليل كدي بيكون جاب راسي والشافني المداخلة الجاية كتبت لي عمر الفاروق اشاكلو مااااااااا كضب
05-24-2006, 09:14 AM
Rakoba
Rakoba
تاريخ التسجيل: 02-05-2002
مجموع المشاركات: 5814
Quote: بدت الفنانة شروق وهي من اسرة مريخابية والدها الاستاذ احمد ابوالناس اكثر اناقة ومظهرا خلال استضافتها مرتديا ثوبا سودانيا اقرب لشعار المريخ00 والخرطوم بلاشك علي موعد مع فنانة جامعية مثقفة وسيكون لها مكان متقدم في الساحة الفنية بالوطن بعد العودة الطوعية او في اجازة سنوية
اها كيف غناية ولا لأ؟
05-24-2006, 10:53 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: تعرف يا تمبس غايتو انا وانت شغالين ننظّر ساااااااااااااي الخوف يجي واحد ناقش علم موسيقى ويطلعنا انا وانت ضاربين برة التختة لكن والله سودانيز اون لاين ده جميل ياخ ..
يازول انا عارف أننا قاعدين ( نهرمـــن ) ( هـــرمنت ) ترزية زي القلتها ليك قبيل وعادي جدا ممكن حسع يجيك اي واحد يجرك من اضانك .. ويجرني من لياقة الفنله الـ ( لاكوست ) دي ويقول لينا امشو شوفو ليكم كورة تلعبوها .. لكن عادي يازول ( سودانيز أون لاين وطن ما لا وطن لــه) تعرف: في المتوسطة.. لما قصر الشباب كان بي خيرو .. مشيت أنا ومعاي اتنين اصحابي ـ قال الأولاد عندهم حس موسيقي وعايزين نطلع مزيكاتيــه .. لما وصلنا النافورة الجوانية قامت نادتني الجينات الوراثية .. عندي ( جدي ) لحدي ما اتوفى كان مركب مكنة أنو اقطاعي ومن ( طبقة النبلاء ) قمت غيرت رائي فجأة وقلت ليهم أنا ماشي اسجل في ( تنس الطاولة ) وبيني بينك أنا كنت واثق تماما أنو كان نحن التلاتة كدا كامل اهليتنا فينا عرق من ( شوبان ) ما ح يسجلونــا في قسم الموسيقى لو نقطنا النوته دي .. وبيني بينك انا ما قلت ليهم الحقيقة دي وكان في شوية دغاله مني لانو القسم دهـ بالذات الوكت داك مافي طريقة ليهو نهائي .. المهم مشيت انا معزز مكرم .. واصحابي الاتنين كانو محظوظين وعملو ليهم الاختبار الاولي بتاع تحديد انو عندك حاجة والا زول عادي .. بعد شوية الاستاذ بدون ذكر للاسماء مسكم الاتنين ووقف بيهم من بلكونة الطابق الخامس قال ليهم شايفين هنااااك النجيلة ديك ... في زول بيعلم الكراتية امشو قولو ليهو مرسلني ليكم استاذ فـــلان .. اهــا نواصل ..
Quote: اها يا تمبس بالجد جد هنا البت دي اقنعتني بي إنها غناية ولاحظ حا اقول ليك غناية لكن ما حا اقول ليك اقنعتني بي إمكانياتها الصوتية .. بالجد البت دي هنا ابدعت في اداء الأغنية بصورة يحسدها عليها الموسيقار عبد الرب إدريس نفسه
.. طيب ياعمر طالما هي وصلتك المرحلة دي فده معناتو انها قدرت تطلعنا من مرحلة انها نشاز لي مجيدة لي النوع دهـ تحديدا ( الشرقي ) عملية صعبة جدا والاصعب منو زي ما ذكرت اننا نجيدو على حسب مرجعيتنا العامية أو تعاملنا بالطريقة السودانية البعتقد الكتيرين عدم فهمهم ليها.. طبعا شروق اجادت المسالة دي لانها ربما تاثرت بالبيئة المحيطة واستمدت منها طريقة مخارج الحروف من خلال المتابعة أو ( الهرجة ) الخليجية .. ولو متذكر في مداخله ( بوست ست الريد) قلت ليك علاقة الفنان بالبيئة دائما هي البتشكلو .. وجبت ليك سيرة ( المندلين ) وأنو كيف الجماعة هناك ما بقتنعو بيك اصلووو لو ما شافوهو بي عينهم .. احتمال احساس شروق بالبيئة المحيطة بيها هو الخلاها من وجهة نظرك انها ابدعت .. لكن برضو تاني نرجع لي انو قادره تماما أنها تحجز ليها مكان مميز وسط الاغنية السودانية .. وبي اتفاق الكثير من الذكرهم د. معز من المتخصصين في علم الموسيقى..
Quote: وهنا يا مان ما تعصر علي شديد لأنو انا حا ابني كلامي على الحاسة السادسة
والله ياعمر مافي طريقة ياخ .. أنت الليلة ( حرقت ) لي كيسين اندومي ..
Quote: معظم المشاركات إن لم تكن كلها التي تغنت بها شروق كانت اغاني خليجية
Quote: وانك عارف كيف في برامج المسابقات العربية دي الموسيقيين واصحاب الاختصاص بيتعبوا شديد مع المتسابقين لحدي ما يوصلوهم مرحلة إجادة الأغنية (شايف قبضتني بي حكاية التمارين مش ؟ )
Quote: لذا اتوقع إنو شروق تمرست على اداء هذه الأغنية كثيراً ..
. ايوة كـــدا ..
Quote: شروق إذن تعاني حتى الان عدم القدرة على التحول السريع بين الغناء الخليجي والسوداني او زي ما قلت انت موضوع السلالم ده .. وتأكيداً لي كلامي لاحظ كيف يؤدي معتز صباحي نفس هذه الأغنية
.. تعرف كنت بتمنى أنو اسمعك أغنية ( عيش معاي الحب ) وبرضو كان الاداء قمة في الروعة أو ما بتحس فيهو بالنفس الخليجي خالص .. ( دهـ طبعا لو كنت بتثق في كلامي ). واتفق معاك أنو معتز برضو غناها بطريقة جميلة جدا لكن لاحظ الفرق بين أنو معتز ( سودنــة ) بي احساسو .. وشروق اشتغلته زي ما هي .. يعني هنا في فرق محسوب على معتز في صالح شروق إذا قام اداها مثلا في ( دبي ، ياخميس مشيط ) ممكن واحد عاادي يقول ( وش فيهو الزول ) بينما العكس ممكن يتقبلوها من شروق .. وبي نفس الطريقة ممكن كان غناها معتز في نادي البياطرة ناس ( عابدين واسامة أبو الروس ) يصفقو ليهو شهر لي قدام .. وبرضو كان ادته شروق في نفس المكان برضو بتلاقي نفس الاستحسان دهـ. أما تجربة محمد الأمين في الدوحة في ( ياناعم العود ) لطلال مداح فدي اثبتت نجاحه مية المية أنت ما سمعت الناس دي كانت بتصفق قدر شنو وقربو يكسرو ليهو المسرح؟؟ انا في بورد عكس الريح ضربت مثل تاني بي حنان النيل في أغنية خليجية من التراث اسمها ( شويخ من أرض مكناس ) سمعتها عند بحريني اسمو على الجميري برضو كان مع سمية حسن في الحلم العربي .. وبرضو حنان ادته بي حرفنة شديدة مع مصاحبة اوركسترا السمندل وبرضو ادهشت فيها الجمهور شديد.. تجربة وليد زاكي الدين للاسف ما سمعتها والله .. المرحوم سيد خليفة كان عندو تجربة في أحدى المهرجانات العربية تغني بمصاحبة فرقة موسيقية شرقية كاملة بقيادة الموسيقار ( هادي بقدونس ) برضو كان الاداء اكتر من مشرف .. تجربة اسرار بابكر برضو .. وبعديها طبعا اختفت كعادة كل من يظهر في الساحة .. اما آمال النور دي حاجة تانية يا عمـــر والكلام عنها بيحتاج لي زول متخصص ما زينا نحن الناس الساكت ديل .. ومنال بدرالدين برضو يحليله.. نهلة عبد المنعم عرضت ليها اكتر من عمل هنا وكان شاهدج على انها محطة لابد من الوقوف عندهــا .. لكن ظروف هجرتها ابعدته كتير من الساحة .. سمية حسن .. بالرغم من اكاديميته العالية جدا ونجاحه في الوسط السوداني إلا أنو برضو كانت جيده بعض الشي في الحلم العربي والشي الجميل أنها مثلتنا بالتوب السوداني الغايب ليهو فترة في المحافل العربية والعالمية..
Quote: غناء الفنان السوداني للحن الخليجي حيث يكون فيه صعوبة ...
صدقني ياعمر انا متأكد أنو ح تقدر .. ويا مستطاب سمعتها عند الاستاذ الموصلي .. وهي كلمات الاستاذ الكتيابي .. ومنتظر اسمعه عندها ح يكون شكلها كيف وده المحك الحقيقي .. غايتو ياعمر لحدي الآن انا مصر على أنو اسرار بابكر بخير بس يظهر انها مشغولة بي اشياء تانية ومتأكد انها لما تظهر بي نفس اللونية العودت بيها الناس ح تكون اكتر ثبات .. وبرضو ده بينطبق على شروق .. وبتمنى أنو الاتنين يقدمونا بشكل افضل واسرار عملته قبل كدا .. وشروق في نفس السكة .. ربنا يوفقــه وتثبت..
تمبس: كدي بي تحت تحت كده خت لي اللينك حق الحفظ لي اغنية ليلة عمر دي وبالله اعمل فيها ما شايفني وانا بطلب الطلب ده سمح ؟؟؟ طيب انتو من قبيل ما تجيبو لينا الزي ده
05-24-2006, 09:20 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
شوفو انا بعد خلاااااااااااااص قربت اقتنع ليكم بي شروق اها قام جا راكوبة اداكم الضربة القاضية والبت طلعت مريخابية !!!!!!!!!! فعندكم واحد من إتنين يا دكتور وتمبس: 1- تمرقوا راكوبة من البوست ده سريع على ان يقدم إعتذار واااااااضح وصريح وينفي مريخية البت
أو ..
2- بعد كده انا حا اخرمج وابدا من نقطة الصفر
اها الكورة في ملعبكم !!!!! تخريمة : اسة عليك الله في ذمتك كان شروق دي مريخابية يا راكوبة اها عاد علوية باروكة تكون شنو ؟؟؟
05-24-2006, 09:24 AM
Rakoba
Rakoba
تاريخ التسجيل: 02-05-2002
مجموع المشاركات: 5814
الدكتور معز : والله ختيتني في حتة بيخاااااااااااااااااااااااااا يعني اللستة الكتبتها دي والله لو قالت اماني تايوتا فنانة كبيرة ومطربة جماهيرية معناها كلامهم ببقا صاح فما بالك لمن يقولوهو عن شروق؟؟؟؟ هنيئاً لشروق هذه القلائد والوشائح والشهادات من العمالقة ولكن لابد ان تهتم شروق ايضاً بي ناس قريعتي راحت من شاكلة عمر الفاروق وان تضع كلامهم في عين الإعتبار.. نرجو ان لا تتوقع شروق بأن الطريق مفروش بالورود حتى في وجود هؤلاء العملاقة فالطريق امامها وعر ... لا نود تكسير مجاديفها بقدر ما نود ان تطور الأداء للافضل ونتمنى ان نسمع شروق في القنوات الفضائية العربية .. تخريمة : الأغنية يا دكتور معز بمزيد من الإجتهاد يمكن ان يتم وضع كليب لها ينافس في الشاشات العربية فالكلمة واللحن تؤهل لذلك وبمزيد من الإجتهاد والتمارين تضيف لها شروق اللمسة الأخيرة ...
ويا راكوبة الزولة دي هلالابيييييييييييييييييييييية وكان ما مصدقني اسأل عوضية عزاب
05-24-2006, 11:02 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: يا تمبس أنا عندي مسجلة كاملة من قناة النيل الأزرق
والله يا بروف دي زي ما سجلتها من التلفزيون احتمال أنو يكون حصل ليها حاجة في التحميل .. احتمال وارد برضو.. المشكلة أنو الملف الرئيسي في جهاز تاني .. في مدينة تانية وانا ما بقدر اتحصل عليهو حاول شوف الملف العندك وإذا في طريقة تحملو من جديد يكون كويس
05-25-2006, 06:39 AM
mohamed elshiekh
mohamed elshiekh
تاريخ التسجيل: 05-12-2003
مجموع المشاركات: 1276
Quote: الدكتور معز : والله ختيتني في حتة بيخاااااااااااااااااااااااااا يعني اللستة الكتبتها دي والله لو قالت اماني تايوتا فنانة كبيرة ومطربة جماهيرية معناها كلامهم ببقا صاح فما بالك لمن يقولوهو عن شروق؟؟؟؟
يا وهم كلامكـ ده ما صاح غايتو عندنا في المزيكه لو عندكـ رائ مخالف لي استاذكـ تقولو طوالي و تحكها معاهو لمن تجيب الدم بالمناسبه الاساتذه اعلاه كلللللللللللللللهم درسوني استاذنا الماحي درسني دراسات شرقيه + صاحبي و بريدو جدا واستاذ العاقب درسني هارموني لكن عندي رائ بقولو حتي لو كان مخالف ليهم
د: معز و تمبس و عمر اعتذر عن تأخري .. والله المشغوليه كتيره يادوب الليله انتبهت لي البوست .. و علي وعد .. غدا بتحليل و رائ في ( الامر الذي فيهو تستفتون )
سلام يا اصدقاء
05-25-2006, 06:54 PM
عزيز
عزيز
تاريخ التسجيل: 04-12-2002
مجموع المشاركات: 3290
وبعدين حنكون منتظرين منك رأي متكامل ودراسة في العمل
كل الحب والإحترام
يابروف ياعظيم
الحب كله والتقدير ليك
هذا تأكيد لوعد سابق وسأكون ممتنا لك ..
وأتمنى أن أسمعها فى تسجيلات من حفلات حية لأن الغناء الحى يظهر الأمكانيات الحقيقة للفنان
تسجيلات الأستديوهات الآن أصبح الكمبيوتر يلعب فيها دورا كبيرا فى إزالة أى ( إفيكت ) وفلتره للصوت وإضافات تقنية ورفع السلم الى درجة أعلى وكثير من فنيات التسجيل والتقنية المتاحة تجعل من العمل غير طبيعى .. والمقياس الطبيعى لأى فنان هو مواجهة الجمهور والغناء الحى ..
وصيتى لشروق أن تكثر من الأستماع للغناء السودانى وأن تهتم بدارسة الصولفيج الغنائى مع دارسة الصوت..
ستجد يابروف العنوان فى عكس الريح مع رسالة خاصة..
محبتى وإعتزازى
عبدالعزيز خطاب
05-27-2006, 01:04 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: يا وهم كلامكـ ده ما صاح غايتو عندنا في المزيكه لو عندكـ رائ مخالف لي استاذكـ تقولو طوالي و تحكها معاهو لمن تجيب الدم بالمناسبه الاساتذه اعلاه كلللللللللللللللهم درسوني استاذنا الماحي درسني دراسات شرقيه + صاحبي و بريدو جدا واستاذ العاقب درسني هارموني لكن عندي رائ بقولو حتي لو كان مخالف ليهم
يعني أسة انت خليت الشقة كلللللللللللللها وساكن في أوضة واحدة ؟؟؟ يعني يا خدر كلامي الفوق ده كللللللو تخليهو وتجي تكنكش لي في الحتة دي .. إنتو ناس متخصصين في المجال ده وبالتالي بيكون عندك الخلفية وقوة الحجة عن مقارعة الناس ديل .. انا لو الناس ديل جو زنقوني هنا بي مصطلحاتكم القاطعنها من راسكم دي بتبقا مشكلة فعشااااااان كده انا لمن لقيتك معاي في نفس الراي قلت خلاص انا اتكلم كلام اولاد الحلة ولو جا زول زنقني خدر يديهو في العلمي اها يا اللخو لمن انت ما جيت انا قلت اخفف شوية وكدي راجع مداخلاتي الفوق دي وبتقدر تاخد فكرة كاملة عن رايي في الموضوع مع العلم إنو الراي حقي زي ما قلت ليك راي مستمع بسيط ..
Quote: عوضيه عذاب !! يا هابط
هو جنس هبوط لكن !!!!! وإضطراري كمان ... كيف ليك .. ولسة ياما في الجراب يا حاوي فانا استمتع بهجيج اماني تنس وعلوية محطات وتهاني برينسة ..
Quote: سلام يا اصدقاء
طبعاً اخوك برة اللعبة دي مش؟
عموماً وبالجد انا شخصياً منتظر رأيك في الموضوع وصدقني ما عشان وافق شن طبقة لكن يا قريبك لأنو الموضوع اخد جانب تاني وبقيت انا في جانب وتمبس والدكتور في جانب تاني فزي خليتك انت حكم بيناتنا ولك الحق في استخدام الكروت الملونة مع تحديد الوقت الإضافي وربما نحتاج لضربات الجزاء لفض الإشتباك ..
تخريمة : مبدئياً كده وللضمان ... سلام يا صديق...
05-27-2006, 04:53 AM
خدر
خدر
تاريخ التسجيل: 02-07-2005
مجموع المشاركات: 13188
Quote: الحبيب الطبيب الاديب.. د. معز تمبس الغالي.. وفنانا طارق ابو عبيدة حضور انيق جداً في هذا البوست ذي الصاحب المتواضع.. وفعلاً امتعتمونا بالحوار الجميل الهادف.. والتحليل الرصين.. وجميل جداً ما يقوم به الاخ عمر الفارق من انتقادات، فهي تفتح نفاجاً للمزيد من النقاشات الثرة.. ساكون هنا.. للمتابعة فقط.. والاستمتاع
اخونا نشأت سلامات ياخي و شكرا علي المساحة الهادئه و النقاش الراقي من الجميع وياخي رائيكـ مهم عندنا يدل نعال ندلي بدلونا
عمر (الصديق) و تمبس باصاتكم جميلة .. استمتعت بيها جدا بالمناسبه يا عمر .. تمبس غالبكـ لحدي اسه
ما تخش يا عمر دقيقه انا عاوز المساحات التلاته الجايه
05-27-2006, 05:06 AM
خدر
خدر
تاريخ التسجيل: 02-07-2005
مجموع المشاركات: 13188
لمن علقت علي كلام معز فوق كان اعتراضي علي جمله ان شروق ستعيد صياغه الاغنيه النسويه في السودان وهذا حديث لا علاقه له بشروق و كنت سأقوله ايضا اذا كان العرض المطروح هنا هو حنان النيل شخصيا ... كان فقط اعتراض علي جملة بالنسبه الي مرفوضة تماما إذ لا ولن توجد من ستعيد صياغه الغناء النسوي في السودان ,, فدعامات مهلة العباديه و مني الخير و عائشه الفلاتيه و اخريات كافيه للاساس الذي جلسن و سيجلسن عليه كل شابات الجيل الماضي و الجيل القادم و هذا من باب الاقتناع بفن الرائدات اعلاه اولا و من باب التقدير و العرفان لتراث غنائي عظيم و شاهق
لم ارد افساد احتفاء معز بمثل هذا الجدل و اكتفيت بغمزه صغيره و معز التقطها و ذهب كل منا لحال سبيله .. وكان ذلكـ يكفيني تماما
05-27-2006, 05:35 AM
خدر
خدر
تاريخ التسجيل: 02-07-2005
مجموع المشاركات: 13188
نجي لي غناء الاخت شروق شروق عندها خامه صوت جيده زي ما سبقوني بعض الزملاء و لمن اقول خامه يعني المقومات الاساسيه متوفره و من المؤكد ان شروق ستضيف جديد و ستطرب حواسنا كما اطرب جمالها اعيننا فقط لو تمرنت بشكل جاد و مكثف لان واضح في اغنيات ( عيش معاي الحب - ليله - لهواكـ عافيه المطر ) انو الحجم المليان في الهارديسكـ كبير يا تمبس و ده بتضبطو التمارين و بالمناسبه شروق عندها كنز معاها في الامارات .. اخونا حمزه سليمان .. يا شروق اقبضي في حمزه قوي تمارين و بأستمرار و صدقيني حايمرق الجوهره من صوتكـ بسهوله فحمزه فنان جدا
بشأن التسجيلات اعلاه .. التسجيلات هذه لا تعطي رأي قاطع اولا و ثانيا نحن هنا لسنا من اجل الافتاء بصلاحيه شروق ام عدم صلاحيتها .. اعتقد اننا هنا للاحتفاء بمقدمها اضافه الي ان هذه اول التسجيلات التي نسمعها لها + انها كانت خايفه من الكاميرا فوارد جدا حدوث اخطاء و دي اخطاء عاده ما بتحسب .. بتزكر مره انو وردي في تسجيل اذاعي قال انو بخاف لحدي الليله كل ما يطلع المسرح فدي رهبه مسرح ساكت يا عمر يا حاقد
05-27-2006, 05:11 AM
tmbis
tmbis
تاريخ التسجيل: 10-19-2002
مجموع المشاركات: 24862
قضيه تانيه يمكن هي السبب الاساسي لدخولي البوست دكتور عمر اخوي .. لاحظت انكـ بصدد حمله كامله العتاد لتجهيز ودعم شروق اعلاميا و ده واضح من البوست ده + بوست اخر في سودانيز اونلاين + بوستين في عكس الريح العاوز اقولو انو شروق و تبعا للتسجيلات المطروحة اعلاه ليست في (الفورمه) زي مابقولو ناس الكوره لانو واضح انو التدريب مهم جدا او زي ماقال عمر الفاروق في تحليلاته اعلاه و بالمناسبه رأي عمر ده حقو تاخدوهو .. و عمر نفسو حقو تتعاملو معاهو كـ (بوينتر) انا قاعد اعمل كده كل ما اعمل لحن عندي ( عمر) هنا بمشي ليهو و بسمعو اللحن و بشوف رأيو شنو و بعد داكـ ما بعمل بي رأيو ليه .. زي رأي عمر ده هو السائد .. السائد الذي يجب مراعاته لكن ليس بالضروره الالتزام به وده طبعا لانو الفنان هو البسوق الناس موش العكس العاوز اقولو انو الحمله دي يا دكتور وانا بتابع في كتاباتكـ جاني احساس انكـ بتعلم في شروق ( ركوب العجله ).. لكن ولانكـ مستعجل عليها ..الحيحصل انكـ حا تدفرها لمن تقع بي الطريقة الانت ماشي بيها اسه دي .. حقو تشرب شروق للمستمعين قطره قطره .. مافي حاجه اسمها صناعه فنان .. في حاجه اسمها صناعه نجم و دي بتكون بعد تخطي مرحلة الفنان و شروق اسه في مرحلة الفنان دي .. حقو تساعدوها في التجويد و (الجقرله) الكتيره لحدي مايمرق صوتها بملامحو الواضحه و بعد داكـ تبدا الحمله الجميله اعلاه
شروق كل تمنياتي لكـ بمستقبل فني جميل قادم .. انا علي ثقة من انكـ ستصلين اليه دكتورنا .. شكرا لسعة صدركـ لنقدي
05-27-2006, 05:54 AM
خدر
خدر
تاريخ التسجيل: 02-07-2005
مجموع المشاركات: 13188
Quote: هل ما كنا نسمعه كان غناء مباشر أمام الكاميرا؛ ام كان تسجيلاً مهندساً؟
ملاسي ملاحظتكـ ذكيه جدا و خليتني ارجع تاني واسمع يخيل لي انو التصوير Playback shotting لانو في المقابله الي هي اتسجلت في نفس المكان .. المايكـ فيهو RAUS واضح في الوكت الفيهو تسجيل الاغنيات نقي جدا ولا شنو يا دكتور معز ؟؟
05-27-2006, 06:30 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
وان شاء الله تسمع عمل شروق المكتمل عما قريب وتشوف رد الفعل الجماهيري
والأنا براهن عليهو تماماً وبنيت من أجلو كل ما كتبت في الصحف
فشروق هي المطربة الوحيدة بين كل من استمعت لهم من مغنيات سودانيات على مختلف العصور من منحني استمتاعاً مدهشاً وطرباً لا يحد
هذا سواء كان هناك قصور في صوتها أم لا وأنا حقيقة لم أشعر بأي شيء من هذا القبيل
بل على العكس أرى أنه صوت في غاية الجمال ولم أجد له مثيل فيمن استمعت إليهن في السودان حتى الآن
لكن أكاديمياً فهو أمر لا أستطيع أن أفتي به
بالطبع هذه رؤية خاصة لا تقلل من استمتاع الآخرين ببقية المطربات عبر الأجيال الذين لا أنكر دورهم بالتأكيد لكنهم لم يسجلوا حضوراً كبيراً في وجداني مثل ما فعلت مطربات عربيات وغربيات ومثل ما تفعل شروق الآن..
طيب جيتكم صادي.. وعايز ابدا مع خدر المرة دي قبل شروق..
Quote: لمن علقت علي كلام معز فوق كان اعتراضي علي جمله ان شروق ستعيد صياغه الاغنيه النسويه في السودان وهذا حديث لا علاقه له بشروق و كنت سأقوله ايضا اذا كان العرض المطروح هنا هو حنان النيل شخصيا
... فعلاً كان من الواضح إعتراضك على جملة إعادة صياغة الأغنية النسوية واوافقك الرأي لكن بس في الحتة دي انا عندي وجهة نظر..
Quote: إذ لا ولن توجد من ستعيد صياغه الغناء النسوي في السودان ,, فدعامات مهلة العباديه و مني الخير و عائشه الفلاتيه و اخريات كافيه للاساس الذي جلسن و سيجلسن عليه كل شابات الجيل الماضي و الجيل القادم و هذا من باب الاقتناع بفن الرائدات اعلاه اولا و من باب التقدير و العرفان لتراث غنائي عظيم و شاهق
وما تحته خط هو مربط الفرس..!!! ما عارف ليي حسيت بيك هنا زي العصرت شوية على الجيل الجديد من المغنيات البنات وإن إفترضنا جدلاً إنو الأصوات اللي جات بعد ناس الفلاتية كانت مش ولا بد طيب ليه قلت ولن دي؟؟؟ هل لأنك خلاص عمل إطار للأغنية النسوية وكل حدودها فقط تلك التي رستها منى الخير والفلاتية ؟؟ ام هل لأنو ما قامت به الفلاتية ومنى الخير هو اخر دعامات للفن النسوي يمكن ان نصل ليها ؟؟؟ ام إنك ما بتعشم كتير في الأصوات النسائية القادمة بحكم التوجه التقليدي الذي ينتهجه جيل الفنانات ؟؟؟ طيب يا خدر نفس الكلام ده لو قمنا عكسنا الاية فيهو وجينا نتكلم عن الأصوات الرجالية وقمنا وضعنا الراحل مصطفى سيد احمد كفنان حاول ان يعيد صياغة الأغنية (ولا ادري لماذا لا تسمي الأغنية بالرجالية بينما توجد نسائية) فهل كنا حا نقول للراحل مصطفى سيد احمد إنو إطار الأغنية الرجالية وضعوهو كرومة وسرور ام نعتبر إنو مصطفى عمل ليهو إطار جديد ؟؟؟؟ طبعاً انا هنا مؤيد تماااااااااماً لي كلامك بي إنو ليست شروق من ستعيد إطار الأغنية النسوية لكن ده ما معناهو إنو ما ممكن تجي واحدة تعيد الإطار ده !!! نرجع لي موضوع الصوت ..
Quote: نجي لي غناء الاخت شروق شروق عندها خامه صوت جيده زي ما سبقوني بعض الزملاء و لمن اقول خامه يعني المقومات الاساسيه متوفره و من المؤكد ان شروق ستضيف جديد و ستطرب حواسنا كما اطرب جمالها اعيننا
انا صراحة ما قاعد اقدر أميز خامة الصوت الجيدة في العنصر النسائي لمن يكون صوت البت بيشبه صوت كل البنات أو بالتحديد صوت كل البنات البيغنو.. قلتها في مرة سابقة إنو معظم البنات السودانيات صوتهم بيتشابه شديد يعني اختك في البيت لمن تكون بتغني بيشبه صوت بت جيرانكم وبيشبه صوت واحدة معاكم في الجامعة عاملة فيها فنانة وبيشبه صوت تالتة تكون جات معزومة في قعدة في الحدائق وقررت تسمعكم الامان !!!! صراحة انا حسيت في اغاني شروق السودانية (اكرر الأغاني السودانية ) إنو صوتها من شاكلة بقية اصوات بني جنسي من البنات الفنانات وإمكن الكلام ده برضو خليتو ينطبق على سارة النور (يا تمبس ما تضاربني في سارة النور دي ومشيها لي سمح؟) طيب يا خدر عشان اوضح ليك فهمي بي صورة تانية حا اضرب ليك مثل بي بعض الفنانات العربيات .. يعني الأيام دي لو فتحت القنوات الفضائية حا تلقا اكثر من مليون بت بتغني واي واحدة شكل لكن لو ركزت في صوتهم تكاد تلقاهو بيتشابه وحتى ما بتقدر تميز هل هي صوتها سمح ولا لأ .. لكن تعال شوف من بين المليون صوت النسائي ديل حا تلقا إنو مثلاً اصالة نصري صوت مميز .. وحا تلقا ديانة حداد صوت مميز .. وحا تلقا فعلاً نجوى كرم صوتها جبلي .. وحتى اليسا دي بالمناسبة صوتها لو ركزت فيهو بالجد صوت حنييين ومميز بغض النظر عن الضجة الإعلامية الماخداها من جوانب تانية .. اها شوف انا قدرت ذكرت ليك اسماء كتيرة لكن بالجد في السودان الصفة دي ماف .. هاجر كباشي وبالرغم من إنها ما بتغني اغاني (دعامات اغنية نسائية ) إلا إنها صراحة صوت مميز .. وعابدة الشيخ بالرغم من إنو برضو مرات بحس بيها عندها إستايل غريب إلا أنو صوتها مميز .. امال النور صوت مميز .. حنان النيل صوت ملياااااااااااااااااااااااااااااااااان وبالجد انا حنان النيل دي بتديني إحساس إنو صوتها ما فيهو فراغ (ما عارف حا تفهم لي فراغ دي انا قاصد بيها شنو ولا لأ لكن ده فهمي بي العامية) ..
تخريمة :
Quote: ياريت اسه لانو ( لقاء ) نايمه و عندي زمن
عليك الله تاني لمن تجي ترد نووم لقاء دي لأنو عندي إحساس كده إنو في مداخلات كتبتها ولقاء صاحية خصوصاً حكاية تمبس غالب دي !!!
05-27-2006, 08:04 AM
خدر
خدر
تاريخ التسجيل: 02-07-2005
مجموع المشاركات: 13188
سلامات يا شباب .. عندي مراجعات صغيرة قبل البداية .. ..
Quote: شروق عندها خامه صوت جيده زي ما سبقوني بعض الزملاء و لمن اقول خامه يعني المقومات الاساسيه متوفره و من المؤكد ان شروق ستضيف جديد و ستطرب حواسنا كما اطرب جمالها اعيننا فقط لو تمرنت بشكل جاد و مكثف لان واضح في اغنيات ( عيش معاي الحب - ليله - لهواكـ عافيه المطر ) انو الحجم المليان في الهارديسكـ كبير يا تمبس
تمام يا خــدر .. ده المحور الرئيسي في البوست دهـ .. والحاجات التانية دي مقدورعليها.. ..
Quote: بشأن التسجيلات اعلاه .. التسجيلات هذه لا تعطي رأي قاطع اولا و ثانيا نحن هنا لسنا من اجل الافتاء بصلاحيه شروق ام عدم صلاحيتها .. اعتقد اننا هنا للاحتفاء بمقدمها اضافه الي ان هذه اول التسجيلات التي نسمعها لها + انها كانت خايفه من الكاميرا فوارد جدا حدوث اخطاء و دي اخطاء عاده ما بتحسب .. بتزكر مره انو وردي في تسجيل اذاعي قال انو بخاف لحدي الليله كل ما يطلع المسرح فدي رهبه مسرح ساكت يا عمر يا حاقد
والله ياخدر دي برضو من الحاجات الختيته في بالي .. ونسيت أني اذكرهـ لانو احيانا الصوت كلووو بروح .. الكاميرا والمسرح ومواجهة الجمهور دي حاجات صعبة جدا .. يعني ياعمر عاملة زي كورة القــدم .. واكيد ياعمر عارف التفاصيل دي عامله كيف يعني مثلا لما تكون لاعب ضــد.. الهلال وأنت في فريق ( البواسل ) بتكون ماسكاك ( أم هله هله ) من قبل اسبوع وبطنك طامه زي العندكم ( تسميع ) .. ولما تنزل الميدان بتكون ما عارف اي حاجة .. بالرغم من أنك ممكن تكون رونالدينو.. .. راكـــوبة وخـــدر برضــو
Quote: وهدف جديد ويا عمر الصاعد هابط
كلام اقولو لأول مرة .. بالمناسبة عمر الفاروق .. يمتلك موهبة صوتية خطيرة جــدا ربما هو ما يكون عارفــه .. واحتمال يندهش من الكلام دهـ .. وكــدا ياراكـــوبة غالبنكم تلاتة صفر.. ياعمـــر .. كنت عايز اصنف ليك خامة الصوت لكن بس خفت عليك د من ناحية ومن ناحية تانية خايفك تسمع كلامي دهـ .. تمشي تكلم ( مصعب ) تطلعو شيرنق تشترو ليكم أورغ Yamaha وبعد يومين نسمع بيك في حفلة في الفحص الدوري .. ويسموك ( عمر الحائر + مصعب المانيا )
Quote: ممكن يا تمبس و دكتور معز و الشباب تنزلو لينا لحن استاذ يوسف الموصلي لانو مالاقيهو خالص في كل الاغاني اعلاه ياريت اسه لانو ( لقاء ) نايمه و عندي زمن
ياريت والله لو عندي يا مستطاب .. كنت استشهدت بيها برضو .. وخلص بلاي التزاماتك العائلية دي وتعال لينا
05-27-2006, 08:49 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: يعني ياعمر عاملة زي كورة القــدم .. واكيد ياعمر عارف التفاصيل دي عامله كيف يعني مثلا لما تكون لاعب ضــد.. الهلال وأنت في فريق ( البواسل ) بتكون ماسكاك ( أم هله هله ) من قبل اسبوع وبطنك طامه زي العندكم ( تسميع ) ..
والله دي كتلتها كتل !!!!!!!!! ياخ زمان لمن نكون لاعبين ضد القراقير كان عندهم مدافع إسمو " طبج " ما عارفك بتعرفوا ولا لأ .. اها اخوك كان بيلعب قدام وطبج ده زول ضخم خلاص وشلاليتو برة والله لمن يزيعوا التشكيلة والكوتش يقول لي يا عمر انت راس حربة تلقاني بقول ياااااااا الله طبج ما يكون لاعب اها يا قريبك لمن تخش وتلقا طبج ده اساسي بتكون عايز ليك اقل لي ربع ساعة وجع البطن يروح وطبعاً بتكون مدسي من الكورة وما عايز اييي زول يلعب ليك باص
Quote: كلام اقولو لأول مرة .. بالمناسبة عمر الفاروق .. يمتلك موهبة صوتية خطيرة جــدا ربما هو ما يكون عارفــه ..
مشكلتك يا مان سمعتني بغني وانا قاعد استحمّ وخدر سيد العارفين لمن تخش الحمام صوتك بيكون مباااااااالغة اها يا تمبس انا لمن اكون ماشي اغني في اي حتة بشيل معاي الحمام والغريبة قبل كم يوم بقول لي حميدة ياخ نمشي لي احمد ساطور ده عشان قالوا عندو إستديو بتاع صوت وبيجضم ليك تسجيل والله يخليك بس فريد الاطرش فغايتو يا ساطور جهز لينا البرنامج وشوف لينا الجهاز البيخلي الصوت سمح وانا وتمبس وحميدة جاييييين نعمل شريط وحا نسميهو : الزمن الرمادي
تخريمة : يا دكتور معز الحكم فكّ الكورة وبي الطريقة دي نحن حا نغلبكم ونبقا في : يا درمة درن لي ... ويا راكوبة نحن شعارنا بااااااااااااااااقووووووووووووووووووون في الممتاز
05-27-2006, 01:56 PM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Dear Friends This is a good post I will be back Tuesday to participate. Any way this discussion should be considered positive in Shurooge’s side. Anytime people have a conflict about an artist that is a great thing, but the bad signs that no one talking about you. I will come back Tuesday speaking analytically about this issue and thanks all.
05-27-2006, 05:06 PM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: ح تشطبو عدييييييييييل وح تعيد صياغتو من جديد
وتقعد انت تقول والله ما بعرف شنو..
انت عارف يا دكتور انا بعدين حا اعمل ليكم مع شروق دي زي ما محمد عبد الوهاب عمل مع الست ام كلثوم .. اسة اقعد اداقرها ليكم كده واشيل وانتقد فيها واشيل وانظر ليكم فيها وتقوووم كده يا دكتور انت تعمل لينا زي جمال عبد الناصر وتلمنا في لقاء السحاب واقوووووووم كده اهدي لي شروق عمل من الحاني يكون اشدّ من انت عمري تخريمة : يا دكتور نحن اولاد السير فريجسون ما تلخبط الكيمان وتودينا لي ارسين فينقر.. عندك بطاقة صفرا واي احتكاك تاني بوديك المدرجات
Quote: إذ لا ولن توجد من ستعيد صياغه الغناء النسوي في السودان
انا اعترضت في كلام دكتور معز علي الاطلاق الذي اختزل به خارطة المساهمات النسائيه في السودان (ارجو انكـ تنتبه للجانب اللغوي في الجملة) ده معناتو انو مساهمات رواد الاغنيه النسائيه قد وضعن الاساس الذي لا يحتاج احد الي اعاده صياغته .. قد يضيف او لا .. لكن في كل سيكون امتداد طبيعي لمجهودات الرائدات . إذن شروق و حنان النيل و هاجر كباشي و مصطفي سيد احمد و كل المبدعين الذين اتو في فترات لاحقة لرواد الحقيبه و المدرسه الفنيه الاولي و اغاني القبائل السودانيه الاصليه هم امتداد طبيعي وليسو الغاء .
Quote: وحا تلقا ديانة حداد صوت مميز .. وحا تلقا فعلاً نجوى كرم صوتها جبلي .. وحتى اليسا دي بالمناسبة صوتها لو ركزت فيهو بالجد صوت حنييين ومميز بغض النظر عن الضجة الإعلامية الماخداها من جوانب تانية ..
انت بس كان ختيت الرحمن في قلبكـ اسه حنان النيل صوتها مميز و هاجر كباشي صوتها مميز و كثيرات غيرهن والسبب طبعا انو المطرب/ه بتمرن و يغني كتير لحدي ما يلقي صوتو البحمل نكهتو و بصمتو و دي اهم حاجة في مسأله الغناء و دي هي الاضافه الانا بقصدها .. حاجه تانيه الفنانات العرب لقو الاهتمام (التمويل) اللازم + الاعلام الكبير وانتو شروق دي جاتكم هنا كسرتو مقاديفها .. ادوها فرصه ياخي و حاتشوف صوتها لو مابقي (جبلي ) تعال لومني
(2)
تمبس عمر الفاروق ده ما عندو غير لسانو ده .. ما قلت ليكـ فوق انا عندي (عمر) صغيروني كده بمشي اسمعو الالحان الجديده بعدين ماتنسي القاعده الذهبيه ياخي .. ( البعام) عمرو مايبقي ( ياي )
(3)
استاذ الموصلي
05-28-2006, 09:38 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
غايتو يا خدر ظهرتها عاااااااااااااااااااااااملة .. يعني ناس كجونكات وناس بعامات ؟؟؟ تخريمة : قررت الجلوس في مقاعد البدلاء لإكمال بقية المباراة من على المدرجات وجبنا ليكم المنجم استاذنا الموصلي .. ولحدي الوقت داك انا ما بقطف زهورك بس بعاين .. ويا خدر ياخ الأورغن والله شغلو سمح لكن عاد مدوزن ولا ما مدوزن دي ما بعرفا ليك
05-31-2006, 10:34 AM
Elmosley
Elmosley
تاريخ التسجيل: 03-14-2002
مجموع المشاركات: 34683
الفنان المطبوع خدر نعم لقد حدثتك كثيرا عن شروق وهي مبشرة جدا ولكن فانني أتفق معك بان الفنان لا يتكرر فمني الخير لن تتكرر والفلاتية لن تتكرر والبلابل بسجلهن الرهيب لن يتكررن وآمال النور بقدرتها الفذة نادرة المثال علي التنويع للجملة اللحنية الواحدة لن تتكرر وهذا قطعا لا يمنع شروق من أن تكون لها بصمتها الخاصةولا يمنع ايضا ملاحظاتكم فهي في صالحها وليس بالعكس. أو تذكر ياصديقي حينما تهجموا عليك في تجربتك الاولي مع شريط د الفاتح حسين (الغيم) وهم بعض رفاقك انهم لم يكونوا يعرفون بأن كل هذه الالحان الرائعة تموج بداخلك وهذا نتاج طبيعي للمارسة والتمرين والصقل والتدريب.
محبتي
الحبيب عزيز
ليس بالضرورة أن نقيس الفنان بالحفلات لان الحفلات أحيانا تكتنفهاظروف صعبة جدا (هسع بتقدر تغني في حفله جات فيها كتاحه في الخرطوم) كما أنه مهما كان فان التسجيل لن يجعل من غير المغني مغنيا فالناس اذنها قد أصبح أنظف من الماس. أتفق معك فليس شروق وحدها يلزمها التدريب المستمر بل نحن جميعا أليس كذلك؟؟
لو كنت مكانك لخضتها فأنت تملك ( الجرأة ) لقول ما تتقبله (اذنك ) كثيرون غيرك - وأنا منهم - يحتفظون برأيهم لأسباب كثيرة ربما من بينها الخوف من اتهامهم بأنهم " شُــتُر "..
أمثلتي على (جرأتك ) كثيرة .. ومن بين ما اتفقت معك فيه ( دون افصاح ): - رأيك في (صوت) الطفل الواعد ( العزاااااف ) حفيد ابو صلاح .. - رأيك في الضعف الذي شاب صوت الأستاذ الرائع محمد ميرغني ( الطروب ) في " أمسكي عليك عيونك ديل " التي جاد بها علينا الأخ راكوبة قبل أيام .. - وأخيرا رأيك في شروق الشمس ..
لهذا قلت بأنني سأعطيك صوتي تحيتي .. .
- ليتك تراجع الماسينجر الداخلي..
05-30-2006, 09:51 AM
Elmosley
Elmosley
تاريخ التسجيل: 03-14-2002
مجموع المشاركات: 34683
لقد كان قراري بالصبر وعدم الدخول في هذا البوست حكيما حتي أقرأ كل الأراء ولكني قد صدمت بالراي الغريب للاخ وجدي الذي لاعلاقة له بما نحن فيه فان كان هذا ديدننا فعلي النقد السلام. أناشده وكل الذين علقوا علي رأيه بسحب تلك البوستات فهي لاتليق بناقد ولا بانسانة غاية في التهذيب مثل شروق أبو الناس انسانة لايعرف الاخ مجدي قدرها ولا اسرتها الراقية علينا أن نكون حذرين في كتاباتنا . قد يتعذر البعض بانها قد أصبحت شخصية عامة ولكن حتي الشخصية العامة لا نتعرض لها بهذا الاسلوب غير الكريم. وسأعود لموضوعي
05-30-2006, 10:05 AM
Elmosley
Elmosley
تاريخ التسجيل: 03-14-2002
مجموع المشاركات: 34683
كانت أول مرة ألتقي فيها بشروق بالقاهرة في مطلع التسعينيات وسمهتها تتغني في حفل علي ما اذكر باغنيتي رساله الي أمي فشدني صوتها بتلك الخامة الطيبة وخاطبت نفسي قائلا لو قدر لي العناية الفنية بها لحققت من خلال صوتها فكرة فنية جيدة. وكنت وقتها قد خاطبت والدها الرجل الجميل فوجدت فيه انسانا يتمتع بوعي جدير بالوقوف عنده كثيرا وفي احدي زياراتي للخليج استقبلتني تلك الاسرة الكريمة بطريقة تنبئ باحترام للفن قل أن يجود الزمان به وقطعا للتعليم الاثر الكبير في ذلك وظل ذلك الامل يراودني كل ما تذكرت شروق الي أن جاءت رحلتي الاخيرة الي الخليج والتي لعب فيها صديقي وأخي العزيز بروفيسور معز عمر بخيت دورا بارزا بعد أن جمع بيننا هذا النت الذي يعج بالجمال وبالقبح أيضا. فوجدتها وزوجها الخليج في استقبالي بالمطار ومعها كوكبة رائعة من نجوم الادب والموسيقي اذكر منهم علي سبيل المثال لا الحصر الدكتور الشاعر عز الدين هلالي والشاعر الفذ عبد القادر الكتيابي وموسيقار الاجيال القدمة في نظري حمزه سليمان وغيرهم من الشخصيات الرائعة.
05-30-2006, 10:21 AM
Elmosley
Elmosley
تاريخ التسجيل: 03-14-2002
مجموع المشاركات: 34683
كان ياسر معترضا علي غناء شروق لانه لم يكن لديه الاحساس باهنالك حركة جادة للعناية بها فاشار لي بانه سيسمح لها فقط بالغناء ان كان ذلك سيكون تحت اشرافي وكان هذا شرف لي ايما شرف. وبدات في مشروعي معها فعرفتها الي البروفيسور معز عمر بخيت وبدأت معها مشروع اختيار مجموعه من الاغنيات وبدأت مع الشاب الفنان المطبوع أسامه علي ذو العقلية الموسيقية المطبوعة وصاحب الفكر الثاقب في مجال التعامل مع الموسيقي التحضير لذلك المشروع وعملنا فيه باخلاص لايتطرق اليه الشك. تحدثت مع شاعرنا الفذ الكتيابي وبعد سفري الي الدوحة طلبت من العزيز مدني النخلي ان يمدني بقصائد تناسبهافوافق مدني فورا. وقضيت مع أسامة ليال طويلة في التمهيد والاختبارات وزارتنا شروق في الشارقة مشكورة وبدأت ملامح المشروع تبين في ديموقراطية رائعة وتناسق جميل فالاغنية التي لاتعجبها تحذف فورا وهي قد كانت علي اتم الاستعداد للتدريب وكنت قد اتفقت معها علي أن بحث عن أستاذ لمادة الصوت والغناء لتدريبها علي أداء المناطق العالية والواطية في الصوت لان كل الفنانين يكون لديهم مثل تلك العيوب فيتم معالجتها بالتدريب العلمي. ونواصل
بمجرد وصولي الي أميركا بدا التواصل مع شروق بغية السير في هذا المشروع علي قدم وساق فاتصلت بي هي قائلة بان هنالك شركة اقتنعت بان تسجل لها وقد اتصلت بي من مكتب تلك الشركة اللبنانية فشعرت بجدية في صوت صاحب الشركة وفي صوت شروق جعلتني اعود الي ديوان شعر صديقي معز عمر بخيت الملئ بالقصائد من ذوات السهل الممتنع لاختار قصيدة تلحن خصيصا من أجل شروق لتقديمها للوطن العربي كما تنازلت عن قصيدة أخري كنت قد اقترحت موضوعها للشاعر الجميل مدني النخلي تتحدث عن جمال السودان وأهله لتكون المدخل لها الي اهلي الطيبين في السودان وتركت كل شيئ وبدأت في تلحين الاغنيتين في آن واحد وساعدني في ذلك أن كل واحدة منهما ذات اسلوب مختلف وموضوع مختلف وكنت أريد لاغنية مدني النخلي أن تصور كفيديو كليب ولاغنية بروف معز لتكون أغنية المهرجانات وأتصلت بالعديد من الجهات لاجل هذا المشروع الحلم بصناعة نجمة.
(بحب الليل ) وتحذير محب للفنانه الرائعه شروق ابو الناس؟؟؟؟؟؟!!!!!!!!
ولكن للاسف شروق لم تساهم في البوست الخاص بها وبصورة تحيير المابتحير فقد دخلت الي ذلك البوست مرة واحدة بينما خاطبها اناس كثيرون وتعللت بانها مشغولة في حين أنها كانت ترد علي بوستات أخري وفي نشاط تحسد عليه(فتوغوشت) (واتخضيت) وخفت أن تحذيري السابق لها بان الغرور ربما قد ينال منها مأرباوبالفعل نزل بوست آخر لاغنية أخري لها فسرحت فيه ومرحت كما تريد اذا (فالموصلي قد أصبح مشكلة)
كنت قد كلفت واحد من انجب عازفي البيز جيتار ليضع الخط الايقاعي بكامل هيئته الايقاعية للنقر والبيز والجيتار للأغنيتين إيمانا مني باهمية احترام التخصصات فوضع لهما خطوط غاية في الجمال لأنني كنت أهدف الى أن أقدم شروق الى العالم كله في حلة وصورة حديثة وقد اجتهد نادر وقدرت جهده ثم ارسلت الشكل الكروكي للعمل الي شروق من أجل ان تتمرن عليه وتتقنه وأيضا من أجل أن يساعدها أي كيبوردست في فهم المقام أوتغييره حسب مقتضيات المدي الصوتي لها. فماذا حدث جاء عازف أورغ اسمه مهند ولكنه يبدو أنه في عجالة مع شروق حاول التصرف في أغنيتي حسب طلب شروق ثم اشار الاخ سمبتيكو في بوست بعكس الريح الي أنه سمع لحنا فريدا من ألحاني وكلمات صديقي بروفيسور معز وهنا عرفت بان اللحن قد سمعه بعض الناس قبل الرجوع الى شخصي فطالبت شروق بارساله لي وعند الارسال فجعت بسماع شيئ لم يكن الشيئ الذي بنيته ولم يكن الشيئ الذي اردته فأرسلت تحليلا للعمل بصورة الي بروفيسور معز باعتباره صاحب النص البديع لاغنية (لهواك) وهاكم له بتصرف لأنه يتطابق تماما مع ما تفضل به الاخوان هنا
أخي العزيز ياسر والعزيزة شروق
Quote: أليكم تحليلي أولا أولا اشكر شروق علي مجرد المحاولة ولها أجر ذلك ولنأتي إلي التحليل من منظور اللغة العربية ممتاز جدا بل شكرا لتصحيح خطأي وذلك بتصحيح خبر (ظلت) وذلك بفتح كلمة (مسدلة) وكنت قد رفعتها كما، أيضا صححت كلمة (أدرك) التي فتحتها أنا وذلك بالضم وربما هنالك أخطاء أخري لغوية ارتكبتها دون وعي
المقدمة الموسيقية الجديدة لا لزوم لها البتة فهي تقليدية في الأغنية العربية كما أنها لا تمت بعلاقة حميمة لمتن اللحن. الهارموني لقد حاول الأخ مهند إن كنت قد تذكرت الاسم أن يغير الهارموني الموضوع المصاحب للحن الأساسي واعتمد علي حسه التذوقي فقط وفشل في خلق جو هارموني مناسب وأدخل ما نسميه Non Harmonic Tones مما أدي إلي جر شروق الحساس إلي خروج عن المقامية في كلمة (وانتصر القدر) و(دروب العشق) Out of Tune وهنالك عدة فنانين رائعون ولكن لديهم حساسية تجاه الأصوات الخارجة ونشاز الآلات منهم آمال النور وشخصي أيضا لذا فعدم المعرفة بالهارمونية يوقع عازفي الاورغ الجيدين في مثل هذه المزالق تغيير اللحن في كل من (وتدور في فلك المني) و(ونظرت حولك هائما هائما) أوقع التسلسل المنطقي فبدلا من أن تصبح هذه المنطقة هي القمة فقد انعكس الأمر وأصبحت السفح وشروق لا تريد أن تزور تلك الآفاق اللحنية العالية هذه ليست شروق التي أريدها، أن في ذهني شروق أخري كما أن تغيير السرعة ونوع الإيقاع قتل حيوية الأغنية وبذا فقد أنتهي اللحن كمعادل موضوعي للنص الشعري وأصبح غريبا عنه وافتقر إلي أهم عناصر التماسك فيه وتفتت إلي خلايا بعد أن كان جسما محسوسا ملموسا أحبتي هذه لمحات سريعة
ونواصل
(عدل بواسطة Elmosley on 05-30-2006, 02:31 PM) (عدل بواسطة Elmosley on 05-30-2006, 02:34 PM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة