|
|
 وكت الرجال الجد و النسوان الجد جا , شدو حيلكم تب.
|
وكت الرجال الجد والنسوان الجد جا شدو حيلكم
الســـودان بلدنا بخيره وشره وجباله وصحاريه ووديانه
الســـودان بلدنا وماعندنا غيرو تب وما كايسين لينا بديل غيرو
بلدنا كان أبينا وكان رضينا
نحن فاضل لينا شنو ولا عندنا شنو غير بلدنا والله ما عندنا التكتح والبلد دي منو البخاف عليها كان ما خفنا عليها نحن السودانيين كلنا, بي شماليننا وجنوبننا وشرقيننا وغربننا نحميها لازم كان رطنا رطانة وكان رطنا عربي وكان كتبنا وكان قرينا ياها بلدنا وياهو مصيرنا والبلد دي ياناس مابتبقي كعبة ولابتبقي سمحة الا بينا انحن نحن البنسويها ونحن البنصلحها ونحن البنخربا.
أها الوكت ده مو وكت ساهل ده وكت الرجال البصح بصح والنسوان البصح بصح وكت الرجال الجد والنسوان الجد يلا الراجل يبقي راجل والمره التبقي مرة والنربط حزامنا وننكرب تب, الوكت ده يا ناس السودان بدور الحكمة والصدق مع الناس ومع نفسك دي, أها إنتو دايرين سودانا ده يبقي صومال ولا بيروت زمان دايرين النيران تولع فيهو كلو من شمالو لي جنوبو ومن غربو لي شرقو, ديارين ده, ما كفانا الألاف الماتو في الغرب وما كفاية الملايين الماتو واتشردو في الجنوب والجيعانين في الشرق والشمال ما كفانا والله العظيم كفانا وأهلنا المساكين ديل والله ما بستاهلو القاعدين نسويهو فوقهم ده, الناس ديل ترباله ورعاوية ومنو الفي السودان ده من نمولي لي حلفا ومن زالنجي لي كسلا الماهو تربالي ولا رعاوي الناس اهلنا ديل القاعدين في الريف وفي الخلا والقاعدين يموتو من الجوع والمرض والحروب بساووا سبعين في المية من عدد شعبنا.
الليلة دي كان ماحكمنا العقل البلد بتضيع وبتخرب خرابا والله بعدو تاني ما بتصلح ونحنا كلنا عارفين البحصل ده بحصل لانو في ناس مظلومين ظلمتهم الحيكومات وما ظلموهم الرعاوية والترباله الماليين السودان وناس الحيكومات ديل همهم في كراسيهم ديل .
الشماليين كتلوا الجنوبيين والجنوبيين بنتقموا وبكتلو الشمالين والشماليين كتلو الغرابة والغرابة بدورو برضو ينتقمو والشراقة برضو بدورو ينتقمو والكلام ده مدور من زمـــان مو من الاستقلال وجاي من زمن المهدية وكمان قبالا وعشان كدي الساقية دي مدورة ومدورة وتب ماها واقفة علا الرجال والنسوان يكربو بطنهم ويقيفو وقفه الشجعان من أجل البلد دي ومن أجل الوطن ده, منو فيكم المابحب السودان ومنو فيكم المابسهر الليل كلو عشان يسمع ليهو خبر عن بلدو والله كان كضبتو علي نفسكم وغشيتوها مابينفع أنتو السودان ده كلكم بتعزوهو وبتحبوهو وياهو بلدكم عزكم ومحل أهلكم الطيبين وحبوباتكم الريحتن ترد الروح البلد دي بلدكم كلكم وانتو كلكم اخوان نفس الخلقة والاخلاق ومصيركم واحد واكلكم ياهو الكسرة والعصيدة كان بي اللبن وكان بي الملاح.
الناس بتدور تفرقكم بدورو يودوكم لي ورا وكان إنتو ماعرفين دي تكونو غبيانين ولا متغابين واللمتحان ده القاعدين نحل فيهو ده إمتحان مو ساهل ولكن والله مو صعب بالحيل بس بدورنا كلنا نقيف صف واحد ونتحد ونغفر ونتسامح كلنا مجروحين ومنكوبين عشان كدي أنا قلتا الوكت بدور الرجال الجد والنسوان الجد لانو التحدي كبير , أها إنت كان راجل جد عاين لي بلدك كلها زي مابتعاين لي بطن بيتك وسوي البتقدر عليهو واكتر عشان البلد تسلم وتبقي طيبة وكان إنتي مره جد قومي بي دورك ودورك أكبر من دور الرجال الجد جد ديل والمرة الجد هي البتحافظ علي بطن بيتها والسودان ده ياهو بطن بيتك الكبير.
يلا أنشروا التسامح والحب بيناتكم والله كلكم ناس طيبين وأقويا ومافي شي بغلبكم كان نويتو وصفيتو النوايا واتوكلتو علي الله , والناس البتقوليكم لابد من مواجهة الحقيقة قولولم الحقيقة بنواجها وكلو زول ياخد حقو واكتر والكرامتو إنداست بنعزو والجرحو كبير بنضمدو ليهو والإتيتم بنبقالو أم وأبو والجيعان فينا بنقاسمو الكسرة والرغيفة , قولولهم لكن كفانا كتال ودمار وموت خلاص تاني ماداير نسمع صوت الرصاص ومادايرين نبقي فرجة العالم كلو يتفرج فوقنا, والله الرجال الجد والنسوان الجد مابرضو يبقو فرجة وما برضو يظلمو اهلهم ويكتلوهم.
يلا ياناس من الليلة دي ابقو يد واحدة وضمدوا الجروح وعاينو للبلد الراجياكم دي.
|
|
 
|
|
|
|
|
|
|
|
Re: وكت الرجال الجد و النسوان الجد جا , شدو حيلكم تب. (Re: سامى عبد الوهاب مكى)
|
صديقى العزيز عبد الماجد
التحية لهذه الكلمات الجميلة..والتى لاتنبع ءألا من جميل بمقدارك
السقوط فى أتون النعره جهالة لن نقبلها فى حق أنسانيتنابدأ الوعى الذى غاب لبرهة يلملم أطرافه والمبادرات الخيرة تأخذ طريقها الواضح....
لأنك صديقى سأقول لك بأنى تعثرت..بأشتباهات خانقة داخل نفسى لكنى نهضت....
كن بجانبى..انت (ودرارى) القوس
نحتاجكم....
| |
|
|
|
|
|
|
|
|
|
Re: وكت الرجال الجد و النسوان الجد جا , شدو حيلكم تب. (Re: حاتم الياس)
|
الأخ الصديق الرفيق حاتم
والله أحس باختناقاتك و(المداولة) التي تصنع حوارا بين قناعاتنا وإفرازات الشر والإحتراب. وأعلم أن الجرح عميق ومؤلم ولكنك يا أخي حاتم أحد هؤلاء الرجال الجد جد الذين يحتاجهم الوطن والأهل والمستقبل وهاأنذا أضع يدي في يدك لنوحد دقات قلوبنا ومجاري الدماء فينا ونستعيذ بالله من شرور أنفسنا فالإنتقام عمل سهل والحكمة عمل شاق ينتهجه الرجال الجد والنسوان الجد.
لا عليك أخي الحبيب نحن جميعا معك وأنت كذلك معنا هنا في القلب والمصير والسلام والوئام
واصل الإنتفاض
مودتي وإحترامي
| |
|
|
|
|
|
|
| |
عبدالماجد فرح يوسف
حاتم الياس
nadus2000
Elmosley
فيس بوك
تويتر
انستقرام
يوتيوب
بنتيريست