|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
تمبس والشباب..
تحياتى وتقديرى..برجاء تزويد هذا البوست بوصلة وردى ووداللمين
...............
أنا بحــــب تابيدا بطــــرس !!!!
المسرح القومى ضاق بالحضور امسية الخميس 19يوليو الفين وسبعة ...
النيل يفيض فى هيجة مضرية يكاد يرشق السيارات الواقفة على امتداده شمال وجنوب المسرح...يرشقها بسره وسطوته وسحره..
فى منتصف الصالة جلس عملاق الاغنية والسودان كما آلهة النوبة وعظمائها واهراماتها...
صورته ومنظره وهو يجلس فى الصالة وامام جمهوره عاد بى الى صيف الفين واحد فى منزل السيد اسامة داوود عبداللطيف والبروفسور على شمو بصوته الفخيم يتحدث فى حفل استقبال الفنان الملهم لدا عودته المهيبة ...
البروف تحدث ان مايلفته فى شخصيته ليس فنه واضافته فى المجال وتلك محسومة جدلا..وانمامايلفته هو قوته وعزيمته ومضاءه الاشم...
محمدوردى فى يوبيله ..جلس الناس فى حضرته وطاب لهم المقام حتى بعدمنتصف الليل...
صعد الى خشبة المسرح..زيدان..كابلى..درماس..يتغنى كل واحد منهم بواحدة من اغنياته البديعة..ووردى حيث يجلس يشارك بمقطع ومقطعين وحالة مثل السحر ومس الجن تعتور الحضور الكبير..
ثم ..والناس سكارى وماهم بسكارى يعتلى الموسيقار وداللمين الخشبة وهو يطلب ان يقدم لحنا بالعود..يقول انه تعلم العزف على العود باغنيات وردى...
كاد العود يمشى على قدميه والجمهور فى جلجلة وشيتن يحير...ثم ..هو ووردى يغنيان (ابقى تائه والغرام يصبح حكاية)..غناء مثل حداء ياتى من بعيد ..من جوف كل واحد فينا...ومن جوف الحسناء الوزيرة تابيدا بطرس التى كانت وهى الى يمين وردى تردد كل اغنية من اغنياته عن ظهر قلب...
تابيداوزير الصحة حضرت مبكرا وغاب مسؤؤلون زوى صلة بالثقافة والفنون والمعنى الجميل..
تابيدا كانت نجما ساطعا ورمزا لمعنى الفن وسحره وتقدير الفنانين..
انا احب محمدعثمان وردى..واحب تابيدا بطرس اكثر..
خمسون عامافى صحة ابوالورود..وتابيدا..والفنانين..وجميعكم..
محبتى,,,
| |
 
|
|
|
|
|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: محمد عبدالرحمن)
|
Quote: والله العظيم قطعنا فيك ونحن بنحضر فى السهرة ..الجماعة قالوا دى
مافى حل الا تتسجل بكرة فى الاعادة ..قلت لبدرالدين يازول تمبس مابقصر
والحاجات السمحة دى مابتفوتو ..
|
والله يا محمد كنت طالع .. تلاتة تلفونات .. ثبتتني ..
يعني عايزيني كنت افوت المهرجان ده .. يامحمد ..؟
ياخي انا قاعد مصاقر التلفزيون ده علشان منـو .. ما عشان محمد الأمين ووردي ديل..
والله فعلا .. قون الدرون .. وقون الغلب النشلة الفي الزمن الضايع دي ..
ابتهجوا ياخ .. حق لينا الفرح ..
| |
|
|
|
|
|
|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: شهاب الفاتح عثمان)
|
Quote: والقمه السودانيه كلاكيت ثاني مره
والنتائج جميله و مرضيه |
يادكتور شهاب .. الأمور ماشة بشكل كويس .. مجرد ما اسمنا ده يتداول بشكل كويس .. ونكسر عقدة المصاروة ديل ، دي براهــا بالدنيا ..
وكويس انكم دردقتوهم .. علشان الضرب يكون مذدوج ..
شكرا يادكتور لمواقفك الاصيلة مع كل المنتخبات البتلعب بي اسمنا ده المحتاجين ليهو في المرحلة دي ..
واستمتع معاي بي وردي وأبو اللمين ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
السخف
انو تلفزبونا كالعادة
لم يقدم الحفل كاملا
كمان مسألة تعدد المايكات السخيفة دي ما بتخلص
لاحظ لمن وردي كا بباصي مع وداللمين
كان مايك التلفزيون بعيد وماسكو الواد!
البديع وجود كبيهم الاستاذ عثمان حسين
الله يديهم الصحه وطول العمر
وبعد الجيل ده
الاغنية السودانية
صفر كبير!
لي كم سنه ماسمعت لحن جديد اطربني
هل انا عندي مشكلة ؟
تسلمو
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Mamoun Ahmed)
|
Quote: السخف
انو تلفزبونا كالعادة
لم يقدم الحفل كاملا |
العزيز مامونك
دئاما نحن كدا .. وياخي مفترض ما تزعل وتفرح عديل طالما أنهم أخيرا طلعو من القوقعه بتاعت برامجهم القاطعنها من راسهم دي .. ياخي ليلة زي دي .. مفترض يرفعو ليها علم عديل كدا مش ينقلو لينا فيها مشرتمة ومقطعة ومبتورة ..
بعدين المسالة التقنية دي يا مامون .. انسى .. ياخي مايكات شنو يا مامون ..؟؟ تلفزيون معظم كوادرو مواليه وما مؤهله تتعشم في إنو يطلع منهم شغل جميل ..؟ لا اعتقد
افرحني ايضا وجود النيل الثالث .. الاستاذ عثمان حسين أو كما اسماه الإذاعي الكبير ذو النون بشرى .. كنت بتمنى اسمع صوت الاستاذ عثمان حسين .. لكن للزمن سطوته .. ويعود لينا الاستاذ بي صوتو الملائكي فما احوجنا أن نستمع لهؤلاء العمالقة .. الذين سطروا اسمهم بمداد الذهب في مسيرة الأغنية السودانية ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
ماذلت محروما من كل الإبداعات التي تتحدثون عنها ......
يوم 22/07/2007 .... أخوكم قادي ابداع ....
كورة المريخ ما حضرتها
كورة الهلال ما حضرتها
كورة وردي وود اللمين .... برضو ما حضرتها
لكن طالما في الحبيب تمبس .... مافي حجة بتفوتني
شكرا يا ولدنا ........ 
لكن ود اللمين عذب حنان العود
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: احمد معتصم الطيب)
|
العزيز أحمد المعتصم:
Quote: والـحـضـور كان مـنـتـعـش ومـتـفـاعـل لـدرجة كــبـيرة
ونـحنـااتـعـذبـناعـذاب الـسـنـيـن |
.. هي نفس الحالة اللاشعــورية الانتابتنا كلنــا .. احساس فرح غريب ونشوة حاضرة .. محلقة بيك في عالم تحس فيهو انك براك ..
صوت العملاق وردي مع حنجرة الباشكاتب والعود الغريب جدا
ونشوة الحضــور ..
أظنها دي حاجة ح تكون زي مذنب هالي بيظهر كل مية سنة..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Alsa7afa_30)
|
| Quote: يا جماعة في حد عارف الإعادة متين و الساعة كم؟؟؟ |
.. والله يا صحافة انا زيك كدا .. ما عارف الحاصل شنو .. مع اني ح انتظر الاعادة دي لانو الحلقة ما حضرتها من الأول ويظهر انو فيها اشياء كتيرة فاتت علي .. لكن بي مداخلاتك الجميلة والملفات المرفقة رجعتني تاني الفورمة .. بلاي شوف المواعيد كيف لو لقيت خبر ادينا ليها هنا..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: الفاتح يسن)
|
| Quote: ياتمبس لم يبقى في الوطن الرايح غير المحمدين وقلة قليلة والبقية تعرض خارج الدائرة حفظهما الله للوطن |
عزيزي الفاتح يس ..
مليون مراحب يا صاحب .. ولعل الأمور بي هناك رايقه
الوطن عايد يا الفاتح لا محالة .. وإن طال العذاب .. وح نبنيهو البنحلم بيهو يوماتي..
لا احسدك ولا احسد كل الحلوين المعاك .. فأنتم ايضا من وهبتونا في لحظات من عمر الزمان كل الجميل وأنتم من خلف الأستاذ محمد وردي تترجمون الالحان وتحولون الكلمات إلى نوته موسيقية .. كل حرف فيها سمفونية للخلود .. للجمال .. للوطن ..
هنيئا لنا بوردي .. وبالباشكاتب .
وهنيئا للوطن بهم.
| |
|
|
|
|
|
|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: omar altom)
|
| Quote: الله يخليك ياخ .تصدق انا سجلت الغنية بتاعت عافية (ياحنين) الغنتها في برنامج وليد زاكي الدين الاسمو كل الجمال !!!!مباااااااااااااااااااالغة غايتو كان داير تسمعها اول حاجة تقعد في الارض لانك any way ح تقع( دردرب) من الطرب والنشوة |
والله يا عمر التوم بتبالغ لكن .. التسجيل ده بالذات انا بفتش ليهو من زمن .. ياخي جيبو هنا إنت ما عارف البوست ده مفتوح لي عذابات الناس ..
بالتالي بنقبل منك أي أدوات تعذيب ..
| Quote: vhs اها الزول كان داير يرفعها في يوتوب يعمل شنو؟؟؟؟؟ |
. دي مشكلة كبيرة طبعا .. لانك محتاج لي تحويلة في الكمبيوتر . وعلشان تحوله في الكمبيوتر محتاج لي يكون عندك كرت فيديو .. وده هارد وير لازم تشتريهو .. يا يكون عندك لاب توب مجهز بالخاصية دي .. والمسالة جاره شديد يا عمر
لكن مبروك للهلال .. واتصرف لي في اغنية عافية دي بي اي طريقة .. القال ليك تكلمني منو ..؟
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
اسمع يا حبة والله برسلو ليك بالدرب عديييييل كدة مآآآآآآآآ عندك مشكلةانا ذآآآآتي احسن لي الشريط ده من يكون عندي لانو اليوم كلو قاعد قدام الفيديو وبس قآآآآآعد اعاين للبتعمل فيهو البت دي.البت دي مجنونة.والله العظيم مجنووو نة.
اسمع باقي الكلام خليهو في الايميل
مودتي
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
يا تمبس
انت بس وريني داير شنو!!!دايرني ارسل ليك الفيديو كاسيت بالبريد؟ولا احسن انقلو في سي دي وارسل ليك السي دي؟ولا شنو؟؟؟؟؟ انا قاعد في بوسطن وممكن ارسلوا ليك بال FEDX ولا ال TNT ولا DHL ما فارقة معاي وانت بعد داك ارفعوا في يوتوب عشان يبقي الطرب والنشوة overseas وعبر المحيطات.
تحياتي
| |
|
|
|
|
|
|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
العــــــذاب العذاااااااااب
يا تنبس هم بعملوا في شـنو و إنت لابـــد لي جنس شنو!
ياخي أنـا بسـمع و عبوني كـلها مرقرقة و مرات بنطنط و بعمل مايسترو
أكون جنيت؟ مـا مـشـكلة..الإبداع ده سبب من اسباب الوفاة عديــل مش الدسترة بس!
بالمناسبة مقطع خوفي منك ده قبل كدا غنوه سوا و برضو كـان جـنــون
-------
مبروك للجميع يا رشاشة
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: saadeldin abdelrahman)
|
Quote: ياخي أنـا بسـمع و عبوني كـلها مرقرقة و مرات بنطنط و بعمل مايسترو
أكون جنيت؟ |
.. والله يا سعد الدين اليوم داك يوم غريب جدا ..
الظاهر لي المسالة ما كانت عبارة عن ناس بتغني ..
أنا اعتقد انو في ( اشعة ) كدا طارت في الجــو وإنتقلت للناس دي كلها ... حول العالم ..
ناس ( ناسا الفضائية ) ديل قاعدين يعملوا شنو ؟؟ كبف ما يرصدوا الحاجات الزي دي ؟؟
انا متأكد يا سعد الدين أنو الحالة العامة دي كانت مسيطرة على كل الناس الحضرت الحفل ده .. من داخل المسرح والشافوها في الشاشة حول العالم ..
عن شخصي انــا .. ما لقيت وسيلة تعبير مناسبة .. خلاف إني اقوم من الكرسي القاعد فيهو واتحرك بشكل عشوائي بعد فترة اكتشفت إني قاعد اللف في الغرفة زي الدربكين .. مرات ( اصفق .. مرات اقول ياسلام عليك يا وردي .. مرات اقول الله يخليك يا باشكاتب .. بعدما انتهت الحلقة حسيت بي انو زي جبل الهموم اتشال من ضهري ..
بالمناسبة .. البكاء في الحالة ديك ما بيكفي ..
أرجو أن تضيفني للقائمة بكامل اعترافي والكلام ده سر بيني وبينك ولاول مرة اقولو
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
تمبس عنوانك لكن ما ضللني ..... أنا قلت تمبس ده جنّ والا شنو؟
شفت السهرة على غير موعد ... وبالصدفة فتحت قناة السودان .. ووجدت ما يسر ويسكر. وطبعاً أزالوا كل الآثار الما كويسة الخلفها زيدان (مش حاجة غريبة؟)
قال محمد الأمين: أنا والأنغام والعود في إيدي ....... والله يا ود الأمين (عود ما خمج)
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد أبوالعزائم أبوالريش)
|
| Quote: تمبس عنوانك لكن ما ضللني ..... أنا قلت تمبس ده جنّ والا شنو؟ |
محمد العزائم يا ابو الريش ..
ليك مدة ما شايفك ..
والله لو بتصدق عنوان البوست كان من ضمن الهضربة الكنت بهضرب فيها الوكت داك وأنا في حالة الغيبوبة دي .. كنت لافي حوالين نفسي .. وبسال في معتصم دفع الله المستسلم للوضع ده في هدوء ودهشة .. بقول ليهو ياخي محمد الأمين ووردي ديل قاعدين يعملو في شنو .. ؟ ديل ناس نصاح..؟
بدون ما اشعر وبي نفس النشوة الفيني دي .. جريت على الجهاز .. وفتحت البوست ده في الحال وجهزت الاغاني ..
وقلت لي معتصم البوست ده مستحيل يقعد للصباح .. قال لي يستاهل روحسيت انو ما عايز يصرف كلام كتير كفاية المزيكا العامله ليهو تنويم مغنطيسي دي ..
| Quote: وطبعاً أزالوا كل الآثار الما كويسة الخلفها زيدان (مش حاجة غريبة؟) |
.. طبعا كلامك ده وقع لي قبل شوية كنت بسمع في زيدان .. وهو بغني لي وردي ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Mannan)
|
Quote: يوما ليس كالايام قط
غاب فيه الوعى والقلب انفرط
سجلت الاحتفالية والدموع تطفر من عينى احيانا.. كان احتفالا التقى فيه العمالقة .. وانداح الطرب... انه السودان الجميل برغم ما فيه من بثور ...
|
استاذنا نور الدين منان:
هكذا كان حالنا وقتها .. غالبتنا الدموع .. وغالبنا الصبر .. كنت اظنها ليلة من الف ليلة وليله .. كنت اظنها ليلة القدر .. أتت في غير موعد .. وقتها احسست بأن كل الأماني يمكن أن تتحقق .. كل الأماني غير مستحيلة .. فهذا يوم عظيم جميع العملاقين .. وردي والباشكاتب .. فكان يوم اروع واخضر واكثر عذوية من مياه المقرن عند الملتقى ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: ahmed haneen)
|
| Quote: يا خي النوم طار من عيونا .. |
بلاي يا مقاتل كنت معانا في الصورة برضو ..؟
الظاهر لي اليوم داك الناس دي كلها ما نامت ..
تعرف يا مقاتل .. مسالة البروفة دي أو الشغل المرتجل دي من الاشياء العادية جدا لما الواحد يكون ( بروفيشونال ) في الصنعة .. يعني عندك العازف ممكن في اي لحظة يجي داخل في الحوار الموسيقي مجرد ما يستلم طرف السلم .. او أول الحرف الموسيقي ..
محمد وردي + محمد الأمين ديل فاتو المرحلة بتاعت ( البروفيشونلويه ) البنقوله دي
ديل ناس بعد كدا يغنو بالفطرة السلمية ..
يغنو علشان يعذبونا نحن ديل.
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: haroon diyab)
|
| Quote: مع كامل احترامنا للفنان سيف الجامعة لكن يامان والله لمن المعلم استلم هجرة عصافيييييييييييير الخرييييييييييييييييييف حسيت باني غريب هناك . |
ياهارون دياب
كيفك يا صاحب ..
والله برضو مع كامل احترامي لي سيف الجامعة والاداء الجميل ..
لكن العصافير دي .. والله وردي عمل ليها جناحات عديل كدا ..
تعرف عصافير الخريف دي قبل كدا بكيت ليك بيها زول عزيز علي عديل كدا ليهو فتر طويلة من السودان .
فتحت ليهو الاسبيكر بتاع التلفون .. وسمعتو
غايب السنين الليلة مالو .. إلخ ..
وحات خوتك ( جعــر ) بصوت حزين جدا .. وساتلمت منو انا الباقي تميتو ليهو
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Hatim Yousif)
|
الرائع تمبس
فعلا كانت سهرة رائعة من رائعين و قد أكملت السهرة فرحي بتعادل المريخ و انتصار الهلال
Quote: والله يادكتــور .. لي سنين ما استمتعته متعة زي دي ..
ياخي الله يديهم طول العمــر والصحة ..
الناس دي ليها سنين ما فرحت ..
ونحن لينا سنين من طعم حاجات زي دي ..
الله يخليكم يا وردي .. ويا محمد الأمين |
فعلا متعة حقيقية
لك ودي
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Mekki M Alhassan)
|
Quote: الاخ تمبس جئت من الشغل فرحا لاشاهد فرح الهلال
تقوم تجيب لينا ود الامين بالعود
يااخي رفقا بالقوارير.. نحنا الفرح ده بنلقاهو بالقطاعي |
العزيز مكي الحسن ..
سلامات
لابد كان أن يمتد الفرح .. المدينة كانت تحتاج أن تنام وقتها على انغام محمد الأمين ، ووردي ونشوة الانتصار..
فليرفق بنا هؤلاء العباقرة .. كانت اصواتهم مؤلمة ، نشوانه .. وفيها من الخير الكثير..
لذا كانت دهشتنا بعد أن غاب الفرح كثيرا من الديار..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Hatim Yousif)
|
Quote: تمبس .... عوداً حميداً
أهليييييييين وبركة الرجعت لينا تاااااني |
العزيز حاتم يوسف :
كيفك يا صاحب .. والله أنا قاعد وكل الحاجات في مكانه .. لكن من فترة اصبحنا كالحجارة أو كدنا ..
لكن دائما القيمة الجمالية تستفز المشاعر ..
هذا ما حدث استفزانا وردي والباشكاتب .. استفزاني احساس الحضور .. ونشوتهم
كيف لي أن اصمت .. علي كل هذا الجمال ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
تمبس ..
وحات ربي كنت قايك آخر من يهتم بجيل
وردي ، و ود اللمين و عثمان حسين ،
و ابراهيم عوض ... كنت قايلك من شلة
(الاغنيات الشبابية ضد القديم) !!!
صورتك و شكلك بيقولوا كده ؟؟!!!!
خذلتني يا تمبوسة !!!
بعدين عندي بوست حول نفس الموضوع ..
عايزك تتحرفن و تنقله معاك هنا
عشان تتوحد الجهود و كده !!!
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد ابراهيم قرض)
|
Quote: تمبس ..
وحات ربي كنت قايك آخر من يهتم بجيل
وردي ، و ود اللمين و عثمان حسين ،
و ابراهيم عوض ... كنت قايلك من شلة
(الاغنيات الشبابية ضد القديم) !!!
صورتك و شكلك بيقولوا كده ؟؟!!!!
خذلتني يا تمبوسة !!! |
يا دكتــور قرض ..
الما عندو قديم اصلو ما يعشم ليهو في جديد .. في المزيكا بالذات ..
فكم اطرب للراحل بادي محمد الطيب .. وكم يشجيني عثمان حسين الصوت الجريح ، كم ارتاح لأولاد الموردة وأولاد شمبات .. خلف الله حمد ، مبارك حسن بركات ـ حسن عطية ، العاقب محمد الحسن ، ويسكرني طربا الراحل خضر بشير والملك ابداؤود ، الفلاتية عشة ، ثنائي الجيل ، فاطنة الحاج ، محمد مرغني ، خالدي .. ولا باس من هاجــر كباشي .. وباسر تمتام ـ وعاصم البنا ـ وبعض من اغاني البنات بالدلوكة ـ إلخ
كل
من لا يستمع لهؤلاء العمالقة .. فلبتحسس ( صمامه )..
البوست يا دكتور من دربي ده عليهو .. تلقاني قدامك.
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
| Quote: سجلت الاحتفالية والدموع تطفر من عينى احيانا |
منان ..
يقيني أن الدموع سالت من ناس كتيرين ..
يا ربي يكون السبب شنو ؟؟ يعني الدموع
دي تكون ناتجة من شنو ؟؟!! كده انت ورينا
حسيت بي شنو و بعدين أنا بوريك !!!
| Quote: مع كامل احترامنا للفنان سيف الجامعة لكن يامان والله لمن المعلم استلم هجرة عصافيييييييييييير الخرييييييييييييييييييف حسيت باني غريب هناك . |
هارون دياب ..
أبدا و الله ..
وبعدين أغاني وردي دي ما بتدي الزول
فرصة عشان يفشل ... يعني لو غناها
الحمار تطلع عسل ينقط عديل كده ..
طبعا سيف الجامعة فنان ضخم و عظيم و صاحب أداء
متميز و هو اضافة حقيقية لأغاني وردة و للفن
عموما ...
| Quote: يا جماعة في حد عارف الإعادة متين و الساعة كم؟؟؟ |
الصحافة ..
الجماعة ديل نقلوها بالغلط ..
كانوا مفتكرين انها حفل مباشر
من ضمن فعاليات زيارة البشير
للفاشر ... ما أظن يقعوا في
الغلط مرة أخرى !!!
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد ابراهيم قرض)
|
ابقى تايه والغرام يصبح حكاية....
والاماني الحلوة دي الكانت بداية..
تبقى اواك في طريقي وفي النهاية ..
هذه الابيات مناغنية وردي لا زال صداها تراوح مسمعي بصوت الفنان ود اللمين
وذلك عندما كنت بالجبيل الصناعية بالمنطقة الشرقية في المملكة عام 1983م
وقد اعملا هذان العملاقان بهذه الاغنية عملا عجيبا ومططاها مطا فاقت زمنها اغنية فغدا يأتلف الجنة اشواكا وظلا.
كانت بحق ليلة ابداعية فزادها ألقا تمبس باعادتها لنا هنا بعد ان فاتنا الزمن زنحن منتشين بفوز الهلال والمريخ...
شكرا ياحماااااااااااااادة على قول وردي لمن بدلع ود اللمين
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد زمراوي عبدالعزيز)
|
Quote: هذه الابيات مناغنية وردي لا زال صداها تراوح مسمعي بصوت الفنان ود اللمين
وذلك عندما كنت بالجبيل الصناعية بالمنطقة الشرقية في المملكة عام 1983م
وقد اعملا هذان العملاقان بهذه الاغنية عملا عجيبا ومططاها مطا فاقت زمنها اغنية فغدا يأتلف الجنة اشواكا وظلا. |
.. العزيز محمد زمراوي
سلامات:
هذه الكبسولة المضغوطة من الإبداع اهدانا لها هذا الثنائي العظيم .. لتخفف من آلامنا الكثير أتت بمفعولها العكسي .. فزاد الآلم بزيادة معدل الفرح .. فمن اللحظات النادرة جدا أن يجتمع هذا الجمال في ليلة لم نكن نعلم أن القدر يخبي يدخر لنا فيها الكثير من الفرح ..
لننعم استاذي بهذا العذاب الجميل .. وهذه النشوة التي سيمتد طعمها ومزاقها طويلا ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
حبيبنا تمبس
بعد السلام والتحية
الله يديك العافية ياخى
تعرف انا حضرت من فقرة الكابلى والنهاية الاكثر من رائعة وهى مشاركة ابو اللمين ووردى معا وقلت هذه ليلة من ليالى العمر حقا ولكن لماذا لم تقدم الحفلة كاملة ؟؟؟؟؟
اسعدتنى جدا بنقلك هنا للمقاطع الجميلة والرائعة ...
بصراحة نقلك ذاتو ابداع ياخى
ليت التلفزيون يحرص على مثل هذه التسجيلات فهى رائعة
وهى تعيد صياغة الاذن التى اتلفتها المستجدات الغنائية
شكرا حبيبنا فالكلمات لا توفيك حقك .....
وتسلم لينا وتسلم لينا اناملك الذهبية ....
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: قرشـــو)
|
تمبس الحبيب والله دي مش إبداع ياخي الواحد بكى عديل كدة
وكنت حريصاً أن أسمع صوت أحبابي ليشاركوني الفرحة ضربت ليك تلفونك مقفول ، ضربت لعمران عامل خدمة موجود، معتصم دفع الله قافل تلفونو وهسع يكون غرقان في دموعو
الطيب جميل عمل نائم من التلفون .... ضربت للؤي شمت أبى يرد
الفيديو عصلج معاي قلت ما مشكلة تمبوسي قاعد ، والإعادة قاعدة
ياخي العود مبالغة لكن ................
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Sidig Rahama Elnour)
|
Quote: تمبس الحبيب والله دي مش إبداع ياخي الواحد بكى عديل كدة
وكنت حريصاً أن أسمع صوت أحبابي ليشاركوني الفرحة ضربت ليك تلفونك مقفول ، ضربت لعمران عامل خدمة موجود، معتصم دفع الله قافل تلفونو وهسع يكون غرقان في دموعو
الطيب جميل عمل نائم من التلفون .... ضربت للؤي شمت أبى يرد
الفيديو عصلج معاي قلت ما مشكلة تمبوسي قاعد ، والإعادة قاعدة
ياخي العود مبالغة لكن ................ |
. والله با صديق إنت عانيت معاناة شديدة جدا علشان تفرغ شحناتك ( الورد لمينيه دي )
يوم عجيب ياخ .. بلاي يا صديق للدرجة دي بقينا خفاف ما بتحمل الاشياء الصعبة دي ..؟
نفرح نبكي .. نحزن نبكي ..
ياسلام على الاحساس لما يكون في قمة الصدق ..
صاحبك عمران اتصل علي وانا ياوبك بسجل في المقطع بتاع العود .. ياخي اختصرت ليك حنانو زاتو . وأقول ليك حاجة ..؟ هو زاتو حسيت إنو بيكلفت فيني .. شابكني .. سجل .. اللحق التلفزيون . سجل كنت عايز اتخابث عليهو وأقول ليهو تلفزيونا بايظ لكن حنيت على حالو .. والراجل ابو وليدات ..
الطيب حسن جميل في حالات زي دي ما تلجأ ليهو .. ما بيخدمك في اي حاجة ..
لؤي شمت بيكون سارح ليك مع وردي كان جيت شلتو شلت البيت كلو ما بجيب خبرك خليك من انو يرد ليك.
اتصل علينا انا ومعتصم ديل .. بتلقانا صاحيين .. لكن الحظة ديك لو قدرت تطلع مننا بي جملة مفيدة تكون بالغته .. لانو مسيطرة علينا حالة من الفوضى المرتبة .. وصدمة نشوة مبالغ فيها ما قادرين نفك شفرته لحدي الان .. واظنها عمت كل الدنيا في الليلة ديك .
| |
|
|
|
|
|
|
|
|
 Re: ياخي محمد الأمين .. ووردي ديل قاعدين يعملو شنــو ..؟ (Re: قرشـــو)
|
Quote: اسعدتنى جدا بنقلك هنا للمقاطع الجميلة والرائعة ...
بصراحة نقلك ذاتو ابداع ياخى
ليت التلفزيون يحرص على مثل هذه التسجيلات فهى رائعة
وهى تعيد صياغة الاذن التى اتلفتها المستجدات الغنائية |
حبيبنا العمدة قرشــو ..
مليون سلام يا غالي .. وجيدا جيت. كنت اتمنى مثلك أن يعيدنا التلفزيون السوداني إلى ذكرى الأيام الجميلة .. مهرجانات الثقافة والإبداع .. ليالي التلفزيون الغنائية الساهرة حفلات الإذاعة في الهواء الطلق .. والكثير من المعالم التي غيبوها من تاريخنا ومن ذاكرتنا عمدا..
لكن
استمر التلفزيون في نفس المسلسل الدرامي .. حتى الحفل اعتقد أنه كان مبتور وناقص ... عزانا فقط فيما وصلنا من متعة ولو القليل منها..
Quote: لفت ابنى نظرى لمايكرفون قناة العربية فى الحفل ....
ترى هل ستبث قناة العربية الحفل لاحقاً ؟؟؟؟ مع انها قناة اخبارية
لكن السر شنو فى الحكاية دى ؟؟؟؟ |
.. فعلا ياعمدة . انا برضو لاحظت للمايك ده .. واكيد ح تتبث مقاطع من الحفل في الإخبارية .. وكنت لاحظت صبيحة يوم الحفل خبر في صحيفة سعودية ومنشور معاها صورة من الحفل يظهر فيه العملاق وردي .. بكامل هيبته..
تشكر يا عمدة
وحقيقي مداخلتك رجعتني للايام الخوالي ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: امل احمد عمر)
|
Quote: ولقينا مهرجان الجمال ده والجري حصل .. وين الريموت هي نسجل كيف
كبكبة شديدة وفي الاخير قررنا نستمتع باللحظة دي وبعدين يحلها الحلال
جيت لقيت تمبس حلااااها .. |
.. أمل كيفك:
عارفه علشان الجري والكبكبة دي .. كل الأوضاع بتكون في وضع الاستعداد .. الكمبيوتر .. على التلفزيون على الفيديو .. البتجي فيها تجي .. ودائما بتتحل بالخيارات البديلة الزي دي
تحياتي لي الناس المعاك ..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Nasruddin Al Basheer)
|
العزيز تمبس والناس الحلوين
لكم التهنئة على هذا الجمال..
أنا من الناس البستمتعو برؤية الفرح في عيون الناس
عندما أدرت الريموت كونترول على القناة السودانية ولقيت سهرة وردي،
أصابني نوع من الجنون والهضربة وأم هلا هلا، خاصة وأنا فرحتي كانت
بكرتين بعد انتصار الزعيم..
من شدة ما مستمتع كان عندي إحساس إنو ما بعيش عشان أكمل باقي السهرة،
كنت بعاين في عيون الناس وألقى ليك كل الناس تكاد تطير من الفرحة والمتعة،
كل الناس كانت فرحانة وأي واحد قريت في عيونو إنو الحفلة دي حقتو هو شخصياً،
ولدي شافني مركز شديد في التلفزيون وما شغال بيهو خالص، عمل لي فيها الولد
بغير من محمد وردي وحاول يبكي ويحنني، ما عبرتو والله ولا اشتغلت بيهو،
أمو قالت ليهو: أبوك ده عندو جن اسمو الهلال ووردي خليهو هو هسي ما فاضي ليك..
الولد بكى لكن حتى الآن ما عارفو سكت ولا لسه ببكي..
بتذكر قلت ليهو: يا ولد ما تجنني.. في اللحظات دي أبعد عن طريقي..
واستمريت في الاستمتاع، وحسيت أي واحد حضر الحفلة أو شاهدها كان حريص على
تخزين أكبر قدر من المتعة والفرح والبهجة،
نحن ما شعب مسكين ويتيم من حاجة اسمها فرح.. أقل حاجة تخلي سلكنا كهرب..
عندنا قمة زي وردي وناس التلفزيون ما قاعدين ينشرو فنوا وإبداعو
التلفزيون مفتوح على مصراعيه لإزعاج المداحين والمنشدين والفنانين المسيخين..
بقينا لما نسمع شيء لوردي أو أبو اللمين نبقى مصاقيع زي المساطيل..
عارف إنك حاتكون عملت البدع يا تمبس في البوست ده عشان كده كنت مصر بل ملح
على أن أفتح هذا البوست رغم إنو عصلج معاي أكتر من عشرة مرات،
قلت يا جماعة البوست ده فيهو شنو من جوة يكون (التهمة) ثبتت على تمبس؟
هاهاهاها..
مشكور يا حبيبنا على الإمتاع ونقل البهجة واعذرني لو بريتكم
أصلي مصقوع من أمس وبوستك ده زاد علي السطلة..
ارشح البوست ده ليكون بوست السنة إذا ختا قطاع الطرق..
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Nasruddin Al Basheer)
|
حبيبنا نصر الدين البشير
سلامات
فرحتك . دي ما بي كرتين يا نصرالدين .. دي وصلتها الحد ودخلت في منطقة الانجذاب الصوفي .. ومن ثم الترجمة .. وهي مرحلة ( سريالية الحديث ) ..
مش بقولو ليك الزول ده غرقان .. أها ياهو ده الغرق زاتو البقولوهو ..
هذه الحالة يا عزيزي انتابتنا كلنا.. لفونــا في الكرتين ديل .. وما استشارونــا ... باغتونــا ، وضربونا في قلبنا .. وفي الحتات الحساسة جدا .. المقفولة وما اتهبشت من سنين ..الواحد يا نصرالدين صقعة زي دي بيفتش ليها .. ولو بالريحة بس ..
طرب حد الاشباع .. حد الارتواء .. حد النشوة ..
يانصرالدين .. ياخي بتمنى ليك غيبوبة جميلة زي دي كلما تفتح التلفزيون المعذبك ده علشان تجي تمتعنا بي كتابة صادقة زي دي .
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Sudnawi)
|
وآهـ وتاني آهـ يا تمبس
لا أدري كم كمية الفرح التي كانت بالأمس ...
ولا أدري يا تمبس كمية الضحك والابتسام
يا تمبس كل هموم الغربة والوحدة والألم أمس راحت
والله راحت
ولا أدري يا تمبس كمية الحزن التي انزاحت عن كاهلي
وكمية النوم التي نمتها ملء جفوني
وكمية السعادة التي أدخلها هذه الثنائي العجيب
في كل شي
السعادة بأنني من صلب هذا الشعب الذي أنجب هؤلاء
السعادة والفرح بالسمع الذي نستمتع به
السعادة بأننا ما زلنا نصر وسنواصل الإصرار بأن هؤلاء من نستمع لهم
أنا ما عارف يا تمبس الجديد شنو في البكتبو ده
زي ما الناس الفوق ديل بكوا
لم أستطيع أن أحبس دموعي
وزي ما بعضهم فتش حبايبو بالتلفونات
فتشت كل زول والوقت متأخر عشان أقسم معاهو الفرح الأنا فيهو ...
والله شكل الناس الحاضرين الحاجة دي كان مدفق بي حاجات عجيبة
وأصر يا تمبس على الحاجتين ديل
محمد الأمين ووردي كشي واحد
والهلال
أقول ليك شنو يا تمبس
بلدنا جميل
غنانا أجمل
وناسنا ( الكبار )الله يخليهم لينا
ياخي أنا والله خايف من يوم بكرة ده بشكل ما طبيعي
يوم يفوتوا الناس ديل ونكون بعداك محلك سر ...
وطبعاً نحن الآن مكانك سر
لكن وجود الناس ديل بيناتنا وبي حاجاتهم الموجودة دي
كل يوم دمائنا بتتجدد بما يكرروا ترديده علينا
والحزن يا تمبس إنو الغربة منعتنا التواجد وسط الفرح المسكوب أمس هناك
...
الكلام ما كمل .. وما حا يكمل
وعليكم الله البوست ده ما يمشي أي حتة
| |
|
|
|
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: عمران حسن صالح)
|
عمران أبوحمودي ..
لو لم تقم في تلك الأمسية بتلااتصال علي بعد ملحمة الهــلال .. لكنت اعتقدت أن الهلال لم يفز .. ولم تكتمل فرحتي ..
ولو ما كررتها بالصوت النشوان . المستعجل الفرح إنو يا تمبس اللحــق سجل الحلقة دي بسرعة ,, لما تأكدت انو الفرح يمكن أن يطير وتنتشر حبيباته في الهــواء ونستنشقه ..
ولو لم أكن متأكد من نضافة ( اضانك ) وزوقك الموسيقي العالي .. وحبك للاستاذ وردي والباشكاتب .. ( وقدانك ) لي بي ( تتعلم من الأيام ) المسجلة في شريط كامل بالجهتين .. وورد حفلة اديس .. ( وبناديها) الجميلة لما تأكدت انا الغناء أحيانا يحلق بك في عوالم أخرى تحتاجها في لحظات آنية من الصراع الفلسفي بين جدلية الموت .. والحياة ..
لذلك يا صاحبي
ادعو الله أن يمتعك بكل أنواع السعادة .. ( مكتوبة بالنوتة ) أو ملعوبة باصات في المستطيل الأخضــر ..
البوست ده يا عمران موجود .. وانا عاملو بوست متعة كروية وفنية .
يعني بي صراحة كدا .. ( كفر ووتــر ) ... وكلما المزاج يكون عالي .. بنجي نوقع فيهو هنا ونسجل حضور ..
| |
|
|
|
|
|
|
| |
tmbis
الملك
محمد عكاشة
awad okasha
طيفور
jini
Alsa7afa_30
محمد عبدالرحمن
شهاب الفاتح عثمان
Mamoun Ahmed
غباشي
حيدر حسن ميرغني
خضر حسين خليل
نيازي مصطفى
احمد معتصم الطيب
omar altom
الفاتح يسن
saadeldin abdelrahman
محمد أبوالعزائم أبوالريش
Mannan
ahmed haneen
معتصم دفع الله
Hatim Yousif
haroon diyab
hajhamad
محمد زمراوي عبدالعزيز
قرشـــو
Sidig Rahama Elnour
امل احمد عمر
محمد مكى محمد
Gaafar Ismail
Nasruddin Al Basheer
عمران حسن صالح
فيس بوك
تويتر
انستقرام
يوتيوب
بنتيريست