|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
اخي الرائع .. تمبس
انا والانغام والعود في ايدي .. وود الامين المبدع والهرم الكبير وردي .. سهرة فيها الماضي والابداع .. كل شيء حاضر .. ونحن كالعادة امام الاباع اضعف مانكون .. اخي تمبس .. موقع you tube لااستطيع انزال الاغاني منه وفيه تقطيع المرة الاولي .. ارجو ان تدلني علي حل ؟؟
ولك الود ..
بهاء الدين حسن/ القاهرة /
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Sudnawi)
|
Quote: ناجي الزبير... ترسل التسجيل ده مع محمد عركي وإلا !! تمبس... ياخ إنت اعجب من يوسف محمد زاتو... |
ياخالـــد .. ناجي ده ممكن يشدك سنة كاملة .. يعذبك عذاب السنين .. بعداك حتين يحن على حالك ويرسل ليك .. اسالني انا منو .. .. يوسف محمد يا خالد ؟؟ كان تقول لي إنت اعجب من ( باص القون ) .. شفت ليك زول عاقل بلعب ليهو باص قون بالطريقة دي ...؟ حسع باص القون ده فرقو شنو من وردي ومحمد الأمين ..؟
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: الناظر)
|
Quote: إتصلت بكل حبيب عشان يسمع و بكرة يحكى |
النــاظر: كيفنك ..؟ الفرح بيجي من غير ميعاد .. ولا انتظار ، قودوين فرحنــا في الزمن الضايع .. وردي والباشكاتب تموها لينا .. ح يفضل اليوم ده يا النــاظر يوم مشهود .. ح نحكي بيهو مدة طويلة لانو اتسجل في سفــر الخلــود .. ومن أيام السودان العظيمة .. إنتصار .. ونشوة فرح ..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
معليش يا أخوانا فاصل قصير جدا و نواصل بس عايز أحسب الناس الذين ثبت بكائهم في لقاء القمم الجديد/القديم هذا: البكاي الأول محمد إبراهيم قرض:
Quote: تمبس .. ما عملوهو أصابني في مقتل .. ولم أجد غير الدموع ... |
الثاني سعدالدين جعفر
Quote: ياخي أنـا بسـمع و عبوني كـلها مرقرقة و مرات بنطنط و بعمل مايسترو |
الثالث نـورالدين منان
Quote: سجلت الاحتفالية والدموع تطفر من عينى احيانا |
الرابع صديق رحمة النور
Quote: تمبس الحبيب والله دي مش إبداع ياخي الواحد بكى عديل كدة |
ا لخامس ولد أخونا نصرالدين البشير
Quote: ولدي شافني مركز شديد في التلفزيون وما شغال بيهو خالص، عمل لي فيها الولد بغير من محمد وردي وحاول يبكي ويحنني، ما عبرتو والله ولا اشتغلت بيهو، |
يقيني أن الذين بكوا كثر و لكنها غتاتة بني السودان
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: saadeldin abdelrahman)
|
يا سعد الدين .. صدقني إنت بتتعب في نفسك ساي .. غايتو كان جيت تكتب ( البكاؤون ) .. وتعمل ليهم حصر هنا .. ح تتعب .. طبعا حسع العملو ( بكين ) هنا ديل الصريحين جدا .. وجو قالوها .. في ناس اراهنك انهم معانا ف يالبوست ده لكن ( بكو ) .. وقشو دموعهم .. واستغفروا غايتو يا سعد بره المساحة دي .. انا عندي خمسة بضمنهم ليك .. ديل في تمرين الهلال قاعدين يبكو خليك لما يغني محمد اللمين ووردي عمر الفاروق واحد منهم لاني قبل كدا قبضتو بالثابته
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Mohamed Yousif Hamad)
|
Quote: على فكره وردي هلالابي و ابواللمين زاتو هلالابي كبير كمان و انا زاتي هلالابي بلميلاد كمان و زي ما قال زعيمنا رحمة الله عليه الطيب عبدالله السودان ده كله هلالاب بس في شوية ناس كده زعلانين منو مشو يشجعو انديه اخرى |
عزيزي محمد يوسف .. سلامات ياجميل: والله يا محمد يوسف نحن الهـــلالاب ديل مشهورين بالمتعة .. نغني نمتع .. ونلعب كفــر نمتع .. نغلبك في عضمك ده .. برضو تطلع مستمتع .. تاني فضلنا شنو ..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
Quote: البكاي الأول محمد إبراهيم قرض |
سعد الدين .. أنا ما البكاي الأول .. أنا البكاي التاني .. تعرف ليه ؟؟ لأنه بكيت تاني لامن عادوها صباح اليوم الثلاثاء الساعة 5 صباحا بتوفيت السودان ..
وبعدين انت ما بتبكي مالك ؟؟ سمعته ولا جابوهو ليك ؟؟؟
و يالها من قمة القمم .. تجلى فيها الابداع و تفوق على نفسه ..
أما (المجادعة) بين وردي و ود اللمين فحدث ولا حرج
خوفي منك و يا نور العين ..
ثم تلكم الحميمية الطاغية التي تربط بين العملاقين ودري و محمد الأمين ..
سمعت يا سعد وردي ينادى على أبو الأمين:
"شكرا يا حمادة" !! "شكرا يا حمادة وربنا يحضرنا خمسينك" !!!
تقول لي ما ابكي ؟؟!!! ..
هو نحن منو الفضل لينا غيرهم !!!
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد فرح)
|
Quote: كانت ليله ولا اروع قمم وتلاقت |
ايوة يا عبد الغفــار .. ده كان لقاء السحاب .. ولقاء العمالقة .. لا تكرر كثيرا .. .. .
Quote: تشكرات أفندم على البوست العذاب ده ديل ياأخوي دهب خااااااااالص الله يديهم ويديك الصحه والعافيه مؤونة عام من الود |
العزيز محمد فــرح .. ياسيدي ديل .. آخــر جيل العمالقة .. وآخــر ناس بتعذب الحرف .. والكلمة واللحــن .. ربنا يمد في ايامهم .. ويمتعنا ويعذبنا بي كلامهم السمح ده..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: انعام عبد الحفيظ)
|
دي شامبر .. دي باريس .. دي لاكروا .. دي مونت كريستو ..
إنعام ياخ نتجرس و نبكي و نتلوا مع وردي و صوت الولد الكارثة داك : ( اللفتة و الخصل اللي نامت فوق تسابيح البريق و خطاكي و الهدب المكحل و فتنة التوب الأنيق ) .. ديني أنا ياخ .. تقومي تبهليها و تحنكشي الشغل بدي لايف ودي فودروا .. ؟؟ تمبس بيتعقد من الكلامات الزي دي , و يفتكرا شتيمة لاقدر الله . حاضر ؟؟
يللا أحكي لينا عن الحفلة .. فليس من رأى كمن سمع . و إنت يا أصلي .. ولا كلمة , تسمع و بس .
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Emad Abdulla)
|
عماد عبد الله
سلامات والله اتمنيت تحضروا الحفلة
بس الفنان تمبس ماقصّر
ياخي دي كانت ليلة من أجمل الليالي
وبالمناسبة معليش ليكم عشان ما بتتكرر
كل فنان من الفنانين الشاركوا كانو قمة في الإبداع
وشاركهم وردي بترديد بعض المقاطع
سيف الجامعة نزل من على المسرح وغنى بجوار وردي
"هجرة عصافير الخريف" (ياخي نحنا زااااتنا هاجرنا في اللحظات ديك)
اما ود اللمين والله دا كمان حكاية براااااااااااااهو
ياخي الناس دي ما استحملت مذيعو الربط
من شدة ما كانت متعطّشة لسماع اغاني وردي عند الفنانين ديل
ياخي داك يوم يعقّد عديل كدا
وأول مره أشوف الناس السايقين عربات وطالعين من الحفلة
في الشارع ورغم الزحمة تمرر بعضها مزاجهم كان راااااااايق
ربنا يديهم كلهم العافية
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: peace builder)
|
Quote: اذا في اي تسجيل ممكن يتحفظ في الكمبيوتر ما تبخلوا بيهو ونحن برضو بنحب الموردة وبنقدر ناسها |
كيفك ياجمال ..؟ والله من ناحية التسجيلات البتتحفظ دي ما بنقصر .. ونوم قفى .. الحاجات الجميلة دي حرام الواحد يكون ساجنه في الجهاز .. والناس محتاجة ليها بشدة ..
عمر مديد لوردي .. وللاستاذ محمد الأمين الصحة والعافية
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: انعام عبد الحفيظ)
|
Quote: وأول مره أشوف الناس السايقين عربات وطالعين من الحفلة في الشارع ورغم الزحمة تمرر بعضها |
.. غايتو يا إنعام دي بالغتي فيها.. .. لكن بالجد كدا اليوم داك الناس دي كلها كانت مساكاهم ( أم فريحانه ) .. انا القدامك دا اتنقلت لي العدوى .. بالذات مع عصافير الخريف .. ولو كان لحقني ( مافي داعي ) .. إحتمال كان الواحد قامت ليهو جناحين ..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Emad Abdulla)
|
Quote: و إنت يا أصلي .. ولا كلمة , تسمع و بس . |
يعني يا عماد بي حركتك بتاعت الكم يوم دي .. معناته بعد كدا ح تحكي لينا من هناك ..؟ يعني ح تكون جوه الحتات ذاته مش كدا ..؟ والله يا عماد بقدرما قفلتها معانا لكن عجبني ليك .. اقول ليك حاجة.. إنت امشي احضر لينا في ( اللايفات ) دي .. وتعال الصباح .. الصباح تلقانا كابين جرسلين هنا ده ..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
Quote: محمد العزائم يا ابو الريش .. ليك مدة ما شايفك .. |
تمبس معاك حق .. من مدة والحاصل في البورد ما عاجبني .. شمطة ومنابذة وووو .. ففضلت غالباً أتفرج بس .. لكن يومها جيت مخدّر من عمايل أبواللمين ووردي و(بايتة معاي) نشوة الحفلة، قمت لقيت البوست بتاعك ده، عايزني ألبد كيف بعد داك؟ ياخي ديل ينطّقوا الحجر. أما موضوع زيدان خليهو هسة وأحسن ما نخرب الجمال ده، وممكن نتكلم فيهو تاني (بصراحة قرب يطفشني من الحفلة).
مودتي
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد أبوالعزائم أبوالريش)
|
Quote: معاك حق .. من مدة والحاصل في البورد ما عاجبني .. شمطة ومنابذة وووو .. ففضلت غالباً أتفرج بس |
.. يا محمد البورد ده احسن مكان الواحد ممكن يمارس فيهو اي حاجة .. حكاية انك تمشي تخليهو لي نوعية كدا محدده بي عينه ... دي قمة الانهزامية .. زمان الواحد كان بيتحسس من اي حاجة ويبعد فترة طويلة من البورد .. لكن حسع الواحد جلدو بقى تخين واللا الحاصل شنو ما عارف .. بالعكس كمان لما البورد يكون هادي ووديع .. بيفتش تفتيش لي الناس العاملين قرف للبشرية دي .. أما بخصوص الشباب ديل .. فثبت بما لا يدع مجالا للشك أنو محمد الأمين ووردي ديل الله خلقهم لمتعت البشرية .. واضافة ( غدد ) ليها علاقة بالفرح والبهجة.. انا اصلو ما تخيلت زيدان يعمل كدا .. ما كمان اي شيخ وليهو طريقتو .. ودي اصلو ما ممكن تكون طريقة زيدان نهائي..
| |
|
|
|
|
|
|
في حضرة جلالك يطيب الجلوس ... !!! (Re: tmbis)
|
من منا لا تلهبه الأكتوبريات ...
باسمك الأخضر يا أكتوبر الأرض تغني ....
ثم ...
ونغني لحريق المك في قلب الدخيل ... مثلما غنت مهيرة ... تلهب الفرسان جيلاً بعد جيل ... !! للجسارة ... حين ما استشهد في مدفعه ... عبد الفضيل ....!!
من منا لايطرب حين يسمع ...
لما تفوتنا لحظة **** جميلة أجمل لحظة تستنانا ..!! والحباااااااااااااااااان نشييييييل ندييييييييهم ...!!
من منا لم يسافر مع عصافير الخريف ساعة هجرتها ...
هجرة عصافير الخريف ... في موسم الشوق الحلو ...
هيج رحيلها مع الغروب .....
من منا لم يرحل مع المنفى ساعة أن يقول ...
رحلت وجيت ... في بعدك لقيت ... كل الأرض منفى ...!!
وكيف يخاطب بنت التسعتاشر سنة ...
ما تخجلي يالسمحة قولي استعجلي ..
عطشتي قلبي وكل يوم تجملي ..
أديني كلمة وسامحيني ( وطولي ) ..
فكان هو والأنغام والعود في ايدو يحكيلنا حكاية ويزيد ترديدو ...
إحتفل الشعب السوداني ليلة 19 يوليو باليوبيل الذهبي لفنان افريقيا الأول ... وهو صاحب البصمة التي لا تخطئها العين كما قال بحق الأستاذ / عبدالكريم الكابلي .. كانت ليلة ليلاء .. كنت وحيداً أمام تلك الشاشة الفجيعة ... فطفقت أصفق تارةً ... وأتمايل طرباً تارةً أخرى .. وتدمع عيني تاراتٍ عديدة ... كلما رأيت الحشود تأتي للوفاء فقط ... دون منٍ أو كلالة ... ما أعذب الألحان في بلدي ... وما أعذبك يا وردي ... وكم كنت مميزاً أستاذنا أبو اللمين ... وأنت تتغزل في العود ... وكم كنت رائعاً طوال خمسين عاماً يا أيها الوردي ... ففي حضرة جلالك يطيب الجلوس ... ثم كان يدعو عقب كل وصلة لأبو اللمين ... الله يحضرنا خمسينك ... !! كانه يقول فيها أنني سأكون بين المحتفين بك لأنك كبيراً بيننا ... كم هو أصيل .. كم امتلئت عزاً وكبرياء ليلة الأمس ... ما أجملك ... أدام الله الصحة والعافية عليك وعلى المشرقين من أمثالك ...!!!
شكراً أخ تمبس ... فقد أسعدتنا أيضاً ...
| |
|
|
|
|
|
|
Re: في حضرة جلالك يطيب الجلوس ... !!! (Re: altahir_2)
|
Quote: والله يا علاء الناس دى بتبالغ |
العزيز جدا الطاهر .. فعلا الناس دي بتبالغ بشكل ما طبيعي .. تجميع هذه (الوصفة) الفنية في قالب واحد لهو الجن بعينه .. استدعاء الذاكرة دي حاجة عجيبة جدا .. بلاي بتتذكر لما محمد الأمين دا كان طاشي ليبيا ووين كدا ما عارف .. ووردي القاهرة امريكا .. ووين ما عارف ..؟ بلاي شوف السودان دا كان عامل كيف ..؟ والله في ناس ماتت بالحسرة عديل كدا ..
| |
|
|
|
|
|
|
Re: في حضرة جلالك يطيب الجلوس ... !!! (Re: Tareq Siddiq)
|
العزيز طارق صديق ..
Quote: شكراً أخ تمبس ... فقد أسعدتنا أيضاً ... |
تبقى الحقيقة الثابتة أن هذا العشق الوردي المحمد لميني يتسرب مع كريات الدم ويعمل فعله في الجسد .. والعقل. هذه العبقرية التي تغنت بكل ما ذكرت ستفضل محل عشق الكثير وسينتقل هذا العشق من جيل إلى جيل .. فمنذ اكتوبر حتى يومنا هذا كلمتهم خالده في تمجيد الشعب .. والوطــن .. والحبيبه .. حتى الحكي عن آلامنــا الصغيرة .. قلنــا ما ممكن تسافر .. وهجرة عصافير الخريف وكل ما قالوه من أجلنا ..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
إنعام ياخ نتجرس و نبكي و نتلوا مع وردي و صوت الولد الكارثة داك : ( اللفتة و الخصل اللي نامت فوق تسابيح البريق و خطاكي و الهدب المكحل و فتنة التوب الأنيق ) .. ديني أنا ياخ ..
سعد الدين ألحق شوف عماد عبد الله كاتب شنو؟
دا واحد جديد كمان أضيفو لقائمة البكاؤون
اديهم فرصة ياخ بطّل الرصد دا
والجماعة ديل لسان حالهم بقول ليك
يا سعد الدين خوفي منك وانا خائف
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: saadeldin abdelrahman)
|
أخونا سعد " X " .. ياخي طلعت ما سعد إكس .. طلعت X-RAY قاعد ترصد في البكا منو و الجعر منو ؟؟؟ بعدين إنعام دي زااااااااتا رايحة ليها بكية .. و عاملة ثابت البطل .. في زول سألها ؟؟
البكا مالو يا سعد ؟؟ .. عيبو لي بالله ؟؟؟ خير البكاؤون النخاجون .. و الما بكا في الليلة ديك بيكون فيهو حاجة ما ياها .. مش الشاعر قال : ( إذا أنت لم تعشق و لم تعرف الهوى , فقم و اعتلف تبناً فأنت حمارُ ) ؟ و طبقوها بـ : ( قفا نبك من ذكرى حبيبٍ و منزل , بسقط اللوى بين الدخول فحومل ) .. أها نحنا واقفين و حاجزين من قبال عمنا ده و عمكم تمبس و " الهوا " بيجيب البكا .. و سجن سجن , غرامة غرامة .
هسع يجي أب راس مقلوز داك يعملا لينا موضوع .. فيا أصلي .. إشتغل شغل الجمال و بس , ناس سعد و إنعام ديل من " المرجفين " .. حمانا الله
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Emad Abdulla)
|
صاحب الغصن الرطيب/ عماد بن عبدالله دحين البكاء فوقو عيب كمان؟؟..يبقن علينا غربة و تحجر عيون!! علا النخيج دا لسة ما جربتوا .. ليـــه يا عصافير ليه الأسف ..مين علمك معنى الوداع عارف ده ما أول سفر لبلاد بعيدة بدون متاع غايتو يا عمدة..أنا جعرت معاكم لكن نعوم دي من المرجفات في الخرطوم بالحيل..تكاوي ناس المهجر ديل بالحفلات ال(لايف) و الغناء النضيف ويبدو أن لديها مخطط ضخم لإعادة ( معذبي المنافي).. سدد الله خطاها و اصلح حال البلاد و العباد.
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد على طه الملك)
|
Quote: هم من تبقوا لنا من جيل العماليق .. حفظهم الله ومتعهم بالصحة ..
|
العزيز محمد على طه الملك.. نعم تسرب مننا الكثيرين .. بالأمس القريب رحــل عذب الصوت جميل الكلمة والحضور خليل اسماعيل .. (ضاع) في الزحمة صوت الرائع عثمان حسين وأنطفأت الكثير من القناديل .. ما تبقى لنا من رئحة هؤلاء .. إلا هؤلاء .. حفظهم الله ومتعهم بصحتهم كما امتعونا.. وتحياتي عبرك للصديق الفنان حسام ( الصحافة 30 ) الذي اضاف لهذا البوست طعما خاصا.. ومذاق آخــر.
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: محمد ابراهيم قرض)
|
Quote: بالله عليكم تأملوا في وجه هذا العملاق وردي جيدا .. |
العزيز قرض .. تعرف يادكتور في شخصيات كدا مجرد النظر ليها تشعر بالهيبة والوقار .. والرهبة لانو ملامحه اتشكلت حسب القيم الجواها خير او شــر .. جمال أو قبح .. ماذا ننتظر أنانرى في ملامح أمثال وردي الأمبراطور وهو يحمل بداخله كل هذه المعاني وتغني بكل هذه الكلمات الخالده لعرس السودان .. ولبعانخي ولعلي عبد اللطيف ولود حبوبة .. ثم: احبك .. أحبك أنا مجنونك ساكن فيني هواك وبريدك .
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
Quote: بعد إذنك يا تمبسكو ,, شايف الناس متجرسة من عدم إمكانية حفظ الفيديو و خصوصاً إنعام عبد الحفيظ .. مع إنو المفروض ما نديها أي حاجة (حسادة بس) لأنها مشت الإحتفال و خلتنا هنا في انتظار عطف التلفزيون القومي علينا.. مافي تضامن معنوي ؟!
|
بعد إذنك يا تمبس
الصحافة 30
شنو ياخ شيل الحال دا الواحد يعني ما يطلب منكم حاجة أبداً إلا وتشيلوا حالو
يعني عشان انا مشيت الاحتفال واستمتعت بالحفلة دي ((لايف) وهنا اتذكرت عماد عبد الله )
تقوموا تكونوا حاسدين كل الحسادة دي
اها انتو سجلتوها وانا حضرتها (لايف) كدا خمسة لى انا وصفر ليكم انتو يعني قريب التعادل
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: انعام عبد الحفيظ)
|
Quote: بعد إذنك يا تمبسكو ,, |
إنتو الحاصل شنــو يا الصحافة ويا إنعام عبد الحفيظ الناس دي بقت رقيقة كدا مالا .. وزيها وزي الانقليز واحد يا انعام مش قلتي الناس كانت بتمرر العربات طيب الناس البتمرر العربات وعرفناها .. إنت والصحافة .. وعماد عبد الله ده الحاصل عليكم شنــو ..
ما تعملو لينا خلل في سودانيتنا .. ( واتوكيتاتنا) الإجتماعية ياخي أعملو الحاجات من غير أوتوكيت عشان تدوني احساس بي إني عايش ..
يا عماد عبد الله .. بلاي عليك الله عاين الناس ديل لابسين بدل .. ومتريحين وانيقين كيف عليك الله كلمم يبطلو يمررو لينا العربات في البوست ده
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: Nader Abu Kadouk)
|
Quote: تمبس الحفله فاتتني الله يخليك لينا ياخوي ودالمين ما طلع .... العود عديل كده
|
يا نادر.. كويس انو اليوتيوب ده بقدم في خدمة ضخمة جدا الفاتك كلو بتلقي .. لكن طبعا الفرش طعمو ونكهتو بتكون حلوة .. يعني الحلقة دي بالذات لو عاينت الناس الكانت في المسرح ومنفصمه دي .. وحالتنا حتى ونحن في التلفزيون .. وقتها كلامي ده بيقع ليك كويس..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
Quote: إنتو الحاصل شنــو يا الصحافة ويا إنعام عبد الحفيظ الناس دي بقت رقيقة كدا مالا |
يا تمبس لو لقينا الناس تكون في الحالة دي على طول
الدنيا دي تبقى بمبي شديد
بس ما بقدروا على كدا
لازم برضو ينكدّوا على روحهم
كدى خلينا هسه في اللون البمبي
الأبى يروح من يوم الحفلة لغاية هسه دا
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
العزيز تمبس
شكرا للاخ بكري اولا ولك ثانيا على الدعم الغير محدود ثانيا كما عودتنا تاتينادوما بالروائع الدويتو بين ابو اللمين ووردي كان رائعا لكنه حلق وارتفع في يانور العين في تقديري لن يتكرر اما عزف ابو اللمين على العود فقد كان حاجة تانية وكما قال احد الاصدقاء (جضمه وادبه)لقد تملكت الجمهور الدهشة فصفق بعضهم بعد فترة والبقية اعادهم الى الواقع صوت التصفيق تعرف كنت امني نفسي ان يكون هناك جمع من الفنانين والفنانات الشباب لكن خابت امنيتي لكن عزائي كان في الجمهمور الحاضر حيث ان معظمهمن من صغار السن اللذين لم يعاصروا وردي ومحمد الامين لكن جمعهم روعة الفن الجميل التحية لوردي وابو اللمين وامنياتي لهم بالصحة والعافية
في رعاية الله وحفظه
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
بوست توثيقآ توثيقـآ للعبـــات الامنيــــة....خطـــف نعــش الراحـــل...ذ الخاتــم عــــدلان
يا اخ بكري ابوبكر ما هي مسوغات نقل هذا البوست الي مكتبتبي وهو ما يزال حيآ ...هذا عبث ...ادري مدي الرغبة الجامحة لدي تمبس " الدسك جوكي " لتطفيش هذا البوست بعد ان تم كشفه و تعريته في هذا البوست كأداة تم استخدامها لنشر الحوار المدسوس المنسوب الي صدّيق شقيق الفقيد الراحل الخاتم عدلان لتدعيم رواية حكومة الجبهة الاسلامية بعدم خطف النعش في مطار الخرطوم من قبل اجهزة امنها..و لتكذيب رواية عدلان شقيق الفقيد الذي كان مرافقآ للجثمان من لندن والتي نقلها الي الاستاذ الباقر العفيف ورواها لمولانا اسماعيل التاج فنقلها بدوره الي المنبر....وايضآ لتشوية سمعة وتارخ الاستاذ الخاتم عدلان واسرته بالزعم بان اسرته جلبت معها الي المطار رجالآ من المخابرات العسكرية وجهاز الامن العام هم من الاصدقاء المقربين الي الاسرة علي حد زعم الحوار المدسوس
وقد فشل الدسك جوكي في الاجابة علي اية من الاسئلة التي وجهت اليه وابراز الضمانات الكافية التي زعم انه يملكها امام كل من يكابر ويشكك في الحوار.
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: omar ali)
|
الموهوم علامة الاستفهام(؟)
Quote: يا اخ بكري ابوبكر ما هي مسوغات نقل هذا البوست الي مكتبتبي وهو ما يزال حيآ ...هذا عبث ...ادري مدي الرغبة الجامحة لدي تمبس " الدسك جوكي " لتطفيش هذا البوست |
عليك الله ما بتخجل إنت ؟؟ تطفيش ورغبة جامحة ..؟ أديها صنــة . شان تعرف التطفيش كيف .. إنت قايلني خليتك مش كدا ..؟ والله إلا تقول الروووب هنا ده .. بس اكل باسطة كتير الايامات دي .. واشرب ( نشا ) وامشي عكس الهوا ..
أنا البعاعيت ديل عندي ليهم شغل خاص .. الواحد بجرو من اضانو بطلعو من جحرو .. زيو زي اي (ضب) يا (ورل)..
| |
|
|
|
|
|
|
Re: ياخي محمد الأمين .. ووردي ديل قاعدين يعملو شنــو ..؟ (Re: tmbis)
|
العزيز/ تمبس ،،،،،، تحية مباركة وكيف الوالد انشاء الله طيب
الناس ديل ( ود اللمين ووردي ) قاعدين للابداع ،،،لكن بصراحة وردي مبدع بكلماته ،،، لكن هذا الاسمراني ( أبو اللمين ) دا شي لا يصدقه العقل
لو دندن ساكت بأي أغنية بغنيها أي فنان تحلف تقول إخلوها ليو ،،،، هذا ما يحصل لهذا العملاق ،،،ربنا يمتععهم بالصحة
ودي وتحياتي
ود الامير
| |
|
|
|
|
|
|
|