|
|
 Re: صابح يا حليب (Re: قرشـــو)
|
أخي قرشو
عدنا
عن العصير أقول أن ناسنا جنهم سكر - بضم السين وتسكين الكاف - المهم يا قرشو يا أخوي رطل السكر ممكن يتلحس في زي 13 كباية شاي أحمر أو 17 كباية شاي بي لبن مش بي حليب ، أها لو جبت عصير حبة القطن أو بذور الخروع أو شجر العوير أو السنمكه وخليت السكر كتير في العصير والله يتلحس في دقائق والواحد يقول ليك تاني. وأكيد يا قرشو في حاجات كتير غلط يعني مثلا الداردمه (الدندرمه) تلك الألوان التي يتم إضافة السكر إليها وتعبأ بها أكياس وتوضع في فيرزر التلاجه وتباع للأطفال على إعتبار أنها أيس كريم وهي في أحسن الأحوال آيس إن لم تقطع الكهرباء لفترة زمنيه طويله.
نحن في السودان أخي قرشو محتاجين لي حماية في كافة مناحي الحياة ومحتاجين قبل ذلك لتثقيف وشجاعة نعرف من خلالها حقوقنا وواجباتنا ومحتاجين نعرف كمان هل نحن مواطنين ولا ما مواطنين ، وهل في قانون ولا ما في قانون وهل في ناس فوق القانون وباقي الناس تحت القانون ، بعدين رد حماية المستهلك على السطور التالية حا يكون شنو مثلا في تقديرك :
المشتري: يا أخوي البضاعة دي كعبه غيرها لي ما بشيله والله
البائع: تشيلها ولا ما تشيلها على كيفك عنك ما شلتها قروشك في جيبك والبضاعه في الدكان
البائع: يعني ما في واحد دق ليك باب بيتكم وقال ليك تعال أشتري
المشتري: يا أخوي إنت رخصو ليك وفتحت المحل ده عشان تخدم الناس مش عشان تستعمرهم وتستغل حاجاتهم
البائع: والله أنا فتحت المحل ده عشان أترزق الله مش عشان أخدمك إنت أو غيرك ولو كنت لاقي حاجه غيرو كان عملتها
المشتري: يا أخ في نظام وفي قانون حماية مستهلك في البلد دي
البائع: يضحك بصوت عالي ، قانون حماية المستهلك والله خوفتني يا إبن العم ، ولو إفترضنا إنو في قانون زي الإنت قلت عليهو ده إنت بتعتبر نفسك مستهلك بالله إنت هسه مستهلك مشتري ليك ربع كيلو وبتقول مستهلك والله صحيح الإختشو ماتو
المشتري: يا سيد إن شاء الله أشتري بي مليم واحد إنت دخلك شنو في بضاعة وفي تسعيرة وفي نظام
البائع: حبيبي يا نظام أمشي جيب النظام قبل ما أطلع ليك من المحل وأوريك النظام العام والخاص كمان نظام شنو يا أبو نظام إنت.
يتجمهر نفر غير قليل مرددين ومخاطبين المشتري "باركها يا إبن العم" دي البضاعه العندو أو الداير يبيعها ليك ولو ما عجبك شوف ليك محل تاني هو مش المحل الوحيد في السوق"
المشتري: يا عالم أنا لو عملت كده بضيع وبهدر حقوقي لازم الناس تعرف حقوقها
بعض المتجمهرين مهمهمين: يا أبن العم الله يهديك حقوق شنو كمان إنت بتضيع في وقتك ووقت الناس الواقفين ديل ، يا تشتري يا تنكشح
|
|
 
|
|
|
|
|
| |
almulaomar
فيس بوك
تويتر
انستقرام
يوتيوب
بنتيريست