|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
إخوان وأخوات لا أعرفهم ولا يعرفوني كم دعوت لهم بظهر الغيب لحالهم لما أعلموني هذا ما (ملكت) ..وبذلته ..وما اهلكوني أحببتهم في الله وها قد بادلوني إن كان* يحسب حسنا فهو بضاعتي وهم أربحوني.
الدعاء بظهر الغيب* ............................................................................ سودانيز اون لاين كما قال الشاعر..(زي شباك منور في ظلام الليل) .............
أما البوسط البجيب الشئ الكعب أقفلو وما ت ت ع ب , ولا شنو؟
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
تعلمت من المنبر كل (السمح)
اخوان بحق وحقيقة (مش هظار)
تعلمت كيف يكون الانسان (بنى ادم ومتسامح)
تعلمت انه سودانيزاون لاين مش مجرد اعضاء اجتمعوا (باختلافاتهم الكثيرة)
بل اسرة واحدة (رغم المشاترين) تجدهم بقربك عند (الصعب)
وتلعمت ايضا مهما وجدت (الكعب هنا) لا تساوى الجمال الذى وجدته هنا
وجدت (صحبة الكترونية) بمشاعر يندر ان تجدها فى صحبة حقيقية
ندوية ان شاء الله ما تشوفى اى كعب (بس تقعى فى سمح وتقومى من سمح)
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
العزيزة نادية تحياتي والإحترام
في ظني أن هذا المنبر يمثل الواقع السوداني بكل جماله وبكل تناقضاته . المعلومة مبذولة لمن يريد ، وهؤلاء الذين يحرصون على نصف رأيهم الذي هو عند أخيهم موجودون . وناس ( كتحتنا في وسط البحر ) أيضاً موجودون . العلاقات الإنسانية متوفرة على أرقى مستوى ، تتجلى بحميمية في لحظات الضعف الإنساني عند وقوع حادث أليم جربت ذلك عندما اختلت كل موازيني برحيل سندي في الحياة المرحوم والدي الذي فارقني فجأة، وجدتهم كلهم معي . وأيضاً ( الشكل المجاني ) برضو موجود . الحراك الموجود في ظاهرة صحية رغم حدة الإستقطاب والترصد أو قولي قلة هامش التسامح ، المقلق هو ظهور النبرة العنصرية الكريهة .
على المستوى الشخصي
تعلمت منه كثيراً تعرفت فيه بأفاضل وفضليات لم تختلف شخصياتهم في الواقع عندما التقيتهم بل قد يزيدون ظرفاً ومعرفة . يبقى ذلك الذي يشبه الإدمان في ضرورة المرور
باختصار
المحصلة إيجابية
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
Quote: عن نفسى
تعلمت الصبر على الأذى (سمح)
و
تعلمت الحرص فى التعامل (سمح)
و
تعلمت السهر (كعب)!!
و
تعلمت الصبر على الجوع عشان ارد على بوست لما الاكل يبرد ويطلع من نفسى (كعب) !!
|
قطعت جهينة قول كل خطيب!!!!
Quote: تعلمت الصبر على الجوع عشان ارد على بوست لما الاكل يبرد ويطلع من نفسى (كعب) !!
|
ويمكن تأكلي ويمكن لا؟؟؟؟؟
بس الخرابي تخليني على الأطلاق كان برد كان ما برد.... كلو سوا.....
غايتو أصلها الخرابي النت دي فاتحه خرابتها طوالي عندي إلا منما أجيها بس أكوس الخرابي القاصدا ديك وأمشي أكوسلها, كان ألقاها كان ما ألقاها بس هي في ....
بس نقول شنو!!! الشايقي
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
سلام يا نادية،
موضوع جميل ...
سودانيز أونلاين يصبح إدمان بعد فترة ..
في كتاب مميزين وبتلقي نفسك متابعة معظم (وليس كل) ما يكتبون
بالتأكيد سودانيز أونلاين ساحة للتواصل بين السودانيين حول العالم. ودي حاجة تحسب للأخ بكري أبوبكر، ومجهود يُشكر عليه
بصراحة، سودانيز أونلاين ما أضاف لرصيد أصدقائي، لأنّي ما تعوّدت أختار أصدقائي أونلاين بس. ده ما بيمنع إنّو في ناس كتيرة هنا تستاهل إنّو الواحد يسعي لصداقتها علي فكرة . بس للأسف ما حصل لاقيت زول من المنبر وجهاً لوجه حتّي الآن؛ وعشان كده قلت إنّو المنبر ما أضاف لرصيد أصدقائي ...
بالمقابل، كتابة البعض هنا - خاصة بعض مدّعي النضال، ممن لا يفرّق بين السودان كوطن كلنا ننتمي ليهو وبين حكومة الإنقاذ التي لا تمثّل إلا قلة - تجعلني أضع يدي علي قلبي خوفاً علي وطني
بكل أسف يا نادية، خلاصة ما خرجت به من هنا إنو نحن السودانيين ما بتنفع معانا الديمقراطيّة، وعلي طول بنقلبها فوضي. جولة سريعة علي المنبر تخليكي تعرفي إنّو الحكاية في أغلبها كيمان وتصفية حسابات
أحياناً بتحصل مشاكل بتصل مراحل تخليك تتذكّري شكل شفّع الروضة! نادراً ما تلقي نقاش موضوعي بين إتنين مختلفين في الرأي؛ وكل زول بيتناول الأمور من وجهة نظرو بما يخدم أهداف التوجّه البيتّبعو
ده غير إنّو في ألفاظ متكرّرة هنا ما إتخيّلت يوم إنّي ممكن أقراها مكتوبة في منبر نقاش يغشاه الكل. ياخ في ألفاظ أصلاً ما سمعتها إلا هنا!
علي كل حال سودايز أونلاين مدرسة مفيدة، الواحد بيتعلّم منها الكتير. وما بالضرورة إنّو كل البتعرفيهو هنا يكون مفيد. أحياناً لازم نعرف الغلط عشان نتجنّبو!
آه، وقبل ما أنسي ...
تعلمت إنّي لما أكون في نقاش مع زول أسد كل الثغرات الممكنة في طرحي لوجهة نظري قبل ما أعلنها. وبرضو إنّي دايماً أخلي خط رجعة للطرف التاني، وأسهّل عليهو التراجع عن رأيو لو كان خطأ بدون ما يحس إنّو الموضوع شخصي ويصر علي موقفه ...
علي كل حال مشكورة علي إثارة الموضوع، ويديكي العافية ...
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: ابو جهينة)
|
ابو جهينة ياغالى
عارف ؟
زمان لما الولد المهذب الجميل الاسمو لؤى شمّت جانا فى القاهرة حكى لى عنك كلام جميل وقال انو بيحبك ويحترمك جدا وقلت ليهو انو ده نفس احساسى بالجد .. عاين
منبر بكرى ده حقق لى حاجات كتيرة سمحة منها التعرف على شخصية راقية وجميلة زيك والله
Quote: أكعب شيء .. هو أن يعاديك عضو هنا عن سوء فهم لما ترمي إليه ... |
والله نفس الملامح والشبه وده شئ بيحزن قلبى شديد انو سؤ الفهم يخلق عداء بينى وبين اى زول فى الدنيا دى ناهيك عن منبر بكرى البنحب كل ناسو السمحين !!
بالمناسبة لؤى شمّت اخبارو شنو عساه طيب .. بالله طمنا على الزول المهذب ده لو لسة عندكم فى المملكة سمح ؟!!
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
ندو حبيبة مشتاااقين احنا انا عن نفسى اتعلمت حاجات ..وعرفت حاجات .. وقوت عندى حاجات وترسخت اكتر عندى قناعات !!
اتعلمت الصبر على الاذية .. اتعلمت برضو عدم التسرع فى الاحكام.. لكن الباقى عرفتو وشفتو بس الحمدلله مااتعلمتو !! وعرفت انو فى ناس مابتعرف فى الدنيا دى غير الاذية.. وعرفت ان الفجور عند البعض فى الخصومه عند البعض ماعندو حدود .. وعرفت ان البعض يعشق ان يكون شاذا وسط الاخرين حتى ولو كان هذا خصما عليه/لايهم!! وقوت عندى قوة احتمال غير عادية ودى بتكون مع الصبر فوق وترسخت عندى قناعات انو مرمى الله مافى زول بيرفعو ولو اتقلبت الدنيا !! وانو المااتربى فى بيتو من هو صغير وحياتك حبيبه لو اتقلبت الدنيا مابيتادب !! كفاك ولا ازيدك ؟! حبيبة تسلمى يارب
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: ماجدة عوض خوجلى)
|
نادية عثمان اولا حمدلله علي السلامة ومنورة البورد يقولون معرفة الناس كنز كل لحظة من عمرنا لها ثمن كل شاردة واردة او ومضة واشراقة لها تاريخ كل موقف له معني وتبقي ابدا المعاني والمواقف الجميلة واللحظات الممتعة لاتنتهي والحياة استمرار وليست تكرار فكل جمال بجماله وكل متعة بلحظتها وكل انسان بمواقفه والحياة لاتقف وتبقي الحياة باستمرارها وحياتنا بقصرها فلنعش مواسم الفرح الاتية فليس هناك زمنا لاهداره قيل اليوم جميل والغد اجمل سمح
| |
|
|
|
|
|
|
Re: بمنتهى الصراحة .. (Re: نادية عثمان)
|
ندوية العسل ...
العمل العام ( سمح شديد)
حب الناس ( سمح شديد)
Quote: أكعب شيء .. هو أن يعاديك عضو هنا عن سوء فهم لما ترمي إليه ... |
أكعب شيء .. هو أن يعاديك عضو هنا عن سوء فهم دون ان ترمي إليه ... (كعب شديد)
| |
|
|
|
|
|
|
Re: بمنتهى الصراحة .. (Re: انعام حيمورة)
|
سلام نادية تعلمت أن أحب غيري دون شروط. تعلمت أن أمد يد العون لمن أرادها، وأن أكون حاضرة لمن لم يطلبها بعد. تعلمت بأن هناك أخاً وأختاً لم تلدهم أمهاتنا برغم أننا لم نراهم ولم نستمع لأصواتهم ولكننا لا نستطيع الإستغناء عن شهامتهم وطيب قلوبهم
| |
|
|
|
|
|
|
Re: بمنتهى الصراحة .. (Re: محمد صباحى)
|
محمد صباحى
انت اخو معتز صباحى الفنان الجميل داك ؟!
Quote: تعلمت بأن هناك أخاً وأختاً لم تلدهم أمهاتنا برغم أننا لم نراهم ولم نستمع لأصواتهم ولكننا لا نستطيع الإستغناء عن شهامتهم وطيب قلوبهم |
وما اظن فى اجمل من كده فى الدنيا (سمح لمن سمح ) !
| |
|
|
|
|
|
|
Re: بمنتهى الصراحة .. (Re: انعام حيمورة)
|
انعام حيمورة
سلامات كتارااااات
Quote: حب الناس ( سمح شديد) |
والله ده نعمة من ربنا ان شاء الله ينعم علينا بيها ومايحرمنا منها ابددددددددا يارب ..(سسسسمح جدا)
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: نادية عثمان)
|
تحياتي نادية وعوداً حميداًُ بعد طول فراق (سمح) أهو دي واحدة من ابعاد البورد الاجتماعية... مجتمع بحق...
والتحية لضيوف البوست (سمح برضو)...
تعلمت ان أقرأ بعقل مفتوح جداً ، والا اضع ثابتاً غير قابل للتغير ، فإمكانية النقاش ذا المصادر المتعددة مفيدة للجميع (موش سمح؟)
في ناس هنا وان لم يعودوا متواجدين الآن ، أثروا فيّ بشكل كبير جداً ، أهديهم عبر بوستك أسمى آيات المحبة
على سبيل المثال لا الحصر (إيمان أحمد ، رودا مردا ، عبد الله بولا ونجاة محمد علي ، د.عباس مصطفى صادق، حنينة وخالد الحاج والعتبى لمن سقط اسمهم/هن سهواً) (سمح خالس)
في ناس هنا اتمنى ان لا ينقطع عطائهم/هم\ن ، أهديهم عبر بوستك أرقّ أزهار المودة...
على سبيل المثال لا الحصر ( أ.محسن خالد ، أ. يوسف الموصلي ، أ. عبد المنعم عجب الفيا، أ. تماضر شيخ الدين ، د.إشراقة مصطفى) وعذراً لمن سقط اسمهم/هن سهوا)
وقد أعود للتكملة(....) ( دي واحدة من الجاكات الاتعلمناها هنا يا نادية )
أنور
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: اسامة الخاتم)
|
تعلمت إنو ما ضروري يكون عندي "مكتبة بإسمي" أو "أفتح بوست جديد"، إلاّ إذا كان الموضوع جديد والفكرة متفردة ومفيدة وعندي الزمن للمتابعة والقدرة على الرد، وتعلمت إنو الأهم أن أدخل كل بورد إيجابي أتعلم منو وأشارك وأدعم الأفكار الإيجابية والخيرة. وأرمي لي قدام..
تعلمت أن أتحاشى الشهرة وأقاوم حب الظهور.
أتمنى أن أواصل إلزام نفسي أن لا أشارك في أي بوست مشاتر.
تعلمت هنا كيف أكون فاعل وأحول أي فكرة ممكنة التنفيذ لخطة عمل.
وتعلمت أن الخير دائماً يسود ويبقى مهما طال الزمن.
وعرفت إنو في ناس بحبو السودان بالفعل مش بالكلام.
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: Elawad Eltayeb)
|
العوض الطيب
سلامات كتارات
Quote: تعلمت إنو ما ضروري يكون عندي "مكتبة بإسمي" أو "أفتح بوست جديد"، إلاّ إذا كان الموضوع جديد والفكرة متفردة ومفيدة وعندي الزمن للمتابعة والقدرة على الرد، |
ياسلااااااام اها ده تواضع وفهم سمح جدا جدا
Quote: أتمنى أن أواصل إلزام نفسي أن لا أشارك في أي بوست مشاتر. |
وده اسمح من السماحة فى حد سماحتها زاتها !
Quote: وتعلمت أن الخير دائماً يسود ويبقى مهما طال الزمن. |
اها فى سماحة اكتر من كده بالله ؟!!
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: غادة عبدالعزيز خالد)
|
طيب يا ندويه.. اتعلمت اشاركم الفرح والحزن.. سمح اتعلمت اوصل فكرتي بالكتايه..يعني ما قاعده لتم شرحي باشارات اليدين..سمح اتعلمت اضحك براي مع الكومبيوتر لما اقرا حاجه مضحكه كاتبها زول...سمح اتعلمت الصبر...سمح أدبت نفسي أكتر...سمح اتعلمت أشوف كلام كعب بدون ما يغمي عليا...شين اتعلمت بالزمن أعرف بتحديد أكبر الميول والألتزامات السياسيه لكتير من الزملاء والزميلات.. افتكر سمح.. اتعلمت اشرب قهوه أكتر..سمح للمزاج كعب للصحه.. قلت قراءاتي للكتب..كعب جدا.. قلت ساعات نومي...افتكر كعب.. اتعلمت اوسع دائرة علاقاتي بالناس الحلوه هنا واتعرف بأسرهم...حلو جدا جدا..
كفي الليله ..موش؟
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: Muna Khugali)
|
منمن حبيبة قلبى من جوة
Quote: اتعلمت اضحك براي مع الكومبيوتر لما اقرا حاجه مضحكه كاتبها زول...سمح |
انا زااااااااتى زيك وده جنون سمح
Quote: اتعلمت اشرب قهوه أكتر..سمح للمزاج كعب للصحه.. |
وانا مشكلتى بنسى اشرب اى حاجة وانا مصاقرة منبر بكرى ده (كعب جدا )
Quote: قلت قراءاتي للكتب..كعب جدا.. |
نفس الملامح والشبه يامنى !! كعب جدا
Quote: اتعلمت اوسع دائرة علاقاتي بالناس الحلوه هنا واتعرف بأسرهم...حلو جدا جدا.. |
اسمح من السماحة زاتها ياعسل
كونى بالف خير ياحبيبة
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: النذير حجازي)
|
الرائع النذير حجازى
Quote: ما تعلمته من غوغاء سودانيز أون لاين هو العمل بهذه الحكمة وأعز الله قائلها: والصمتُ عن جاهلٍ أو أحمقٍ شرفُ....... وفيه أيضاً لصونِ العرض إصلاحُ أما ترى الأسدَ تخشى وهي صامتةٌ؟! ........ والكلبُ يخزى لعمرُ اللهِ نباحُ؟! |
لله درك اخى الاكرم
ولكن اعتقد ان المنبر كما به من الغوغاء كما جاء فى وصفك فهناك ايضا اروع الناس وانت منهم
يلا تعال قول برضو السمح الاتعلمتو من سودانيز اون لاين سمح ؟!
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: Mohammed Ibrahim Othman)
|
الكعب :
_ عرفت انه في ناااس بيكروهنا لدرجة العمى فقط لاننا ولدنا من ابوين شماليين ويطلقو علينا جلابة ،ويتمنو لو يفنونا من الوجود .... _ عرفت انو في جراءة سيئة في كتابة عناوين البوستات ...بدون اعتبارات لشدتها علينا ولحريمنا واخواتنا وعيالنا ....تورعت عن مطالعة امام عيالي حتى اتاكد من خلوه من عبارات نابئة مقززة ... _ عرفت انه نحن عاطفيين جدااا وممكن واحد لو فهم كتابتك خطأ ...يتهمك بابشع التهم ويعاديك اشد العداوة ... _عرفت ان بعض الناس بتدافع عن بعض فقط بسبب الميول الحزبية او الجهوية ... _ تعلمت ما اقول كل ارائي ...لان هناك من يطالب بالديمقراطية ويمنعها منااذا اختلفنا معه في ارائه ... _ عرفت انه ممكن يجتمع عليك نفر لاغتيال شخصيتك المعنوية بنشر الاشاعات والتهم ...
اها يانادية قصرنا معاك ...قلنا ارائنا بكل صراحة والله ...
| |
|
|
|
|
|
|
Re: بمنتهى الصراحة ..واجه نفسك ..ماالذى تعلمته من منبر سودانيز اون لاين (سمح وكعب)؟!! (Re: Mohammed Ibrahim Othman)
|
Mohammed Ibrahim Othman
Quote: عرفت انه في ناااس بيكروهنا لدرجة العمى فقط لاننا ولدنا من ابوين شماليين ويطلقو علينا جلابة ،ويتمنو لو يفنونا من الوجود |
ياساتر يارب ..ربنا يهدى النفوس يارب !!!
Quote: عرفت انو في جراءة سيئة في كتابة عناوين البوستات ...بدون اعتبارات لشدتها علينا ولحريمنا واخواتنا وعيالنا ....تورعت عن مطالعة امام عيالي حتى اتاكد من خلوه من عبارات نابئة مقززة ... |
والله ده شئ مؤسف فعلا .. لكن الحمد لله برضو فى بوستات راقية وجميلة ومصادمة وحقيقية يعنى فى وفى وهنا يكم العزاء والسلوى سمح ؟!
| |
|
|
|
|
|
|
|