شهر عشرة حبابو عشرة - بوست توثيقي لأناشيد أكتوبر

الملحمة (قصة ثورة)
كلمات: هاشم صديق
غناء : الاستاذ الموسيقار ود اللمين - عثمان مصطفي وخليل اسماعيل وبهاء الدين ابوشله وام بلينة السنوسي

لما الليل الظالم طول وفجر
النور من عينا اتحول
قلنا نعيد الماضي الاول
ماضي جدودنا الهزمو الباغي
وهدو قلاع الظلم الطاغي
******
وفي ليله وكنا حشود بتصارع
عهد الظلم الشب حواجز.. شب موانع
جانا هتاف من عند الشارع
******
قسما قسما لن ننهار
طريق الثورة هدى الاحرار
******
والشارع ثار
وغضب الامه اتمدد نار
******
وهزمنا الليل
والعزة اخضرت للاحرار
******
وطني أنحنا سيوف امجادك
نحن مواكب تفدي ترابك
ولسه الشارع بشهد لينا
في يوم الغضبه حصاد ماضينا
مشينا نعطر حقل الثوره
بدم نفديها بلادنا الحره
وكان اكتوبر فجر الغضبه
كسرنا قيود الماضي الصعبه
ولما مشينا مواكب صامده
تهدر وتغلي وتهتف راعده
******
الرصاص لن يفنينا
الرصاص لن يفنينا
******
وسال الدم في ارض الوادي
فدينا النور بالروح يابلادي
وكانت صفحه حكاها العالم
وفجر اكتوبر طل وسالم
******
وهزمنا الليل هزمنا الليل
والنور في الاخر طل الدار
وهزمنا الليل هزمنا الليل
والعزه اخضرت للاحرار
******
وكان في الجامعه موكب هادر
صمم يجلو الليل السادر
وكان الليل السادر غادر
فجر غضبو سموم دخان
******
الشعب الثائر صمم هادر
يصرع ليلنا الداجي الطول
******
وكان القرشي شهيدنا الاول
وما اتراجعنا
حلفنا نقاوم ليلنا وسرنا
وما اتراجعنا
******
للشمس النايره قطعنا بحور
حلفنا نموت أو نلقى النور
******
وكان في الخطوه بنلقي شهيد
بدمو بيرسم فجر العيد
******
يا اكتوبر انحنا العشنا ثواني زمان
في قيود ومظالم وويل وهوان
كان في صدورنا غضب بركان
وكنا بنحلف بالاوطان
نسطر اسمك ياسودان
******
بدمانا السالت راويه الساحه
حلفنا نسير مانضوق الراحه
شهرنا سيوف عصيانا المدني
وكانت وحدة صف ياوطني
وايد في ايد حلفنا نقاوم
ومابنتراجع ومابنساوم
خطانا تسير في درب النصر
هتافنا يدوي يهز القصر
******
كسرنا حواجز ازلنا موانع
صفنا واحد
عامل وطالب وزارع وصانع
ياساحة النصر ياحقل النار
ياواحه بتحضن روح اصرار
******
روينا ورودك دم ثوار
وشتلنا فضاكي هتاف احرار
خطينا ترابك احرف نايره
بتحكي سطور ايامنا الثايره
******
وشلنا الشهدا مشينا ونهتف
الرصاص لن يفنينا
وجرح النار في قلوبنا بينزف
الرصاص لن يفنينا
سجينا الشهدا وجينا نقاوم
الرصاص لن يفنينا
مابنتراجع ومانساوم
بينا وبينك تار يا ظالم
وفجأه ونحن صفوف بتصمم
زغرد فجر الغضبه الحالم
******
وهزمنا الليل هزمنا الليل
والنور في الاخر طل الدار
وهزمنا الليل هزمنا الليل
والعزه اخضرت للاحرار
******
قسما قسما يا اكتوبر
نحمي شعارك نجني ثمارك
ونرفع راية الثوره الغاليه
عاليه ترفرف فوق الساريه
عليها شعار الثوره الاكبر
ورسمو النادر زاهي واخضر
ولسه بنقسم يا اكتوبر
لما يطل في فجرنا ظالم
نحمي شعار االثوره نقاوم
ونبقى صفوف تمتد وتهتف
لما يعود الفجر الحالم
يااكتوبر

الملحمة