أستجواب عاجل لـ(تراجي مصطفى) تعالي جاي بسرعة....

Quote: العضو : تراجي مصطفى. بما أنك قد تغيبتي عن هذا المنبر لمدة خمسة (5) أيام عجاف من تاريخ 18/9/2007م حتى 22 منه دون إذن أو إبداء أي أسباب شرعية.

ورغم الكوره وهلال مريخ الشايقي كثر خيره فقدني.


اها يا الشايقي يا اخوي بعد الحرده مشيت مظاهرة آتوا
وآتوا دي يا اخوي اجارك الله منها 6 ساعات زي السم ذهاب و6 اياب!!
وللتعتر لينا الجماعه المعاي نعسوا وقالوا لي تسوقي قلت ليهم جدا
ناموا كلهم,,حاتك اختك طششتهم طشه اسكت ساي
قربت امرقهم في امريكا,اتاريني طلعت بمخرج خطأ
وشارع جميل وهادي لا شاحنات ولا زحمه
واختك كاسحه...الناس ينومو ويصحوا ويقولوا لي كيف السواقه معاك
الشارع شكله فاضي اقول لهم تمام كله تمام....بعدين انتبهنا
لا قرى لا محطات بنزين ....لا استراحات.....لا علامات بتوضح آتو
كل الهناك بيقول الكبري للولايات المتحده بعد كذا كيلو؟؟
هاياخوانا التطير عيشتي...الناس ديل ضيعتهم وين؟؟؟
المهم يازول ربك رب الخير عثرناعلى محطة بنزين وسألنا فيها
قالوا لينا بعدت مسافة ساعتين من آتو!!
ورجعنا بسرعه خرافيه..وياويلك من مخالفة السرعه في كندا
لو قبضوك بيها...ترفع لك سعر التأمين اقل شيئ حوالي ال 50 دولا شهريا
لمدة 5 سنوات!!اها شفت المحن الانا بدخل الناس فيها؟؟؟

وحاتك بعد ده مافي طريقه غير نصل في الوقت المحدد
والطلاب المنظمين للتظاهره بدأوا يتصلوا..اها انت وين؟؟اقول لهم على بعد ساعه
وثاني ..على بعد نصف ساعه...ولما وصلناهم و التظاهره على وشك النهايه.
لما وصلنا قدام البرلمان الكندي....فيلم عشان تلقى لك موقف للسياره
ولاحظ نحن ناس اقاليم و العاصمه دي بنجيها للمظاهرات بس(يعني مهمشين
هنا برضوا واريتو تهميش حبيبك) المهم يازول قلت للمعاي انا نزلوني هنا
وانت بطريقتكم تفتشوا موقف تلقوا ما تلقوا...انا لازم اجري....وجريت جري....
غايتو الساوها فينا قضية دارفور.....بس خليها في سرك وقول ربنا يعظم الاجر.

والله يا الشايقي انا جنس الجري الجريته في البلاد دي لو جمعته مع بعضه بيوصلني السودان كدر
تجري الصباح تودي العيال ...وتجري اليوم كله عشان تخلص حاجاتك قبل رجعت العيال
وتجري الظهر لجيبتهم,,,تجري...وتجري,,تجري لما تنكفي على وشيك.
غايتو يا الشايقي لو شفت لك اي تصوير عن كندا وشفت لك زوله بتجري
تأكد انها دي تراجي مصطفى.


ما خلصنا من مظاهرة آتوا...كمان جينا لمظاهراتنا بتاعت اكل العيش
اها حسب شغلي (النكرته رجاء العباسي وسوتني عاطله)في منظمه اسمهاSACHA
وتلقى معلومات عنها هنا وعن هذه التظاهره:
http://sacha.ca/home.php?sec=23
اها دي احلى انواع المظاهرات.....فهي مظاهره ليليه وفي سبتمبر دائما من كل عام
وهي ضد العنف وتخليدا لذكرى نساء كنديات قتلهن احد السفاحين
ونعتقد كناشطات بان التحقيق حول مقتلهن لم يحظى بالحرص
والاهتمام الكافي...,ذلك لانهن من مهمشات كندا
فاغلبهن من بنات native او aboriginal من كنا نقول عنهن في السودان بنات الهنود الحمر.
(على فكره الآن كلمة هنود حمر تعتبر مسبه وممنوعه في كندا لان اهلها رفضوها وكذلك كلمة اسكيمو عقبال السودان...شف في كم كلمه اهلها ما بحبوها تطلق عليهم؟؟)
في ذكراهن نقرر ان نخرج كنساء لوحدنا ليلا ومع اطفالنا
وان نقول من حقنا ان نكون آمنات.

وتعاريف الآمن متنوعه
فنتحدث عن الآمن من الجوع
والآمن من العنف
والآمن من العطاله
و...الخ.


في هذه التظاهره كانت امنا حواء محمد عيسى حاضره معنا
وتحدثت للبعض عن الظلم الذي وقع عليها من قبل حكومة السودان.


هذه تظاهره تعجبني كثير.....
فهي تظاهرة قوة وليس تظاهرة ضعف.....
وتجتمع فيها الناشطات بكل الوانهن وخلفياتهن المتنوعه
ومعتقداتهن...و تنوعنا وتباين خلفياتنا يقوينا ولا يضعفنا.
ونردد في هتاف هادر....
Women unite......... talk back the night

نساء تهتف بالانجليزي ونساء بالعربي ونساء بالفارسي و....الخ
بكل لغات الدنيا هتفنا لوحدتنا كنساء.


اها بعدها وحاتك اختك رقدت سلطه
اها المره دي عين خواجات ما جلابه


اتذكرت حسه حاجه كنت ناسياها
لاقتني زمليها فارقتني ليها سنه
وقال لتي يازوله انت بتصغري ما بتكبري مالك؟؟؟
عاد يا الشايقي نسيت اقول ليها هرشك..والله اكبر عليك.
اظنها...ياها هي القرضتني بعينها.

وحاتك مرضت انا وحازم ولدي وقربنا نموت.
انفلونزا زي الملاريا.....وغربه يا الشايقي خليها على الله.
اليناولك ..حبة شوربه تقوي عضامك مافي.
اها كثر خيرك يا اخوي الفقدتني.


صحبتك الحيزبون.





تخريمه:
انت مسؤل من الخير حيزبون يعني شنو؟؟؟