والله المغتربين السودانيين البيجوا السودان اجازات ويرجعوا حيرونا ..!!

Quote: الاستاذ جلال جبريل السلام عليكم و رحمة الله و بركاته ردي هذا علي تعليق الاستذة اميرة السيد في البوست بتاع ناذر الخليفة ( عن المغتربين ) .. ارجو شاكرا ادراجه في بوستك المخصص لمشاركات القراء من غير الاعضاء و كذلك ارجو شاكرا ادراجه في بوست ناذر حتى يتسنى للاستاذة اميرة الاطلاع و الرد عليه ان هي رغبت بذلك. اولا: الاستاذة اميرة دمغت جميع موظفي المصالح الحكومية بانهم يأخذون رشاوي ( حتى الاستثناء الشكلي حرمتنا منه) حيث قالت "يعني يا صلاح جميع موظفي الحكومة السودانية بياخدوا رشاوي" و ليت مصدر كلام الاخت اميرة كان تجربة شخصية مع موظف او مسئول حكومي طلب منها صراحة او ضمناً ان تعطيه رشوة حينها يكون الخطل في التعميم فقط .. و لكن للعجب كان مصدر كلامها سمسار يحاول ان ياخد منها رشوة ... " فقال بعبارة واضحة ومفهومة:" نحن هنافي السودان اذا اي موظف ما اخذ رشوة ما ممكن يشتغل ...فسألته :: وهل لكلام ده بينطبق على كل المصالح لحكومية .. فقال نعم.." و فات على الاخت اميرة ان صاحبنا هذا مستفيد من رده عليها بهذه الصورة حيث يحاول دفعها لان تعطيه الرشوة بدون كلام كتير بان يوحي لها بان هذا هو الاسلوب المتبع في كل المصالح الحكومية السودانية و لا يدعو للدهشة او الاستغراب. وحتى لو استبعدنا عامل المصلحة عند السمسار كيف نفترض في سمسار او عرضحالجي يعمل علي هامش مصلحة الاحصاء كيف نفترض فيه المعرفة بحال موظفي الشئون الهندسية او مصلحة المياه او اي مصلحة حكومية اخرى حتى تقول عنه الاخت اميرة انه "علرف كل ما يجري في المكاتب السودانية" و من ثم تصدر بناءً عليه حكما قاسياً علي" جميع موظفي الحكومة السودانية" بانهم "بتاعين رشاوي " و من ثم تجود علينا بال (وجه مكشر) ؟؟؟؟ ثانياً : يتضح من القصة ان الاخت اميرة لم تحاول اصلا ان تاخد حقها بالدرب العديل حيث يتطلب ذلك ملي ارانيك ووقوف في الصفوف حيث قالت : "وقابلت احد الموظفين وقال لي : بدل ما تبهدلي نفسك في الصفوف وتجري ورا ملء الارانيك وما بتعرفي المكت بالبطلع الشهادات وين خلي واحد من الأخوان القاعدين تحت الشجرة ديك يساعدك وتديهو الفي النصيب" و يفهم من هذا انه قال لها هذا الكلام من باب النصيحة .. و لو رفضت الاخت اميرة نصيحته واصرت ان تاخذ الارنيك بنفسها و بهدلت نفسها في الصفوف شوية و جرت وراء ملء الارانيك لضيقت بابا من ابواب الفساد .. و لكنها استسهلت دفع الرشوة و " اشترت دماغها " و بعد نهاية الفلم جات عشان تقول "إلا موظفين الحكومة ما سمحين وما طيبين.. ( وجه مكشر)" اخيراً : الاخ جلال جبريل .. ارجو ان تعفينا من قصة اشتراط الاسم الثلاثي هذه حيث ان بعض اعضاء سودانيز اونلاين انفسهم لا يكتبون باسمائهم الثلاثية ( اساسي و قيقراري مثالاً).. و لك بعد ان تتطلع على المكتوب ان تنشره او ترد معتذراً لمرسله حسب تقديرك و لك جزيل الشكر ابو كريم موظف في مصلحة حكومية مقيم بالخرطوم

(عدل بواسطة اميرة السيد on 10-24-2012, 07:57 PM)