|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
الاخ ناذر سلامات تعرف خلاص كنت طالع ماشى البيت (من المكتب) قمت لى شلاقتى قلتا اكشف للمنبر شويه لقيت الجريو ده حايم جمب الشاشه بتاعتى و رحتا ...... واحده واحده و ميت بالضحك
لو فى طريقى اسأل لينا الغفير من ام الجريو او ابوهو لانو لو الجريو ده عمل كده فى الجماعه ديل اكيد امو ولا ابوهو
ح يكونوا فى الدستورية و لا الجنائية.
السبب كلو من الغفير الرفع السعر كده يعنى هسى لو كان باعو بنفس السعر احتمال كان رجل الاعمال ده رشاهو فى العيد من غير سبب.
بس ما تكون نظارتك الطارت ديك. ..
متابعين
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: محمد البشرى الخضر)
|
سلام يا ناذر وضيوفه الكرام بوست متعة والله يا ناذر، طبعاً يا ناذر الشعب السوداني كلو بحب الجريوات، دي أسألني منها كان عندي كلــبة (الله يكرمكم) من سلالة أمريكية، وكانوا الشباب بحجزوا الجريوات قبل سنة من الولادة، حتي مدير مدرستنا المتوسطة كان مهووس بالجريوات، ولي معه قصص طويلة معي ومع الجريوات لا يسع المكان لسردها.
وبالمناسبة يا ناذر القصة دي لو كنت صنفرتها كويس كدا ولحتها سوق جائزة الطيب صالح، كانتا فوزت مع هشام آدم وطه جعفر
تحياتي وفي إنتظار التتمة على أحر من الجمر
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
قصة ممتعة ياناذر ؛؛
كل الشواهد بتقول إنت حسن؛قول لي كيف؟
كيف:
Quote: الحركة دي زعلت ليك حسن زعلة ما عادية طوالي فتح جُزلانو وطلع ليهو شريحة تانية كان خاتيها لليوم الاسود (هو في يوم أسود أكتر من يوم الجريو دا) !! ما في زول عارف رقما إلا هو ودخلا في الموبايل وإتصل تاني بي سيف ..!!
|
اها إنت كنت قاعد مع حسن لمن عمل الحركة دي ؟
Quote: حسن إنتهى من أبوهو وطوالي دخل الحمام .. طلع الشريحة الخاتيها لليوم الأسود .. كسرا وهرسا ورماها جوة الحمام وجر الموية .. سرعة سرعة طلع تلفونو ومسح كل الهستري بتاع المكالمات وجاهم طالع بي كل براءة وفوق راسو بتدور الأربعة عصافير الصغار ديلاك دليل البراءة ..
|
المرّاقة الوحيدة الممكن تطلعك منها ؛إنو حسن حكي ليك الموضوع بتاع الحمام ده بعد النفوس هدأت.
اها دي بتمرق منها كيف:
Quote: (إتضح فيما بعد إنو بعد الزرزرة دي كللللللللللها ما في تسجيل ولا حاجة لكن حسن التفتيحة لعب بي أعصاب سيف الدقوسة ونجح في كدة) ..
|
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: بشير جبريل علي)
|
Quote: غايتو أنا عملت تحليل لكل الشخصيات التي وردت في القصة .. بما فيهم الخفير والجريو ..ما لقيت شخصية منهم بتنطبق على ناذر .. |
لوووووووووووووووووووووووووووووووووووووووووووووووولز ياخ انت ده التحفة يا بشير ياخ مبااااااااااااااالغة اضحك الله سنكم يا شباب
عارف يا بشير بكون ناذر ده سيف من قال كشحوه كف كسروا ليه نضارته لوووووووووولز ما شايف صورته في البروفايل لي يوم باكر نضارته مخربشة يا ربي يكون خربشها الجريو
ناذر كيفك ياخ والله جعلت من يومي مسرحية من الزمن الجميل والله قصة تحفة تحفة تحفة انت عارف انا بتوقع انك الزول الشتموه في صمة خشمو وجاي ساكي حقو لووووووووووولز أو احتمال حسن زي ما قالوا ليك الجماعة فوق
واكتر تحليل انك حسن صاح لكن تحليل بشير ود عمي جبريل جاء كشح كل شي في السهلة لووووولز احتمال يكون حسن جاء حكى ليك او اعترف فيما بعد بعد الجرجرة دي كلها غايتو زي ما قلت السودانيين بحبو الجرجرة والمطمطة زيك كدة برضو في قصصك لينا بالاضافة للشمار زينا نحن كدة حارسنك وروحنا محرقانا لووووووووولز
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: بريمة محمد)
|
ياااناااادر هسى انا شماار جاانى حاااار انو الرااجل صااحب الجريو دا من دينكا ابييى وقرر يشيل الجريو بتااعو عشااان مشتت من البلد دى فى شاان قصة الانفصال بتاعة السياسيين دى وصاادف انو مررتو مسيرية ومختلفه معااهو حول ملكية جرييو الجن دا ووكيل النياابة الفتح البلاغ فى القضية مشى الحج وعندو اجااازة ما بيرجع الابعد فبرايير الجااى اهاا تاانى تحت تحت قالوا رجل الاعمال حامدعندو نسيبو فىاللجنة بتااعة الترسييم بتاعة ابييى وحاالفين ما تتحل قصة الجرييو دى الاستفتاء دا ماا بقووووم
اها هسى الجرييو دا اكاان الانفصاال دا حصل تبع ووين بيكوون الجرييو تبع يااتووووو بلد
قبل مااقفل قاللو جااء هسى تاانى ادروووب وحلف بتااجوج انو ابو الجرييو دا جاابو معااهو كسلا ومافى واالد بيفرط فى جنااهو بالساااهل
بس عليك الله ياانااذر والرسوول فى الدرب نزل صورة الجريو هنااا
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
سلام يا ناذر وضيوفه الكرام
يا ناذر، نسيت حاجة مهمة جداً ليه ما صورت "الجريو"؟ بي موبايلك؟ وحقو برضو تصور لينا السور بتاع ناس سيف أبو نضارات
وبالمناسبة يا ناذر إنت : 1) ماممكن تكون سيف لأنو سيف عزابي وأهلو في الخليج 2) وبرضو ما ممكن تكون علي، لأن علي عزابي وساكن مع أهلو. 3) وما ممكن تكون حسن، لأن حسن شافع صغير 4) وما ممكن تكون حامد، لأنك ما رجل أعمال مشهور 5) وما ممكن تكون الغفير من البداهة 6) وما ممكن تكون الضابط، لأنك لست شرطي 7) ومن البداهة ماممكن تكون الجريو لوول 8) فإنت احتمال كبير تكون الزول النبزوهو دا
تحياتي
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
سلام يا ناذر وضيوفه الكرام
يا ناذر، نسيت حاجة مهمة جداً ليه ما صورت "الجريو"؟ بي موبايلك؟ وحقو برضو تصور لينا السور بتاع ناس سيف أبو نضارات
وبالمناسبة يا ناذر إنت : 1) ماممكن تكون سيف لأنو سيف عزابي وأهلو في الخليج 2) وبرضو ما ممكن تكون علي، لأن علي عزابي وساكن مع أهلو. 3) وما ممكن تكون حسن، لأن حسن شافع صغير 4) وما ممكن تكون حامد، لأنك ما رجل أعمال مشهور 5) وما ممكن تكون الغفير من البداهة 6) وما ممكن تكون الضابط، لأنك لست شرطي 7) ومن البداهة ماممكن تكون الجريو لوول 8) فإنت احتمال كبير تكون الزول النبزوهو دا
تحياتي
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: محمد سنى دفع الله)
|
سيخ طويل :
Quote: ياااناااادر هسى انا شماار جاانى حاااار انو الرااجل صااحب الجريو دا من دينكا ابييى وقرر يشيل الجريو بتااعو عشااان مشتت من البلد دى فى شاان قصة الانفصال بتاعة السياسيين دى وصاادف انو مررتو مسيرية ومختلفه معااهو حول ملكية جرييو الجن دا ووكيل النياابة الفتح البلاغ فى القضية مشى الحج وعندو اجااازة ما بيرجع الابعد فبرايير الجااى اهاا تاانى تحت تحت قالوا رجل الاعمال حامدعندو نسيبو فىاللجنة بتااعة الترسييم بتاعة ابييى وحاالفين ما تتحل قصة الجرييو دى الاستفتاء دا ماا بقووووم
اها هسى الجرييو دا اكاان الانفصاال دا حصل تبع ووين بيكوون الجرييو تبع يااتووووو بلد
قبل مااقفل قاللو جااء هسى تاانى ادروووب وحلف بتااجوج انو ابو الجرييو دا جاابو معااهو كسلا ومافى واالد بيفرط فى جنااهو بالساااهل
|
مبالغة دي بقت فيلم طويل ...
تعرف في فلم هندي مبالغة أنتج بغرض السلام في 2001 .. الفلم من بطولة أميتاب باتشان و نانا باتيكر .. القصة بتدور في الحدود الهندية الباكستانية .. عصابات باكستانية أغارت على قرية هندية وخطفت طفل صغير هو توم لي واحد تاني ورجعوا بيهو باكستان .. الحصل إنو الفي باكستان بعد كبر دخل الجيش وإنضم للمخابرات الباكستانية والفي الهند برضو دخل الجيش وإنضم للمخابرات الهندية .. طبعا بيتلاقو في الصدامات البتحصل في الحدود بين الجانبين .. الفي الهند عارف إنو في أخوهو زمان خطفوهو ودخلوا بيهو باكستان .. والفي باكستان الزول الخطفوا قبل ما يموت وراهو إنو هندي وإنو عندو توم في الهند .. التيمان الإتنين عندهم وشم مشترك في صدرهم .. غايتو بعد كم صراع وخبيت كدة بين الإتنين الفي الهند شرط لي داك قميصو وشاف الوشم وعرفو إنهم أخوان ..
غايتو بعد داك القصة إتحولت لي السلام بين البلدين بإستخدام قصة الاخوين ديل ...
أها يا سيخ .. إتخايلي ممكن ننتج قصة زي دي باستخدام السيناريو بتاع أبيي دا ...
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ساميه حامد)
|
سلام النذير ..
Quote: يا ناذر، نسيت حاجة مهمة جداً ليه ما صورت "الجريو"؟ بي موبايلك؟ وحقو برضو تصور لينا السور بتاع ناس سيف أبو نضارات
|
إنشاء الله الصورة تنزل الليلة ..
Quote: وبالمناسبة يا ناذر إنت : 1) ماممكن تكون سيف لأنو سيف عزابي وأهلو في الخليج 2) وبرضو ما ممكن تكون علي، لأن علي عزابي وساكن مع أهلو. 3) وما ممكن تكون حسن، لأن حسن شافع صغير 4) وما ممكن تكون حامد، لأنك ما رجل أعمال مشهور 5) وما ممكن تكون الغفير من البداهة 6) وما ممكن تكون الضابط، لأنك لست شرطي 7) ومن البداهة ماممكن تكون الجريو لوول 8) فإنت احتمال كبير تكون الزول النبزوهو دا
|
وجهة نظر برضو ..
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
نواصل يا شباب ...
قلنا سيف ركب مع السرية المتحركة عشان يجيبو الجريو وعلي وأولاد الحلة منتظرين في القسم حامد رجل الأعمال يجي هناك وطبعا منتظرين سيف على أمل يصلو لي تسوية .. حسن برضو جا القسم يشوف الحصل شنو ..
حامد رجل الاعمال وهو طالع مستعجل قابل أبوهو محمد حسين ..
محمد حسين : ماشي وين يا حامد ؟ حامد: ماشي القسم يا أبوي .. سيف فتح فيني بلاغ وهسي هم دايرني هناك ؟! محمد حسين : الولد دا ما نصيح ولا شنو ؟بلاغ شنو في حاجة فارغة زي دي ؟! حامد : كدي أنا ماشي أشوف الحاصل .. محمد حسين : دقيقة النمشي معاك ...
وهم طالعين قدام البيت فجأة كدة يجو نسايب حامد .. سلام كلام وإتفضلوا وإتونسوا .. حامد من بعيد يشوف عربية الدورية جاية عليهو .. حامد طبعا إفتكرم ديل ناس القسم جايين يقبضوهو .. طبعا منظرو شين جدا حا يكون قدام نسابتو .. قبل ما يتحرك أو يفكر في حاجة عربية الدورية كانت قربت منهم ..
طبعا سيف راكب مع العساكر بي ورا .. أول ما شاف حامد دق جرس :
سيف : يا هو دا يا جماعة أنزلوا أقبضوهو !! عسكري : الجريو ؟ حامد : لا لا ياخ دا الزول الضربني وقف العربية وأرفعوهو عشان يتأدب ..!! عسكري : ما ممكن نقيف نحن ماشين بي تعليمات محددة نجيب الجريو ما نجيب حامد دا .. الوكت دا عربية الدورية قربت شديد لي حامد وأبوهو ونسابتو وسيف يصرخ ويعلي في صوتو :
سيف : يا خي عليكم الله وقفوا العربية دي وأرفعوا الزول دا ..! العسكري بي نهرة : إنت يا ملكي داير تعمل لينا مشاكل ولا شنو .. ! أرح جيب لينا الجريو وخلاص ..!
الوكت دا العربية خلاص دايرة تتجاوز ناس حامد .. وسيف فقد الامل لكن ما فقد تشنجو فقعد يكورك بي صوت عالي :
ليك يوم يا حامد هسي بنلف ونجيك نرفعك والجريو بتاعكم دا تشموهو قدحة بعد دا (طبعا الصوت بيتلاشى تدريجيا مع سرعة العربية) ..
حامد كبى عرق للطيش .. ما فضل إلا يتبخر ..!!
واحد من نسابتو : الحاصل شنو يا حامد ؟! دا منو وقصة الجريو دي شنو ؟! حامد وهو بيمسح في العرق : ما عارف دا واحد سكران ساي بيكون .. جريو شنو وقدحة شنو ؟! واحد من نسابتو : لكن الزول دا ناداك بالإسم ؟ حامد وهو بيحاول يبتسم : إنت ما عارف الشهرة متاعب ..!!
حامد إستأذن من نسابتو وخلى أبوهو معاهم ودور مشى على القسم بي سرعة .. هو ما عارف الدورية دي ماشة وين لكن العارفو إنو لو الدورية جات راجعة سيف حا يشيل حسو تاني .. كفاية ناس الحلة كلهم سمعو سيف وهو بيكورك ..
حامد طبعا ما عارف إنو الفصيلة ولا السرية دي ماشة تجيب الجريو ..!
وكمان أكيد ما عارف إنو القدر لمن يجيب الحاجات مع بعضا كدة ممكن يكتل ليو زول ..!!
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
شكرا يا ناذر
تابعنا قصة الجريو وزهجنا من التطويل وقربنا نقول ليك يلعن ابو الكـــلاب ذاتو!
لكن بإهدائك لنا حكمة ( كل بت غزال أخوها أسد) غيرنا المود وضحكنا لمن سالت
دموعنا على صاحبك، والظاهر عليه كان يتمرن لتحمل هذا الجمباز القاسي، وأنصحك
يا ناذر ( البباري الجداد بودي التندل) يعني الكوشة أو الزبـــالة ( بلهجة أولادنا)
وعشان تمشي ( الكــوشة)، لازم تأخذ دورة فض نزاعات متخصصة. فيها طبعا كم مسكة مميزة،
وكم زوغة من بنية مدنكلة، و تحمل شلوت ما مقصود، والحجاز دمو قريب.
واصل ياخي..... والله أهنئك، تلم في محبة الناس ساكت بحكاويك دي.
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
Quote: يا جماعة أنا خايف من حاجة واااحدة والله واحد إنو سيف الدين شكاوي دا، يعرف إن ناذر كتب عنو في سودانيز أون لاين، ويقوم يفتح فيهو بلاغ، ويكتبو تعهد إنو يمسح القصة دي من البورد قبل ما يكملها لوول |
يا النزير ....
سيف غايتو ما أظنو عرف لأنو في اللحظات دي واليومين دي هو مشغول بالمنافسة مع حسن على :
منو البيحمي الجريو ويديهو اللبن والأكل ومنو البيصل للجريو أول ؟!
حا تقول لي هو الجريو وينو وقاعد وين مش ؟!
أقول ليك الجريو مربوط في حوش القسم بتعليمات من الضابط اللئيم داك لحدي ما الموضوع يتحسم .. وطبعا لا حسن لا سيف بيثقوا في العساكر يعتنوا بي الجريو كويس .. عشان كدة هم متنافسين على الإعتناء بالجريو أكلو وشرابو وحمامو والجريو أخر دلع اليومين ديل ..!!
بس المشكلة الحصلت إنو قبل كم يوم القدر (الأنا قلت ليكم يوم بيكتل ليهو زول) صدف إنو حسن وسيف جو في وكت واحد .. دا شايل لبن ودا شايل لحم وحصلت الكيتة ..
لو بتحبونا تابعونا ...!!
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: هشام حسن)
|
حامد ..
Quote: لو ما تميت القصة دى بكرة انشاء الله حاقول للناس دى انت منو
حامد
واصل...متابعين |
روق المنقة يا خي وما توهم الجماعة ساي .. لأنو حامد الحقيقي بتاع القصة الايامات دي مبطل كل أشغالو واعمالو ومتفرغ تماما للبوست دا وكل ساعة بيضرب لي تلفون يعلق ويضيف والضحك شارطو .. وكمان في حاجة تانية ..
أنا كنت مستغرب على عدد الزوار الكبير للبوست لكن عرفت من حامد إنو فرض على كل موظفينو في شركاتو ومصانعو يقرو البوست دا ويتابعوهو بعد ما رسل ليهم الرابط وإلا حا يخصم منهم مرتب تلاتة أسابيع ..!!
حلتك حرقت يا صاحبي ..!!ههههه
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
بت الهنا ..
Quote: قال اسي بكتب ليكم من مطار الخرطوم يعني نظام لاب توب و فلاش سوداني و سفر و طيران و كده
|
لا لا بتوب لا فلاشات لا بطيخ ..!
إنتي الظاهر طولتي من مطار الخرطوم ..
مطار الخرطوم بقى فيهو كمبيوتراااات وإنترنييتاااات وحاجات كتيييييرة متطورة ..
أي نعم هم كلهم تلاتة بس خاتينهم في صالة المغادرة وكمان خاتينهم في حتة عالية ومن غير كراسي .. يعني الزول يستعملم وقافي لإنعدام الكراسي .. ودا لانهم عارفين الزول بيتعب من الوقوف فأكيد حا يستعمل الجهاز خمسة دقائق ويخليهو لي غيرو وبي كدة ممكن الصالة الفيها تلتمية مسافر يستعملو التلاتة أجهزة دي بي كل سهولة ويسر ..!!
دا كلو من سياسة التقشف البقت علينا دي ..!!
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: اميرة السيد)
|
Quote: غايتو يا الجريو اللقيتا.. مافي زول لقاها.. جزء من مداخلة مداخلة في بوست آخر في البورد.. تشير إلى موضوع الجريو.. وحديث سلفاكير للصحفية رفيدة ياسين.. وموضوع نشر شريط الحوار من عدمه..
Quote: فلماذا لا ينشر الشريط وهو حل منطقي وبسيط لا يوجد ما يمنع من نشر الشريط طالما تم النشر الصحفي
الا غايتو كان بقت زي قصة الشفت القال انا سجلت المكالمة في قصة الجريو البهناك ديك وطلع هو كذاب ساكت
رفيدة ياسين ليست باحثه عن شهره هل يوجد فى مكتب سلفاكير محجوب فضل بدرى اخر |
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: حماد الطاهر عبدالله)
|
أها يا جماعة ...
المشهد هنا حا ينقسم لي إتنين .. يعني إتخيلو شاشة تلفزيون فيها مشهدين مختلفين .. المشهد الاول حامد وهو طالع من بيتم وماشي على القسم .. وقف عربيتو جمب القسم وقعد يتناقش مع أخوانو وأولاد النادي بي برة قبل يخش على الضابط .. وفي المشهد التاني عربية الدورية وقفت قدام بيت سيف ونزل منها سيف عشان يجيب الجريو ..
المشهدين ديل في نفس الوكت .. كدي نشوف البيحصل مع سيف أول ..
عسكري : بالله ما تعطلنا سريع سريع كدة إتناول الجريو دا وتعال .. سيف : أدوني خمسة دقائق بس ..! عسكري : ليه خمسة دقائق ..؟! داير تجيب شنو إنت أصلك ؟!.. سيف : يا اخوانا حاولوا أفهموني .. الجريو دا ######ان ليهو فترة طويلة .. وبالطريقة دي حا يقرد (يجيهو قراد) ..بس فرصة كدة أحميهو سريع وأجيبو ..! والله ما بياخد معاي زمن ..!! العسكري : خلاص سريع بديك دقيقتين بس ..
سيف جرى على الجريو كابسو وجرا بيهو الطشت خلى العساكر في العربية برا ينقرضوا : الود دا ما كويس ولا شنو ..! والله نحن الما كويسين المبارين موضوع فارغ زي دا .. لكن يا جماعة الزول دا كلامو صاح الجريو لو مليان طين بيقرد وأنا زمان كان عندي جريو .. داير يمسك بي الجماعة زمن قهموهو وسبوا ليهو زي سب حسن داك وسكتوهو ..!!
نخلي المشهد دا علي كدة ونشوف الحصل شنو بي هناك مع حامد .. حامد جا داخل القسم أول ما شافوهو العساكر والمباحثية طوالي شبكوهو ليك كلام وسلام وشرفت القسم ومش عارف إيه مع إنو ديل نفس الجماعة الإتلموا قبل شوية وكانوا ما شين يرفعوهوا في البوكس بتاع الدورية ..
حامد جاملم ودخل على الضابط
حامد : السلام عليكم يا سعادتك .. الضابط : وعليكم السلام يا باشا إتفضل شرفت القسم .. حامد : الأخبار شنو والقصة شنو يا سعادتك ؟! الضابط : والله جانا المواطن سيف دا هنا وبلغ قال إنت ضربتو وإتعديت عليهو بي سبب جريو ..! حامد : فعلا حصلت بينا مشاجرة يا سعادتك لكن ضربتو وضربني زي البيحصل في أي شكلة .. الضابط : هو قال إنت سببت ليهو الأذى الجسيم وشال أورنيك تمنية ..! حامد : يا خي هو في أذى جسيم أكتر من العملو قبل شوية ؟! الزول جا في نص الحلة يكورك من عربيتكم عمل لي فضيحة ياخي ..! الضابط : هم جوك بي هناك ولا شنو ؟! حامد : جو مارين قدامي .. هم ماشين وين سعادتك ؟! الضابط : ماشين يجيبوا الجريو سبب الشكلة ..! حامد : طيب هسي البيحصل شنو ؟! الضابط : البيحصل إنك حا تكون معانا في الحراسة لحدي ما يجينا الاورنيك دا ..! حامد : معقولة بس ؟! الضابط : دا القانون كدة ؟! حامد : إنت سمعت الشهود القاعدين برة ديل ؟ الضابط : أيوة سمعت كلامم وعرفت القصة ..! حامد : هسي يرضيك بي سبب موضوع فارغ زي دا أخش الحراسة وإتبهدل كدة ؟!
الضابط نادى الناس البرة بتاعين النادي وأخوان حسن يتشاوروا وكلهم أجمعوا إنو الموضوع فارغ وما بستاهل .. وكل اليحصل إنو سيف دا يجي ويدي حسن الجريو بتاعو ويتنازل عن البلاغ وينتهي الموضوع على كدة ..
الضابط : ما عندي مشكلة لو سيف جا وإتنازل .. خلوهو يجي في الأول ..
يلا أرجعاكم معاي لي سيف بي هناك ..
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
سيف جا طالع من البيت مستعجل ويدو مبلولة موية ..
عسكري : وينو الجريو يا زول ؟! سيف : معليش يا جماعة حا أخد من زمنكم شوية .. واصل الدكان القريب دا أجيب لي صابون بدرة واجي ..! عسكري : إنت راسك ما حلو ولا شنو ؟! إنت قايلنا فاضين ليك ولي جريوك دا .. جيب الجريو دا كدة بي حالتو دي ..! سيف : يا جماعة والله ما حا أأخد زمن .. ولو خايفيني إتأخر أرحكاكم معاي بي عربيتنا دي ونجي ..
(لا حظوا لي عربيتنا دي) ..!!
طبعا العساكر دقوا جرس وهاجو وقهموا سيف .. خلوهو يقوم جاري جوة الحوش يلفح الجريو ويجي يركب ..!!
العربية متحركة والجريو حموهو قبل شوية ضارب الترطيبة وشابك العساكر (هيو .. هيو ... هيو) قايل روحو ماشين يفسحوهو والعساكر كلهم بيحمروا للجريو واظن اي واحد فيهم كان متمني يرفع بوتو اللابسو فوووووق وينزلو فوق راس الجريو وينتهوا من القصة دي ..!
الوكت دا نسابة حامد جو ماشين وأبو حامد محمد حسين جا طالع يودعم قدام البيت .. العربية قربت من قدام البيت .. أبو حامد أول ما شاف العربية طوالي خاف من البيحصل .. سيف كحل أبو حامد دقى جرس في العربية .. يا هو دا أبو الزول الضربني يا جماعة أرفعوهو معانا برضو عشان ولدو يجينا .. العسكري قال لي سيف .. يا ود إنت مجنون .. هو الرفع دا سااااهل كدة .. أي زول تقول أرفعوهو في العربية نرفعوا ليك ؟! حامد : يا أخوانا والله العظيم دا أبو الناس الإتشاكلت معاهم ولو ما مصدقني أقيفوا أسألوهو .. العسكري نهر ليك سيف وسكتوا لكن سيف ما سكت قعد يكورك : والله يا حاج محمد .. حامد دا إلا يرحل من الحلة دي .. أنا وراهو والزمن طويل وصل ليهو الكلام دا يا حاج ؟! .. وراهو والزمن طويل .. وراك والزمن طويل يا حامد ..وطبعا كلامو بيتلاشى براحة براحة مع سرعة العربية والجريو شغال ليو موسيقى تصويرية (هيو .. هيو .. هيو) .. زي التقول بيهدد ويتوعد مع سيف ..!
ابو حامد كبى عرق وما فاضل ليهو إلا يطير ..!!
واحد من النسابة : إنت يا حاج دا مش ياهو السكران بتاع جبيل زاتو ؟! محمد حسين يرص حرف ويفط حرف : الظاهر هو زاتو .. النسيب : مالو الزول دا معاكم ..؟! محمد حسين : معانا نحن ؟!!! ما بنعرفو وما عندنا بيهو علاقة ..! النسيب : جاب إسم حامد عدييل وإتكلم معاك مباشرة بالإسم .. محمد حسين : بيكون مشبهنا ساكت .. المهم والله شرفتونا وما قصرتو ونجيكم عما قريب .. وأمشوا ما أأخركم عشان مشواركم بعيد ..
محمد حسين كلفت ليك النسابة وركبم العربية سريع وزوغ منهم الكلام وجا داخل البيت عيونو زي الشرار من الزعل .. إتناول العمة حقتو وجا طالع دور عربيتو ويا القسم جاك زول ..!!
بعد شوية كل الأطراف في القسم ..حامد .. سيف .. علي .. حسن .. أبوهم .. الجريو .. الزول النبذوهو .. باقي أولاد النادي ..
يعني ما فضل إلا يجيبوا النادي زاتو ..!!
| |
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: اميرة السيد)
|
يا جماعة رايكم شنو في كلام أميرة دا ؟:!!
Quote: يا ناذر عاوزين منك خدمة بسيطة ممكن تكتب لينا القصة كلها في بوست واحد باختصار وبعدين تجي تفصل بالتفصيل الدقيق
|
أنا ما فارقة معاي باقي القصة والحصل بعد داك ممكن أنتهي منو في تلاتة سطور بالكتير بدون تفاصيل ..!!
لكن كدة في حاجات كتيرة بتضيع .. ومحمدالسني دفع الله حا يضطر يشوف ليهو زول تاني يكتب السيناريو ..!!
وأنا زااتي برتاح من التلفونات والإيميلات والماسنجرات الكتيرة البتضغط على إكمال القصة ..!!
رايكم شنو يا جماعة ؟؟؟!!!
| |
|
|
|
|
|
|
|